Veðurstofa Íslands

01/06/2026

Jarðskjálfti vestur af Húsmúla 1. júní 2026

Jarðskjálfti af stærð 4,5 varð kl. 13:45 í dag vestur af Húsmúla í Henglinum. Veðurstofan hefur fengið fjölda tilkynninga um að skjálftinn hafi fundist greinilega víða á Suðvesturlandi m.a. á Akranesi og undir Eyjafjöllum.

Myndirnar þrjár sýnir hristikort með áhrifum jarðskjálftans. Stjarnan sýnir hvar skjálftinn átti sér upptök. Litirnir gefa til kynna styrk hristingsins þar sem heitari litir tákna sterkari hristing.

Fólk nálægt upptökunum gæti hafa fundið sterkan kipp, séð hluti hristast eða færast til og heyrt brak eða dynki í húsum. Fjær upptökunum fannst skjálftinn vægar þar sem styrkur hristingsins dvínar afar hratt eftir því sem fjær upptökunum dregur.

Jarðskjálftahrina hófst á svæðinu upp úr kl. 7 í gærmorgun, 31. mai, og hafa um 700 jarðskjálftar mælst síðan hrinan hófst. Búast má við eftirskjálftavirkni á svæðinu næstu daga.

Kortið sýnir staðsetningu og stærð jarðskjálfta vestur af Húsmúla í Henglinum frá kl. 7 í gærmorgun. Dökkar súlur sýna stærð yfirfarna jarðskjálfta, en ljósa súlur óyfirfarna.

Brotlausnir stærstu jarðskjálftanna og dreifing eftirskjálfta benda til þess að um sniðgengisskjálfta sé að ræða á norður-suður misgengi á brotabelti Suðurlands og Reykjaness.

Veðurstofan minnir á fólk að huga að viðbrögðum vegna jarðskjálfta, sjá nánar á heimasíðu Almannavarna: https://www.almannavarnir.is/natturuva/jardskjalftar/vidbrogd-vid-jardskjalfta/

05/05/2026

🛰️ Við minnum á opinn EUMETSAT-viðburð á Veðurstofu Íslands á morgun, miðvikudaginn 6. maí, kl. 14:00–16:00.

EUMETSAT er evrópsk stofnun sem rekur veðurgervihnetti og miðlar gervihnattagögnum til veðurþjónusta, vísindasamfélagsins og annarra notenda.

Viðburðurinn fer fram í Matsal Veðurstofunnar, Bústaðavegi 7, og er öllum opinn. Fjallað verður um gervihnattagögn í þágu veðurs, loftslags og náttúruvár.

Þau sem ekki komast á staðinn geta fylgst með fundinum í gegnum Teams hér:
https://tinyurl.com/eumetsat-vedur

Hægt er að opna hlekkinn í vafra ef Teams-appið er ekki uppsett, skrá nafn ykkar á fundinn og koma inn sem gestur.

Viðburðurinn fer fram á ensku.

Fyrirlesarar verða frá EUMETSAT, Veðurstofu Íslands, Háskóla Íslands og Náttúrufræðistofnun:
Hayley Evers-King, Vesa Nietosvaara, Eiríkur Örn Jóhannesson, Ingibjörg Jónsdóttir og Joaquin Munoz Cobo Belart.

Við hlökkum til að sjá ykkur.

04/05/2026

Könnun um áhrif eldfjallagass á farþega og áhafnir í flugi

Veðurstofa Íslands óskar eftir svörum frá fólki sem flaug til, frá eða innan Íslands á meðan eldgos stóðu yfir á Reykjanesskaga og telur að flugið þeirra gæti hafa farið í gegnum eldfjallagös.
Könnunin er ætluð bæði farþegum og starfsfólki flugfélaga.
Niðurstöðurnar verða notaðar til að skoða hvaða áhrif brennisteinsdíoxíð (SO₂) getur haft á fólk um borð í flugvélum.
Könnunina má finna hér:
https://tinyurl.com/Vedustofa-Islands

Könnunin er hluti af alþjóðlegu samstarfi Veðurstofu Íslands og ICAO, Alþjóðaflugmálastofnunarinnar.

Survey on the effects of volcanic gas on passengers and aircrew

The Icelandic Meteorological Office invites responses from people who flew to, from or within Iceland while volcanic eruptions were ongoing on the Reykjanes Peninsula and believe their flight may have passed through volcanic gases.
The survey is intended for both passengers and airline staff.

The results will be used to assess how volcanic sulfur dioxide (SO₂) may affect people on board aircraft.

The survey can be found here:
https://tinyurl.com/Icelandic-Met-Office

The survey is part of an international collaboration between the Icelandic Meteorological Office and ICAO, the International Civil Aviation Organization.

29/04/2026

🛰️ Gervihnattagögn í þágu veðurs, loftslags og náttúruvár

Miðvikudaginn 6. maí kl. 14:00–16:00 verður opinn EUMETSAT-viðburður á Veðurstofu Íslands um nýjustu þróun í gervihnattagögnum og notkun þeirra á Íslandi og á alþjóðavettvangi.

EUMETSAT gegnir lykilhlutverki í evrópsku samstarfi um veðurgervitungl og miðlun gervihnattagagna. Á viðburðinum verður fjallað um hvernig slík gögn nýtast við vöktun veðurs, loftslags, jökla og eldvirkni.

Fyrirlesarar:

Hayley Evers-King, EUMETSAT
Vesa Nietosvaara, EUMETSAT
Eiríkur Örn Jóhannesson, Veðurstofa Íslands
Ingibjörg Jónsdóttir, Háskóli Íslands
Joaquin Munoz Cobo Belart, Náttúrufræðistofnun

📍 Matsalur Veðurstofu Íslands, Bústaðavegi 7–9
🗓️ Miðvikudagur 6. maí
🕑 14:00–16:00

Viðburðurinn er öllum opinn og fer fram á ensku.

Einnig verður hægt að fylgjast með fundinum á eftirfarandi slóð:
https://teams.microsoft.com/meet/39347403641875?p=GuthiEhJLsWgXnyDJX

28/04/2026

Hvað er AMOC og hverju skiptir það fyrir Ísland?

Í Kastljósi í gær var rætt við Halldór Björnsson, fagstjóra veðurs og loftslags hjá Veðurstofu Íslands, og Hrönn Egilsdóttur, sviðsstjóra umhverfissviðs hjá Hafrannsóknastofnun, um nýlegar rannsóknir, óvissu og möguleg áhrif breytinga á AMOC á haf- og loftslag við Ísland.

Á vef Loftslagsþjónustu Veðurstofu Íslands er að finna ítarlega skýringargrein um AMOC. Þar er meðal annars farið yfir muninn á AMOC og Golfstraumnum, helstu spurningar um hringrásina, mælingar, líkön, áhættu, heimildir og möguleg áhrif á Ísland.

Vísindalegt mat bendir til þess að AMOC veikist á þessari öld en óvissa er um umfang, tímasetningu og svæðisbundin áhrif. Breytingar á AMOC geta haft áhrif á sjávarhita, varmaflutning, veðurmynstur og breytileika í veðurfari. Þær geta einnig haft þýðingu fyrir vistkerfi sjávar og samfélög við Norður-Atlantshaf.

Loftslagsþjónustan brúar bilið á milli vísinda og samfélags með miðlun upplýsinga um áhrif loftslagsbreytinga og aðlögun að breyttum heimi.

Eða eins og kom fram í þættinum: Heimurinn heldur áfram, en spurningin er hvernig við stígum næstu skref.

Viðtalið í Kastljósi:
https://www.ruv.is/sjonvarp/spila/kastljos/38169/bc088h/veltihringras-atlantshafsins

Grein Loftslagsþjónustu Veðurstofunnar:
https://gottvedur.is/loftslagsbreytingar/frettir/veltihringras-atlantshafsins-hvad-er-amoc-og-hvada-thydingu-getur-thad-haft-fyrir-island/

24/04/2026

Hvernig má nota niðurstöður langtímahættumats?

Niðurstöður langtímahættumats vegna hraunavár eru ekki spá um hvar eða hvenær næst gjósi. Þær eru fyrst og fremst hugsaðar sem grunnur að undirbúningi, skipulagi og ákvarðanatöku til lengri tíma.

Þær geta nýst ólíkum hópum með ólíkum hætti:

Skipulag og landnotkun
Niðurstöðurnar geta hjálpað við að bera saman svæði, meta hvar berskjöldun fyrir hraunvá er meiri eða minni og styðja ákvarðanir um skipulag, landnotkun og framtíðaruppbyggingu.

Innviðir og þjónusta
Þær geta nýst við að greina hvaða innviðir geta verið útsettir, svo sem vegir, vatnslagnir, raflínur, virkjanir og önnur mannvirki sem samfélagið reiðir sig á. Þær geta einnig stutt undirbúning, forgangsröðun mótvægisaðgerða og viðbragðsáætlanir.

Almenningur
Upplýsingarnar geta hjálpað fólki að skilja betur hvaða svæði eru talin útsettari fyrir hraunvá en önnur og hvers vegna ákveðin svæði fá sérstaka athygli í skipulagi og viðbúnaði.

Mikilvægt er að hafa í huga að langtímahættumat kemur ekki í stað skammtímahættumats, vöktunar eða tilkynninga þegar virkni eykst. Þá skipta nýjustu mælingar og stöðuupplýsingar mestu máli.

Nánar: eldfjallava.is

23/04/2026

Gleðilegt sumar 🌿

Sumarið birtist í mörgum myndum, stundum í sól og blíðu, stundum í gráum himni og logni.

Hvernig birtist sumarið ykkur um land allt? 🌤️

Vetur og sumar frusu saman víða um land, einkum inn til landsins, aðfaranótt sumardagsins fyrsta, en slíkt á samkvæmt þjóðtrúnni að boða góða tíð.

Ekki ber þó öllum saman um hversu áreiðanleg sú vísbending er. Trausti Jónsson veðurfræðingur hefur fjallað á skemmtilegan hátt um þessa gömlu þjóðtrú og bent á að ekki sé einfalt að lesa skýr teikn um sumarið út frá henni einni saman. Nánar má lesa um það í færslu hans hér neðst.

Við deilum tveimur myndum frá fyrsta morgni sumars. Önnur er úr vefmyndavél Veðurstofunnar á Goðabungu, en hina tók Salóme Jórunn Bernharðsdóttir, náttúruvársérfræðingur, af þaki Veðurstofu Íslands um klukkan sjö í morgun.

Þegar frýs saman – sumar og vetur – þá hvað?
https://trj.blog.is/blog/trj/entry/1710745/

21/04/2026

Langtímahættumat kemur ekki í stað núverandi hættumats fyrir virknina við Svartsengi

Mikilvægt er að blanda ekki langtímahættumati vegna hraunavár sem Veðurstofan gaf út í dag saman við skammtímahættumat sem gefið hefur verið út reglulega vegna virkninnar við Svartsengi og Sundhnúksgígaröðina. Það skammtímahættumat segir til um líkur á því hvað gæti mögulega gerst á næstunni og byggir á mælingum á nýjustu upplýsingum um virkni á svæðinu. Samkvæmt því skammtímahættumati er til dæmis metin lítil hætta á gosupptökum innan Svartsengis.

Langtímahættumatskortið hér að neðan sýnir líkur á gosupptökum á öllum Reykjanesskaganum. Kortið sýnir hvort að það séu meiri líkur á gosupptökum á einu svæði frekar en öðru á Reykjanesskaganum.

Eins og fram kemur í skýrslunni eru meiri líkur á gosupptökum í miðjum eldstöðvakerfunum og þar sem þau þvera flekaskilin á Reykjanesskaganum, eins og til dæmis Svartsengi.

Það að á langtímahættumatskortinu sjáist að „miklar“ líkur séu á gosupptökum á tilteknum svæðum, þýðir að þar eru 10 sinnum meiri líkur á gosupptökum en á svæðum þar sem líkur eru metnar „litlar“. Ástæðan fyrir því er að ekki er lagt mat á hvort og hvar gos komi upp á skaganum á komandi árum, heldur eingöngu hvar er líklegra að gos komi upp heldur en annarsstaðar.

Þegar eldstöðvakerfi sýnir virkni sambærilega þeirri sem sést hefur við Svartsengi þá fellur langtímahættumat úr gildi og skammtímahættumat tekur við sem byggir á rauntímagögnum. Því er mikilvægt að átta sig á því að fyrir svæðið við Svartsengi og Grindavík er það skammtímahættumatið sem er í gildi, en ekki langtímahættumatið.

21/04/2026

Fyrsti hluti langtímahættumats vegna hraunavár á Reykjanesskaga er kominn út.

Veðurstofa Íslands hefur nú birt tvær nýjar skýrslur um hraunavá, annars vegar fyrir Reykjanesskaga í heild og hins vegar fyrir höfuðborgarsvæðið. Skýrslurnar eru hluti af stærra verkefni um langtímahættu- og áhættumat vegna eldfjallavár á Reykjanesskaga.

Helstu niðurstöður sýna hvar líkleg gosupptakasvæði eru og hvaða svæði gætu orðið útsett fyrir hraunflæði. Hér er þó ekki verið að segja til um hvar eða hvenær næst gýs, heldur að leggja mat á hvar hætta getur skapast til lengri tíma.

Meðal þess sem kemur fram er að í efstu 10% líklegra áhrifasvæða á Reykjanesskaga eru tvö þéttbýli, fjórar virkjanir og tvö vatnsból. Jafnframt sýna sviðsmyndir fyrir höfuðborgarsvæðið að meirihluti núverandi byggðar er á svæðum þar sem líkur á hraunflæði eru metnar mjög litlar eða litlar. Niðurstöðurnar styðja því að mestu við það sem þegar var vitað en setja fram heildstæðari og aðgengilegri mynd af hraunavá á svæðinu.

Samhliða útgáfu skýrslanna hefur Veðurstofan opnað nýja vefsíðu, eldfjallava.is, og gagnvirka kortasjá þar sem hægt er að kynna sér niðurstöðurnar nánar, skoða kort og nálgast skýrslur.

Verkefnið er umfangsmikið og á sér fáar fyrirmyndir á heimsvísu. Það nær til sjö eldstöðvakerfa, sextán sveitarfélaga og fjölda mikilvægra innviða. Markmiðið er að efla undirbúning, styðja skipulag og stuðla að upplýstri ákvarðanatöku til lengri tíma.

Nánar á https://eldfjallava.is/

Ítarleg skýringarfrétt á vef Veðurstofunnar:
https://www.vedur.is/um-vi/frettir/fyrsti-hluti-af-langtimahaettumati-vegna-hraunavar-a-reykjanesskaga-kominn-ut

21/04/2026

Snjóathugunarmennirnir Hlynur Sveinsson og Daði Benediktsson hjá Veðurstofu Íslands tóku þátt í Tæknidegi Verkmenntaskólans um helgina og kynntu þar verkefni sín á lifandi og fróðlegan hátt.

Þeir fræddu gesti um ýmiss konar snjómælitæki, leyfðu fólki að skoða snjó í stækkunargleri og stafrænni smásjá auk þess sem Hlynur hafði einnig sett saman fróðlegt myndband með svipmyndum frá störfum þeirra.

Svona miðlun er mikilvæg til að vekja áhuga á náttúruvá, vísindum og starfi Veðurstofunnar.

1 like. "Veðurstofan á Tæknidegi Verkmenntaskólans"