08/14/2026
សមត្ថកិច្ចបំភ្លឺករណីដឹកជញ្ជូនកុំព្យូទ័រតាមរថយន្តឯកជននៅប៉ោយប៉ែត គឺជាការរឹបអូសវត្ថុតាងទៅធ្វើកោសល្យវិច័យ
(បន្ទាយមានជ័យ)៖ មន្ត្រីនគរបាលនៃការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលខេត្តបន្ទាយមានជ័យ បានបញ្ជាក់បំភ្លឺប្រាប់សារព័ត៌មាន ខ្មែរជាយដែន នៅមុននេះបន្តិចថា សកម្មភាពមនុស្សកំពុងលើក និងជញ្ជូនកុំព្យូទ័រដាក់ក្នុងរថយន្តឯកជនមួយគ្រឿង ដែលពលរដ្ឋបានថតជាប់នោះ គឺជាប្រតិបត្តិការស្របច្បាប់របស់កងកម្លាំងសមត្ថកិច្ចក្នុងការដឹកជញ្ជូនវត្ថុតាងយកទៅធ្វើកោសល្យវិច័យ ពុំមែនជាសកម្មភាពរបស់ជនស៊ីវិលណាម្នាក់នោះឡើយ។
មន្ត្រីជំនាញបានបញ្ជាក់បន្ថែមថា សម្ភារៈកុំព្យូទ័រដែលជាវត្ថុតាងទាំងនោះ ត្រូវបានដាក់បញ្ចូលក្នុងរបាយការណ៍ផ្លូវការរាយការណ៍ជូនព្រះរាជអាជ្ញារួចរាល់ ព្រមទាំងបានឆ្លងកាត់ការត្រួតពិនិត្យ និងបិទស្លាកបោះត្រា (បិទស៊ីល) ត្រឹមត្រូវតាមនីតិវិធីច្បាប់ មុននឹងដឹកជញ្ជូនចេញពីទីតាំងបង្ក្រាប ស្ថិតក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ នាល្ងាចថ្ងៃទី១៤ ខែសីហានេះ។ តាមមន្ត្រីនគរបាលនៃការិយាល័យប្រឆាំងបទល្មើសបច្ចេកវិទ្យា ខណៈបង្ក្រាប និងដឹកជញ្ជូនវត្ថុតាងយកទៅធ្វើកោសល្យវិច័យ កងកម្លាំងបានពាក់ឯកសណ្ឋានមានអក្សរសំគាល់ការរិយាល័យប្រឆាំងបទល្មើសបច្ចេកវិទ្យាខេត្តបន្ទាយមានជ័យនិងមានពាក់កាតសម្គាល់ខ្លួនត្រឹមត្រូវផងដែរ។
