05/07/2026
Respublica партиясының съезі 📍
⚡️Respublica партиясының төрағасы Айдарбек Қожаназаровтың өкілеттігі үш жылға ұзартылды
Respublica партиясының V кезектен тыс съезінде партияның тең төрағасы Сырымбек Тау партия төрағасы Айдарбек Қожаназаровтың өкілеттік мерзімін ұзартуды ұсынды. Партия төрағасының өкілеттік мерзімі осы жылдың шілде айында аяқталады.
«Айдарбек Асанұлы – партияның негізін қалаушылардың бірі. Оның жетекшілігімен Respublica аз уақыттың ішінде ел сеніміне ие болған беделді саяси күшке айналып, нақты нәтижелерге қол жеткізді», – деді Сырымбек Тау.
Оның айтуынша, партия осы уақыт ішінде өңірлерде берік ұйымдық құрылым қалыптастырып, депутаттық корпусты нығайтты және азаматтардың мүддесін көздейтін көптеген заңнамалық бастамаларды көтерді. Алдағы Құрылтай сайлауы қарсаңында партияның сабақтастығы мен таңдаған бағытын сақтап қалу аса маңызды.
Сырымбек Тау Айдарбек Қожаназаровтың кәсіби біліктілігі мен басқарушылық тәжірибесіне тоқталып, оның партия мүшелерінің, өңірлік филиалдардың және депутаттық корпустың қолдауына ие екенін айтты.
Оның пікірінше, өкілеттік мерзімін ұзарту партияның тұрақты дамуын қамтамасыз етіп, алға қойған стратегиялық міндеттерді жүйелі түрде жүзеге асыруға мүмкіндік береді.
Съезд делегаттары Айдарбек Қожаназаровтың Respublica партиясының төрағасы ретіндегі өкілеттігін ұзартуға дауыс беріп, ұсынысты қолдады.
Елордада Respublica партиясының кезектен тыс V съезі өтті, оған партия басшылығы, орталық және өңірлік кеңес мүшелері, филиал төрағалары, депутаттар, сондай-ақ Respublica Jastary және ReWomen қауымдастықтарының белсенділері қатысты.
