នាយកដ្ឋានកម្មសិទ្ធិបញ្ញា Cambodiaip

17/08/2026

នាព្រឹកថ្ងៃទី១៧ ខែសីហា ឆ្នាំ២០២៦ ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធាននាយកដ្ឋានកម្មសិទ្ធិបញ្ញា បានដឹកនាំកិច្ចប្រជុំបូកសរុបវឌ្ឍនភាពការងារប្រចាំឆមាសទី១ និងទិសដៅការងារនៅខែបន្ត ឆ្នាំ២០២៦ ។

នៅក្នុងកិច្ចប្រជុំ ការិយាល័យនីមួយៗ បានរាយការណ៍ពីលទ្ធផលការងារ សំណូមពរ និងបញ្ហាប្រឈម ដើម្បីស្នើសុំដំណោះស្រាយ។

ជាលទ្ធផល នាយកដ្ឋានបានសម្រេចសម្មិទ្ធផលការងារសំខាន់ៗជាច្រើននៅក្នុងប្រចាំឆមាសទី១នេះ និងបន្តអនុវត្តសកម្មភាពជាអាទិភាពតាមផែនការសកម្មភាពរបស់នាយកដ្ឋាន។ ជាមួយគ្នាផងដែរ ឯកឧត្តមប្រធាន បានផ្ដល់អនុសាសន៍ណែនាំ និងបានដោះស្រាយបញ្ហាប្រឈមនានារបស់ការិយាល័យចំណុះនាយកដ្ឋាន។

07/08/2026

(ខេត្តកែប)៖ កាលពីថ្ងៃទី៣ ខែសីហា ឆ្នាំ២០២៦ ឯកឧត្តម សួន​ វិជ្ជា ទីប្រឹក្សាក្រសួងពាណិជ្ជកម្ម និងជាប្រធាននាយកដ្ឋានកម្មសិទ្ធិបញ្ញា បានចូលរួមអម ឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម ក្នុងសិក្ខាសាលាផ្សព្វផ្សាយស្តីពី "ការអនុវត្តគម្រោងការកសាងកេរ្តី៍ឈ្មោះម៉ាក និងការចុះបញ្ជី ក្តាមសេះកែប ជាម៉ាកសម្គាល់ភូមិសាស្ត្រទំនិញ" និងមានការអញ្ជើញចូលរួមពីសំណាក់ ឯកឧត្តម លី សាវេត អភិបាលរងនៃគណៈអភិបាលខេត្តកែប ឯកឧត្តម ហូ ស៊ីវយ៉ុង អគ្គនាយកសេវាពាណិជ្ជកម្ម មន្ទីររអង្គភាពពាក់ព័ន្ធជុំវិញខេត្ត អាជ្ញាធរមូលដ្ឋាន អ្នកនេសាទ និងអាជីវករ ជាច្រើនរូប។

គោលបំណងនៃការរៀបចំសិក្ខាសាលាផ្សព្វផ្សាយនេះគឺដើម្បីផ្តល់ចំណេះដឹងនិងផ្សព្វផ្សាយពីគម្រោងកសាងកេរ្តិ៍ឈ្មោះម៉ាកនិងចុះបញ្ជី “ក្តាមសេះកែប” ជាម៉ាកសម្គាល់ភូមិសាស្ត្រទំនិញ និងការលើកកម្ពស់ចំណេះដឹងពីកម្មសិទ្ធិបញ្ញា ជាពិសេស មូលដ្ឋានគ្រឹះនៃការរៀបចំម៉ាកសម្គាល់ភូមិសាស្ត្រទំនិញ និងការប្រមូលធាតុចូលពីអ្នកចូលរួមដើម្បីរៀបចំជាសៀវភៅបន្ទុក ក្នុងការត្រៀមរៀបចំចុះបញ្ជី “ក្តាមសេះកែប” ជាម៉ាកសម្គាល់ភូមិសាស្ត្រទំនិញ។

05/08/2026

នារសៀលថ្ងៃចន្ទ ទី៣ ខែសីហា ឆ្នាំ២០២៦ ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញានិងជាប្រធាននាយកដ្ឋានកម្មសិទ្ធិបញ្ញា លោកអគ្គនាយករងសេវាពាណិជ្ជកម្ម និងមន្រ្តីជំនាញនាយកដ្ឋានកម្មសិទ្ធិបញ្ញា ដែលដឹកនាំដោយ​ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានចូលរួមកិច្ចប្រជុំពិភាក្សា​លើសេចក្តីព្រាងផែនការយុទ្ធសាស្ត្រស្តីពីកម្មសិទ្ធិបញ្ញាពាក់ព័ន្ធនឹងធនធានពន្ធុ ចំណេះដឹងជាប្រពៃណី និងវិញ្ញត្តិវប្បធម៌ជាប្រពៃណី (GRTKTCE) ដែលរៀបចំដោយក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៅទីស្តីការគណៈរដ្ឋមន្ត្រី ​ ក្រោមអធិបតីភាព ឯកឧត្តម នរ៉ាណាឫទ្ធិ អានន្ទដាយ៉ាត អនុប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។

20/07/2026

20/07/2026

(ទីក្រុងហ្សាការតា, ប្រទេសឥណ្ឌូនេស៊ី) នាព្រឹកថ្ងៃចន្ទទី២០ ខែកក្កដា ឆ្នាំ២០២៦ ឯកឧត្តម សួន វិជ្ជា ក្នុងនាមជាប្រធានក្រុមការងារសហប្រតិបត្តិការកម្មសិទ្ធិបញ្ញាអាស៊ាន (AWGIPC) បានចូលរួមបើកកិច្ចប្រជុំលើកទី៣ នៃក្រុមការងារ ASEAN IP DIGITAL TRANSFORMATION TASK FORCE (DTTF) ដែលមានការរួមពីបណ្ដាលប្រទេសជាសមាជិកអាស៊ាន អង្គការកម្មសិទ្ធិបញ្ញាពិភពលោក ក្រុមការងារអាស៊ាន ។

កិច្ចប្រជុំនេះមានគោលបំណងដូចខាងក្រោម៖
១. រាយការណ៍អំពីវឌ្ឍនភាពដែលសម្រេចបានតាមយរៈគម្រោងក្រោមអាណត្តិរបស់ក្រុមការងារ
២. ពិនិត្យឡើងវិញនូវវឌ្ឍនភាពនៃគំនិតផ្តួចផ្តើមជាយុទ្ធសាស្ត្រទាក់ទងនឹងបញ្ញាសិប្បនិម្មិតនិងកំណត់វិស័យសម្រាប់ការគាំទ្របន្ថែម
៣. ពន្លឿនការធ្វើសមាហរណកម្មឌីជីថលក្នុងតំបន់តាមរយៈការអភិវឌ្ឍផែនទីបង្ហាញផ្លូវសម្រាប់ការធ្វើបដិវត្តកម្មឌីជីថល និង
៤. ពង្រឹងការលើកកម្ពស់ចំណេះដឹងក្នុងតំបន់តាមរយៈការផ្លាស់ប្ដូរបទពិសោធន៍ និងវគ្គបណ្តុះបណ្តាលស្ដីពី ឌីជីថលកម្មសិទ្ធិបញ្ញា "Digital IP Office " និងកិច្ចពិភាក្សាផ្សេងៗ។

15/07/2026

ការពង្រឹងប្រព័ន្ធកម្មសិទ្ធិបញ្ញារបស់កម្ពុជាតាមរយៈកិច្ចសហប្រតិបត្តិការជាមួយអង្គការកម្មសិទ្ធិ​បញ្ញាពិភពលោក (WIPO)

(ទីក្រុងហ្សឺណេវ​, ប្រទេសស្វ៊ីស​) នាថ្ងៃចន្ទទី១៣​ ខែកក្កដា ឆ្នាំ២០២៦ គណៈប្រតិភូកម្ពុជាពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និងនាយកដ្ឋានកម្មសិទ្ធិបញ្ញា (DIP) នៃក្រសួងពាណិជ្ជកម្ម បានជួបពិភាក្សាការងារជាមួយអ្នកជំនាញនៃអង្គការកម្មសិទ្ធិបញ្ញាពិភពលោក (WIPO) ស្តីពីការរៀបចំច្បាប់ការសង្ងាត់ពាណិជ្ជកម្ម និងការរៀបចំធ្វើវិសោធនកម្មច្បាប់ស្តីពី ប្រកាសនីយបត្រតក្កកម្ម វិញ្ញាបនបត្រម៉ូដែលមានអត្ថប្រយោជន៍ និងគំនូរឧស្សាហកម្មរបស់កម្ពុជា។

ក្នុងជំនួបនេះ ភាគីកម្ពុជាបានលើកឡើងថា ការរៀបចំច្បាប់ស្តីពីការសង្ងាត់ពាណិជ្ជកម្មកំពុងមានសំណួរគោលនយោបាយជាច្រើនដែលត្រូវការការពិភាក្សា។ ជាការឆ្លើយតប WIPO បានបង្ហាញការត្រៀមខ្លួនក្នុងការគាំទ្រកម្ពុជា តាមរយៈកម្មវិធីបណ្តុះបណ្តាលតាមអនឡាញស្តីពីកាសង្ងាត់ពាណិជ្ជកម្ម និងការផ្តល់យោបល់លើបញ្ហាគោលនយោបាយដែលកម្ពុជាបានលើកឡើង។

ភាគីទាំងពីរក៏បានពិភាក្សាអំពីការធ្វើវិសោធនកម្មច្បាប់ស្តីពី ប្រកាសនីយបត្រតក្កកម្ម វិញ្ញាបនបត្រម៉ូដែលមានអត្ថប្រយោជន៍ និងគំនូរឧស្សាហកម្មរបស់កម្ពុជាផងដែរ។ WIPO បានលើកទឹកចិត្តឱ្យកម្ពុជាកំណត់ឱ្យបានច្បាស់នូវគោលបំណង និងទិសដៅគោលនយោបាយរបស់ខ្លួន ដើម្បីឱ្យ WIPO អាចផ្តល់នូវការប្រឹក្សាយោបល់ និងផ្តល់ជំនួយបច្ចេកទេកផ្នែកច្បាប់ដែលសមស្រប​។

ជំនួបនេះបានបញ្ជាក់ជាថ្មីអំពីកិច្ចសហប្រតិបត្តិការដ៏រឹងមាំរវាងកម្ពុជា និង WIPO ក្នុងការពង្រឹងប្រព័ន្ធកម្មសិទ្ធិបញ្ញារបស់កម្ពុជា ដើម្បីគាំទ្រដល់នវានុវត្តន៍ ការវិនិយោគ និងការអភិវឌ្ឍសេដ្ឋកិច្ចប្រកបដោយចីរភាព។

15/07/2026

(ទីក្រុងហ្សឺណេវ​, ប្រទេសស្វ៊ីស​) នាថ្ងៃចន្ទទី១៣​ ខែកក្កដា ឆ្នាំ២០២៦ ឯកឧត្តម សួន វិជ្ជាទីប្រឹក្សាក្រសួងពាណិជ្ជកម្ម និង ជាប្រធានលេខាធិដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា​ និងគណ:ប្រតិភូពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) បានជួបពិភាក្សាការងារជាមួយគណៈប្រតិភូ WIPO ​លេីការពង្រឹង និងពង្រីកបណ្តាញមជ្ឈមណ្ឌលគាំទ្របច្ចេកវិទ្យា និងព័ត៌មានកម្មសិទ្ធិបញ្ញា (TISC)។​

ជាលទ្ធផល​ ភាគីទាំងពីរនឹងបន្តពិភាក្សាផ្នែកបច្ចេកទេសលើការអនុវត្តប្រព័ន្ធគ្រប់គ្រង TPPM Dashboard និងជំរុញការបញ្ចប់វគ្គបណ្តុះបណ្តាលគ្រូបង្គោល Certified TISC Trainers​ ដេីម្បីពង្រឹងសមត្ថភាពមជ្ឈមណ្ឌល TISC ទាំង៥ ដែលមានស្រាប់ ពង្រីកទៅកាន់សាកលវិទ្យាល័យបន្ថែម និងផ្តោតលើសេវាផ្ទេរបច្ចេកវិទ្យា និងការធ្វើពាណិជ្ជកម្មកម្មសិទ្ធិបញ្ញា។

10/07/2026

(ទីក្រុងហ្សឺណេវ, ប្រទេសស្វ៊ីស) នាព្រឹកថ្ងៃអង្គារ ទី០៧ ខែកក្កដា ឆ្នាំ២០២៦ ឯកឧត្តម សួន វិជ្ជាបានចូលរួម ពិធីបើកកិច្ចប្រជុំមហាសន្និបាតលើកទី៦៨ របស់អង្គការកម្មសិទ្ធិបញ្ញាពិភពលោក (WIPO) ដឹកនាំដោយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា។ មហាសន្និបាតអង្គការកម្មសិទ្ធិបញ្ញាពិភពលោក (WIPO)ត្រូវបានរៀបចំជារៀងរាល់ឆ្នាំដោយមានការចូលរួមពីរដ្ឋសមាជិករបស់ WIPO និងអង្គការអន្តរជាតិដេីម្បីដោះស្រាយបញ្ហាប្រឈមពាក់ព័ន្ធការអភិវឌ្ឍន៍កម្មសិទ្ធិបញ្ញា និងការតម្រង់ទិសដៅការងារនាពេលអនាគត។

ទន្ទឹមនេះ ឯកឧត្តម សួន វិជ្ជា ក្នុងនាមជាប្រធានក្រុមការងារអាស៊ានស្តីពីកិច្ចសហប្រតិបត្តិការកម្មសិទ្ធិបញ្ញា បានធ្វើសេចក្តីថ្លែងការណ៍របស់អាស៊ាន ទៅកាន់មហាសន្និបាតនេះផងដែរ។

08/07/2026

(ទីក្រុងហ្សឺណេវ​, ប្រទេសស្វ៊ីស​) នាថ្ងៃចន្ទទី៦ ខែកក្កដា ឆ្នាំ២០២៦ ឯកឧត្តម​ សួន​ វិជ្ជា​ បានអមដំណេីរលោកលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និង ជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញាជួបពិភាក្សាការងារទ្វេភាគីជាមួយនឹងឯកឧត្តម​ KIM YONG SUN​ រដ្ឋមន្ត្រីក្រសួងកម្មសិទ្ធិបញ្ញានៃសាធារណរដ្ឋកូរ៉េ។​

ជំនួបទ្វេភាគីនេះធ្វេីឡេីងក្នុងគោលបំណងពិនិត្យលេីវឌ្ឍនភាពការងារក្រោមកិច្ចសហប្រតិបត្តិការដែលមានស្រាប់​ និងពិនិត្យលទ្ធភាពពង្រីកកិច្ចសហប្រតិបត្តិការបន្ថែមទៀតដេីម្បីអភិវឌ្ឍវិស័យកម្មសិទ្ធិបញ្ញានៅកម្ពុជា។

សូមជម្រាបផងដែរថា​ ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការ លើការពង្រឹងកិច្ចការពារនិងអភិវឌ្ឍន៍វិស័យកម្មសិទ្ធិបញ្ញា ជាពិសេសការអនុវត្តអនុស្សរណៈនៃការយោគយល់គ្នា ស្តីពីផែនការការងាររួមគ្នា ឆ្នាំ២០២៥-២០២៧ និងការអនុវត្តគម្រោងស្តីពីការអប់រំលើការបង្កើតថ្មីនៅកម្ពុជា។

08/07/2026

(ទីក្រុងហ្សឺណេវ​, ប្រទេសស្វ៊ីស​) នាថ្ងៃចន្ទទី៦ ខែកក្កដា ឆ្នាំ២០២៦ ឯកឧត្តម​ សួន​ វិជ្ជា​ បានអមដំណេីរលោកលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និង ជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញាជួបពិភាក្សាការងារទ្វេភាគីជាមួយនឹងឯកឧត្តម Daren Tang អគ្គនាយកអង្គការកម្មសិទ្ធិបញ្ញាពិភពលោក។​ ជំនួបទ្វេភាគីទាំងពីរនេះធ្វេីឡេីងក្នុងគោលបំណងពិនិត្យលេីវឌ្ឍនភាពការងារក្រោមកិច្ចសហប្រតិបត្តិការដែលមានស្រាប់​ និងពិនិត្យលទ្ធភាពពង្រីកកិច្ចសហប្រតិបត្តិការបន្ថែមទៀតដេីម្បីអភិវឌ្ឍវិស័យកម្មសិទ្ធិបញ្ញានៅកម្ពុជា។

សូមជម្រាបផងដែរថា​ ទន្ទឹមនឹងកិច្ចពិភាក្សាទ្វេភាគីជាមួយអង្គការកម្មសិទ្ធិបញ្ញាពិភពលោក កម្ពុជា និងអង្គការកម្មសិទ្ធិបញ្ញាពិភពលោក (WIPO) ចុះអនុស្សរណៈនៃការយោគយល់គ្នា ស្តីពីការបង្កើតមជ្ឈមណ្ឌលពាណិជ្ជកម្មកម្មសិទ្ធិបញ្ញា សំដៅគាំទ្រដល់វិស័យឯកជន ក្នុងការយល់ដឹងពីសារៈប្រយោជន៍នៃកម្មសិទ្ធិបញ្ញា។ការបង្កើតមជ្ឈមណ្ឌលពាណិជ្ជកម្មកម្មសិទ្ធិបញ្ញាធ្វេីឡេីងក្នុងគោលបំណងជួយសហគ្រាសធុនតូច និងមធ្យម (SMEs) អាជីវកម្មថ្មី (Startup) និងអ្នកច្នៃប្រឌិត (Innovators) ក្នុងការកំណត់អត្តសញ្ញាណ ការពារ និងគ្រប់គ្រងទ្រព្យកម្មសិទ្ធិបញ្ញា ព្រមទាំងធ្វេីការបណ្តុះបណ្តាលដើម្បីជួយអាជីវកម្មប្រើប្រាស់កម្មសិទ្ធិបញ្ញាជាឧបករណ៍សម្រាប់ការការពារអាជីវកម្ម​ និងលេីកកម្ពស់ការប្រកួតប្រជែង។