ສະພາປະຊາຊົນແຂວງບໍ່ແກ້ວ

20/08/2026

ກໍາມາທິການວັດທະນະທຳ-ສັງຄົມ ແລະ ຊົນເຜົ່າ ສະພາແຫ່ງຊາດ ລົງຕິດຕາມກວດກາ ແລະ ຊຸກຍູ້ວຽກງານ ຢູ່ແຂວງບໍ່ແກ້ວ
-------------------------
ວັນທີ 20 ສິງຫາ 2026 ນີ້, ກຳມາທິການວັດທະນະທໍາ-ສັງຄົມ ແລະ ຊົນເຜົ່າ ສະພາແຫ່ງຊາດ ໄດ້ມີກອງປະຊຸມຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານ 6 ເດືອນທ້າຍປີ 2026 ຢູ່ສະພາປະຊາຊົນແຂວງບໍ່ແກ້ວ, ໂດຍການເປັນປະທານຮ່ວມຂອງທ່ານ ແກ້ວຈະເລີນ ເຊ່ຍຢີ້ງຢາງ ຮອງປະທານກຳມາທິການວັດທະນະທຳ-ສັງຄົມ ແລະ ຊົນເຜົ່າ ແລະ ທ່ານ ຄຳຈັນ ອິນທະຈັກ ກຳມະການພັກແຂວງ, ຮອງປະທານສະພາປະຊາຊົນແຂວງ ຜູ້ຊີ້ນຳຄະນະກຳມະການວັດທະນະທຳ-ສັງຄົມ ແລະ ຊົນເຜົ່າ ສພຂ, ເຂົ້າຮ່ວມ ມີບັນດາທ່ານຄະນະປະຈໍາສະພາປະຊາຊົນແຂວງ, ຮອງປະທານຄະນະກຳມະການ, ຮອງຫົວໜ້າຫ້ອງວ່າການ ສພຂ, ຫົວໜ້າ-ຮອງຫົວໜ້າ ແລະ ຜູ້ຕາງໜ້າພະແນກການ ໃນຂົງເຂດວັດທະນະທຳ-ສັງຄົມ, ຂົງເຂດຊົນເຜົ່າ, ອົງການຈັດຕັ້ງມະຫາຊົນຂອງແຂວງ, ທີມງານຈາກສະພາແຫ່ງຊາດ ແລະ ພະນັກງານວິຊາການຄະນະກຳມະການວັດທະນະທໍາ-ສັງຄົມ ແລະ ຊົນເຜົ່າ ສພຂເຂົ້າຮ່ວມ.
ໃນກອງປະຊຸມຄະນະຮັບຜິດຊອບ ໄດ້ສະເໜີຈຸດປະສົງ ແລະ ແຂກເຂົ້າຮ່ວມກອງປະຊຸມ. ຈາກນັ້ນ, ທ່ານ ແກ້ວຈະເລີນ ເຊ່ຍຢີ້ງຢາງ ຮອງປະທານກຳມາທິການວັດທະນະທຳ-ສັງຄົມ ແລະ ຊົນເຜົ່າ ໄດ້ມີຄໍາເຫັນເປີດກອງປະຊຸມ ແລະ ເຈາະຈີ້ມໃຫ້ບັນດາພະແນກການ, ອົງການຂົງເຂດວັດທະນະທໍາ-ສັງຄົມ, ຂົງເຂດຊົນເຜົ່າ ລາຍງານການຈັດຕັ້ງປະຕິບັດວຽກງານຂອງແຕ່ລະຂົງເຂດ ຕາມຄຳຖາມເຈາະຈີ້ມທີ່ຄະນະຮັບຜິດຊອບສົ່ງໃຫ້ ເຊິ່ງປະກອບມີ 10 ພາກສ່ວນ ຄື: ພະແນກສຶກສາທິການ ແລະ ກິລາ, ພະແນກສາທາລະນະສຸກ, ພະແນກແຮງງານ ແລະ ສະຫວັດດີ ການ-ສັງຄົມ, ພະແນກວັດທະນະທຳ ແລະ ທ່ອງທ່ຽວ, ປກສ ແຂວງ, ຫ້ອງວ່າການແຂວງ, ແນວລາວສ້າງຊາດແຂວງ, ກຳມະບານແຂວງ, ຊາວໜຸ່ມແຂວງ, ອົງການກາແດງແຂວງ, ບັນດາພາກສ່ວນດັ່ງກ່າວ ໄດ້ລາຍງານຫຍໍ້ ໂດຍຍົກໃຫ້ເຫັນສະພາບການຈັດຕັ້ງປະຕິບັດວຽກງານທີ່ມີຜົນສໍາເລັດ ແລະ ບາງຂໍ້ຄົງຄ້າງທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດໃຫ້ສຳເລັດຕາມຄາດໝາຍທີ່ສະພາແຫ່ງຊາດ, ສະພາປະຊາຊົນຂັ້ນແຂວງ ໄດ້ຮັບຮອງ ແລະ ຍົກໃຫ້ເຫັນບາງຂໍ້ຫຍຸ້ງຍາກທີ່ເປັນສາເຫດເຮັດໃຫ້ການຈັດຕັ້ງປະຕິບັດ ບໍ່ສາມາດບັນລຸຕາມຄາດໝາຍ, ໃນໂອກາດດັ່ງກ່າວທ່ານ ຄໍາຈັນ ອິນທະຈັກ ຮອງປະທານສະພາປະຊາຊົນແຂວງ ໄດ້ມີບາງຄຳເຫັນເພື່ອແລກປ່ຽນ ແລະ ຊີ້ນຳໃຫ້ພະແນກການດັ່ງກ່າວນຳໄປຈັດຕັ້ງປະຕິບັດ.
ຕອນທ້າຍກອງປະຊຸມ ທ່ານ ແກ້ວຈະເລີນ ເຊຍຢີ້ງຢາງ ຮອງປະທານກຳມາທິການວັດທະນະທຳ-ສັງຄົມ ແລະ ຊົນເຜົ່າ ໄດ້ສະຫຼຸບສັງລວມ ແລະ ມອບໃຫ້ພະແນກການ, ອົງການໃນຂົງເຂດວັດທະນະທຳ, ຂົງເຂດຊົນເຜົ່າ ສືບຕໍ່ເອົາໃຈໃສ່ຈັດຕັ້ງປະຕິບັດແຕ່ລະຄາດໝາຍໃຫ້ບັນລຸຕາມແຜນການ, ຊີ້ນຳໃຫ້ພາກສ່ວນດັ່ງກ່າວມີການປະສານສົມທົບຢ່າງກົມກ່ຽວໃນແກ້ໄຂບັນຫາ, ພ້ອມທັງສ້າງແຜນການລົງຕິດຕາມຊຸກຍູ້ຢ່າງໃກ້ສິດຕໍ່ປະຊາຊົນບັນດາເຜົ່າ, ເພື່ອເກັບກໍາຂໍ້ມູນ ແລະ ເຂົ້າເຖິງປະຂາຊົນບັນດາເຜົ່າ ຈຶ່ງຈະໄດ້ຂໍ້ມູນຢ່າງລະອຽດ ແລະຈຶ່ງສາມາດແກ້ໄຂບັນຫາໄດ້. ຕອນທ້າຍທ່ານຍັງໄດ້ສັງລວມບັນຫາຕ່າງໆທີ່ພະແນກການ, ອົງການໃນຂົງເຂດດັ່ງກ່າວສະເໜີ ເພື່ອໄປລາຍງານຕໍ່ຄະນະປະສະພາແຫ່ງຊາດ ແລະ ສົມທົບກັບບັນດາກະຊວງທີ່ກ່ຽວຂ້ອງ ຊຸກຍູ້, ແກ້ໄຂ ໃຫ້ດີຂຶ້ນໃນຕໍ່ໜ້າ

ພາບ/ຂ່າວ
ນັກຂ່າວ ສພຂ

18/08/2026

17/08/2026

16/08/2026

07/08/2026

"ປະກາດການສ້າງຕັ້ງກົງຈັກ ແລະ ແຕ່ງຕັ້ງຄະນະ ສສຊ ປະຈໍາເຂດເລືອກຕັ້ງທີ 5"
ວັນທີ 7 ສິງຫາ 2026, ທີ່ຫ້ອງປະຊຸມສະພາປະຊາຊົນແຂວງ ໄດ້ມີພິທີປະກາດກົງຈັກທີ່ຄະນະປະຈໍາສະພາແຫ່ງຊາດສ້າງຕັ້ງ ແລະ ແຕ່ງຕັ້ງຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 5 ແຂວງບໍ່ແກ້ວ ໂດຍການເປັນປະທານຂອງທ່ານ ມອນໄຊ ລາວມົວຊົ່ງ ກຳມະການສູນກາງພັກ, ຮອງປະທານຄະນະປະຈໍາສະພາແຫ່ງຊາດ (ຄປຈສພຊ); ເຂົ້າຮ່ວມມີທ່ານ ພົຈວ. ແປ້ນຄຳ ບຸດຈັນແພງ ກໍາມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງ (ສພຂ); ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ (ສສຂ) ທີ່ປະຈຳຢູ່ອ້ອມຂ້າງແຂວງ ແລະ ເມືອງຫ້ວຍຊາຍ, ພະແນກການ, ອົງການພັກ-ລັດຂອງແຂວງ, ຄະນະຫ້ອງວ່າການສະພາປະຊາຊົນແຂວງ ແລະ ພະນັກງານເສນາທິການຂອງ ສພຂ ເຂົ້າຮ່ວມຢ່າງພ້ອມພຽງ.
ໃນພິທີ, ໄດ້ຮັບຟັງລາຍງານສະພາບການເຄື່ອນໄຫວວຽກງານ 6 ເດືອນຜ່ານມາ ຂອງຄະນະສະມາຊິກສະພາແຫ່ງຊາດ (ຄສຊ)ປະຈຳເຂດເລືອກຕັ້ງທີ 5 ແຂວງບໍ່ແກ້ວ ຈາກທ່ານ ພົຈວ. ແປ້ນຄຳ ບຸດຈັນແພງ ຕໍ່ພິທີ; ຈາກນັ້ນ, ທ່ານຮອງຫົວໜ້າຫ້ອງວ່າການສະພາແຫ່ງຊາດ ໄດ້ຜ່ານມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 185/ຄປຈ, ລົງວັນທີ 08/7/2026 ວ່າດ້ວຍການສ້າງຕັ້ງກົງຈັກ ແລະ ແຕ່ງຕັ້ງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 5 ແຂວງບໍ່ແກ້ວ ໂດຍແຕ່ງຕັ້ງທ່ານ ພົຈວ. ແປ້ນຄຳ ບຸດຈັນແພງ ເປັນປະທານ, ທ່ານ ດາລີວັນ ພູສະຫວັນ ເປັນຮອງປະທານ, ທ່ານ ນາງ ທຸມມາລີ ວົງພະຈັນ ເປັນຄະນະ, ທ່ານ ພົຈວ. ປອ. ຄຳແຝງ ວັນດີໄຊ ເປັນຄະນະ, ທ່ານ ນາງ ບົວຄົມ ຂານສຸວົງ ເປັນຄະນະ, ທ່ານ ນາງ ສີອຳໄພ ໂສລະຖີ ເປັນຄະນະ ແລະ ທ່ານ ພັອ. ຄຳແດງ ວັນນະສິດ ເປັນຄະນະ; ຈາກນັ້ນ, ທ່ານ ມອນໄຊ ລາວມົວຊົ່ງ ໄດ້ມອບມະຕິດັ່ງກ່າວໃຫ້ແກ່ຄະນະ ສສຊ ປະຈຳເຂດເລືອກຕັ້ງທີ 5 ແລະ ໄດ້ມີຄຳເຫັນໂອ້ລົມຕໍ່ພິທີ, ທ່ານໄດ້ສະແດງຄວາມຊົມເຊີຍຕໍ່ບັນດາທ່ານທີ່ໄດ້ຖືກແຕ່ງຕັ້ງ ແລະ ໃຫ້ບັນດາທ່ານທີ່ໄດ້ຮັບການແຕ່ງຕັ້ງ ນໍາພາ-ຊີ້ນໍາວຽກງານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 5 ແຂວງບໍ່ແກ້ວ ພ້ອມທັງເນັ້ນໜັກໃຫ້ສ້າງກົນໄກການປະສານງານກັບຄະນະກຳມະການປົກຄອງແຂວງ, ບັນດາກໍາມາທິການ ແລະ ຫ້ອງວ່າການສະພາແຫ່ງຊາດ, ສະພາປະຊາຊົນແຂວງ ໃຫ້ມີຄວາມກົມກຽວ ເພື່ອເຮັດໜ້າທີ່ ຕາມ 3 ພາລະບົດບາດທີ່ກຳນົດໄວ້ໃນກົດໝາຍ ເປັນຕົ້ນ ດ້ານນິຕິກຳ, ການຕົກລົງບັນຫາສໍາຄັນພື້ນຖານຂອງແຂວງ, ຕິດຕາມກວດກາ. ທ່ານຮອງປະທານສະພາແຫ່ງຊາດ ຍັງໄດ້ສະເໜີໃຫ້ຄະນະກຳການປົກຄອງແຂວງ ຈົ່ງໃຫ້ຄວາມຮ່ວມມື, ການສ້າງເງື່ອນໄຂອໍານວຍຄວາມສະດວກໃຫ້ແກ່ການເຄື່ອນໄຫວປະຕິບັດໜ້າທີ່ວຽກງານຂອງ ສສຊ-ສສຂ ເປັນຕົ້ນແມ່ນ ພາຫະນະ, ງົບປະມານ ແລະ ບັນຫາອື່ນໆ ທີ່ຈຳເປັນໃຫ້ແກ່ການເຄື່ອນໄຫວໃນຕໍ່ໜ້າ ແລະ ຍາວນານ.
#ນັກຂ່າວສະພາປະຊາຊົນແຂວງ

04/08/2026

ປະກາດກົງຈັກການຈັດຕັ້ງ ແລະ ບຸກຄະລາກອນ ຄະນະສະມາຊິກສະພາປະຊາຊົນແຂວງບໍ່ແກ້ວ ປະຈຳເຂດເລືອກຕັ້ງເມືອງຫ້ວຍຊາຍ
ຕອນເຊົ້າວັນທີ 4 ສິງຫາ 2026 ນີ້, ຢູ່ທີ່ສະໂມສອນເມືອງຫ້ວຍຊາຍ ໄດ້ຈັດພິທີປະກາດກົງຈັກການຈັດຕັ້ງ ແລະ ບຸກຄະລາກອນ ຄະນະສະມາຊິກສະພາປະຊາຊົນແຂວງບໍ່ແກ້ວ ປະຈຳເຂດເລືອກຕັ້ງເມືອງຫ້ວຍຊາຍ ໂດຍການເປັນປະທານ ຂອງທ່ານ ດາລີວັນ ພູສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງບໍ່ແກ້ວ ( ຜູ້ປະຈໍາການ ); ມີ ທ່ານ ຈອມແພງ ວິໄລສານ ຄະນະປະຈໍາພັກແຂວງ, ເລຂາຄະນະບໍລິຫານງານພັກເມືອງ, ມີທີມງານຂອງສະພາປະຊາຊົນແຂວງ, ຄະນະປະຈຳພັກເມືອງ, ກຳມະການພັກເມືອງ ແລະ ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.
ໃນພິທີ ທ່ານ ສາຍຄໍາ ຄໍາປະເສີດ ຄະນະປະຈຳສະພາປະຊາຊົນແຂວງ, ໄດ້ຂຶ້ນຜ່ານມະຕິ ສະບັບເລກທີ 15/ຄປຈຂ, ລົງວັນທີ 15 ພຶດສະພາ 2026 ວ່າດ້ວຍການສ້າງຕັ້ງກົງຈັກ ແລະ ແຕ່ງຕັ້ງບຸກຄະລາກອນ ຂອງກົງຈັກທີ່ຄະນະປະຈໍາສະພາປະຊາຊົນແຂວງສ້າງຕັ້ງ ໂດຍຮັບຮອງເອົາທ່ານ ຈອມແພງ ວິໄລສານ ຄະນະປະຈໍາພັກແຂວງ, ເລຂາຄະນະບໍລິຫານງານພັກເມືອງ, ສະມາຊິກສະພາປະຊາຊຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນຫົວໜ້າ, ທ່ານ ອຳພອນ ລໍມີໄຊ ກໍາມະການພັກເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນຮອງຫົວໜ້າ; ທ່ານ ດາລີວັນ ພູສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນກໍາມະການ; ທ່ານ ນາງ ອໍາພອນ ບຸນຍາວົງ ຄະນະປະຈໍາສະພາປະຊາຊົນແຂວງ, ຫົວໜ້າຫ້ອງວ່າການສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນກໍາມະການ; ທ່ານ ເທວາ ຊົງ ຮອງປະທານຄະນະກໍາມະການເສດຖະກິດ ແລະ ການເງິນ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງຫ້ວຍຊາຍ ເປັນກໍາມະການ ແລະ ທ່ານ ພັອ ອຸດົມໄຊ ພົມປັນຍາ ຮອງຫົວໜ້າການເມືອງ, ຫົວໜ້າຫ້ອງການເມືອງກອງບັນຊາການທະຫານແຂວງບໍ່ແກ້ວ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນກໍາມະການ ແລະ ຜ່ານມະຕິ ຂອງຄະນະປະຈໍາສະພາປະຊາຊົນແຂວງ ສະບັບເລກທີ 47/ຄປຈຂ ວ່າດ້ວຍການສ້າງຕັ້ງຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ, ໜ່ວຍງານຊ່ວຍວຽກ ແລະ ແຕ່ງຕັ້ງຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ. ເຫັນດີສ້າງຕັ້ງຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ແລະ ໜ່ວຍງານຊ່ວຍວຽກ ປະກອບມີ 2 ໜ່ວຍງານຄື: ໜ່ວຍງານຄົ້ນຄວ້າ-ສັງລວມ ແລະ ໜ່ວຍງານບໍລິຫານ-ການເງິນ ໂດຍເຫັນດີແຕ່ງຕັ້ງ ທ່ານ ອຳພອນ ລໍມີໄຊ ກໍາມະການພັກເມືອງ ຮອງຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ເປັນຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ ມີຕໍາແໜ່ງທຽບເທົ່າກັບຫົວໜ້າຫ້ອງການຂັ້ນເມືອງ.
ໃນພິທີ ທ່ານ ໂຊ່ນ ອິນທະໄຊ ຄະນະປະຈໍາພັກເມືອງ, ຫົວໜ້າຄະນະຈັດຕັ້ງເມືອງ ໄດ້ຂຶ້ນ ຜ່ານຂໍ້ຕົກລົງ ຂອງປະທານຄະນະກໍາມະການປົກຄອງເມືອງຫ້ວຍຊາຍ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ເຫັນດີ ຍົກຍ້າຍ ທ່ານ ສົມໂພ ກຽດຕິສັກ ຫົວໜ້າໜ່ວຍງານກໍ່ສ້າງຮາກຖານການເມືອງ ຫ້ອງວ່າການເມືອງ ໄປຮັບໜ້າທີ່ໃໝ່ ເປັນຮອງຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ, ຍົກຍ້າຍ ທ່ານ ນາງ ຈອມແປງ ຈັນສະແຫວງ ຫົວໜ້າໜ່ວຍງານບໍລິຫານ ຫ້ອງວ່າການເມືອງ ໄປຮັບໜ້າທີ່ໃໝ່ ເປັນຮອງຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ, ຍົກຍ້າຍ ທ່ານ ຈືມົວ ຫົວໜ້າໜ່ວຍງານບໍລິຫານຄະນະກວດກາພັກ-ລັດເມືອງ ໄປຮັບໜ້າທີ່ໃໝ່ ເປັນຫົວໜ້າໜ່ວຍງານບໍລິຫານ- ການເງິນ, ຍົກຍ້າຍ ທ່ານ ນາງ ຈັນສະໝອນ ສຸພາກອນ ຮອງຫົວໜ້າໜ່ວຍງານ ຊົນເຜົ່າ ແລະ ສາດສະໜາ ຫ້ອງການແນວລາວສ້າງຊາດເມືອງ ໄປເປັນຮອງຫົວໜ້າໜ່ວຍງານບໍລິຫານ-ການເງີນ ຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຫ້ວຍຊາຍ.
ໂອກາດນີ້ ທ່ານ ດາລີວັນ ພູສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ໄດ້ສະແດງຄວາມຂອບໃຈເປັນຢ່າງສູງມາຍັງ ຄະນະພັກ, ຄະນະກໍາມະການປົກຄອງເມືອງ ແລະ ການຈັດຕັ້ງທຸກພາກສ່ວນທີ່ໄດ້ໃຫ້ການຕ້ອນຮັບ ແລະ ກະກຽມພິທີປະກາດກົງຈັກການຈັດຕັ້ງ ແລະ ບຸກຄະລາກອນ ຂຶ້ນໃນມື້ນີ້ເປັນຢ່າງດີ, ການປະກາດກົງຈັກການຈັດຕັ້ງ ແລະ ບຸກຄະລາກອນໃນຄັ້ງນີ້ ຍັງເປັນການຕອບສະໜອງຢ່າງທັນການຕໍ່ສະພາບຄວາມຮຽກຮ້ອງຂອງໜ້າທີ່ການເມືອງໃນໄລຍະໃໝ່ ແລະ ທ່ານໄດ້ເນັ້ນໜັກໃຫ້ປູ້ທີ່ໄດ້ຮັບການແຕ່ງຕັ້ງຕ້ອງສຸມໃສ່ຈັດຕັ້ງປະຕິບັດວຽກງານສະພາປະຊາຊົນແຂວງ ໃຫ້ມີປະສິດທິພາບ, ປະສິດທິຜົນສູງຂຶ້ນ, ໃນຖານະທີ່ເປັນຕົວແທນແຫ່ງສິດ, ຜົນປະໂຫຍດ ຂອງປະຊາຊົນບັນດາເຜົ່າ, ເພື່ອຊອກຫາທາງອອກໃຫ້ປະຊາຊົນໃຫ້ໄດ້ທ່ວງທັນກັບເວລາ, ເພີ່ມທະວີຄວາມເອົາໃຈໃສ່ໃນການໂຄສະນາ, ເຜີຍແຜ່ ຈັດຕັ້ງເຊື່ອມຊຶມວຽກງານສະພາໃຫ້ປະຊາຊົນບັນດາເຜົ່າ, ໃຫ້ຊັ້ນຄົນໃນສັງຄົມຮັບຮູ້ເຂົ້າໃຈກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນທ້ອງຖິ່ນ ຂອງພວກເຮົາໃຫ້ນັບມື້ດີຂຶ້ນ.

04/08/2026

ຊົມເຊີຍ ວັນສ້າງຕັ້ງສະພາປະຊາຊົນທ້ອງຖິ່ນ ຫຼື ສະພາປະຊາຊົນຂັ້ນແຂວງ ຄົບຮອບ 48 ປີ ຢ່າງສຸດໃຈ!
(4 ສິງຫາ 1978 - 4 ສິງຫາ 2026).........................................................................
ຂ່າວອື່ນໆ: https://na.gov.la
Facebook: ຂ່າວ “ຜູ້ແທນປະຊາຊົນ”
ຊ່ອງຢູທູບ (youtube): NA media
ສົນໃຈລົງໂຄສະນາ ໂທ: 021 454 563
ຕິດຕໍ່ນັກຂ່າວ ໂທ: 021 413 522
ຫຼື ສົ່ງຂໍ້ຄວາມທາງແອັບ (app): Lao Na

04/08/2026

ພິທີປະກາດກົງຈັກການຈັດຕັ້ງ ແລະ ບຸກຄະລາກອນ ຄະນະສະມາຊິກສະພາປະຊາຊົນແຂວງບໍ່ແກ້ວ, ປະຈຳເຂດເລືອກຕັ້ງເມືອງເມິງ
---------------
ວັນທີ 31 ກໍລະກົດ 2026 ຜ່ານມານີ້, ຢູ່ທີ່ສະໂມສອນ ເມືອງເມິງ ແຂວງບໍ່ແກ້ວ ໄດ້ຈັດພິທີປະກາດກົງຈັກການຈັດຕັ້ງ ແລະ ບຸກຄະລາກອນ ຄະນະສະມາຊິກສະພາປະຊາຊົນແຂວງບໍ່ແກ້ວ, ປະຈຳເຂດເລືອກຕັ້ງເມືອງເມິງ ໂດຍການເປັນປະທານ ຂອງທ່ານ ດາລີວັນ ພູສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງບໍ່ແກ້ວ (ຜູ້ປະຈຳການ ), ມີທ່ານ ສີວິໄລ ສີແສນດີ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ມີທີມງານຂອງຄະນະສະມາຊິກສະພາປະຊາຊົນແຂວງ, ຄະນະປະຈຳພັກເມືອງ, ກຳມະການພັກເມືອງ ແລະ ຫົວໜ້າ-ຮອງຫົວໜ້າຫ້ອງການພາຍໃນອ້ອມຂ້າງເມືອງເຂົ້າຮ່ວມ.
ກອງປະຊຸມ ທ່ານ ບົວຮອງ ແກ້ວສຸບັນ ຄະນະປະຈຳສະພາປະຊາຊົນແຂວງ, ປະທານຄະນະກຳມະການວັດທະນະທຳ-ສັງຄົມ ແລະ ຊົນເຜົ່າ ໄດ້ຂຶ້ນຜ່ານມະຕິ ສະບັບເລກທີ 15/ຄປຈຂ, ລົງວັນທີ 5 ພຶດສະພາ 2026 ວ່າດ້ວຍການສ້າງຕັ້ງກົງຈັກ ແລະ ແຕ່ງຕັ້ງບຸກຄະລາກອນ ທີ່ຄະນະປະຈໍາສະພາປະຊາຊົນແຂວງສ້າງຕັ້ງ ຄື: ຮັບຮອງເອົາທ່ານ ສີວິໄລ ສີແສນດີ ກໍາມະການພັກແຂວງ, ເລຂາພັກເມືອງ,ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນຫົວໜ້າ; ທ່ານ ນາງ ສາຍທອງ ອິນທະພອນ ກໍາມະການພັກເມືອງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນຮອງຫົວໜ້າ; ທ່ານ ດຣ ຄໍາສິນ ພົມມະຫານ ກໍາມະການພັກແຂວງ, ຫົວໜ້າພະແນກສາທາລະນະສຸກແຂວງ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນກໍາມະການ; ທ່ານ ນາງ ບົວຄົມ ຂານສຸວົງ ກໍາມະການຄະນະປະຈໍາສະພາປະຊາຊົນແຂວງ, ປະທານຄະນະກໍາມະການເສດຖະກິດ ແລະ ການເງິນ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນກໍາມະການ; ທ່ານ ບົວຮອງ ແກ້ວສຸບັນ ກໍາມະການຄະນະປະຈໍາສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ຊົນເຜົ່າ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນກໍາມະການ ແລະ ທ່ານ ພັທ ຈັນທອນ ແກ້ວສິງທອງ ຮອງຫົວໜ້າກອງບັນຊາການ ປກສ ເມືອງ, ສະມາຊິກສະພາປະຊາຊົນແຂວງ ປະຈໍາເຊດເລືອກຕັ້ງເມືອງເມິງ ເປັນກໍາມະການ. ຜ່ານມະຕິເລກທີ 48/ຄປຈຂ ວ່າດ້ວຍການສ້າງຕັ້ງຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ, ໜ່ວຍງານຊ່ວຍວຽກ ແລະ ແຕ່ງຕັ້ງຫົໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເຫັນດີສ້າງຕັ້ງຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ແລະ ໜ່ວຍງານຊ່ວຍວຽກ ປະກອບມີ 2 ໜ່ວຍງານຄື: ໜ່ວຍງານຄົ້ນຄວ້າ-ສັງລວມ ແລະ ໜ່ວຍງານບໍລິຫານ-ການເງິນ ເຫັນດີ ແຕ່ງຕັ້ງ ທ່ານ ນາງ ສາຍທອງ ອິນທະພອນ ກໍາມະການພັກເມືອງ, ຮອງຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ເປັນຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ແລະ ມີຕໍາແໜ່ງທຽບເທົ່າກັບຫົວໜ້າຫ້ອງການຂັ້ນເມືອງ ແລະ ທ່ານ ຄຳເງິນ ຄະນະປະຈຳພັກເມືອງຜ່ານຂໍ້ຕົກລົງ ຂອງຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ສະບັບເລກທີ 01-02-03/ ຄສຂມ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານດໍາລົງຕໍາແໜ່ງບໍລິຫານ ເຫັນດີ ຍົກຍ້າຍ ທ່ານ ມຸດ ອຸ່ນທະລາ ຕໍາແໜ່ງພັກ: ສະມາຊິກ, ຕໍາແນ່ງລັດ: ຫົວໜ້າໜ່ວຍງານບໍລິຫານ-ຈັດຕັ້ງ( ຄະນະໂຄສະນາອົບຮົມເມືອງ ) ຍົກຍ້າຍໄປປະຈໍາການຢຸູ່ ຫ້ອງຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ແຕ່ງຕັ້ງເປັນຮອງຫົວໜ້າຫ້ອງການ ດໍາລົງຕໍາແໜ່ງປະເພດ 5; ເຫັນດີ ຍົກຍ້າຍ ທ່ານ ຂົນຄໍາ ອ້ອຍແຂມທອງ ຕໍາແໜ່ງພັກ: ສະມາຊິກ, ຕໍາແໜ່ງລັດ: ຫົວໜ້າໜ່ວຍງານກົດໝາຍໂຄສະນາເຜີຍແຜ່ກົດໝາຍ ແລະ ສົ່ງເສີມວຽກງານຍຸຕິທໍາ ( ຫ້ອງການຍຸຕິທໍາເມືອງ ) ຍົກຍ້າຍໄປປະຈໍາການຢູ່ ຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ແຕ່ງຕັ້ງເປັນຫົວໜ້າໜ່ວຍງານຄົ້ນຄວ້າ-ສັງລວມ ດໍາລົງຕໍາແໜ່ງປະເພດ 6; ແລະ ຍົກຍ້າຍ ທ່ານ ນາງ ລໍາພອນ ວັນນະຈອມຈັນ ຕໍາແໜ່ງພັກ: ສະມາຊິກພັກ, ຕໍາແໜ່ງລັດ: ຫົວໜ້າໜ່ວຍງານບໍລິຫານ-ຈັດຕັ້ງ ( ຫ້ອງການກະສີກໍາ ແລະ ສິງແວດລ້ອມເມືອງ ) ຍົກຍ້າຍໄປປະຈໍາການຢູ່ ຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງເມິງ ຈາກນັ້ນ ໃນພິທີຍັງໄດ້ມອບມະຕິຕົກລົງ ແລະ ຂໍ້ຕົກລົງ ໃຫ້ແກ່ຜູ້ທີ່ໄດ້ຮັບການແຕ່ງຕັ້ງໃໝ່ ຢ່າງເປັນທາງການ.
ໂອກາດນີ້ ທ່ານ ດາລີວັນ ພູສະຫວັນ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ ໄດ້ມີຄຳເຫັນຊີ້ນຳ ແລະ ເນັ້ນໜັກຕໍ່ພິທີໃນຄັ້ງນີ້ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈເປັນຢ່າງສູງມາຍັງ ຄະນະພັກ, ຄະນະກໍາມະການປົກຄອງເມືອງ ແລະ ການຈັດຕັ້ງທຸກພາກສ່ວນທີ່ໄດ້ໃຫ້ການຕ້ອນຮັບ ແລະ ກະກຽມພິທີປະກາດກົງຈັກກ່ນຈັດຕັ້ງ ແລະ ບຸກຄະລາກອນ ຂຶ້ນໃນມື້ນີ້ເປັນຢ່າງດີ, ພິທີປະກາດກົງຈັກການຈັດຕັ້ງ ແລະ ບຸກຄະລາກອນໃນຄັ້ງນີ້ ຍັງເປັນການຕອບສະໜອງຢ່າງທັນການຕໍ່ສະພາບຄວາມເລັ່ງທ່ວງ ຂອງໜ້າທີ່ການເມືອງໃນເງື່ອນໄຂໃໝ່ ເພື່ອພັດທະນາວຽກງານສະພາປະຊາຊົນທ້ອງຖິ່ນໃຫ້ມີຄຸນນະພາບໃໝ່, ມີປະສິດທິພາບ, ປະສິດທິຜົນສູງຂຶ້ນ, ໃນຖານະທີ່ເປັນຕົວແທນແຫ່ງສິດ, ຜົນປະໂຫຍດ ຂອງປະຊາຊົນບັນດາເຜົ່າ. ເພື່ອຕອບໂຈດແກ້ໄຂສະພາບບັນຫາຕ່າງໆ ທີ່ປະຊາຊົນຕັ້ງຂຶ້ນ ເພື່ອຊອກຫາທາງອອກໃຫ້ປະຊາຊົນໃຫ້ໄດ້ທ່ວງທັນເວລາກວ່າເກົ່າ, ພ້ອມກັນນັ້ນ ກໍຈະໄດ້ເພີ່ມທະວີຄວາມເອົາໃຈໃສ່ໃນການໂຄສະນາ ປະຊາສຳພັນ ເພື່ອໃຫ້ປະຊາຊົນບັນດາເຜົ່າ, ໃຫ້ຊັ້ນຄົນໃນສັງຄົມຮັບຮູ້ເຂົ້າໃຈກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນທ້ອງຖິ່ນ ຂອງພວກເຮົາໃຫ້ນັບນັບເພີ່ມຂຶ້ນເລື້ອຍໆ.