16/01/2026
Síðastliðinn miðvikudag var staðfest í bæjarstjórn, sú ákvörðun skipulagsnefndar að vísa deiliskipulagi 1.áfanga á Blikastaðalandi til auglýsingar og kynningar. Einnig var samþykkt að vísa breytingu á aðalskipulagi til auglýsingar og kynningar.
Uppbygging á Blikastöðum er stórt mál, enda er þetta stærsta uppbyggingarverkefni í sveitarfélaginu fyrr og síðar. Þetta mál er umdeilt og á að vera það, það er ekki sjálfsagður hlutur að tvöfalda sveitarfélagið. Því skiptir öllu máli á þessum tímapunkti að íbúar fái að skoða gögn málsins, mæta á fundi, spyrja spurninga og fá svör. Og það er ferlið sem er að fara í gang.
Ferlið
Núverandi bæjarstjórn tók við samningnum undirrituðum. Ég lít á hlutverk okkar að tryggja hag bæjarins, áður en næstu skref eru tekin. Mér finnst deiliskipulagið sjálft vel unnið og nefndi í mínum orðum sl. miðvikudag að búið væri að leggja mikið í það, sem sveitarfélagið hefði aldrei haft burði til að gera.
Það breytir þó ekki þeirri skoðun minni að þéttleikinn sé of mikill og ég hef áhyggjur af umferðinni sem á eftir að aukast á þessu svæði.
Íbúakosning
Í vikunni hefur verið kallað eftir því að boðað verði til íbúakosningar og það sem fyrst. Við ræddum þessi mál innan okkar raða. Niðurstaða samtalsins var sú að ekki væri tímabært að leggja fram tillögu um íbúakosningu, þar sem endanlegar niðurstöður eftir auglýsingu og ábendingar liggja ekki fyrir.
Við viljum að íbúar skoði gögnin, myndi sér skoðun og skili inn ábendingum. Þegar sú niðurstaða er komin, er að okkar mati tækifæri til að ræða þær hugmyndir.
Kynnum okkur málin
Við hvetjum íbúa bæjarins því til að kynna sér deiliskipulagshugmyndir 1.áfanga og senda inn ábendingar.
Blikastaðaland er nýtt íbúðahverfi sunnan núverandi byggðar í Mosfellsbæ, á skilgreindum samgöngu- og þróunarás höfuðborgarsvæðisins. Deiliskipulag 1. áfanga nær yfir um 34,8 ha svæði þar sem lögð er áhersla á samspil byggðar og náttúru, sjálfbæra þróun í spennandi...
