រដ្ឋបាលសង្កាត់ស្ទឹងមានជ័យទី២

04/08/2026

ថ្ងៃអង្គារ ៦រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែសីហា ឆ្នាំ២០២៦
លោក ទូច សំអុល ចៅសង្កាត់ស្ទឹងមានជ័យទី២ បានបើកកិច្ចប្រជុំដោយមានអ្នកចូលរួមមាន ចៅសង្កាត់រង សមាជិកក្រុមប្រឹក្សា ប៉ុស្ត៍នគរបាល ប្រធានភូមិ អនុភូមិ សមាជិកភូមិ ប្រធានប្រជាការពារសង្កាត់ ប្រជាការពារសង្កាត់ មន្រ្តីបរិស្ថាន អំពីការងារ កំណត់បែងចែកភារកិច្ច ក្នុងកម្មវិធី ក្រុមគ្រូពេទ្យស្ម័គ្រចិត្ត ចុះពិនិត្យសុខភាពជូនប្រជាពលរដ្ឋក្នុងមូលដ្ឋានសង្កាត់ស្ទឹងមានជ័យទី២ ចំនួន ១១០០នាក់នៅថ្ងៃទី៩ ខែសីហា ឆ្នាំ២០២៦ ក្រោមអធិបតីភាពឯកឧត្តម ស៊ុន ចាន់ថុល ឧបនាយករដ្ឋមន្រ្តី ប្រធានក្រុមការងារចុះមូលដ្ឋានខណ្ឌមានជ័យ។

03/08/2026

សេចក្តីជូនដំណឹង ស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦

19/07/2026

19/07/2026

ព្រឹកថ្ងៃទី ១៩ ខែ កក្កដា ឆ្នាំ ២០២៦ លោកស្រី អ៊ុម សុជាតា ក្រុមប្រឹក្សាសង្កាត់ តំណាងឲ្យលោកចៅសង្កាត់ សហការជាមួយ លោក អនុភូមិ សមាជិកភូមិដំណាក់ធំ៤ បានចុះសួរសុខទុក្ខ និងដល់គ្រួសារកងទ័ព និងគ្រួសារក្រីក្រ ចំនួន ០២ គ្រួសារ ​ក្នុងនោះ បានជូននូវគ្រឿងឧបភោគបរិភោគ និងថវិកាមួយចំនួន ។

06/07/2026

ទឹកព្រះទ័យមេត្តាដ៏ថ្លៃថ្លារបស់សម្តេចព្រះមហាសង្ឃរាជ បួរ គ្រី ជួយដឹកសពទុរគតជនទៅបូជា ដោយមានការសម្របសម្រួលពីអាជ្ញាធរសង្កាត់ស្ទឹងមានជ័យទី២
​ភ្នំពេញ៖ ក្រោមការយកចិត្តទុកដាក់លើសុខទុក្ខ និងការលំបាករបស់ប្រជាពលរដ្ឋខ្វះខាត អាជ្ញាធរមូលដ្ឋានសង្កាត់ស្ទឹងមានជ័យទី២ បានចូលរួមសម្របសម្រួលយ៉ាងយកចិត្តទុកដាក់ ក្នុងសកម្មភាពមនុស្សធម៌ដ៏ឧត្តុង្គឧត្តមមួយ កាលពីវេលាម៉ោង ០៩:០០ យប់មិញនេះ។
​យោងតាមការស្នើសុំពីក្រុមគ្រួសារសព លោក ស្រី ដេត អាយុ ៤៥ ឆ្នាំ ដែលបានទទួលមរណភាពដោយរោគាពាធ និងមានជីវភាពខ្វះខាតខ្លាំង ស្ថិតក្នុងភូមិឫស្សី៣ សង្កាត់ស្ទឹងមានជ័យទី២ អាជ្ញាធរមូលដ្ឋានសង្កាត់ស្ទឹងមានជ័យទី២ បានធ្វើការទំនាក់ទំនង និងសម្របសម្រួលយ៉ាងទាន់ពេលវេលា។
​ដោយទទួលបានព័ត៌មានពីការលំបាកនេះ និងប្រកបដោយទឹកព្រះទ័យមេត្តាធម៌ដ៏ជ្រាលជ្រៅបំផុត សម្តេចព្រះមហាសង្ឃរាជ បួរ គ្រី ព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា ទ្រង់បានសព្វព្រះរាជហឫទ័យចាត់ចែងក្រុមការងាររថយន្តសាមុយរបស់ «ប៉ុស្តិ៍សុខភាពសម្តេចព្រះរាជគ្រូ បួរ គ្រី ព្រះករុណាព្រះមហាក្សត្រសីហមុនី» ដើម្បីចុះទៅទទួល និងដឹកជញ្ជូនសពយកទៅបូជាតាមប្រពៃណីនៅវត្តចាក់អង្រែក្រោម ដោយមិនគិតកម្រៃអ្វីទាំងអស់។
​សកម្មភាពនេះ បានស្តែងអោយឃើញពីកិច្ចសហការយ៉ាងជិតស្និទ្ធរវាងវិស័យពុទ្ធចក្រ និងអាណាចក្រ ជាពិសេសការយកចិត្តទុកដាក់ខ្ពស់របស់អាជ្ញាធរសង្កាត់ស្ទឹងមានជ័យទី២ ក្នុងការជួយដោះស្រាយទុក្ខធុរៈ និងសម្រាលបន្ទុកដ៏ធ្ងន់ធ្ងររបស់គ្រួសារប្រជាពលរដ្ឋដែលមានជីវភាពខ្វះខាតក្នុងមូលដ្ឋាន អោយស្របតាមគោលនយោបាយគិតគូរពីសុខទុក្ខប្រជាពលរដ្ឋគ្រប់ពេលវេលា។
​គ្រួសារសពបានសម្តែងនូវសេចក្តីថ្លែងអំណរគុណយ៉ាងជ្រាលជ្រៅបំផុតថ្វាយចំពោះ សម្តេចព្រះមហាសង្ឃរាជ បួរ គ្រី និងអំណរគុណដល់អាជ្ញាធរមូលដ្ឋានទាំងអស់ ដែលបានជួយជ្រោមជ្រែងក្នុងគ្រាដ៏លំបាកបំផុតនេះ៕

06/07/2026

28/06/2026

នៅវេលាម៉ោង ៨.០០នាទីព្រឹកត្រូវនិងថ្ងៃអាទិត្យ ១៤កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៨ ខែមិថុនា ឆ្នាំ២០២៦ដោយមានការណែនាំយ៉ាងយកចិត្តទុកដាក់ពី លោក ទូច សំអុល ចៅសង្កាត់មានជ័យទី២ បានចាត់អោយលោក សេង ស៊ីវ៉ាន់ថា ចៅសង្កាត់រងទី១ ចុះពិនិត្យតាមដានការដ្ឋានស្ថាបនាដាក់ប្រព័ន្ធលូថ្មីជូនប្រជាពលរដ្ឋដេញថ្លៃបានដោយក្រុមហ៊ុនអូឡាំពិកមូន្នីដែលជាគម្រោងមូលនិធិរបស់សាលាសង្កាត់ដែលនិងកំពុងស្ថាបនាដាក់ប្រព័ន្ធលូនៅក្រុមទី ៨ ភូមិឬស្សី៣ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ដាក់បានចំនួន៣ខ្សែ÷
ខ្សែទី ១ ប្រវែង ៩៥ ម៉ែត្រ.
ខ្សែទី ២ប្រវែង ៧២ ម៉ែត្រ
ខ្សែទី ៣ ប្រវែង ៧៦ ម៉ែត្រ
ក្រុមហ៊ុននឹងបន្តចុះដាក់លូខ្សែទី៤និងខ្សែទី ៥ បន្តទៀតនៅពេលដែលស្ថាបនាដាក់ប្រព័ន្ធលូខ្សែទី ៣ ត្រូវបានបញ្ចប់។

27/06/2026

ថ្ងៃទី ២៧ ខែ មិថុនា ឆ្នាំ ២០២៦ លោក សេង ដឺលុច ប្រធានក្រុមការងារចុះជួយភូមិដំណាក់ធំ១ តំណាងឲ្យ ឯកឧត្តម យុន​ ហេង ប្រធានក្រុមការងារគណបក្ស ចុះមូលដ្ឋាន សង្កាត់ស្ទឹង មានជ័យទី២ លោកស្រី អ៊ុម សុជាតា សមាជិកក្រុមប្រឹក្សាសង្កាត់ តំណាងឲ្យ លោក ទូច សំអុល ចៅសង្កាត់ស្ទឹងមានជ័យទី២ និង លោក លោកស្រី សាខាបក្សភូមិដំណាក់ធំ១ បានចុះសួរសុខទុក្ខ សមាជិកបក្សក្រីក្រ មានជំងឺ ចំនួន ០៥ គ្រួសារ
ក្នុងនោះ ក្រុមការងារបានឧបត្ថម្ភនូវគ្រឿងឧភោគបរិភោគ និងថវិកាមួយចំនួនផងដែរ