25/02/2023
X'nagħmel kieku kelli tifel gay?
Dan l-aħħar waqt taħdita dwar l-integrazzjoni sesswali li kont qiegħed immexxi xi ħadd staqsini "Nick inti kif iġġib ruħek u xi tgħid jekk għada pitgħada jiġi wieħed minn uliedek u jgħidlek li hu Gay?"
Xejn, irrispondejt (minkejja li jdejquni domandi kemmxejn personali waqt tali lekċers, imma għidt "I'll go with the flow")
Sempliċement ma nagħmel XEJN. Komplejt imbagħad- X'suppost għandi nagħmel wara kollox? Bħal ma kont nagħmel xejn kieku kelli tifel eterosesswali. Xejn differenti minn dak li nagħmlu kull jum bħala ġenituri.
Nisimghu jekk irid jitkellem dwarha. Nistenna l-mument meta jkun irid jiftaħ qalbu magħna. U, meta jasal dak il-mument, nistaqsih jekk hemmx xi ħadd li sar iħobbu, u jekk iva nistaqsih "jekk tixtieq, meta se tintroduċih magħna?"
Nistaqsih biss kif inhu, jekk iħossux kuntent u x'qiegħed iħoss. L-aħħar ħaġa li nixtieq mingħandu hi li ma jħossux obbligat li jixbah lili bħala missieru jew lil ommu bid-difetti u l-ħażin kollha tagħna, jew iħossu taħt pressjoni biex isegwi xi ideali soċjali. Ngħidlu li aħna nkunu ferħana jekk hu jħossu liberu jagħmel dak li jixtieq u dak li jħoss li se jagħmlu kuntent. Bħala nies li nemmnu nfakkruh li Alla jħobbu kif inhu u li l-iżjed ħaġa li nemmnu li jeżiġi minna huwa li nkunu veritiera magħna nfusna.
Tassew, biex inkun onest, inħoss li m’hemm xejn li jagħmel ġenitur iktar kburi milli jara lil ibnu/bintu jieħu triqtu fil-ħajja, it-triq personali tiegħu indipendenti minn missieru jew ommu, indipendenti mir-rieda tal-oħrajn u l-preġudizzji tas-soċjetà.
Komplejt ngħid li l-imħabba, min-naħa l-oħra, le, ma tiġix deċiża fuq il-mejda, fuq Facebook, tinder, Grindr eċċ jew mhijiex xi ħaġa li titlobha. L-imħabba tingħata u, jekk tkun partikolarment xortik tajba, tiġi rċevuta. Is-sesswalità mhix triq li tagħżel imma xi ħaġa li int. M'hemmx wisq xi tgħid iżjed.
Din kienet ir-risposta sempliċi tiegħi. Nistennew il-ġurnata (nittamaw li mhijiex imbiegħda) li fiha mistoqsija bħal din tkun ferm aktar imbarazzanti għal min jistaqsiha milli għal min iwiġiebha.
Ħajr lil ħafna ġenituri li jgħinu lil uliedhom iħarsu lejhom infushom b'imħabba u mhux b'mistħija. Ħajr ukoll lil diversi NGOs, inkluż Drachma Parents (grupp fi ħdan il-Knisja Kattolika Maltija) li jakkumpanjaw lil ġenituri fil-vjaġġ tagħhom ma' uliedhom LGBTIQ.
Jekk inti ġenitur li qiegħed/qegħda ssibha diffiċli biex taċċetta tali realtà ħossok liberu li titlob għajnuna. Dawn l-NGOs jagħmlu ħafna xogħol imprezzabbli.
Pittura ta' Helena Wade.
