08/09/2020
Dormi sonnu profundu calabrisi,
Com’a nu jjiru, non ti risbijjari
A fini paghi tu sempri li spisi
Servu fedeli ti fai cumandari.
Quand’è chi voti u mundu suprasutta?
Quand’è chi tiri fora l’attributi?
Quandu ti ncazzi lampu mi ti butta,
Mi ffuchi tutti quanti sti cornuti?
Nta Val di Susa non vonnu jjù treni
Nui chi volimu ndi cacciaru tutti
Stannu facendu lotta senza freni
E nui facimu a lotta a cù i ndi futti!
Ccà non trasunu jjù mancu beccacci
Ccà non passunu jjù mancu marvizzi
Rrestammu suli, sventurati e pacci
Non simu bboni jjù, mancu pè spizi!
di Bruno Salvatore Lucisano
