01/09/2026
ڕاگەیاندنى بەڵگەنامەى سەکۆى سێلایەنەى نێوان حکومەتى هەرێمى کوردستان و خاوەنکار و کرێکاران
ئەمڕۆ سێشەممە 1ـی ئەیلوولی 2026 بەڵگەنامەى سێلایەنە لەنێوان حکومەتى هەرێمى کوردستان؛ وەزارەتى کار و کاروبارى کۆمەڵایەتى، و ژوورەکانى بازرگانى و پیشەسازیی هەرێم و یەکێتیی بەڵێندەرانى کوردستان وەکو لایەنى خاوەنکاران، و سەندیکاکانى کرێکارانى هەرێمى کوردستان وەکو نوێنەرى کرێکاران، واژوو کرا.
لە ڕێوڕەسمێکى تایبەتدا لە شارى هەولێر، بە ئامادەبوونى خاتوو کوێستان محەمەد وەزیرى کار و کاروبارى کۆمەڵایەتى و بەڕێز مەریوان بەگۆک عەزیز بەڕێوەبەرى گشتی کار و دەستەبەرى کۆمەڵایەتى، بەڕێز گەیلان حاجى سەعید سەرۆکى ژوورەکانى بازرگانى و پیشەسازیی هەرێم، بەڕێز ڕزگار جەمال کەریم سەرۆکى یەکێتیی بەڵێندەرانى کوردستان و بەڕێز هەنگاو عەبدوڵڵا خان سەرۆکى سەندیکاکانى کرێکارانى هەرێمى کوردستان و نوێنەرانى ڕێکخراوى کارى نێودەوڵەتى (ILO)، بە پاڵپشتیی یەکێتیی ئەوروپا بەڵگەنامەی دامەزراندنی "سەکۆی گفتوگۆی کۆمەڵایەتی سێلایەنە" لە هەرێمی کوردستان واژوو کرا.
ئامانجی ئەم سەکۆیە چەسپاندنی بنەماکانی گفتوگۆی بنیاتنەر و هاوئاهەنگییە لە نێوان سێ لایەنی سەرەکی (حکومەت، خاوەنکاران و کرێکاران)، ئەم سەکۆیە وەک "ئەنجوومەنێکی ڕاوێژکاری" کار دەکات و تیشک دەخاتە سەر پڕۆژە یاساکان، سیاسەتەکانی کار و بەرنامە ستراتیژییەکانی تایبەت بە باشترکردنی ژینگەی کار، بۆ دابینکردنی بڕیاری زانستی و هاوسەنگ، سەکۆکە سوود لە کەسانی پسپۆڕ و شارەزا وەردەگرێت و لەژێر سەرپەرشتی و چاودێریی ڕاستەوخۆی وەزیری کار و کاروباری کۆمەڵایەتی دەبێت، هەروەها سکرتاریەتێکی تایبەت ئەرکی ڕێکخستنی کۆبوونەوە و کۆنووسەکان لە نێوان هەر سێ لایەن دەگرێتە ئەستۆ.
لە کۆتایی ڕێوڕەسمەکەدا کۆنگرەیەکی ڕۆژنامەوانی بۆ هەریەک لە بەڕێزان وەزیری کار، بەڕێوەبەری گشتی و سەرۆکی سەندیکای کرێکاران ڕێکخرا، تێیدا بەڕێزان وەڵامی پرسیاری ڕاگەیاندنکارانیان دایەوە و جەختیان لەسەر ئەوە کردەوە کە ئەم سەکۆیە دەبێتە قەڵغانێک بۆ پاراستنی ماف و بەرژەوەندییەکانی کرێکاران و خاوەنکاران پێکەوە، و ڕۆڵێکی کاریگەر دەبینێت لە پەرەپێدانی ئابووریی هەرێمی کوردستان لە ڕێگەی گفتوگۆی نیشتمانییەوە.
ڕاگەیاندنی بەڕێوەبەرایەتی گشتی کار و دەستەبەری کۆمەڵایەتی.
