05/09/2026
🔻 Тарихтан – туризмге: Талдықорғанда «Қызылтас – Тасбақа» экопаркінің алғашқы кезеңі ашылды
Бүгін Талдықорған қаласының іргесіндегі тарихи мекен «Қызылтас – Тасбақа» шатқалында абаттандырылған экопарктің алғашқы кезеңі ашылды.
Экопарктің ашылуына Талдықорған қаласының әкімі Ернат Бәзіл қатысып, тарихи аумақты жаңғырту қаланың туристік әлеуетін арттырып, ішкі туризмді дамытуға жаңа мүмкіндік беретінін атап өтті.
Мемлекет басшысының тапсырмасына сәйкес Жетісу облысында үш экопарк құру көзделген. Соның бірі «Қызылтас – Тасбақа» экопаркі. Облыс әкімі Бейбіт Исабаевтың қолдауымен аумақты абаттандыру жұмыстары қолға алынып, бүгінде жобаның алғашқы кезеңі жүзеге асырылды. Үш кезеңнен тұратын жобаны 2027 жылы толық аяқтау жоспарланған.
Алғашқы кезең аясында демалушыларға арналған орындықтар, шолу алаңы, арнайы фотоаймақ пен санитарлық торап орнатылып, қоқыс жәшіктері қойылды. Сондай-ақ аумақты жарықтандыру және абаттандыру жұмыстары жүргізілді.
Шара аясында келушілер үшін шатқалдағы көне петроглифтерге экскурсия ұйымдастырылып, экологиялық акция, қолөнер шеберлерінің жәрмеңкесі, этно-дефиле, ұлттық ойындар және өзге де танымдық іс-шаралар өтті. Бұл шаралар тарихи мұраны кеңінен таныстырумен қатар, ұлттық құндылықтарды дәріптеуге және экологиялық мәдениетті қалыптастыруға бағытталды.
Қала әкімі Ернат Бәзіл тарихи мұраны сақтап, оны келешек ұрпаққа жеткізудің маңыздылығына тоқталды.
– Тасбақа шатқалының тарихи маңызын ескере отырып, бұл аумақты сақтап қалу бағытында ауқымды жұмыстар жүргізілді. 2024 жылы облыс әкімі Бейбіт Исабаевтың қолдауымен шатқал ерекше қорғауға алынды. Бүгінде бұл жер ата-бабамыздан қалған бай мұрамен танысып, көне тарихымызды тереңірек тануға мүмкіндік беретін бірегей мекен. Сондықтан бүгінгі шараның тарихи әрі тағылымдық мәні зор. Біз өткенін қастерлеп, тарихына құрметпен қарайтын халықпыз, – деді Ернат Бәзіл.
Сондай-ақ қоғам белсендісі, экожанашыр Динара Бакирова тарихи мекенді сақтау мен жаңғыртудың маңыздылығын атап өтіп, экопарктің бүгінгі келбеті экобелсенділер мен жергілікті әкімдіктің бірлескен жұмысының нәтижесі екенін жеткізді.
Алдағы уақытта экопаркті дамыту жұмыстары кезең-кезеңімен жалғасады. Негізгі мақсат тарихи мекенді қала тұрғындары мен қонақтары үшін ғана емес, шетелдік туристер үшін де тартымды туристік орынға айналдыру.
Айта кетейік, «Тасбақа» шатқалы көне тарихи мұраларға бай бірегей аумақтардың бірі. Мұнда 2 мыңнан астам петроглиф пен сақ дәуіріне тиесілі қорымдар бар. Тарихшылар арасында бұл аумақ «Талдықорған петроглифтері» деген атаумен де белгілі.
