15/07/2026
នាព្រឹកថ្ងៃពុធ ទី១៥ ខែកក្កដា ឆ្នាំ២០២៦ លោក លាង រឿនសុធី អភិបាល នៃគណៈអភិបាលក្រុងបូកគោ បានអញ្ជើញចូលរួមពិធីជួបសំណេះសំណាលជាមួយរដ្ឋបាលក្រុងបូកគោ ក្រុមប្រឹក្សាសង្កាត់ ស្មៀនសង្កាត់ និងអាជ្ញាធរពាក់ព័ន្ធ សរុបចំនួន ៦៩នាក់ ក្រោមអធិបតីភាពដ៏ខ្ពង់ខ្ពស់របស់ ក្រុមសមាជិកព្រឹទ្ធសភាប្រចាំភូមិភាគទី៥ ដឹកនាំដោយ ឯកឧត្តម ឈួន ឆាម ប្រធានស្តីទី នៅសាលប្រជុំសាលាក្រុងបូកគោ។
នៅក្នុងជំនួបនេះរៀបចំឡើងក្នុងគោលបំណងពង្រឹងទំនាក់ទំនងឱ្យកាន់តែជិតស្និទ្ធរវាងព្រឹទ្ធសភានិងមូលដ្ឋាន ព្រមទាំងរួមគ្នាស្វែងយល់ពីវឌ្ឍនភាព បញ្ហាប្រឈម និងស្វែងរកដំណោះស្រាយនានាលើការផ្តល់សេវាសាធារណៈ ការអនុវត្តគោលនយោបាយភូមិ ឃុំ សង្កាត់មានសុវត្ថិភាព និងការអភិវឌ្ឍហេដ្ឋារចនាសម្ព័ន្ធ។
ក្នុងឱកាសនោះ ឯកឧត្តមប្រធានស្តីទី បានពាំនាំនូវការផ្តាំផ្ញើសួរសុខទុក្ខប្រកបដោយក្តីនឹករលឹកពីសំណាក់ថ្នាក់ដឹកនាំព្រឹទ្ធសភា និងបានជម្រាបជូនអំពីមុខងារសំខាន់ៗរបស់ព្រឹទ្ធសភា ព្រមទាំងសមិទ្ធផលការងារជាច្រើនដែលព្រឹទ្ធសភានីតិកាលទី៥សម្រេចបាន និងលទ្ធផលការងារចុះផ្ទាល់របស់ក្រុមសមាជិកព្រឹទ្ធសភាប្រចាំភូមិភាគទី៥។
នៅក្នុងកិច្ចប្រជុំនេះ អង្គពិធីបានពិភាក្សាយ៉ាងផុសផុលលើប្រធានបទសំខាន់ៗចំនួន ៥ រួមមាន៖ ការងារអភិវឌ្ឍន៍មូលដ្ឋានឆ្នាំ២០២៥ និងទិសដៅឆ្នាំ២០២៦, ការអនុវត្តគោលនយោបាយភូមិ ឃុំ សង្កាត់មានសុវត្ថិភាព, ការផ្តល់សេវាសាធារណៈ, ឱកាសការងារសម្រាប់ពលករត្រឡប់មកពីប្រទេសថៃ និងការដោះស្រាយបញ្ហាប្រឈមនានា។ #រដ្ឋបាលក្រុងបូកគោ
