Heng Sophannarith, Phnom Penh (2026)

25/09/2026

បុគ្គលិកអប់រំ និងនិស្សិតនៃសាកលវិទ្យាល័យវេស្ទើន ចូលរួមសិក្ខាសាលាស្តីពី “ការបញ្ជ្រាបការយល់ដឹង អំពីសិទ្ធិជាមូលដ្ឋាននៃរបបសន្តិសុខសង្គម” ដើម្បីស្វែងយល់ពីសិទ្ធិ និងកាតព្វកិច្ចក្នុងការចូលរួមរបបសន្តិសុខសង្គម.....................................
(ភ្នំពេញ)៖ នារសៀលថ្ងៃទី២៥ ខែកញ្ញា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតីបើកសិក្ខាសាលាស្តីពី “ការបញ្ជ្រាបការយល់ដឹងអំពីសិទ្ធិជាមូលដ្ឋាននៃរបបសន្តិសុខសង្គម” ជូនដល់បុគ្គលិកអប់រំ និងនិស្សិត នៃសាកលវិទ្យាល័យវេស្ទើន ដោយមានអ្នកចូលរួមប្រមាណជាង ២០០នាក់។

ក្នុងឱកាសនេះដែរ ឯកឧត្តមបណ្ឌិតអគ្គនាយករង ប.ស.ស. បានបញ្ជាក់ថា បុគ្គលិកអប់រំ និងនិស្សិត ដែលបានចូលរួមក្នុងសិក្ខាសាលាផ្សព្វផ្សាយនេះ និងទទួលបានការយល់ដឹងកាន់តែច្បាស់អំពីអត្ថប្រយោជន៍របបសន្តិសុខសង្គម ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន និងស្វែងយល់ពីសិទ្ធិ កាតព្វកិច្ច ក្នុងការចូលរួមរបបសន្តិសុខសង្គមនៅកម្ពុជា ព្រមទាំងវឌ្ឍនភាពថ្មីៗ ជាពិសេសការអនុវត្តគោលនយោបាយថ្មីៗរបស់រាជរដ្ឋាភិបាល ដូចជារបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុករបស់សមាជិក ប.ស.ស.។

ទន្ទឹមនឹងនេះ ឯកឧត្តមបណ្ឌិតអគ្គនាយករង បានផ្ដាំផ្ញើដល់សិក្ខាកាមទាំងអស់ ឱ្យយកចិត្តទុកដាក់ត្រងត្រាប់ស្ដាប់បទបង្ហាញរបស់មន្ត្រីជំនាញ ប.ស.ស. ដោយស្មារតីទទួលខុសត្រូវខ្ពស់ ព្រមទាំងចូលរួមលើកជាសំណួរ ឬចម្ងល់ផ្សេងៗ ដើម្បីទទួលបានការពន្យល់បន្ថែមឱ្យបានយល់កាន់តែច្បាស់ និងត្រឹមត្រូវ ព្រមទាំងអាចយកចំណេះដឹងទាំងនេះទៅធ្វើការផ្សព្វផ្សាយបន្តប្រកបដោយប្រសិទ្ធភាព។

ជាមួយគ្នានេះដែរ លោកបណ្ឌិត កៀង រតនា សាកលវិទ្យាធិការ នៃសាកលវិទ្យាល័យវេស្ទើន បានថ្លែងអំណរគុណដល់ថ្នាក់ដឹកនាំ ប.ស.ស. និងបានជំរុញលើកទឹកចិត្តដល់សិក្ខាកាមទាំងអស់ ឱ្យខិតខំយកចិត្តទុកដាក់ស្ដាប់ ក្រេបជញ្ជក់ចំណេះដឹង និងបទពិសោធល្អៗ ដើម្បីជាទុនបន្ថែមក្នុងការអភិវឌ្ឍសមត្ថភាពរបស់ខ្លួនឱ្យកាន់តែប្រសើរឡើង៕

24/09/2026

អបអរសាទរ ខួបលើកទី៣៣ ទិវាប្រកាសរដ្ឋធម្មនុញ្ញ
(២៤ កញ្ញា ១៩៩៣ - ២៤ កញ្ញា ២០២៦)

#បសស

23/09/2026

ផៃ វួចនា មិននឹកស្មានថា ខ្លួនឯងមានជំងឺបែបនេះ ដែលជាជំងឺតម្រូវឱ្យវះកាត់!
នាងស្ទើរតែអស់សង្ឃឹមក្នុងជីវិតទៅហើយ ដោយនាងគិតបារម្ភរឿងវះកាត់ ព្រោះនាងខ្លាច ខ្លាចមិនអាចនៅមើលឃើញមុខកូនៗរបស់នាងបន្តទៀត
តែជាភ័ព្វសំណាង វួចនា ទទួលបានការវះកាត់ដោយជោគជ័យក្នុងមន្ទីរពេទ្យខេត្តពោធិ៍សាត់ ដោយប្រើប្រាស់ប័ណ្ណសមាជិក ប.ស.ស.

#បសស

23/09/2026

ភ្នំពេញ៖ នាព្រឹកថ្ងៃពុធ ទី២៣ ខែកញ្ញា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អនុប្រធានក្រុមការងារសហភាពសហព័ន្ធយុវជនកម្ពុជា វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ បានអញ្ជើញចូលរួមកិច្ចប្រជុំប្រចាំខែកញ្ញា ឆ្នាំ២០២៦ និងទិសដៅអនុវត្តបន្ត ក្រោមអធិបតីភាព ឯកឧត្តម ទុយ ស៊ីផាន់ សមាជិកគណៈកម្មាធិការកណ្តាល ស.ស.យ.ក.និងជាអនុប្រធានក្រុមការងារ និងជាប្រធានក្រុមការងារ ស.ស.យ.ក. ក្នុងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ដើម្បីពិនិត្យអំពីលទ្ធផលការងារប្រចាំខែ ក៏ដូចជាលើកទិសដៅអនុវត្តបន្តរបស់ផ្នែកលេខាធិការដ្ឋានចំណុះអង្គភាពក្រោមឪវាទ កម្មិវធីនេះប្រព្រឹត្តទៅនៅសាលប្រជុំ ជាន់ទី៩ នៃទីស្តីការក្រសួងការងារ និងបណ្តុះបណ្តាលវិជ្ជាជីវៈ ដោយមានសមាជិក សមាជិកាចូលរួមប្រមាណជាង ៤០រូប។

22/09/2026

ឯកឧត្តមបណ្ឌិត ហេង សុផាន់ណារិទ្ធ៖ សុខភាព សុវត្ថិភាព និងអាយុជីវិតរបស់កម្មករនិយោជិត គឺជាធនធានដ៏មានតម្លៃបំផុតសម្រាប់រោងចក្រ សហគ្រាស និងសង្គមជាតិ
………………
ភ្នំពេញ៖ សុខភាព សុវត្ថិភាព និងអាយុជីវិតរបស់បងប្អូនកម្មករនិយោជិត គឺជាធនធានដ៏មានតម្លៃបំផុតសម្រាប់រោងចក្រ សហគ្រាស និងសង្គមជាតិទាំងមូល។ ផ្ទុយទៅវិញ គ្រោះថ្នាក់ចរាចរណ៍នៅតែជាប្រភពហានិភ័យ និងជាបញ្ហាប្រឈមដ៏ធ្ងន់ធ្ងរ ដែលជះឥទ្ធិពលអវិជ្ជមានដល់សុភមង្គលគ្រួសារ ផលិតភាពការងារ និងស្ថិរភាពសេដ្ឋកិច្ច។

នេះជាការលើកឡើងរបស់ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ ក្នុងឱកាសអញ្ជើញជាអធិបតីភាពបើកសិក្ខាសាលាពិគ្រោះយោបល់ស្តីពី "ការបង្កើត និងអនុវត្តគោលនយោបាយកម្រិតរោងចក្រស្តីពីសុវត្ថិភាពចរាចរណ៍ផ្លូវគោក" នៅសណ្ឋាគារកាំបូឌីយ៉ាណា រាជធានីភ្នំពេញ នាព្រឹកថ្ងៃទី២២ ខែកញ្ញា ឆ្នាំ២០២៦នេះ ដោយមានអ្នកចូលរួមប្រមាណជា ១០០នាក់។

ឯកឧត្តមបណ្ឌិតអគ្គនាយករង ប.ស.ស. បានគូសបញ្ជាក់ថា បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានជំរុញការកែលម្អរថយន្តដឹកទំនិញ ទៅជារថយន្តដឹកជញ្ជូនបងប្អូនកម្មករនិយោជិតឱ្យកាន់តែមានផាសុកភាព និងសុវត្ថិភាពយ៉ាងយូរត្រឹមឆ្នាំ២០២៧ ក្នុងគោលដៅកាត់បន្ថយអត្រាគ្រោះថ្នាក់ចរាចរណ៍ផ្លូវគោក របស់កម្មករនិយោជិត ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តមបណ្ឌិតអគ្គនាយករង បានបន្តទៀតថា គិតត្រឹមខែសីហា ឆ្នាំ២០២៦នេះ ប.ស.ស. ក្នុងនាមជាសេនាធិការឱ្យក្រសួងការងារ និងបណ្តុះបណ្តាលវិជ្ជាជីវៈ បានជំរុញការកែលម្អរថយន្តដឹកជញ្ជូនកម្មករនិយោជិតប្រភេទដឹកទំនិញបានចំនួន ៣៦៥គ្រឿង រួចមកហើយ និងកំពុងសហការយ៉ាងសកម្មជាមួយក្រុមហ៊ុនផលិតយានយន្តក្នុងស្រុក ដើម្បីផ្តល់ជម្រើសរថយន្តដឹកអ្នកដំណើរដែលមានសុវត្ថិភាព និងផាសុកភាព ឬជម្រើសបច្ចេកទេសក្នុងការកែលម្អរថយន្តស្របតាមស្តង់ដាដែលគាំទ្រដោយ ប.ស.ស. សម្រាប់អ្នកដែលមិនទាន់មានលទ្ធភាពប្តូររថយន្តថ្មី។

ជាទីបញ្ចប់ ឯកឧត្តមបណ្ឌិតអគ្គនាយករង បានថ្លែងអំណរគុណយ៉ាងស្មោះស្ម័គ្រ ចំពោះលោកស្រី ហ្រ្វោគជឹះ ប៊ូឡឺ ប្រធានគម្រោង BFC នៃអង្គការ ILO លោក គឹម បញ្ញា នាយកអង្គការ AIP Foundation ប្រចាំប្រទេសកម្ពុជា និងតំណាងអង្គការដៃគូទាំងអស់ ដែលបានផ្តួចផ្តើម និងគាំទ្ររៀបចំវេទិកានេះឡើង ដើម្បីប្រមូលធាតុចូល និងអនុសាសន៍ល្អៗសម្រាប់ជាមូលដ្ឋានគ្រឹះក្នុងការដាក់ឱ្យអនុវត្តគោលនយោបាយកម្រិតរោងចក្រនាពេលឆាប់ៗខាងមុខ៕

18/09/2026

ការទៅទទួលសេវាព្យាបាលនៅមន្ទីរពេទ្យឆ្ងាយផ្ទះ គឺអាចធ្វើឱ្យអ្នកបាត់បង់ឱកាសក្នុងការសង្គ្រោះជីវិត!

សូមជ្រើសរើសមន្ទីរពេទ្យជិតផ្ទះ ដើម្បីទទួលបានការព្យាបាល និងសង្គ្រោះជីវិតបានទាន់ពេលវេលា។

លក្ខខណ្ឌផ្សេងៗ ត្រូវបានអនុវត្ត!!!
#បសស
———————————————

18/09/2026

មន្ត្រីរាជការថ្នាក់ក្រោមជាតិ នៃរដ្ឋបាលខេត្តព្រះវិហារ ចូលរួមក្នុងសិក្ខាសាលាផ្សព្វផ្សាយស្ដីពី "ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់មន្រ្តីសាធារណៈ" ដើម្បីស្វែងយល់ពីវឌ្ឍនភាព និងអត្ថប្រយោជន៍ផ្សេងៗ របស់ ប.ស.ស.
………………
ខេត្តព្រះវិហារ៖ នាព្រឹកថ្ងៃទី១៨ ខែកញ្ញា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតីបើកសិក្ខាសាលាផ្សព្វផ្សាយស្ដីពី "ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់មន្ត្រីសាធារណៈ" ជូនដល់ថ្នាក់ដឹកនាំ និងមន្ត្រីរាជការក្រោមឱវាទរដ្ឋបាលខេត្តព្រះវិហារ សរុបប្រមាណជា ១៩០នាក់ នៅសាខា ប.ស.ស. ខេត្តព្រះវិហារ។

ថ្លែងឡើងក្នុងឱកាសនោះ ឯកឧត្តមបណ្ឌិតអគ្គនាយករង ប.ស.ស. បានឱ្យដឹងថា បច្ចុប្បន្ននៅក្នុងខេត្តព្រះវិហារ មានមន្រ្តីរាជការ មន្រ្តីជាប់កិច្ចសន្យា ក្រុមប្រឹក្សាខេត្ត ក្រុង/ស្រុក ឃុំ/សង្កាត់ ប្រធាន/អនុប្រធាន និងសមាជិកភូមិ ប្រធាន/អនុប្រធាន ការិយាល័យប្រជាពលរដ្ឋ អតីតមន្រ្តីរាជការ អតីតយុទ្ធជន បានចុះបញ្ជីជាមួយ ប.ស.ស. សរុបចំនួន ១០ ៥២៩នាក់ ដោយក្នុងនោះមានមេគ្រួសារចំនួន ២ ១០២នាក់ បានយកអ្នកក្នុងបន្ទុករបស់ពួកគាត់មកចុះឈ្មោះចូលជាសមាជិក ប.ស.ស. ផ្នែកថែទាំសុខភាពតាមរបបភាគទានដោយស្ម័គ្រចិត្ត ក្នុងនោះមានសហព័ទ្ធចំនួន ១ ២២៧នាក់ និងកូនក្នុងបន្ទុកចំនួន ៣ ៣៧៨នាក់។

ឯកឧត្តមបណ្ឌិតអគ្គនាយករង បានបន្តទៀតថា មន្រ្តីរាជការ ដែលបាននាំអ្នកក្នុងបន្ទុក រួមមាន ប្តី ឬប្រពន្ធ និងកូនចុះបញ្ជីជាសមាជិក ប.ស.ស. រួចរាល់នឹងទទួលបានការគាំពារផ្នែកថែទាំសុខភាពតាមរបបភាគទានដោយស្ម័គ្រចិត្ត រួមមាន សេវាពិនិត្យ និងព្យាបាល ដោយមិនព្រួយបារម្ភពីបន្ទុកចំណាយច្រើន នៅតាមមន្ទីរពេទ្យជាដៃគូ ប.ស.ស. រួមទាំងអត្ថប្រយោជន៍ផ្សេងៗទៀតពី ប.ស.ស. ផងដែរ។

ជាមួយគ្នានោះដែរ ឯកឧត្តម យឹម បញ្ញា អភិបាលរង តំណាង ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ បានសម្តែងនូវការអរគុណដល់ថ្នាក់ដឹកនាំ ប.ស.ស. ព្រមទាំងជំរុញដល់អ្នកចូលរួមទាំងអស់ត្រូវនាំសមាជិកគ្រួសារក្នុងបន្ទុករបស់ខ្លួន មកចុះឈ្មោះចូលជាសមាជិក ប.ស.ស. ឱ្យបានគ្រប់ៗគ្នា ដើម្បីធានាបាននូវអត្ថប្រយោជន៍ និងលើកកម្ពស់សុខុមាលភាពគ្រួសារប្រកបដោយភាពកក់ក្តៅ៕

18/09/2026

សេចក្តីជូនដំណឹង ស្តីពី កាលបរិច្ឆេទនៃការផ្តល់សេវា ប.ស.ស. នៅអគារទីស្នាក់ការកណ្តាល ប.ស.ស. សាខា ប.ស.ស. ខេត្ត-ខណ្ឌ និងសាខាតាមផ្សារទំនើបអ៊ីអនម៉លទាំង៣ទីតាំង

17/09/2026

ឯកឧត្តមបណ្ឌិត ហេង សុផាន់ណារិទ្ធ ទទួលជួបសម្តែងការគួរសម និងពិភាក្សាការងារជាមួយតំណាងសមាគមសហព័ន្ធសេវាអប់រំនៅកម្ពុជា ដើម្បីពង្រឹងកិច្ចសហការ និងការគាំពារសន្តិសុខសង្គម ដល់បុគ្គលិកអប់រំក្នុងវិស័យឯកជន...............
ភ្នំពេញ៖ នាព្រឹកថ្ងៃទី១៧ ខែកញ្ញា ឆ្នាំ២០២៦នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានទទួលជួបសម្ដែងការគួរសម និងពិភាក្សាការងារជាមួយលោក គង់ សំនៀង ទីប្រឹក្សាសមាគមសហព័ន្ធសេវាអប់រំនៅកម្ពុជា តំណាងឯកឧត្តមបណ្ឌិត ហុង លីម សហស្ថាបនិក និងប្រធានក្រុមប្រឹក្សាភិបាលសមាគមសហព័ន្ធសេវាអប់រំនៅកម្ពុជា នៅស្នាក់កណ្ដាល ប.ស.ស. រាជាធានីភ្នំពេញ។

ក្នុងជំនួបសម្ដែងការគួរសមនោះ ឯកឧត្តមបណ្ឌិតអគ្គនាយករង ប.ស.ស. បានជម្រាបជូនពីអត្ថប្រយោជន៍នៃរបបសន្តិសុខសង្គម នីតិវិធីនៃការបង់ភាគទាន កាតព្វកិច្ចការចុះបញ្ជិកា ព្រមទាំងយន្តការនៃការចុះអធិការកិច្ច ដើម្បីធានាបាននូវអនុលោមភាព និងទទួលបានការគាំពារពី ប.ស.ស. សម្រាប់បុគ្គលិកអប់រំដែលបម្រើការងារក្នុងវិស័យក្នុងឯកជន ឱ្យកាន់តែមានប្រសិទ្ធភាព។

ទន្ទឹមនឹងនោះ ឯកឧត្តមបណ្ឌិតអគ្គនាយករង ប.ស.ស. ក៏បានសម្តែងនូវឆន្ទៈ ក្នុងការសហការជាមួយសមាគមសហព័ន្ធសេវាអប់រំនៅកម្ពុជា តាមរយៈការសម្របសម្រួលជួយដោះស្រាយបញ្ហាប្រឈម និងការផ្តល់សេវា ប.ស.ស. ដល់សមាជិកនៃសមាគម ក្នុងន័យការពារផលប្រយោជន៍ស្របច្បាប់របស់ពួកគាត់។

ជាមួយគ្នានេះ លោក គង់ សំនៀង ទីប្រឹក្សាសមាគម ក៏បានសម្តែងនូវការកោតសរសើរ ចំពោះការរីកចម្រើនគួរឱ្យកត់សម្គាល់របស់ ប.ស.ស. នៅទូទាំងប្រទេស ជាពិសេសគឺគុណភាពនៃការផ្តល់សេវានៅតាមមន្ទីរពេទ្យដៃគូ ប.ស.ស. ដែលក្រុមគ្រូពេទ្យបានយកចិត្តទុកដាក់ និងការផ្តល់សេវាជូនដល់សមាជិក ប.ស.ស. លឿន រហ័ស ប្រកបដោយការទទួលខុសត្រូវខ្ពស់។

នៅចុងបញ្ចប់ លោកទីប្រឹក្សាសមាគម បានថ្លែងអំណរគុណ ចំពោះថ្នាក់ដឹកនាំ និងមន្ត្រីជំនាញ ប.ស.ស. ដែលបានចំណាយពេលវេលាដ៏មានតម្លៃ ដើម្បីជួបពិភាក្សាផ្លាស់ប្តូរយោបល់ និងឆ្លើយតបនូវរាល់ចម្ងល់នានា ប្រកបដោយភាពស្និទ្ធស្នាល និងការទទួលខុសត្រូវខ្ពស់៕

15/09/2026

ឯកឧត្តមបណ្ឌិត ហេង សុផាន់ណារិទ្ធ អញ្ជើញចូលរួមជាគណៈអធិបតីក្នុងពិធីសំណេះសំណាលជាមួយសិស្សានុសិស្សប្រឡងមធ្យមសិក្សាទុតិយភូមិ ឆ្នាំសិក្សា ២០២៥-២០២៦ និងអាណាព្យាបាលសិស្ស ក្នុងស្រុកកំពង់សៀម
------------------------
(កំពង់ចាម)៖ នៅព្រឹកថ្ងៃទី១៥ ខែកញ្ញា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អនុប្រធានក្រុមការងារចុះជួយមូលដ្ឋានស្រុកកំពង់សៀម និងជាប្រធានក្រុមការងារចុះជួយមូលដ្ឋានឃុំទ្រាន បានអញ្ជើញចូលរួមជាគណៈអធិបតីក្នុងពិធីសំណេះសំណាលជាមួយសិស្សានុសិស្សប្រឡងមធ្យមសិក្សាទុតិយភូមិ ឆ្នាំសិក្សា ២០២៥-២០២៦ និងអាណាព្យាបាលសិស្ស ក្នុងស្រុកកំពង់សៀម សរុបប្រមាណ ៦១១ នាក់ ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហេង សួរ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់សៀម។

ពិធីសំណេះសំណាលខាងលើនេះ ត្រូវបានរៀបចំឡើងក្នុងគោលបំណងលើកទឹកចិត្ត និងតម្រង់ទិសផ្លូវសិក្សាសម្រាប់អនាគតយុវជនក្នុងមូលដ្ឋានស្រុកកំពង់សៀម ដែលទើបប្រឡងបញ្ចប់មធ្យមសិក្សាទុតិយភូមិថ្មីៗ ដើម្បីឱ្យពួកគេអាចត្រៀមខ្លួន ទាំងការជ្រើសរើសជំនាញសិក្សានៅថ្នាក់ឧត្តមសិក្សា និងការបណ្តុះបណ្តាលបច្ចេកទេសនិងវិជ្ជាជីវៈ ឱ្យស្របតាមតម្រូវការទីផ្សារការងារ សំដៅបន្តដំណើរឆ្ពោះទៅរកភាពជោគជ័យក្នុងជីវិត និងក្លាយជាសសរទ្រូងដ៏រឹងមាំក្នុងការអភិវឌ្ឍប្រទេសជាតិ។

សូមបញ្ជាក់ថា ពិធីសំណេះសំណាលនេះ បានប្រព្រឹត្តទៅដោយផ្ទាល់នៅមជ្ឈមណ្ឌលសន្តិភាព ស្ថិតក្នុងក្រុងកំពង់ចាម ដោយមានការចូលរួមពីសំណាក់លោក លោកស្រីតំណាងរដ្ឋបាលខេត្តកំពង់ចាម និងស្រុកកំពង់សៀម លោកគ្រូ អ្នកគ្រូ អាជ្ញាធរគ្រប់លំដាប់ថ្នាក់ ព្រមទាំងក្មួយៗសិស្សានុសិស្ស អាណាព្យាបាល និងសមាជិកគ្រួសារសិស្ស នៃស្រុកកំពង់សៀម សរុបប្រមាណ ១ ៦០០ នាក់៕

Heng Sophannarith

25/09/2026

24/09/2026

23/09/2026

23/09/2026

22/09/2026

18/09/2026

18/09/2026

18/09/2026

17/09/2026

15/09/2026

Address

Telephone

Website

Alerts

Shortcuts

Share

Category

Listing takedown request