27/08/2026
بابەتی گەرمی بەڕێز مەزڵوم عەبدی
لای هەمووان ڕوونە لە یەكەم ڕۆژی ڕاپەڕینی گەلانی سوریا دژی ستەمی بەعسیەكانی سوریا هەڤاڵ مەزڵوم عەبدی و هەڤاڵەكانی ڕووبەڕووی ئەركێكی قورس بونەوە ، كە بەرگری لە كۆمەڵ كوژی و لە ناوبردنی كوردانی ڕۆژ ئاوا بوو.
ژیرانە شەڕی تیرۆرستانیان كرد و خۆیان لە شەڕی ڕژێمی سوریا لادا هەرچەند بە بەرچاوی جیهانەوە قەتڵ و عامی عفرین و سەریكانی و چەندینی تر كرا و جگە لە هەسەدە و هێزە كوردیە دۆستەكان كەس نەهاتە مەیدانی ڕووبەڕوو بونەوە.
لەسەر و بەندی ڕوخاندنی ڕژێمی بەشار ، گۆڕانكاری سیاسەتی نێودەوڵەتی ، بارودۆخێكی پڕ مەترسی بۆ هەسەدە و دەسەڵاتی خۆ سەری و كوردانی ڕۆژ ئاوا هاتە پێش و توشی شەڕێكی نەخوازراوی نا بەرامبەر بوون.
دەبوو لەم قۆناغەشدا مەزڵوم عەبدی و هەڤاڵەكانی بە بەخۆدا چونەوەی هەڵەكان و تێگەیشتن لەو بارودۆخە تازە هەنگاوی نوێ بنێن چۆن گەل و خۆیان لە مەترسیە گەورەكان ئەپارێزن ئایە هێزەكانی هەسەدە و بەڕێوبەری خۆ سەری شەڕی خۆ كوژی و ماڵ وێرانی گەل هەڵبژێرن یان خۆ لادان لە شەڕێكی نەخوازراو ، ئایە كێ پشتیوانی مادی هێز و بەڕێوبەری دابین بكات ، ئایە كێ بەر لە چاو چنۆكی تورك و بە كرێ گیراوەكانی بگرێت ، ئایە خۆ لادان لە شەڕێكی نەخوازراو و بیانوی لەشكر كێشی تورك و جۆلانی باشترە ، یان شەڕێكی ماڵ وێرانكەر؟
ئایە دەستكەوتی مافە سەرەتاییەكان و پاراستنی هێزەكەیان لە سوپای سوریا باشترە ، یان ئینكاری لە ماف و بێبەش كردنی براكانمان لە ڕۆژ ئاوا ، ئایە جەنگ لە پێناوی ئاشتیە یان جەنگ لە پێناوی جەنگە؟
ئایە ئەو سەركردە و فەرماندانەی زیاد لە ١٧ ساڵە لە مەیدانی شەڕدان و ژیانێكی قورسیان تێپەڕاند باشتر لە واقعی خۆیان تێدەگەن یان قسەی سەر مێز و واڵی سۆشیال میدیا ئایە پەند وەرگرتن لە هەڵەكانی ڕابوردوو ژیری نیە؟
خۆزگە سەركردایەتی كورد لە باشور نە ١٩٧٤ شەڕی بكردایەتەوە و نە ١٩٨٥ گفتوگۆی بەجێ بهێشتایە.
لانی كەم نە توشی كارەساتی ئاشبەتاڵ و نە توشی دەر ئەنجامی شەڕكردنەوەی دوای گفتوگۆی ١٩٨٤ دەبوین.
بیرمان نەچێت هەڵەی سیاسی میلەتێك لەناو دەبات بە پێچەوانەشەوە لە لەناو چون دەپارێزێت.
تكایە با لە شوێنی نەرم و گەرمەوە بڕیار نەدەین سێری واقع بكەین.
