06/10/2025
𝐁𝐢𝐝𝐝𝐚𝐜𝐢𝐝𝐫𝐮: 𝐀𝐧𝐠𝐞𝐥𝐨 𝐂𝐚𝐫𝐨𝐭𝐞𝐧𝐮𝐭𝐨 𝐞 𝐌𝐚𝐫𝐜𝐨 𝐂𝐨𝐫𝐬𝐢 𝐟𝐮𝐧𝐭 𝐢𝐬 𝐛𝐢𝐧𝐜𝐢𝐝𝐨𝐫𝐢𝐬 𝐝𝐞 𝐬𝐮 𝐏𝐫𝐞́𝐦𝐢𝐮 𝐃𝐞𝐬𝐬𝐢̀ 𝟐𝟎𝟐𝟓
(Artìculu de San Gavino Monreale.net)
Angelo Carotenuto po sa Narrativa e Marco Corsi po sa Poesia ant bintu sa de 40 editzionis de su Prémiu Giuseppe Dessì. In sa tzerimónia de premiatzioni, in Biddacidru, s’est donau puru su Prémiu speciali de sa Giuria a Lella Costa e su Prémiu speciali de sa Fondatzioni de Sardigna a Marco Paolini.
Sa de 40 editzionis de su Prémiu Literàriu at donau su giudítziu suu: Angelo Carotenuto e Marco Corsi funt is bincidoris chi ant arriciu su prémiu in sa tzerimónia chi s’est fata in Biddacidru e chi est acabbada a is 8 e mesu de a merii.
Su scritori napoletanu Angelo Carotenuto, in cumpetitzioni cun Laura Imai Messina e Luigi Manconi, at tentu s’arreconnoscimentu po sa setzioni Narrativa cun su romanzu “Viva il lupo” (Sellerio), e su poeta toscanu Marco Corsi, lómpiu in finali impari a Alessandro Canzian e Alessandra Corbetta, at bintu po sa setzioni Poesia, cun “Nel dopo” (Guanda).
Su merii. Si funt donaus puru is duus arreconnoscimentus annuntziaus: su Prémiu speciali de sa Giuria, chi dónnia annu prémiat s’impegnu culturali de personàgius chi si funt ammostaus in su panorama literàriu e artísticu, a Lella Costa, intra is figuras prus de importu de su teatru e de sa televisioni italiana; invècias su Prémiu speciali de sa Fondatzioni de Sardigna, riservau a personalidadis chi si funt postas in ammostu in su panorama artísticu in s’annu de riferimentu, est andau a Marco Paolini, atori, regista e autori teatrali cun esperiéntzia meda.
Sa serada, presentada de Chiara Buratti, abbista, pronta e capassa de chistionai cun is finalistas e is stràngius in su palcu, fatu-fatu lassàt logu a is interventus musicalis de su GnuQuartet chi at presentau in anteprima unu branu dedicau a su scritori de “Paese d’ombre”, intitulau “Dessì”, cumpostu giustu giustu po custa ocasioni.
Narrativa. In “Viva il lupo”, Angelo Carotenuto contat sa crisi esistentziali de Gabriele Purotti, leader de una band rock e giugi de unu talent show, chi perdit sa boxi pustis chi s’est morta de disgràtzia Tete, una cuncurrenti gióvuna chi issu iat scrocorigau. Intra arrepentimentus e circa de luidura, Purotti scrucullat aintru de su mundu truncau de Tete e apitzus de is cusseguéntzias de is scioberus suus, scoberrendi debbilesas e liòngius inabetaus. Unu romanzu chi cumpudat su discumbéniu de una sotziedadi pratzia intra cumpetitzioni e solidadi, innui genti manna e piciocheddus si ponint ananti de is debbilesas insoru.
Poesia. Cun s’arregorta poética “Nel dopo”, Marco Corsi cumpudat sa chistionada intra passau e benidori, proietendi s’atualidadi in una dimensioni bisadora e suspéndia, innui su tempus s’ammànniat e su spàtziu diventat un’ambienti baddarincu únicu chi imprassat dónnia cosa. Cun unu léssicu arricu e una scritura chi si stésiat de is modellus traditzionalis, Corsi intritzat memória, presenti e avertimentu, ponendi in sa poesia sa trabballosidadi de un’esisténtzia chi imprassat arregodus antigus e possibbilidadis de su benidori. Un’òpera chi cunfirmat sa maturidadi de s’autori, capassu de fraigai una manera de contai globali e trisinadora.
Sa giuria. Su scioberu de is tres finalistas e is bincidoris funt su resurtau de su trabballu de una giuria cualificada meda, ghiada de Anna Dolfi, esperta manna de s’òpera de Dessì, e cumposta de professoris universitàrius: Duilio Caocci, Gino Ruozzi, Nicola Turi, Giuseppe Langella, Luigi Mascheroni, Francesca Serafini, Fabio Stassi e unu rapresentanti de sa Fondatzioni Dessì.
Is boxis de is istitutzionis. A sa tzerimónia ddoi fiant puru unus cantu de rapresentantis de is istitutzionis, cumenti a s’assessora regionali a sa Cultura Ilaria Portas, e is cunsilleris regionalis Emanuele Matta e Gigi Piano.
Sa presidenti de sa Fondatzioni Dessì, Debora Aru, in su discursu suu a cumintzu, at arregodau cumenti sa de 40 editzionis de su Prémiu siat puru unu momentu de bilànciu, ponendi in craru chi sa Fondatzioni non si ocupat scéti de su Prémiu Literàriu, ma est unu labboratóriu chi non spàciat mai e chi proponit assumancu 40 atóbius dónnia annu.
Su síndigu de Biddacidru Federico Sollai, candu s’est fata sa premiatzioni, at bófiu espressai unu pentzamentu chi ndi bessiat a foras de su cuntestu de sa serada, narendisí acanta de su pópulu palestinesu e arregodendi chi «sa cultura e is librus tenint oi prus de ariseru unu ruolu fondamentali: si agiudant a cresci cumenti a comunidadi, a ndi sciusciai is murus de s’ódiu e a fraigai unu benidori prus giustu e prus empàticu».
