02/09/2026
Comune di San Sperate
S’úrtima dí de is labboratórius “Gioghendi in Bibblioteca”
Su 25 de Austu eus acabbau is labboratórius “Gioghendi in Bibblioteca”: prus de 20 is partetzipantis, pipias e pipius intra is 5 e is 11 annus chi funt benius a nos’agatai in sa Bibblioteca Comunali “Anselmo Spiga” de Santu Sparau. Totus impari ant giogau e, pruscatotu, ant imparau cancu fueddu in sardu: giai totus ant ammostau capacidadi de cumprèndiri fintzas fràsias longas, poita ca in domu is de sa famíglia su Sardu ddu fueddant; medas funt fintzas bonus a pronuntziai de manera giusta e chene dificultadi. E ant allirgau su logu!
Totus impari, nci eus fintzas passau una pariga de oras imbentendi un’istória: dognunu at postu un’idea, ant fatu is disegnus de is personàgius, ant immaginau un’aventura ispassiosa e ant partetzipau cun gana bella a cust’atividadi, ascurtendi cumenti su contu est essiu bellu meda fintzas in Sardu.
Crosidadosus, seis? Pentzaus carei.
Duncas, innòi asuta, s’istória de…
𝐅𝐚𝐮𝐬𝐭𝐢𝐧𝐚 𝐞 𝐔𝐦𝐛𝐞𝐫𝐭𝐮
Umbertu, benendi de su benidori de s’annu 3000, arribbat in su tempus nostu. Est un’èssiri chi ndi benit de un’àteru mundu, un’istràngiu, unu furisteri ispatziali istravanau meda! Tenit duas cambas e duus bratzus cument’e is umanus, ma a dogna manu tenit tres didus isceti: su póddixi, s’índixi e su didu de mesu. Sa peddi sua est birdi, e tenit cuatru ogus grogus, duus ananti e àterus duus in sa conca, unu a dereta e unu a manca, chi impreat po ligi sa menti de is àterus.
Sa primu personi chi atóbiat a Umbertu est Faustina, una piciochedda de 8 annus arta unu metru e binticincu, a pilus longus a colori de oru e a ogus birdis. Faustina, sendi una piciochedda atrivia e crosidadosa, mancai sa bisura de Umbertu siat diferenti de sa sua no ddu timit e est prexada meda de ddu connosci.
Umbertu ddi iscóviat luegus su motivu de su viàgiu in su tempus: depit informai a totus ca nexi de s’incuinamentu e de s’istampu de s’ozonu sa Terra est sunfrendi, tanti chi in su tempus suu su préssiu de Santu Sparau no podit cumpriri, e duncas non si ndi agatat prus.
Luegus Faustina si ndi atzicat: ita arrori mannu! Cumenti at a fai sa bidda de Santu Sparau chene préssiu?
«Ita tocat a fai po sarvai su préssiu de Santu Sparau?» ddi pregontat.
Umbertu ddi narat chi s’única manera de sarvai su préssiu, e duncas sa Terra intrea, est cussa de serrai s’istampu de s’ozonu, e ca ddu podit fai isceti issa: s’ajaja, chi fiat una giana, a Faustina ddi at lassau unu filu màgicu chi serbit própriu a cust’iscopu.
Perou, po serrai s’istampu, tocat nci a pesai finas a celu e a passai a s’àtera parti de is nuis. Sigumenti Faustina no podit intrai in sa navi de Umbertu, ca ddoi at unu postu isceti, intzandus ndi furant un’aparéchiu de s’aeroportu. Candu is duus amigus s’agatant acanta de is nuis, arribbat un’àchili manna manna a ddus agiudai, e Faustina e Umbertu ddas podint atruessai, isciundendi·si ambaduus.
A sa fini, Faustina cosit lestra s’istampu de s’ozonu cun su filu màgicu de s’ajaja e in un’iscuta sa Natura cumentzat a froriri.
Is matas de préssiu ant a torrai a bogai frutu bellu, mannu e saboriu. Su benidori de Santu Sparau est torra luminosu!
S’Umanidadi, ispantada de custus duus giòvunus chi ant sarvau sa Terra, cumprendit ca a certai e a si fai sa gherra pari pari no serbit a nudda. Is Guvernus isterrint unu decretu de is Diritus Universalis, aundi est istabbiliu chi is personis funt totus ogualis e nemus depit prus sunfriri su fàmini.
E totus bivint in paxi e in serenidadi.
Sa morali de custu contu? Nosu de s’ULS Santu Sparau pentzaus chi siat una isceti: chi nosi guvernànt is pipius, fiat mellus meda!
Ita ndi pentzais?
***
SA LÌNGUA CHI CONTAT - Progetu finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018
