ECCD Cambodia

07/10/2026

06/10/2026

សកម្មភាពវគ្គបណ្តុះបណ្តាលទារកវប្បករស្តីពីការរៀបចំកិច្ចដំណើរការទារកដ្ឋាននៅខេត្តព្រៃវែង កំពត និងខេត្តបន្ទាយមានជ័យ​។
ក្រុមគ្រូឧទ្ទេសជំនាញនៃនាយកដ្ឋានអប់រំកុមារបាននិងកំពុងដឹកនាំក្នុងកម្មវិធី​បណ្តុះបណ្តាលអំពីសកម្មភាពពាក់ព័ន្ធនិងការភ្ញោច និងការធ្វើអន្តរាគមន៍ទាន់ពេលសម្រាប់កុមារលូតលាស់យឺត ឬមានភាពមិនប្រក្រតី។​ អ្នកចូលរួមជាទារកវប្បករទាំងអស់ បានយកចិត្តទុកដាក់ក្នុងការកត់ត្រាចំណុចសំខាន់ដែលគ្រូឧទ្ទេសបង្ហាត់បង្ហាញ ការអនុវត្តសកម្មភាពជាក់ស្តែងនៃកិច្ចដំណើរការទារដ្ឋាន។

05/10/2026

វគ្គបណ្តុះបណ្តាលទារកវប្បករស្តីពីការរៀបចំកិច្ចដំណើរការទារកដ្ឋាន
=======
ព្រៃវែង៖ ថ្ងៃចន្ទ ៩រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែតុលា ឆ្នាំ២០២៦ ឯកឧត្តមបណ្ឌិត ប្រាក់ កុសល អគ្គលេខាធិការរងនៃអគ្គលេខាធិការដ្ឋានគណៈកម្មាធិការជាតិគាំពារនិងអភិវឌ្ឍកុមារតូច និងជាប្រធាននាយកដ្ឋានអប់រំកុមារតូច និងលោក លោកស្រីជាថ្នាក់ដឹកនាំនាយកដ្ឋានអប់រំកុមារតូចនៃក្រសួងអប់រំ យុវជន និងកីឡា បានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលទារកវប្បករដំណាក់កាលទី២ស្តីពីការរៀបចំកិច្ចដំណើរការទារកដ្ឋាន ដែលមានរយៈពេល ៥ថ្ងៃ ចាប់ពីថ្ងៃទី៥-៩ ខែតុលា ឆ្នាំ២០២៦ នៅខេត្តព្រៃវែង កំពត និងខេត្តបន្ទាយមានជ័យ ដែលមានសមាសភាពចូលរួមសរុបចំនួន ២៦៣នាក់ ស្រី ២១០នាក់ គាំទ្រថវិកាដោយគម្រោងកែលម្អការអប់រំកម្រិតមូលដ្ឋាន(BEIP)។
ជាកិច្ចស្វាគមន៍ ឯកឧត្តមបណ្ឌិត ប្រាក់ កុសល បានសម្តែងការអបអរសាទរទិវាគ្រូបង្រៀន ៥ តុលា ២០២៦ ជាឱកាសដ៏ល្អប្រពៃ ក្នុងការបង្កើនកាអនុវត្តជាក់ស្តែងដើម្បីផ្តល់អត្ថប្រយោជន៍ផ្ទាល់ដល់កុមារតូច ដែលនឹងក្លាយជាធនធានមនុស្សសតវត្សរ៍ទី២១និងជាអ្នកបន្តវេនដ៏មានសក្តានុពលសម្រាប់អនាគតប្រទេសជាតិយើង។ ការពង្រឹងគុណភាពសេវាអប់រំកុមារតូច មានតួនាទីយ៉ាងសំខាន់ក្នុងការផ្តល់នូវមូលដ្ឋានគ្រឹះដ៏រឹងមាំ និងមិនអាចខ្វះបាន។ ក្នុងន័យនេះ ការផ្តល់សេវាទារកដ្ឋាន មិនមែនគ្រាន់តែជាកន្លែងថែទាំកុមារធម្មតាប៉ុណ្ណោះទេ ប៉ុន្តែថែមទាំងជាកន្លែងសំខាន់សម្រាប់បណ្តុះបណ្តាលកុមារ ឱ្យមានមូលដ្ឋានបំណិនរឹងមាំ មានទំនុកចិត្តលើខ្លួនឯង និងមានភាពធន់ អាចសម្របខ្លួនទៅនឹងបរិយាកាសសិក្សាថ្មីៗ និងអភិវឌ្ឍខ្លួនឯងដោយឯករាជ្យ។ វគ្គបណ្តុះបណ្តាលនាពេលនេះ គឺផ្ដោតទៅលើការគ្រប់គ្រង កិច្ចដំណើរការទារកដ្ឋាន ការកៀរគរ ការចូលរួមអំពីអ្នកពាក់ព័ន្ធ ជាពិសេសទារកវប្បករ(អ្នកថែទាំកុមារ)។ ជាចុងបញ្ចប់ឯកឧត្តមបណ្ឌិត បានផ្ដាំផ្ញើដល់សិក្ខាសាកាម ទាំងអស់ សូមយកចិត្តទុកដាក់ក្នុងការកត់ត្រាចំណុចសំខាន់ដែលគ្រូឧទ្ទេសបង្ហាត់បង្ហាញ ការអនុវត្តសកម្មភាពនានា ដើម្បីធានានិរន្ដរភាពនៃកិច្ចដំណើរការទារដ្ឋានរបស់យើង។

05/10/2026

អបអរសាទរ ទិវាគ្រូបង្រៀន ( ៥ តុលា ) ក្រោមប្រធានបទ «គ្រូបង្រៀន ជាសសរស្តម្ភនៃគរុកោសល្យទំនើប ដើម្បីកសាងធនធាន មនុស្សសតវត្សរ៍ទី២១»

ការប្រារព្ធទិវាគ្រូបង្រៀននេះឡើង ក្នុងគោលបំណងឆ្លុះបញ្ចាំងអំពី តួនាទីស្នូលរបស់គ្រូបង្រៀន ក្នុងការបណ្តុះសម្បទាគ្រប់ជ្រុងជ្រោយដល់យុវជន ដើម្បីអាចឆ្លើយតបទៅនឹងបរិបទពិភពលោក ដែលកំពុងប្រែប្រួលឥត ឈប់ឈរ។

៥ តុលា ២០២៦

✅សូម​ចុច​អាន​…..

បណ្ដាញ​សង្គម​ផ្លូវ​ការ​របស់​នាយ​កដ្ឋាន​អប់រំ​កុមារ​តូច
​
🌐Telegram | 🌐Facebook | 🌐Youtube

04/10/2026

អាយុ ៣ឆ្នាំ ជាវ័យសមស្របសម្រាប់កុមារចាប់ផ្ដើមចូលរៀនមត្តេយ្យសិក្សា។

🎒សូមប៉ាៗ ម៉ាក់ៗ កុំភ្លេចនាំកូនៗទៅចុះឈ្មោះចូលរៀននៅអាយុ ៣ឆ្នាំ ដើម្បីកសាងគ្រឹះសិក្សាសម្រាប់ការលូតលាស់នាពេលអនាគត។

តើលោកអ្នកបាននាំកូនតូចទៅចុះឈ្មោះចូលរៀនហើយឬនៅ?

Via: UNICEF Cambodia - ដើម្បីកុមារគ្រប់រូប

29/09/2026

វគ្គសិក្ខាសាលា​ពិគ្រោះយោបល់​អន្តរក្រសួងស្តីពី​ការ​ពិនិត្យ​ឡេីង​វិញ​ការរៀបចំបទ​ដ្ឋាន​គាំ​ទ្រ​សម្រាប់​អនុវិស័យ​កុមារ​តូច​
========
សៀមរាប​៖ ថ្ងៃអង្គារ​ ៣រោច ខែភទ្របទ ឆ្នាំមមី អដ្ឋ​ស័ក ព.ស ២៥៦៩ ត្រូវថ្ងៃទី២៦ ខែកញ្ញា​ ឆ្នាំ២០២៦ អគ្គលេខាធិការដ្ឋាននៃគណៈកម្មាធិការជាតិគាំពារ និងអភិវឌ្ឍកុមារតូច បានដឹកនាំសិក្ខាសាលាពិគ្រោះយោបល់អន្តរក្រសួង ដែលមានសមាសភាពតំណាងក្រសួងពាក់ព័ន្ធ និងក្រុមការងារជំនាញ ដើម្បីពិនិត្យ​និងពិភាក្សាការរៀបចំបទ​ដ្ឋាន​គាំ​ទ្រ​សម្រាប់​អនុវិស័យ​កុមារ​តូច​ ដែលមានសមាសភាពចូលរួមសរុបចំនួន ៤៩នាក់ ស្រី ២៣នាក់។ វគ្គសិក្ខាសាលា​ពិគ្រោះយោបល់​នេះ ប្រើប្រាស់ថវិកាគម្រោងកែលម្អ ចំណេះទូទៅ-មូលនិធិបន្ថែម (GEIP-AF)។

29/09/2026

សូមជម្រាបជូនលោក-លោកស្រី មានចំណាប់អារម្មណ៏ចូលរួមវគ្គបណ្តុះបណ្តាលខ្លីស្តីពីរៀនតាមរយៈការលេង និង​​ការស្វែងរក​ឱកាស​បន្ត​ការ​រៀន​សូត្រ​នៅ​ទីក្រុងហុងកុង​ដែលឧទ្ទេសដោយអ្នកឯកទេសពីហុងកុង ដែលនឹងប្រព្រឹត្តទៅថ្ងៃ22-23 ខែតុលា ឆ្នាំ2026 សូមមេត្តាស្គែនចុះឈ្មោះចូលរួមតាមQR ដូចមានភ្ជាប់នេះ។

26/09/2026

ថ្ងៃទី២៦ ខែកញ្ញា ឆ្នាំ២០២៦ ក្រុមការងារជំនាញក្រសួងអប់រំ យុវជន និងកីឡា និងតំណា​ធនាគារ​ពិភពលោក​ប្រចាំ​កម្ពុជា​ដឹកនាំដោយឯកឧត្តម ឈួន ប៊ុនឈឿន អគ្គលេខាធិការរង គណៈកម្មាធិការជាតិគាំពារនិងអភិវឌ្ឍន៍កុមារតូច និងជាអនុប្រធាននាយកដ្ឋានអប់រំកុមារតូច ថ្នាក់ដឹកនាំនាយកដ្ឋានអប់រំកុមារតូច និងមន្ត្រីពាក់ព័ន្ធ បានចុះ​ពិនិត្យទីតាំងសាលារៀនគោលដៅអនុវត្តកិច្ចដំណើរការកម្មវិធីទារកដ្ឋាន(ជំហាន២) គាំទ្រដោយគម្រោងកែលម្អការអប់រំកម្រិតមូលដ្ឋាន(BEIP)។

24/09/2026

សាលាស្តីពីការរៀនសូត្រចិត្តសង្គមសម្រាប់កុមារតូច
=====
សៀមរាប៖ ថ្ងៃព្រហស្បតិ៍ ១៣កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៤ ខែកញ្ញា ឆ្នាំ២០២៦ នាយកដ្ឋានអប់រំកុមារតូច បានរៀបចំ សិក្ខាសាលាស្តីពីការរៀនសូត្រចិត្តសង្គមសម្រាប់កុមារតូច ក្រោមអធិបតីភាពថ្នាក់ដឹកនាំនាយកដ្ឋានអប់រំកុមារតូច និងមានការចូលរួមពីថ្នាក់ដឹកនាំមន្ទីរអប់រំ យុវជន និងកីឡាខេត្តក្រចេះ រតនគិរី ព្រះវិហារ និងខេត្តសៀមរាប សរុបចំនួន ២៧នាក់ ស្រី១៥នាក់។ វគ្គសិក្ខាសាលានេះ មានគោលបំណង ផ្សព្វផ្សាយខ្លឹមសារការរៀនសូត្រចិត្តសង្គមដល់អ្នកពាក់ព័ន្ធ លើកកម្ពស់សមត្ថភាពថ្នាក់ក្រោមជាតិឱ្យមានបំណិនប្រតិបត្តិចិត្តសង្គម ដើម្បីរួមចំណែកទប់ស្កាត់ អំពើហិង្សា និងរក្សាសុខសន្តិភាពប្រកបដោយ គុណភាព និងប្រសិទ្ធភាព។ សិក្ខាសាលានេះ ទទួលបានការឧបត្ថម្ភថវិកាដោយអង្គការ យូនីសេហ្វ(UNICEF)។

✅សូម​ចុច​អាន​…..

បណ្ដាញ​សង្គម​ផ្លូវ​ការ​របស់​នាយ​កដ្ឋាន​អប់រំ​កុមារ​តូច
​
🌐Telegram | 🌐Facebook | 🌐Youtube

23/09/2026

អបអរសាទរ ខួបលើកទី៣៣ ទិវាប្រកាសឱ្យប្រើប្រាស់រដ្ឋធម្មនុញ្ញនៃព្រះរាជាណាចក្រកម្ពុជា (២៤ កញ្ញា ១៩៩៣ – ២៤ កញ្ញា ២០២៦)

ថ្ងៃទី២៤ ខែកញ្ញា ឆ្នាំ២០២៦ នេះ គឺជាទិវាជាប្រវត្តិសាស្ត្រដែលប្រជាជាតិខ្មែរប្រារព្ធ ខួបលើកទី៣៣ នៃទិវាប្រកាសឱ្យប្រើប្រាស់រដ្ឋធម្មនុញ្ញ ដែលជាច្បាប់កំពូលនៃព្រះរាជាណាចក្រកម្ពុជា។

រដ្ឋធម្មនុញ្ញដែលប្រើប្រាស់សព្វថ្ងៃនេះ ជារដ្ឋធម្មនុញ្ញលើកទី៦ ត្រូវបានអនុម័តដោយសភាធម្មនុញ្ញ នៅថ្ងៃទី២១ ខែកញ្ញា ឆ្នាំ១៩៩៣ ហើយត្រូវបានអតីតព្រះមហាក្សត្រ ព្រះករុណា ព្រះបាទ សម្តេចព្រះនរោត្តម សីហនុ «ព្រះបរមរតនកោដ្ឋ»ឡាយព្រះហស្ថលេខាប្រកាសឱ្យប្រើប្រាស់ជាផ្លូវការ ដោយព្រះរាជក្រមចុះថ្ងៃទី២៤ ខែកញ្ញា ឆ្នាំ១៩៩៣។

រដ្ឋធម្មនុញ្ញ គឺជាច្បាប់កំពូលនៃព្រះរាជាណាចក្រកម្ពុជា។ រាល់ច្បាប់ និងសេចក្តីសម្រេចទាំងឡាយ នៃស្ថាប័ននានារបស់រដ្ឋ ត្រូវតែស្របនឹងរដ្ឋធម្មនុញ្ញជាដាច់ខាត។

ឆ្លងកាត់អាយុកាល ៣៣ឆ្នាំ រដ្ឋធម្មនុញ្ញមាន ១៦ជំពូក និង ១៥៨មាត្រា ដែលជាគ្រឹះទ្រទ្រង់សន្តិភាព និងការអភិវឌ្ឍ ក្នុងនោះបានចែងអំពីគោលការណ៍ នៃការបែងចែកអំណាចដាច់ដោយឡែកពីគ្នាគឺ៖ (១)អំណាចនីតិបញ្ញត្តិ (២)អំណាចនីតិប្រតិបត្តិ និង (៣)អំណាចតុលាការ ហើយក៏បានអនុម័តនូវសិទ្ធិជាមូលដ្ឋានរបស់ប្រជាពលរដ្ឋ និងគោលការណ៍នីតិរដ្ឋជាដើម។

ក្នុងឱកាសនេះ ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃគណៈកម្មាធិការជាតិ គាំពារនិងអភិវឌ្ឍកុមារតូច សូមសម្តែងនូវភក្តីភាព និងការប្តេជ្ញាចិត្តយ៉ាងមុតមាំ ក្នុងការគោរព និងការពារឱ្យបានខ្ជាប់ខ្ជួននូវរដ្ឋធម្មនុញ្ញ ព្រះមហាក្សត្រ និងរបបរាជានិយមអាស្រ័យរដ្ឋធម្មនុញ្ញ ព្រមទាំងចូលរួមថែរក្សាស្មារតីវប្បធម៌សន្តិភាព ស្ថិរភាពនយោបាយ និងការអភិវឌ្ឍជាតិ។ ជាមួយគ្នានេះ ក្រសួងក៏ប្ដេជ្ញាចិត្តលើកកម្ពស់អភិបាលកិច្ច តាមរយៈការកែទម្រង់រដ្ឋបាលសាធារណៈ ឱ្យកាន់តែមានប្រសិទ្ធភាព តម្លាភាព និងគណនេយ្យភាព ដើម្បីបម្រើផលប្រយោជន៍ដ៏ឧត្តុង្គឧត្តមរបស់ប្រជាពលរដ្ឋ និងសង្គមជាតិ៕

✅សូម​ចុច​អាន​…..

បណ្ដាញ​សង្គម​ផ្លូវ​ការ​របស់​នាយ​កដ្ឋាន​អប់រំ​កុមារ​តូច
​
🌐Telegram | 🌐Facebook | 🌐Youtube