28/07/2026
តើអ្នកដឹងទេថា នៅរាជធានីភ្នំពេញមានសិស្សសាលាជាង ៣៥០,០០០នាក់ កំពុងធ្វើដំណើរទៅ-មកពីផ្ទះ និងសាលារៀន (ចន្លោះពី ២-៤ ដង) ជារៀងរាល់ថ្ងៃ ហើយនៅកម្ពុជាមានសិស្សចំនួន ១២% ក្នុងចំណោមអត្រាមរណភាពដោយសារគ្រោះថ្នាក់ចរាចរណ៍ទាំងអស់ក្នុងឆ្នាំ២០១៩? នេះគឺជាវិបត្តិសុខភាពសាធារណៈដែលប៉ះពាល់ដល់យុវជនច្រើនជាងគេ។
ដើម្បីលើកកម្ពស់សុវត្ថិភាពនៅតាមតំបន់ជុំវិញសាលារៀន រដ្ឋបាលរាជធានីភ្នំពេញ បានសហការជាមួយអង្គការ Partnership for Healthy Cities ដាក់ឱ្យដំណើរការ “គម្រោងសុវត្ថិភាពនៅតំបន់ជុំវិញសាលារៀន” កាលពីខែសីហា ឆ្នាំ២០២៥។ ក្រោមការដឹកនាំ និងអនុសាសន៍ដ៏ខ្ពង់ខ្ពស់របស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ គម្រោងបានរើសយកសាលាបឋមសិក្សាចំនួនពីរជាអាទិភាព រួមមាន៖ សាលាមិត្តភាពកម្ពុជា-វៀតណាម និងសាលាបឋមសិក្សា ហ៊ុន សែន ចាក់អង្រែ ធ្វើជាទីតាំងសាលាគំរូក្នុងការរៀបចំសុវត្ថិភាពឱ្យប្រសើរជាងមុនសម្រាប់សិស្សានុសិស្ស តាមរយៈការកែលម្អហេដ្ឋារចនាសម្ព័ន្ធមួយចំនួន ការរៀបចំយុទ្ធនាការអប់រំផ្សព្វផ្សាយអំពី “ការបន្ថយល្បឿន” ការបើកវគ្គបណ្តុះបណ្តាលស្តីពីសុវត្ថិភាពចរាចរណ៍ផ្លូវគោក និងការរឹតបន្តឹងការអនុវត្តច្បាប់ និងការកំណត់ល្បឿនជាដើម។
សូមចូលរួមគោរពច្បាប់ចរាចរណ៍ទាំងអស់គ្នា ដេីម្បីការពារអាយុជីវិតអ្នក និងក្រុមគ្រួសាររបស់អ្នក។
#រដ្ឋបាលរាជធានីភ្នំពេញ
