Seltjarnarnesbær

02/06/2026

ATH - vegna veðurs frestuðust malbiksframkvæmdirnar sem áttu að vera í gær þar til í kvöld/nótt og ný tímasetning er því:
Fimmtudaginn 4. júní kl. 19:00 til 07:00 þann 5. júní hefur verið tilkynnt um lokun Eiðsgranda vegna malbiksframkvæmda á milli Hringbrautar og Suðurstrandar sem Colas Ísland annast fyrir Vegagerðina/veghaldara. Kaflinn er 1.280m langur og verður framkvæmdarsvæðinu lokað á meðan á framkvæmdum stendur en lokunin gildir á milli Hringbrautar og Suðurstrandar Viðeigandi merkingar og hjáleiðir verða settar upp.

Vegfarendur eru beðnir um að virða merkingar og hraðatakmarkanir og sýna aðgát við vinnusvæðin sem eru þröng og menn og tæki eru við vinnu mjög nálægt akstursbrautum.

01/06/2026

Vekjum athygli foreldra á sumarnámskeiðum Gróttu 2026 en að vanda verður um fjölbreytt sumarnámskeið fyrir börn m.a. leikjanámskeið, ævintýranámskeið, Survivor, handbolta-, fótbolta-, fimleika- og sundnámskeið. Námskeiðin eru frábært tækifæri fyrir börn til að hreyfa sig, kynnast nýjum vinum og eiga skemmtilegar stundir í öruggu og jákvæðu umhverfi.
https://grotta.is/almennt/namskeid-sumarid-2026/
Skráning fer fram á Abler:
https://www.abler.io/shop/grotta/sumarnamskeid

Verkefnastjóri sumarnámskeiða Gróttu er Daði Már Patrekur Jóhannsson, [email protected], s. 612-6246

12/05/2026

MENNTASTEFNA SELTJARNARNESBÆJAR 2026-2030 📚
Bæjarstjórn Seltjarnarnesbæjar samþykkti á dögunum nýja menntastefnu bæjarins fyrir árin 2026-2030 sem unnin var í víðtæku samráði hagaðila. Stefnunni er ætlað að leggja grunn að og styðja við farsælt og framsækið skóla- og frístundastarf. Áhersla er lögð á lærdómssamfélag í fremstu röð með framsækni, þróun, virðingu, vellíðan, þroska, hæfni og árangur nemenda að leiðarljósi. Stefnan verður tekin til kynningar og eftirfylgni á komandi skólaári. Nánari upplýsingar og stefnuna sjálfa má finna á vef bæjarins. 👉 https://www.seltjarnarnes.is/is/ibuar/frettir/menntastefna-seltjarnarnesbaejar-2026-2030

09/05/2026

GÁMAR FYRIR GARÐÚRGANG - TRJÁKLIPPINGAR - MOLTA
Bæjarbúum býðst að losa sig við garðúrgang í gáma frá 13.-29. maí nk. sem settir verða upp á þremur stöðum í bænum. Staðsetning gámanna:

🔸Á Suðurströnd við smábátabryggjuna
🔸Við Norðurströnd til móts við Lindarbraut
🔸Á bílastæði Eiðistorgs við grenndargáma

Athugið! Einungis má setja hreinan garðúrgang í gámana, sturta þarf úr pokunum og alls ekki henda úrgangi í plastpokum í gámana. Athugið sérstaklega að allt plast og annað á að flokka sérstaklega og farga á viðeigandi hátt, öll viljum við flokka rétt fyrir okkar umhverfi og komandi kynslóðir.

🌳Trjáklippingar - Gott er að huga að trjám, runnum og öðrum gróðri sem vaxa út fyrir lóðamörk og geta skapað hættu fyrir vegfarendur, rétt er að benda á það að lóðahafi er bótaskyldur ef slys verða sökum þessa.

🍃 Molta - Seltjarnarnesbær verður með gefins moltu fyrir íbúa sem þess óska þessa sömu daga. Staðsetning á henni verður við Sefgarða / Safnatröð utan við efnissvæði bæjarins. Moltan er jarðvegsbætir fyrir gróðurinn en ekki notuð til að planta í svo því sé haldið til haga varðandi notkun á henni.

Íbúar bæjarins eru hvattir til að huga að nærumhverfi sínu þar sem það á við. 🌞

09/05/2026

FYRSTA ÁFANGA BYGGINGAR NÝS LEIKSKÓLA ER LOKIÐ!
Glæsilegur áfangi er í höfn í byggingu á Undrabrekku, nýs leikskóla á Seltjarnarnesi, þar sem að húsið er nú formlega komið undir þak.

Um mikil tímamót var að ræða í framgangi þessa mikla verkefnis og af því tilefni bauð Aðalvík, þeim sem helst hafa komið að framkvæmdinni, í reisugilli á verkstað í hádeginu, fimmtudaginn 7. maí sl. Starfsfólk leikskólans fékk þá t.a.m. tækifæri til að skoða og máta sig við húsnæðið sem er allt hið glæsilegasta en það mun hýsa átta leikskóladeildir. Það þótti virkilega tilkomumikið að fá að rölta um og skoða aðstæður á báðum hæðum leikskólans en rýmið er stórt, vítt er til veggja og hátt til lofts.

Það að fagna verklokum uppsteypunnar og þessum 1. áfanga byggingar Undrabrekku gerði allt raunverulegra og var óneitanlega mikil gleðistund fyrir alla. Tímaáætlun framkvæmdarinnar hefur staðist eins og lagt var upp með og verktakarnir halda ótrauðir áfram. Þessa dagana er unnið að því að klára að glerja allt húsið til að loka því og steypuvinna við útisvæðið er að hefjast svo nokkuð sé nefnt. Allt verður því áfram á fullu enda rís húsið hratt eins og bæjarbúar hafa tekið eftir og götumyndin stöðugt að breytast en stefnt er að verklokum sumarið 2027.

Myndir segja meira en mörg orð og hér má sjá myndir sem teknar voru á verkstað á fimmtudaginn sem og stutt brot úr ávarpi sem Þór bæjarstjóri hélt í tilefni tímamótanna.

07/05/2026

Skipulags- og umferðarnefnd stóð fyrir velheppnuðum íbúafundi í Gallerí Gróttu í gær þar sem opnað var á umræður og hugmyndir varðandi fyrirhugað skipulagsferli á miðbæjarreitunum við Eiðistorg "Hagkaupsreiturinn" og Austurströnd 7 "Bensínstöðvarreiturinn".

Fundurinn var fjölmennur og þótti bæði áhugaverður og jákvæður. Svana Helen Björnsdóttir formaður Skipulags- og umferðarnefndar stýrði fundinum og sagði frá störfum nefndarinnar þessu tengt og stöðu mála. Halldóra Bragadóttir og Helgi B. Thóroddsen hjá Kanon arkitektum héldu góða kynningu og kynntu m.a. fyrirkomulag skipulagsferlis í svona verkefnum en skýrt var undirstrikað að á þessum tímapunkti hafa engar ákvarðanir verið teknar. Tilgangur fundarins var fyrst og fremst að upplýsa bæjarbúa um uppbyggingarmöguleika á þessum tveimur byggingarreitum, opna umræðuna, varpa fram og kalla eftir hugmyndum, umræðum og ábendingum.

Góður rómur var gerður að fundinum, margar fyrirspurnir og ábendingar komu fram sem allar voru skráðar niður og verður unnið úr þeim nú í framhaldi. Skipulags- og umferðarnefnd ætlar sér svo að afhenda öll gögn og upplýsingar er varða stöðu mála til nýrrar nefndar eftir kosningar sem mun þá þróa málin áfram í samráði við íbúa en allir fundargestir voru sammála um mikilvægi þess. Fundargestir virtust einnig sammála um að það verður spennandi verkefni á næstu misserum að vinna að uppbyggingu miðbæjarreitanna til hagsbóta fyrir bæjarbúa og töldu nauðsynlegt að um bæjarprýði yrði að ræða.

07/05/2026

SVEITARSTJÓRNARKOSNINGAR Á SELTJARNARNESI 2026 Oddvitakappræður verða haldnar í kvöld, fimmtudaginn 7. maí kl. 19:30-21:00 í Mýrarhúsaskóla í tilefni sveitarstjórnarkosninganna þann 16. maí nk. Á fundinum munu oddvitar framboðanna þriggja sem bjóða fram hér á Seltjarnarnesi sitja fyrir svörum varðandi bæjarmálin. Stjórnendur fundarins verða þeir Magnús Sigurbjörnsson og Pétur Krogh ólafsson, stjórnendur hlaðvarpsins Korter í kosningar.

Markmið fundarins er að gefa kjósendum tækifæri til að kynnast bæjarstjóraefnum framboðanna, stefnumálum þeirra og spyrja þá spurninga sem brenna á íbúum.

Fundurinn fer fram í sal Mýrarhúsaskóla og stendur frá 19.30 til 21. Eftir það gefst íbúum tækifæri til að spjalla við frambjóðendur af listum framboðanna þriggja og hver veit nema að eitthvað náttsnarl verði í boði.

Dagskrá
19:30: Húsið opnar
19:45 Fundarstjórar bjóða gesti velkomna og kynna fyrirkomulag fundarins
19:50 Framsögur oddvita framboðanna
20:10 Pallborðsumræður - Oddvitar framboðanna sitja fyrir svörum Magnúsar og Péturs
20:30 Spurningar úr sal - Oddvitar framboðanna svara spurningum kjósenda
21:00 Óformlegt spjall - frambjóðendur listanna þriggja verða á staðnum til að svara spurningum kjósenda

Skipuleggjendur fundarins óska eftir skráningu á fundinn hér:
https://fb.me/e/4zFyVmyA1

05/05/2026

Nú er varptími fuglanna genginn í garð og því hefur sumarlokun og ferðabann um friðlandið við Gróttu tekið gildi sem stendur frá 1. maí – 31. júlí. Á þessum tíma eru gangandi vegfarendur hvattir til að sýna tillitsemi, alls óheimilt að vera með hunda á vestursvæðunum. Kattaeigendur eru einnig hvattir til að halda köttunum sínum innandyra yfir varptíminn, hafa þá í bandi og nota trúðaól sé farið með þá út. Sjóiðkendum er jafnframt bent á að stunda sjóíþróttir norðan- og sunnan Seltjarnarness í stað Seltjarnar á varptímanum.

Rauða línan og skástrikin á kortinu marka vestursvæðin og friðlandið þar sem hundabann gildir. Annars staðar á Seltjarnarnesi gildir hefðbundin regla þ.e. Lausaganga hunda er alltaf bönnuð á Seltjarnarnesi.

05/05/2026

Það var líf og fjör á markaðnum á Eiðistorgi á laugardaginn sem mæðgurnar Iris og Alexandra standa fyrir. Að þessu sinni settu komandi sveitarstjórnarkosningar mark sitt á markaðinn en fulltrúar flokkanna þriggja sem bjóða sig fram á Seltjarnarnesi voru allir á staðnum að spjalla við gesti og gangandi og kynna sín málefni.

29/04/2026

Auðlesinn bæklingur um kosningar!
Miðstöð um auðlesið mál bjó til bækling.
Í bæklingnum er sagt frá því:
• hvað sveitarstjórnar·kosningar eru
• hvernig þú kýst
• hvaða aðstoð þú getur fengið.
Smelltu hér til að lesa bæklinginn:

Hér eru auðlesnar upplýsingar um sveitarstjórnar·kosningar 2026