06/08/2026
ព្រះវិហារ៖ ដោយបានការអនុញ្ញាត និងយកចិត្តទុកដាក់ដ៏ខ្ពង់ខ្ពស់ពី ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃព្រហស្បតិ៍ ៨រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៦ ខែសីហា ឆ្នាំ២០២៦ ឯកឧត្តម ខុម ផលលឿន ប្រតិភូរាជរដ្ឋាភិបាលទទួលបន្ទុកជានាយកមូលនិធិជនពិការ ដឹកនាំក្រុមការងារចុះពិនិត្យវឌ្ឍនភាពការងារក្នុងការផ្តល់សេវាជូនជនមានពិការភាពរបស់សាខាមូលធិនិជនពិការនិងរោងជាងស្តារលទ្ធភាពពលកម្មកាយសម្បទាខេត្តព្រះវិហារ ព្រមទាំងនាំយកអំណោយដ៏ថ្លៃថ្លារបស់ឯកឧត្តម ជា សុមេធី រដ្ឋមន្ត្រី និងលោកជំទាវ ជា ផល្គុន រួមមាន៖ ស្បៀងអាហារ គ្រឿងបរិភោគ ឧបភោគ កាបូបសិក្សា សម្លៀកបំពាក់ និងរទេះរុញ ដើម្បីផ្តល់ជូនជនមានពិការភាពក្រីក្រ ឬជួបការលំបាក ពិសេសជនមានពិការភាពកំពុងស្នាក់នៅជំរំសុវត្ថិភាពបណ្តោះអាសន្ន អតីតយុទ្ធជន និងនិវត្តន៍ជន។
ទន្ទឹមនេះ ឯកឧត្តមនាយក បានផ្តាំផ្ញើការសួរសុខទុក្ខនិងនឹករលឹករបស់ឯកឧត្តមរដ្ឋមន្ត្រីនិងលោកជំទាវ ដល់ថ្នាក់ដឹកនាំ និងមន្ត្រីរាជការទាំងអស់ នៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះវិហារ ព្រមទាំងបងប្អូនជនមានពិការភាពគ្រប់ៗរូបទូទាំងខេត្ត ពិសេសវីរៈកងទ័ព, អតីតយុទ្ធជន និងនិវត្តន៍។
លើសពីនេះមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងសាខាមូលនិធិជនពិការខេត្ត ត្រូវបន្តខិតខំបំពេញការងារផ្តល់សេវា និងយកចិត្តទុកដាក់តាមដានស្ថានភាពរបស់ជនមានពិការភាព ពិសេសអតីតយុទ្ធជន និវត្តន៍ជន និងដើម្បីធានាថាពួកគាត់ទទួលបានសេវាសង្គមកិច្ចសមស្រប៕
