13/07/2026
ក្រសួងផែនការ ប្រារព្ធ “ទិវាប្រជាជនពិភពលោកលើកទី៣៧” ដើម្បីលើកកម្ពស់សក្តានុពលប្រជាជនវ័យក្មេង ឆ្ពោះទៅកាន់ការអភិវឌ្ឍប្រកបដោយចីរភាព
រាជធានីភ្នំពេញ៖ នាថ្ងៃទី១៣ ខែកក្កដា ឆ្នាំ២០២៦ នៅសាលាភូមិន្ទរដ្ឋបាល ក្រសួងផែនការ បានរៀបចំពិធីអបអរសាទរ “ទិវាប្រជាជនពិភពលោកលើកទី៣៧ (១១ កក្កដា)” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មាធិការពិសេសតាមដានការអនុវត្តកម្មវិធីសកម្មភាពនៃសន្និសីទអន្តរជាតិ ស្តីពីប្រជាជននិងអភិវឌ្ឍន៍។
ពិធីនេះមានការអញ្ជើញចូលរួមពីសំណាក់ថ្នាក់ដឹកនាំ និងភ្ញៀវកិត្តិយសជាច្រើនរូប រួមមាន៖ ឯកឧត្តម លោកជំទាវ អនុប្រធាន សមាជិក សមាជិកា នៃគណៈកម្មាធិការពិសេសតាមដានការអនុវត្តកម្មវិធីសកម្មភាពនៃសន្និសីទអន្តរជាតិ ស្តីពីប្រជាជននិងអភិវឌ្ឍន៍, លោកស្រី សាន់ដ្រា ប៊ឺនក្លៅ (Sandra Bernklau) តំណាងអង្គការ UNFPA ប្រចាំកម្ពុជា, តំណាងស្ថាប័នរាជរដ្ឋាភិបាលកម្ពុជា, តំណាងដៃគូអភិវឌ្ឍន៍នានា, តំណាងអភិបាលនៃគណៈអភិបាលរាជធានី-ខេត្ត, ប្រធានមន្ទីរផែនការរាជធានី-ខេត្ត, អង្គការសង្គមស៊ីវិល និងសិស្សមន្ត្រីក្រមការនៃសាលាភូមិន្ទរដ្ឋបាល។
ក្នុងពិធីនេះ ឯកឧត្តមរដ្ឋមន្ត្រី បានគូសបញ្ជាក់ថា ទិវាប្រជាជនពិភពលោកឆ្នាំ២០២៦នេះ ប្រារព្ធឡើងក្រោមប្រធានបទ “ការសម្រេចបានក្តីសង្ឃឹម និងសេចក្តីប្រាថ្នារបស់ប្រជាជនវ័យក្មេង សម្រាប់ពេលបច្ចុប្បន្ននិងអនាគត” ” (Realizing the hopes and aspirations of young people - today and futures)។ ប្រធានបទនេះ គឺជាការឆ្លើយតបទៅនឹងស្ថានភាពប្រជាសាស្ត្រជាក់ស្តែងក្នុងបរិបទកម្ពុជា ដូចមានក្នុងសារលិខិតដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកម្ពុជានាពេលបច្ចុប្បន្នកំពុងស្ថិតក្នុងដំណាក់កាលភាគលាភប្រជាសាស្ត្រដ៏មានតម្លៃមួយ ដោយមានប្រជាជនវ័យក្មេងក្នុងសមាមាត្រយ៉ាងច្រើនលើសលប់។ យោងតាមរបាយការណ៍អង្កេតចន្លោះជំរឿនប្រជាជនឆ្នាំ២០២៤ ប្រជាជនកម្ពុជាមានចំនួន ១៧,៣ លាននាក់ ដោយក្នុងនោះ៖
វ័យក្រោម ១៥ ឆ្នាំ មាន ២៦,៨%
វ័យ ១៥-៣៤ ឆ្នាំ មាន ៣៤,៦%
វ័យ ៣៥-៦៤ ឆ្នាំ មាន ៣២,១%
វ័យ ៦៥ ឆ្នាំឡើង មាន ៦,៥%
ឯកឧត្តមរដ្ឋមន្ត្រីបានសង្កត់ធ្ងន់ថា ទិន្នន័យនេះបង្ហាញពីកាលានុវត្តភាពដ៏ធំធេងនៃភាគលាភប្រជាសាស្ត្រ ក្នុងការជំរុញការអភិវឌ្ឍសង្គម និងសេដ្ឋកិច្ចជាតិឱ្យមានសន្ទុះលឿនទៅមុខ ប្រសិនបើក្តីសង្ឃឹម និងសេចក្តីប្រាថ្នារបស់ពួកគាត់ ទទួលបានការគាំទ្រ និងការវិនិយោគចំទិសដៅ និងទាន់ពេលវេលា។។
ទន្ទឹមនឹងនេះ ផ្អែកលើទិន្នន័យចំណោលប្រជាជនថ្មី ក្នុងសេណារីយ៉ូអត្រាលទ្ធភាពមានកូនថយចុះក្នុងល្បឿនមធ្យម ប្រជាជនកម្ពុជានឹងកើនដល់ប្រហែល ២៤ លាននាក់នៅឆ្នាំ២០៥០ ដោយរចនាសម្ព័ន្ធអាយុនឹងមានការផ្លាស់ប្តូរដូចខាងក្រោម៖
វ័យក្រោម ១៥ ឆ្នាំ នឹងថយចុះមកនៅ ២១,៨%
វ័យ ១៥-៣៤ ឆ្នាំ នឹងថយចុះមកនៅ ២៨,២%
វ័យ ៣៥-៦៤ ឆ្នាំ នឹងកើនដល់ ៣៧,២%
វ័យ ៦៥ ឆ្នាំឡើង នឹងកើនដល់ ១២,៧%
ចំពោះនិន្នាការបម្រែបម្រួលប្រជាសាស្រ្តនេះ ឯកឧត្តមរដ្ឋមន្ត្រីបញ្ជាក់ថា ជាសញ្ញារំលឹកដល់ ក្រសួង ស្ថាប័នពាក់ព័ន្ធ ត្រូវរួមគ្នាដោយបុរេសកម្ម ដើម្បីចាប់យកកម្លាំងពលកម្មវ័យក្មេងនាពេលបច្ចុប្បន្ន ឱ្យក្លាយជាកម្លាំងផលិតភាពខ្ពស់ មានការងារសមរម្យ និងមានលទ្ធភាពកសាងសន្តិសុខហិរញ្ញវត្ថុគ្រួសារ។ ការរៀបចំខ្លួនតាំងពីវ័យក្មេងនេះ មិនត្រឹមតែជួយពង្រឹងសេដ្ឋកិច្ចជាតិនាពេលបច្ចុប្បន្នប៉ុណ្ណោះទេ ប៉ុន្តែថែមទាំងជាមូលដ្ឋានគ្រឹះក្នុងការបំប្លែងការកើនឡើងនៃមនុស្សវ័យចាស់ទៅថ្ងៃមុខ ឱ្យក្លាយទៅជាភាគលាភប្រជាសាស្ត្រទីពីរ ដែលរស់នៅប្រកបដោយសេចក្តីថ្លៃថ្នូរ និងមានសុខុមាលភាព។
ឯកឧត្តមរដ្ឋមន្ត្រីបានបន្តថា ឆ្លើយតបទៅនឹងបម្រែបម្រួលប្រជាសាស្ត្រនេះ ទាមទារឱ្យមានការរៀបចំគោលនយោបាយ និងយុទ្ធសាស្ត្រជាតិប្រកបដោយភាពបត់បែន ទាន់ពេល និងផ្អែកលើភស្តុតាងស្ថិតិ ដើម្បីធានាបាននូវគុណភាពជីវិត ការគោរពសិទ្ធិ និងជម្រើសរបស់ប្រជាពលរដ្ឋគ្រប់ជំនាន់។ ក្នុងនេះដែរ ក្រសួងផែនការ តែងតែដើរតួនាទីយ៉ាងសកម្មក្នុងការសហការជាមួយគ្រប់ភាគីពាក់ព័ន្ធ ដើម្បីចងក្រងទិន្នន័យ ស្រាវជ្រាវ និងតាក់តែងឯកសារគោលនយោបាយនានា ដែលឆ្លើយតបទៅនឹងបរិបទសង្គម-សេដ្ឋកិច្ចជាក់ស្តែង។
ជាមួយគ្នានេះ ឯកឧត្តមរដ្ឋមន្ត្រីបានគូសបញ្ជាក់អំពីចំណុចសំខាន់ៗមួយចំនួនបន្ថែមថា៖
ទិវាជាតិប្រជាជន៖ រាជរដ្ឋាភិបាលកម្ពុជាបានសម្រេចកំណត់យកថ្ងៃទី១១ ខែកក្កដា រៀងរាល់ឆ្នាំ ជា “ទិវាជាតិប្រជាជន” តាមរយៈអនុក្រឹត្យលេខ៩៨ អនក្រ.បក ចុះថ្ងៃទី២១ ខែឧសភា ឆ្នាំ២០២៦ ដើម្បីជំរុញការដោះស្រាយបញ្ហាបម្រែបម្រួលប្រជាសាស្ត្រ។
យុទ្ធសាស្ត្រអន្តរកាល៖ ក្នុងដំណើរការឆ្ពោះទៅរកការចាកចេញពីចំណាត់ថ្នាក់ប្រទេសអភិវឌ្ឍន៍តិចតួច (LDC) នៅខែធ្នូ ឆ្នាំ២០២៩ ក្រសួងផែនការកំពុងរៀបចំ “យុទ្ធសាស្ត្រអន្តរកាលដោយរលូន” (Smooth Transition Strategy) ដើម្បីធានាបាននូវស្ថិរភាព មោទនភាព និងចីរភាព។
ក្នុងឱកាសនេះដែរ ឯកឧត្តមរដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅចំពោះអង្គការសហប្រជាជាតិ (UNFPA) ប្រចាំកម្ពុជា, លោកស្រី សាន់ដ្រា ប៊ឺនក្លៅ (Sandra Bernklau) ព្រមទាំងដៃគូអភិវឌ្ឍន៍ និងគ្រប់ស្ថាប័នពាក់ព័ន្ធ ដែលបានបន្តគាំទ្រ និងសហការយ៉ាងសកម្មជាមួយក្រសួងផែនការ ដើម្បីកសាងសង្គមកម្ពុជាឱ្យមានភាពធន់ និងឆ្ពោះទៅសម្រេចបានចក្ខុវិស័យឆ្នាំ២០៥០៕
តេឡេក្រាម៖ https://go.gov.kh/mop/telegram
#ក្រសួងផែនការ
#ក្រុមការងារព័ត៌មាននិងបណ្តាញទំនាក់ទំនងសង្គមរបស់ក្រសួងផែនការ
