08/06/2026
សូមជម្រាបជូនបងប្អូនប្រជាពលរដ្ឋដែលប្រើប្រាស់ទឹកស្អាតរបស់លោកស្រី វង់ ធារី ដែលមានទីតាំងស្ថិតនៅភូមិស្រករ ឃុំបឹងខ្នារ ស្រុកបាកាន ខេត្តពោធិ៍សាត់ មេត្តាជ្រាបថា នៅព្រឹកថ្ងៃទី៨ ខែមិថុនា ឆ្នាំ២០២៦ ដោយមើលឃើញពីការលើកឡើងរបស់បងប្អូនប្រជាពលរដ្ឋពីការប្រើប្រាស់ទឹកមិនស្អាត ល្អក់កករ ក្រហម ធុំក្លិនមិនល្អ ដូចនេះក្រុមការងារមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រុមការងាររដ្ឋាករទឹកខេត្តពោធិ៍សាត់ និងមានការសហការចូលរួមពីអាជ្ញាធរមូលដ្ឋានរដ្ឋបាលស្រុកបាកាន បានចុះត្រួតពិនិត្យជាក់ស្តែងនៅស្ថានីយផលិតទឹកស្អាតខាងលើ ចាប់ពីប្រភពទឹក អាងប្រព្រឹត្តកម្ម និងបណ្តាញចែកចាយតាមខ្នងផ្ទះប្រជាពលរដ្ឋឃើញថាពិតជាមានភាពល្អក់កករ មានពណ៌ក្រហម មានធុំក្លិនមិនល្អពិតប្រាកដមែន ម្ចាស់ស្ថានីយបានទទួលស្គាល់នៅចំណុចខ្វះខាតរបស់ខ្លួន ហើយសន្យាថានឹងធ្វើការកែលម្អឱ្យបានប្រសើរឡើងវិញ មន្ទីរឧវបន នឹងធ្វើការចុះតាមដានត្រួតពិនិត្យប្រព័ន្ធប្រព្រឹត្តិកម្ម និងបណ្តាញចែកចាយទឹករបស់ម្ចាស់ស្ថានីយរៀងរាល់មួយសប្តាហ៍ម្តងរហូតដល់ការផលិតទឹកនេះបានស្អាតមានគុណភាពនិងសុវត្ថិភាពឡើងវិញ។ ជាចុងក្រោយក្រុមការងារមន្ទីរឧវបន បានធ្វើការណែនាំឱ្យម្ចាស់ស្ថានីយខិតខំធ្វើយ៉ាយណាដើម្បីផលិតទឹកអោយមានគុណភាព និងសុវត្ថិភាពជូនបងប្អូនប្រជាពលរដ្ឋប្រើប្រាស់។ សូមអរគុណ....!
