24/06/2026
Kæru vinir Viðreisnar á Akureyri!
Við erum hvergi af baki dottin þrátt fyrir að úrslit sveitarstjórnarkosninganna í maí 2026 hafi ekki farið eins og við lögðum upp með. Við fórum stórhuga inn í kosningabaráttuna með háleit markmið og af því er engin skömm.
Kosningabaráttur snúast um að ræða við fólk og þökkum við kærlega öllum þeim fyrirtækjum og stofnunum sem tóku á móti okkur, samtölum sem við áttum við töfluna góðu og búum nú vel að góðu og sterku tengslaneti. Það er mikill kraftur í Akureyringum, en að okkar mati þurfa Akureyringar að láta heyrast hærra í sér - ganga fram með brjóstkassann út og vera óhrædd við kastljósið. Hér fer fram mikil verðmætasköpun, fyrir svæðið og landið allt og af því eigum við að vera stolt.
Síðustu vikur hafa félagsmenn Viðreisnar á Akureyri velt vöngum yfir því hvaða hlutverk við viljum taka að okkur til næstu ára og byggir það helst á þremur stoðum:
1 - Aðhald gagnvart bæði meirihluta og minnihluta bæjarstjórnar. Það gerum við með því að mæta á opna fundi, spyrja gagnrýnna spurninga og koma hagsmunum heildarinnar á framfæri í gegnum fyrirspurnir og greinaskrif.
- Vekja áfram athygli á málefnum sem eru okkar hjartans mál. Af öllu svæðinu á að vera best að búa á Akureyri og er það samvinna yfirvalda og fyrirtækja að svæðisborgin Akureyri sé þungamiðja nýsköpunar, velsældar og vaxtar. Það er gott að ala upp börn á Akureyri en það á að vera frábært. Hér eiga öll börn að finna fyrir uppbyggilegu og stuðningsríku umhverfi, hvort heldur í skólakerfinu eða í tómstundum og fjölskyldur eiga geta gengið að framúrskarandi grunnþjónustu. Sveitarfélagið hefur verið vel rekið síðastliðinn ár en við skorum á yfirvöld að fara í innri skoðun á verkefnum stjórnsýslunnar og verkferlum með tæknilausnir í huga. Tími gervigreindar er runninn upp.
3 - Að vera talsmenn Akureyrar gagnvart Alþingi. Við erum í góðum samskiptum við þingmenn Norðausturkjördæmis þvert á flokka og teljum okkur geta lagt hönd á plóg fyrir hagsmuni svæðisins þegar kemur að því að vekja athygli á því sem betur má fara. Nefnum við þar vinnu Ingvar Þóroddsson (ef.) í málefnum og fjárveitingu Hlíðarskóla, þörf á hringtorgi og göngustígum við Skógarböðin, aukin aðbúnað Akureyrarflugvallar, varanlega staðsetningu þyrlu á Akureyri, stærri aðstöðu fyrir sérsveitina á Akureyri og svona mætti lengi telja.
Af þeim verkefnum sem eru framundan er þó þörf á því að vekja athygli á einu stærsta hagsmunamáli íslensku þjóðarinnar. Þann 29. ágúst næstkomandi munu Íslendingar fá einstakt tækifæri til þess að kjósa um hvort þjóðin vilji hefja á ný samningaviðræður við Evrópusambandið. Þá kjósum við um það hvort við viljum fara í viðræðurnar, þar sem rýnt verður í hvern málaflokk fyrir sig næstu árin, sama ferli og átti sér stað í aðildarviðræðum 2009-2013.
Í lok viðræðna fáum við þá loks að sjá við svart á hvítu samning, orð fyrir orð - og fáum þá aftur tækifæri sem þjóð að taka þeim samningi eða hafna. Í annarri þjóðaratkvæðagreiðslu. Við ræðum um hana eftir nokkur ár.
Verkefnin eru mörg, en við erum óhrædd við að bretta upp ermar, líkt og við sýndum í kosningabaráttunni.
Ný stjórn svæðisfélags Viðreisnar á Akureyri tók við keflinu á aðalfundi þann 23. júní og erum við spennt að halda vegferðinni áfram.
Formaður félagsins er áfram Lovísa Oktovía Eyvindsdóttir, meðstjórnendur eru Hafsteinn Árnason, Halla Rut, Halla María Sveinbjörnsdóttir, Jóhann Einarsson, Unnur Pétursdóttir og Þóroddur Ingvarsson (vantar á mynd) en varamaður í stjórn er Axel Björnsson.
