សមាគមទីភ្នាក់ងារទេសន្តរប្រវេសន៍ការងារកម្ពុជា

31/07/2026

កិច្ចពិភាក្សាត្រៀមរៀបចំសិក្ខាសាលាបណ្តុះបណ្តាលភាសាជប៉ុន សម្រាប់គ្រូភាសាជប៉ុនរបស់សមាជិកសមាគមអលម៉េក

នារសៀល ថ្ងៃសុក្រ ទី៣១ ខែកក្កដា ឆ្នាំ២០២៦ នៅសាលប្រជុំការិយាល័យទំនាក់ទំនងភ្នំពេញ នៃមូលនិធិជប៉ុន (The Japan Foundation) លោកស្រី អ៊ុង ទិត្យាសុវណ្ណារ៉ុប អនុប្រធានសមាគមទីភ្នាក់ងារទេសន្តរប្រវេសន៍ការងារកម្ពុជា និងជាប្រធានផ្នែកបណ្តុះបណ្តាល និងលោក ពិន វិរៈ នាយកប្រតិបត្តិ នៃសមាគមអលម៉េក (ALMAC) បានអញ្ជើញជួបពិភាក្សាការងារជាមួយ លោកស្រី Hirabayashi Chisaki ជំនួយការអគ្គនាយកការិយាល័យទំនាក់ទំនងភ្នំពេញ នៃមូលនិធិជប៉ុន (The Japan Foundation) និងសហការី។

កិច្ចជំនួបនេះ ក្នុងគោលបំណងពិភាក្សា និងត្រៀមរៀបចំសិក្ខាសាលាបណ្តុះបណ្តាលភាសាជប៉ុនសម្រាប់គ្រូភាសាជប៉ុនរបស់សមាជិកសមាគមអលម៉េក ដែលនឹងប្រព្រឹត្តិទៅនៅថ្ងៃទី៣ ខែកញ្ញា ឆ្នាំ២០២៦ នាពេលខាងមុខនេះ។ ភាគីទាំងពីរបានផ្លាស់ប្តូរយោបល់ និងពិភាក្សាលើការរៀបចំខ្លឹមសារ ឯកសារពាក់ព័ន្ធ របៀបវារៈ និងវិញ្ញាបនបត្រ សម្រាប់កម្មវិធីបណ្តុះបណ្តាល ដើម្បីធានាថាវគ្គបណ្តុះបណ្តាលអាចឆ្លើយតបទៅនឹងតម្រូវការជាក់ស្តែងរបស់សមាជិក និងជួយពង្រឹងសមត្ថភាពគ្រូបង្គោលក្នុងការបណ្តុះបណ្តាលភាសាជប៉ុនជូនដល់សិក្ខាកាម និងជនទេសន្តរប្រវេសន៍ការងារកម្ពុជាដែលមានបំណងទៅធ្វើការនៅប្រទេសជប៉ុន។

ជំនួបនេះ គឺជាផ្នែកមួយក្នុងការពង្រឹងកិច្ចសហប្រតិបត្តិការរវាង សមាគមអលម៉េក និងមូលនិធិជប៉ុន ក្នុងការអភិវឌ្ឍធនធានមនុស្ស ការលើកកម្ពស់សមត្ថភាពភាសាជប៉ុន និងការត្រៀមលក្ខណៈកាន់តែប្រសើរសម្រាប់ជនទេសន្តរប្រវេសន៍ការងារកម្ពុជាក្នុងការចូលរួមទីផ្សារការងារនៅប្រទេសជប៉ុន។

#អលម៉េក #ការបណ្តុះបណ្តាលភាសាជប៉ុន #ជនទេសន្តរប្រវេសន៍ការងារកម្ពុជា #កិច្ចសហប្រតិបត្តិការ

31/07/2026

កិច្ចប្រជុំពិភាក្សាអំពីកិច្ចសហប្រតិបត្តិការក្នុងវិស័យការងារ និងការបណ្តុះបណ្តាលជំនាញ រវាងកម្ពុជា និងរដ្ឋតាតាស្ថាន នៃសហព័ន្ធរុស្ស៊ី។

នាថ្ងៃទី២៩ ខែកក្កដា ឆ្នាំ២០២៦ នៅក្រសួងឧស្សាហកម្ម និងពាណិជ្ជកម្ម នៃរដ្ឋតាតាស្ថាន បានរៀបចំកិច្ចប្រជុំពិភាក្សាស្តីពីលទ្ធភាព និងយន្តការនៃកិច្ចសហប្រតិបត្តិការរវាងភាគីកម្ពុជា និងរដ្ឋតាតាស្ថាន ក្នុងវិស័យការងារ ការបណ្តុះបណ្តាលជំនាញ និងការបញ្ជូនសិក្ខាកាម និងជនទេសន្តរប្រវេសន៍ការងារកម្ពុជាទៅធ្វើការនៅរដ្ឋតាតាស្ថាន។

កិច្ចប្រជុំនេះ មានការអញ្ជើញដឹកនាំចូលរួមដោយ ឯកឧត្តម សេង សក្ដា រដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ (MLVT) អមដោយ លោក ខ្លេង សុខហ៊ ប្រធានសមាគមទីភ្នាក់ងារទេសន្តរប្រវេសន៍ការងារកម្ពុជា (ALMAC) និងសមាជិកប្រតិភូពាក់ព័ន្ធ ជួបពិភាក្សាការងារជាមួយ ឯកឧត្តម Oleg KOROBCHENKO ឧបនាយករដ្ឋមន្ត្រី រដ្ឋមន្ត្រីក្រសួងឧស្សាហកម្ម និងពាណិជ្ជកម្ម អមដោយ ឯកឧត្ដមអនុរដ្ឋមន្រ្តីក្រសួងឧស្សាហកម្ម និងពាណិជ្ជកម្ម អនុរដ្ឋមន្រ្តីក្រសួងការងារ មុខរបរ និងគាំពារសង្គម និងអនុប្រធានសភាពាណិជ្ជកម្ម នៃរដ្ឋតាតាស្ថាន។

ក្នុងជំនួបនេះ ភាគីទាំងពីរបានផ្លាស់ប្តូរមតិ និងពិភាក្សាអំពីលទ្ធភាពពង្រឹងកិច្ចសហប្រតិបត្តិការជាក់ស្តែង ជាពិសេសដើម្បីស្វែងយល់អំពី ការប្រើប្រាស់កម្លាំងពលកម្មកម្ពុជា ការគាំពារជនទេសន្តរប្រវេសន៍ការងារនៅសាធារណរដ្ឋតាតាស្ថាន ស្វែងយល់ពីស្ថានភាពទូទៅ សេដ្ឋកិច្ច របស់រដ្ឋតាតាស្ថាន ការវិនិយោគ ពាណិជ្ជកម្ម និងការអប់រំ បច្ចេកទេស វិជ្ជាជីវៈ ។

ជំនួបនេះ គឺជាឱកាសដ៏សំខាន់ក្នុងការស្វែងរក និងពង្រីកទីផ្សារការងារថ្មីៗសម្រាប់ជនទេសន្តរប្រវេសន៍ការងារកម្ពុជា ព្រមទាំងជំរុញកិច្ចសហប្រតិបត្តិការអន្តរជាតិក្នុងការអភិវឌ្ឍជំនាញ និងការបង្កើតឱកាសការងារដែលមានសុវត្ថិភាព ស្របច្បាប់ និងមានលក្ខខណ្ឌការងារសមរម្យសម្រាប់ជនទេសន្តរប្រវេសន៍ការងារកម្ពុជា។



#កិច្ចសហប្រតិបត្តិការកម្ពុជា_រុស្ស៊ី
#រដ្ឋតាតាស្ថាន (Tatarstan)
#ទីផ្សារការងារ
#ការបណ្តុះបណ្តាលជំនាញ
#ជនទេសន្តរប្រវេសន៍ការងារកម្ពុជា

30/07/2026

29/07/2026

28/07/2026

កិច្ចពិភាក្សាការងារ និងការចុះហត្ថលេខាលើអនុស្សរណៈនៃការយោគយល់គ្នា (MOU) រវាងសមាគមទីភ្នាក់ងារទេសន្តរប្រវេសន៍ការងារកម្ពុជា (ALMAC) និងតំបន់សេដ្ឋកិច្ចពិសេស "Alabuga" នៃរដ្ឋតាតាស្ថាន សហព័ន្ធរុស្ស៊ី

នាថ្ងៃទី២៨ ខែកក្កដា ឆ្នាំ២០២៦ នៅសាធារណរដ្ឋតាតាស្ថាន នៃសហព័ន្ធរុស្ស៊ី លោក ខ្លេង សុខហ៊ ប្រធានសមាគមទីភ្នាក់ងារទេសន្តរប្រវេសន៍ការងារកម្ពុជា និងក្រុមការងារនៃសមាគមអលម៉េក បានអញ្ជើញអមដំណើរ ឯកឧត្តម សេង សក្ដា រដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ ដឹកនាំប្រតិភូកម្ពុជាជួបពិភាក្សាការងារជាមួយ លោក Elmir Ravilevich Saifullin ប្រធានគម្រោងទទួលបន្ទុករដ្ឋបាល និងជាអនុប្រធានតំបន់សេដ្ឋកិច្ចពិសេស "Alabuga"។

ក្នុងឱកាសនោះ ឯកឧត្តមរដ្ឋលេខាធិការ បានអញ្ជើញជាគណៈអធិបតីក្នុងការចុះហត្ថលេខាលើអនុស្សរណៈនៃការយោគយល់គ្នា (MOU) ស្ដីពីកិច្ចសហប្រតិបត្តិការ រវាងសមាគមទីភ្នាក់ងារទេសន្តរប្រវេសន៍ការងារកម្ពុជា (ALMAC) និងតំបន់សេដ្ឋកិច្ចពិសេស "Alabuga" នៃសហព័ន្ធរុស្ស៊ី ភាគីហត្ថលេខា ដោយ លោក ខ្លេង សុខហ៊ ប្រធានសមាគមអលម៉េក (ALMAC) និង លោក Elmir Ravilevich Saifullin ប្រធានគម្រោងទទួលបន្ទុករដ្ឋបាល និងជាអនុប្រធានតំបន់សេដ្ឋកិច្ចពិសេស ប្រភេទឧស្សាហកម្ម និងផលិតកម្ម "Alabuga" នៃសហព័ន្ធរុស្ស៊ី។

17/07/2026

កិច្ចប្រជុំប្រចាំខែរបស់ផ្នែកគតិយុត្ត នៃសមាគមទីភ្នាក់ងារទេសន្តរប្រវេសន៍ការងារកម្ពុជា (អលម៉េក)

នារសៀលថ្ងៃទី១៧ ខែកក្កដា ឆ្នាំ២០២៦ លោក សុខ ចំណាន ប្រធានផ្នែកគតិយុត្ត នៃសមាគមទីភ្នាក់ងារទេសន្តរប្រវេសន៍ការងារកម្ពុជា (អលម៉េក) បានដឹកនាំកិច្ចប្រជុំប្រចាំខែ ស្តីពីការណែនាំសមាសភាព និងភារកិច្ចរបស់ផ្នែក និងការពិភាក្សាអំពីផែនការសកម្មភាព និងទិសដៅការងារបន្ត ដោយមានការអញ្ជើញចូលរួមពី អនុប្រធានផ្នែក សមាជិកផ្នែក និងលេខាធិការដ្ឋាន សរុបចំនួន ៦ រូប។

កិច្ចប្រជុំបានពិភាក្សាពីការកំណត់ភារកិច្ច និងការបែកចែកតួនាទី ព្រមទាំងការពិភាក្សាអំពីទិសដៅការងារបន្តដោយផ្តោតលើការតាមដាន ការសិក្សាស្រាវជ្រាវ និងការផ្សព្វផ្សាយច្បាប់ អនុក្រឹត្យ ប្រកាស លិខិតបទដ្ឋានគតិយុត្ត និងបទប្បញ្ញត្តិពាក់ព័ន្ធនឹងវិស័យទេសន្តរប្រវេសន៍ការងារ ដើម្បីជាមូលដ្ឋានក្នុងការផ្តល់ការណែនាំ និងការគាំទ្រផ្នែកច្បាប់ដល់គ្រប់ភាគីសហការនៃផ្នែកទាំងអស់ រួមទាំងសមាជិកសមាគមផងដែរ។

កិច្ចប្រជុំនេះ លោក សុខ ចំណាន ក៏បានបញ្ជាក់ពីការប្តេជ្ញាចិត្តរបស់ផ្នែកគតិយុត្ត ក្នុងការពង្រឹងការអនុវត្តច្បាប់ និងលើកកម្ពស់ការយល់ដឹងផ្នែកច្បាប់ ដើម្បីឱ្យការអនុវត្តការងាររបស់សមាជិកសមាគមប្រព្រឹត្តទៅស្របតាមច្បាប់ និងបទប្បញ្ញត្តិជាធរមាន ប្រកបដោយតម្លាភាព ប្រសិទ្ធភាព និងការទទួលខុសត្រូវ។

#ផ្នែកគតិយុត្ត

17/07/2026