05/08/2019
ڕۆڵی راستەقینەی راگەیاندن لە تەنگژە سیاسییەكان دەردەکەوێ !!...
رۆڵ و بەرپرسیارێتی دەزگاكانی راگەیاندن، لەكاتی هەبوونی پشێویی و جەنگ و تەنگژە سیاسییەكان دەردەكەوێت، چونكە میدیاكان دەتوانن كاریگەریی گرنگ لەسەر سایكۆلۆژیای جەماوەر بەجێبهێڵن و پێیاندەكرێ ، لە چارە سەریی تەنگژە سیاسییەكان و بنیادنانی ئاشتی، كاریگەری گرنگیان هەبێت، ئەویش لەرێگای خستنەڕووی چەندین پێشنیاری هێوركەری هاوبەش و پێویست، بۆ پرسە نیشتیمانی و نەتەوەییەكان، كە دەكرێ دەزگا میدیاییەكان بیانكەنە كلیلی چارەسەر بۆ كێشەو قەیرانەكان . ناوەندە میدیایییەكان لەناو كۆمەڵگە دەتوانن لە دروستكردنی رای گشتیی رۆڵێكی گرنگ بگێڕن، كار بكەن بۆ دورستكردنی رای گشتی لەسەر بابەتێك یاخود لەپێناو روبەڕووبونەوەی دیاردەیەك، یا دروستكردنی كۆدەنگییەك بە ئاراستەی چارەسەركردنی كێشەكان . ئەمڕۆ بەرپرسیارێتی بۆتە پێوەری كاری رۆژنامەوانی دروست و سەركەوتوو، وا باشە ئەركی لەپێشینەی میدیاكان بكرێتە ئامرازی پاراستنی ئاشتی و ئاسایشی كۆمەڵایەتی، بۆ سەركەوتن و پەرەپێدانی پیشەی بەرپرسیارێتی رۆژنامەوانی، واپێویست دەكات كە كارمەندەكانیان رابهێندرێن لەسەر گرنگی پاراستنی ئاسایشی نەتەوەیی و كۆمەڵایەتی، تا زیاتر رۆڵیان هەبێ لەسەر پەروەردەكردنی راگەیاندنكاری تەندروست و پێویست . راگەیاندن بە گشتی لە كاتی قەیران و گرفت، هەلێكی زۆری لەبەردەمدایە، جگە لەگەیاندنی زانیاری و رووماڵی رووداو و هەواڵ بەشێوازێكی راستگۆیانەو دوور لە لایەنگریكردن، دەكرێ كار لەسەر هۆشیاری سیاسی و كۆمەڵایەتی و پەروەردەیی و فەرهەنگی بكات، بە ئەركی پیشەیی خۆی هەڵبستێت، رۆلی دووڕوویی و گومان دورستكردن و پیلانگێڕی نەبینێت، لای بینەرو گوێگرو خوێنەر بێزراوو قێزەون دەرنەكەوێ . ئەمڕۆ چەند دەزگا لە راگەیاندنەكانی هەرێم لە قەیرانی قوڵدان و پیشەییانە كارەكانیان ئەنجام نادەن، بۆ بەرژەوەندی حزبو مزایەدەی سیاسی رۆڵی خراپ دەبینن لە بەشبەشكردنی كۆمەڵگە، هەندێ كەناڵی راگەیاندن و هەندێ راگەیاندنكار، نەزانانە بێت یا بەمەبەست لە خزمەتی ئەجێندای دەرەكین، كێشەی كوردو مەسەلە نەتەوەییەكان لە كەناڵەكانیان بێبایەخ نمایشدەكرێ، بەوەش ناوەستن لەڕێگەی میدیای بەناو ئازادو سێبەر ژەهری دوژمنكاری دەڕێژن . لەگەل سەرهەڵدانی تەنگژە سیاسییەكانی هەرێم، ئەركی دەزگاكانی راگەیاندن چاوەڕوانی ئەرك و بەرپرسیارێتی زۆری لێدەكرا، پێویست بوو هەوڵی زیاترو هیمەتی بەردەوامیان بكردایە بۆ كاراكردنەوەی حكومەت و پەرلەمان و گێڕانەوەی سەروەری یاسا، نەك پەنا بردنە بەر شكاندنی یەكتری و دەست بردن بۆ پیرۆزییە نیشتمانییەكان و هەڵدانەوەی لاپەڕەی قێزەوەن و رۆل بەخشین بەهەندێ ئەكتەری نایاسایی و ناسیاسی و گوماناوی بۆ پشتڕاستكردنەوەی درۆ و بۆچوونە قێزەوەنەكانیان، چونكە ئەوە میدیایە دەتوانێت بۆ تێكدان و بونیادنانی ئاشتی و ئاشتەوایی كۆمەڵایەتی بخرێتەگەڕ، وەك دەزانرێت میدیا لەزۆر حاڵەتدا رۆڵی سەرەكی دەگێڕێ لەسەر دروستكردنی بڕیاری سیاسیی دروست، ئەوەش بەهۆی ئەو كاریگەرییەیە كە لە دروستكردنی رای گشتی هەیەتی.
تیمی :
ڕاگهیاندن و ڕوناكبیری
پارتی دیموكراسی و دادپهروهری
ئهوروپا
