11/08/2026
មាត្រា ៦៣._ បទបើកបរក្រោមឥទ្ធិពលនៃគ្រឿងញៀន
បុគ្គលណាដែលបើកបរយានយន្ដតាមផ្លូវគោក ផ្លូវទឹក ឬផ្លូវអាកាស នៅពេលដែលខ្លួនស្ថិតនៅក្រោមឥទ្ឋិពលនៃគ្រឿងញៀនដែលខ្លួនបានប្រើប្រាស់ដោយខុសច្បាប់ ទោះបីគ្មានសញ្ញាបង្ហាញឲ្យឃើញពីខាងក្រៅថាបានប្រើប្រាស់គ្រឿងញៀនក៏ដោយ ត្រូវផ្តន្ទាទោសដាក់ពន្ធនាគារពី ១ (មួយ) ខែ ទៅ ១(មួយ) ឆ្នាំ និងអាចត្រូវទទួលបន្ថែមនូវទោសពិន័យជាប្រាក់ពី ១០០.០០០ (មួយសែន) រៀល ទៅ ២.០០០.០០០ (ពីរលាន) រៀល ប្រសិនបើឥទ្ឋិពលនៃគ្រឿងញៀននេះបណ្តាលឲ្យប៉ះពាល់ដល់សុវត្ថិភាពនៃការបើកបរ ។
ត្រូវផ្តន្ទាទោសដាក់ពន្ធនាគារពី ១ (មួយ) ឆ្នាំ ទៅ ២ (ពីរ) ឆ្នាំ និងអាចត្រូវទទួលបន្ថែមនូវទោសពិន័យជាប្រាក់ពី ២.០០០.០០០ (ពីរលាន) រៀល ទៅ ៤.០០០.០០០ (បួនលាន) រៀល ក្នុងករណីដែលការបើកបរខាងលើនេះបង្កឲ្យមានរបួសដល់អ្នកដទៃ ហើយបណ្តាលឲ្យមានអសមត្ថភាពធ្វើការងារស្មើ ឬលើសពី ៨ (ប្រាំបី) ថ្ងៃ ។
ត្រូវផ្តន្ទាទោសដាក់ពន្ធនាគារពី ២ (ពីរ) ឆ្នាំ ទៅ ៥ (ប្រាំ) ឆ្នាំ និងអាចត្រូវទទួលបន្ថែមនូវទោសពិន័យជាប្រាក់ពី ៤.០០០.០០០ (បួនលាន) រៀល ទៅ ១០.០០០.០០០ (ដប់លាន) រៀល ក្នុងករណីដែលការបើកបរខាងលើនេះបង្កឲ្យមានរបួសដល់អ្នកដទៃ ហើយបណ្តាលឲ្យពិការអចិន្ត្រៃយ៍ ឬស្លាប់ ។
(ច្បាប់ស្តីពី ការត្រួតពិនិត្យគ្រឿងញៀន)
