អគ្គលេខាធិការដ្ឋានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ

17/08/2026

នាព្រឹកថ្ងៃទី១៧ ខែសីហា ឆ្នាំ២០២៦ ឯកឧត្តមអគ្គលេខាធិការរង លោក លោកស្រីប្រធាន អនុប្រធាននាយកដ្ឋាន នៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងគណៈកម្មាធិការជាតិជំរុញចលនាភូមិមួយផលិតផលមួយ បានចូលរួម «សិក្ខាសាលាអន្តរជាតិអំពីគំរូនៃការអភិវឌ្ឍរបស់ប្រទេសចិន» ក្រោមអធិបតីភាព ឯកឧត្តមបណ្ឌិត ឆែម គាតរិទ្ធី ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងដ៏ខ្ពង់ខ្ពស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដោយមានការអញ្ជើញចូលរួមពីឯកឧត្តម WANG Wenbin ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា ព្រមទាំងសាស្ត្រាចារ្យ ចំនួន ៥រូប មកពីវិទ្យាស្ថានសហប្រតិបត្តិការ និងអភិវឌ្ឍន៍ត្បូង-ត្បូង នៃសាកលវិទ្យាល័យប៉េកាំង។

សិក្ខាសាលានេះ រៀបចំឡើងក្នុងគោលបំណងចែករំលែកប្រព័ន្ធអំពីតក្កវិជ្ជាផ្ទៃក្នុង និងមាគ៌ាអនុវត្តជាក់ស្ដែងនៃទំនើបកម្មតាមបែបផែនចិន ដោយតភ្ជាប់យ៉ាងជិតស្និទ្ធទៅនឹងស្ថានភាពអភិវឌ្ឍន៍ជាក់ស្ដែងក្នុងបរិបទរបស់កម្ពុជា ដើម្បីផ្ដល់ជាធាតុចូលនិងបទពិសោធដ៏មានសារៈសំខាន់ក្នុងការជួយកម្ពុជាដោះស្រាយបញ្ហាប្រឈមនៃការអភិវឌ្ឍ ការលើកកម្ពស់សមត្ថភាពផ្ដល់សេវាសាធារណៈរបស់រាជរដ្ឋាភិបាល និងសម្រេចបាននូវការអភិវឌ្ឍប្រកបដោយគុណភាពខ្ពស់ សម្រាប់ថ្នាក់ដឹកនាំ និងមន្ត្រីរាជការនៃទីស្ដីការគណៈរដ្ឋមន្ត្រី ដែលបានចូលរួមសរុបប្រមាណជាង ៤០០រូប៕

Posted by: KLC ៚ ឃួន លឹមឈាន់
រូបភាព : គ.រ.ម.

12/08/2026

12/08/2026

នៅរសៀលថ្ងៃចន្ទ ១២រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែសីហា ឆ្នាំ២០២៦ ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ សហការជាមួយអង្គការ Helen Keller Intl - Cambodia បានរៀបចំកិច្ចប្រជុំ លើកទី៤ នៃគណៈកម្មការតម្រង់ទិសគម្រោងអន្តរវិស័យ «នវានុវត្តន៍សម្រាប់លទ្ធផលកាន់តែប្រសើរ នៃការធ្វើសមាហរណកម្មរវាងវិស័យកសិកម្ម សុខាភិបាល និងអប់រំ ដើម្បីលើកកម្ពស់អាហារូបត្ថម្ភនៅកម្ពុជា» ហៅកាត់ថា «INAS» ក្រោមអធិបតីភាព ឯកឧត្តមវេជ្ជបណ្ឌិត ជា សំណាង អនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាសហប្រធានគណៈកម្មការតម្រង់ទិសគម្រោង និងឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសហប្រធានគណៈកម្មការតម្រង់ទិសគម្រោង និងលោក ហ៊ូ ក្រើន នាយកប្រចាំប្រទេស អង្គការ Helen Keller Intl - Cambodia និងជាអនុប្រធានគណៈកម្មការតម្រង់ទិសគម្រោង។ គោលបំណងនៃកិច្ចប្រជុំ
• ធ្វើបច្ចុប្បន្នភាពវឌ្ឍនភាពក្នុងរយៈពេលបីខែចុងក្រោយពីខែឧសភា ដល់ខែកក្កដា ឆ្នាំ២០២៦។
• ចែករំលែកផែនការសកម្មភាពសម្រាប់បីខែបន្ទាប់។
• ពិភាក្សាអំពីអត្ថប្រយោជន៍ដល់ក្រុមគោលដៅ ដើម្បីលើកកម្ពស់ស្ថានភាពអាហារូបត្ថម្ភកុមារ ដែលត្រូវអន្តរាគមន៍បន្ត។

11/08/2026

ថ្ងៃចន្ទ១២រោច ខែទុទិយាសាឍ ឆ្នាំមមីអដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០-១១ ខែសីហា ឆ្នាំ២០២៦ នៅសាលប្រជុំសណ្ឋាគារ ហ៊ីម៉ាវ៉ារីភ្នំពេញ លោកវេជ្ជៈ សុខ សុវណ្ណារិទ្ធ ប្រធាននាយកដ្ឋាន សន្តិសុខស្បៀង អាហារូបត្ថម្ភ និងសុខាភិបាល​បានអញ្ជើញចូលរួមសិក្ខាសាលាស្តីពី «ហិរញ្ញប្បទានសម្រាប់ប្រព័ន្ធអេកូឡូស៊ី និងកសិកម្មអំណោយផលដល់ធម្មជាតិនៅកម្ពុជា» សិក្ខាសាលានេះមានគោលបំណង លើកកម្ពស់ការកៀរគរហិរញ្ញប្បទានសម្រាប់កសិកម្មអំណោយផលដល់ធម្មជាតិ ការអភិរក្សជីវៈចម្រុះ និងការប្រើប្រាស់ដីប្រកបដោយចីរភាពតាមរយៈវិធីសាស្រ្តហិរញ្ញប្បទាន សម្រាប់ប្រព័ន្ធអេកូឡូស៊ី។ ក្នុងពិធីប្រកាសបើកសិក្ខាសាលានេះ មានវត្តមានដ៏ខ្ពង់របស់ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ។សមាសភាពអញ្ញើញចូលរួម ក្នុងសិក្ខាសាលានេះរួមមានតំណាងថ្នាក់ដឹកនាំ និងមន្រ្តីជំនាញមកពីក្រសួងស្ថាប័នរបស់រាជរដ្ឋាភិបាល ដៃគូអភិវឌ្ឍន៍ វិស័យឯកជន និងធនាគារ សរុបប្រមាណ៧០នាក់៕

Posted by: KLC ៚ ឃួន លឹមឈាន់
Sources: Sok Sovannarith

11/08/2026

នារសៀលថ្ងៃទី៧ ខែសីហា ឆ្នាំ២០២៦ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ប្រធានគណៈកម្មាធិការជាតិជំរុញចលនាភូមិ១ផលិតផល១ បានទទួលជួបលោកស្រី Dr. yoong Jung lee អ្នកស្រាវជ្រាវ វិទ្យាស្ថានសេដ្ឋកិច្ចជនបទកូរ៉េ (KREI) លោក Dr. An Sung Soo តំណាង​សហគមន៍​ជនបទ​កូរ៉េ​ប្រចាំ​កម្ពុជា(KRC)។ ក្នុងឱកាសនេះ ឯកឧត្តមបណ្ឌិតសភាចារ្យ បានថ្លែងអំណរគុណចំពោះក្រសួងកសិកម្ម ស្បៀងអាហារ និងកិច្ចការជនបទ (MAFRA) សាជីវកម្មសហគមន៍ជនបទកូរ៉េ (KRC) និងវិទ្យាស្ថានសេដ្ឋកិច្ចជនបទកូរ៉េ (KREI) ចំពោះភាពជាដៃគូជាបន្តបន្ទាប់ក្នុងការពង្រឹងកិច្ចសហប្រតិបត្តិការកសិកម្មរវាងប្រទេសយើងទាំងពីរ។ គ្រាប់ស្វាយចន្ទីគឺជាទំនិញកសិកម្មអាទិភាពមួយរបស់កម្ពុជា។ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋាភិបាលបានផ្តោតការយកចិត្តទុកដាក់យ៉ាងខ្លាំងលើការបង្កើនផលិតភាពកសិកម្ម ការលើកកម្ពស់ការកែច្នៃតម្លៃបន្ថែម និងការពង្រីកការនាំចេញ ដើម្បីបង្កើនភាពប្រកួតប្រជែង និងធ្វើពិពិធកម្មសេដ្ឋកិច្ច៕

Posted by: KLC ៚ ឃួន លឹមឈាន់
Sources: ខុទ្ទកាល័យ ក.ក.ជ.

07/08/2026

នាព្រឹកថ្ងៃទី៦​ ខែសីហា ឆ្នាំ២០២៦ ឯកឧត្តមបណ្ឌិតសភាចារ្យ​ អ៊ុក​ រ៉ាប៊ុន​ ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ប្រធានគណៈកម្មាធិការជាតិជំរុញចលនាភូមិ១ផលិតផល១ បានអនុញ្ញាតជូនក្រុមការងារសហភាពសហព័ន្ធយុវជនកម្ពុជា (សសយក​) ដឹកនាំដោយ​ ឯកឧត្តម​ ហុឺ​ វីរ:​ ប្រធាននាយកដ្ឋាន​ជំរុញចលនាវប្បធម៌ សាសនា​ និងប្រវត្តិសាស្រ្ត​ នៃសហភាពសហពន្ធ័យុវជនកម្ពុជា​ចូលជួប និងសម្ដែងការគួរសម នៅទីស្ដីការគណ:រដ្ឋមន្រ្តី៕

Posted by: KLC ៚ ឃួន លឹមឈាន់
Sources: ខុទ្ទកាល័យ ក.ក.ជ.

07/08/2026

ដោយមានការចាត់តាំងពី ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិមួយផលិតផលមួយ នៅព្រឹកថ្ងៃព្រហស្បតិ៍ ៨រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៦ ខែសីហា ឆ្នាំ២០២៦ ឯកឧត្តម ហាស់ វង់ដារ៉ា អនុប្រធានគណៈកម្មាធិការជាតិជំរុញចលនាភូមិមួយផលិតផលមួយ បានអញ្ជើញចូលរួមពិធីចែកសញ្ញាបត្រដល់និស្សិតជ័យលាភី និងសម្ពោធអគារសិក្សានៃសាកលវិទ្យាល័យនីតិសាស្រ្ត និង វិទ្យាសាស្រ្តសេដ្ឋកិច្ច ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅមជ្ឈមណ្ឌលកោះពេជ្រ៕

Posted by: KLC ៚ ឃួន លឹមឈាន់
Sources: H.E. ហាស់ វង់ដារ៉ា

05/08/2026

នៅខេត្តកំពង់ឆ្នាំង នាព្រឹកថ្ងៃពុធ ៧រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែសីហា ឆ្នាំ២០២៦ ឯកឧត្តមបណ្ឌិតសភាចារ្យ​ អ៊ុក​ រ៉ាប៊ុន​ ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ប្រធានគណៈកម្មាធិការជាតិជំរុញចលនាភូមិ១ផលិតផល១ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បានអញ្ជើញជាអធិបតីក្នុងពិធីប្រគល់សម្ភារៈបរិក្ខារពេទ្យជូនដល់មន្ទីរសុខាភិបាលខេត្តកំពង់ឆ្នាំង៕

Posted by: KLC ៚ ឃួន លឹមឈាន់
Sources: ខុទ្ទកាល័យ ក.ក.ជ.

02/08/2026

ឯកឧត្តម ជា សំណាង អនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាសហប្រធាននៃអនុក្រុមការងារសេវាផ្គត់ផ្គង់ទឹកស្អាត អនាម័យដែលគិតគូរដល់អាហារូបត្ថម្ភ អញ្ជើញចូលរួមជាអធិបតីក្នុងពីធីបើកវគ្គបណ្តុះបណ្តាលគ្រូបង្គោលថ្នាក់ខេត្តសម្រាប់អនុវត្តគោលការណ៍ប្រតិបត្តិថ្នាក់ជាតិ ស្តីពីកិច្ចអន្តរាគមន៍ សេវាផ្គត់ផ្គង់ទឹកស្អាត និងអនាម័យដែលគិតគូរដល់អាហារូបត្ថម្ភ រយៈពេល៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែកក្កដា ឆ្នាំ២០២៦ នៅសណ្ឋាគារ សុខាល័យអង្គរ សៀមរាប។ កម្មវិធីនេះបានសហការ និងគាំទ្រដោយអង្គការ IDE.

រូបភាពដោយ÷ មួង វិមាន
Source : SCKS-ស៊ូ ច័ន្ទគ្រឹស្នា
Posted by: KLC ៚ ឃួន លឹមឈាន់

31/07/2026

ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ប្រធានគណៈកម្មាធិការជាតិជំរុញចលនាភូមិមួយផលិតផលមួយ ផ្ញេីសារលិខិតគោរពជូនពរ​ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ​ នៃព្រះរាជាណាចក្រកម្ពុជា​ នាឱកាសដ៏មហាមង្គលាភិរម្យឧត្តុង្គឧត្តម បវរសួស្តី សិរីមង្គល វិបុលសុខមហាប្រសើរ នៃពិធីចម្រើនជន្មាយុរបស់ សម្តេចអគ្គមហាសេនាបតីតេជោ ដែលនឹងប្រព្រឹត្តទៅនៅ ថ្ងៃពុធ ៧រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែសីហា ឆ្នាំ២០២៦​ ខាងមុខនេះ៕

Posted by: KLC ៚ ឃួន លឹមឈាន់
Sources: ខុទ្ទកាល័យ ក.ក.ជ.