ກົມອຸດສາຫະກຳປຸງແຕ່ງ - Department of Manufacturing Industry

21/07/2026

ກອງປະຊຸມສະເໜີຂໍໃບຢັ້ງຢືນອຸດສາຫະກຳສີຂຽວຂອງ
ບໍລິສັດ ຊັນເປເປີ ສະຫວັນນະເຂດ ຈໍາກັດ
(ມາດຕະຖານສາກົນ ດ້ານລະບົບບໍລິຫານຈັດການສິ່ງແວດລ້ອມ (ISO 14001:2015))

ໃນວັນທີ 21 ກໍລະກົດ 2026 ທີ່ ບໍລິສັດ ຊັນເປເປີ ສະຫວັນນະເຂດ ຈຳກັດ ທີ່ບ້ານວັງກຸງ ເມືອງເຊໂປນ ແຂວງສະຫວັນນະເຂດ ໄດ້ຈັດກອງປະຊຸມ ຄົ້ນຄວ້າອອກໃບຢັ້ງຢືນອຸດສາຫະກຳສີຂຽວຂອງ ບໍລິສັດ ຊັນເປເປີ ສະຫວັນນະເຂດ ຈໍາກັດ ໂດຍການເປັນປະທານ ກອງປະຊຸມ ທ່ານ ພູທະນູທອງ ໄຊສົມບັດ ມີຄະນະທິມງານຈາກກົມອຸດສາຫະກໍາປຸງແຕ່ງ, ຕາງໜ້າພະແນກອຸດສາຫະກໍາ ແລະ ການຄ້າແຂວງສະຫວັນນະເຂດ, ຫົວໜ້າຫ້ອງການອຸດສາຫະກໍາ ແລະ ການຄ້າເມືອງເຊໂປນ ແລະ ຕາງໜ້າຈາກບໍລິສັດ ຊັນເປເປີ ສະຫວັນນະເຂດ ຈຳກັດ ເຂົ້າຮ່ວມທັງໝົດ 19 ທ່ານ.
ປະທານ ກອງປະຊຸມໄດ້ນຳສະເໜີຈຸດປະສົງ ເພື່ອຊຸກຍູ້ສົ່ງເສີມໃຫ້ພາກອຸດສາຫະກຳປຸງແຕ່ງ ໄດ້ພັດທະນາຕົນເອງໄປຕາມເງື່ອນໄຂໃໝ່ ເປັນຕົ້ນ ການປະຕິບັດອຸດສາຫະກໍາ 4.0, ການພັດທະນາເຕັກໂນໂລຊີ ດິຈີຕອນ ແລະ ປັນຍາປະດິດ, ທ່າອ່ຽງການພັດທະນາແບບຍືນຍົງ, ເພີ່ມທະວີການເຊື່ອມໂຍງ ເຊື່ອມຈອດໃນບັນດາປະເທດ ອາຊຽນ ແລະ ພາກພື້ນ ເປົ້າໝາຍກໍ່ເພື່ອເປັນແມ່ແຮງການພັດທະນາຕາມ ທິດສີຂຽວ, ສົມດູນ ແລະ ຍືນຍົງ.
ກອງປະຊຸມ ຍັງໄດ້ນຳສະເໜີຍຸດທະສາດການເຕີບໂຕສີຂຽວແຫ່ງຊາດ ຮອດປີ 2030 ແລະ ຍຸດທະສາດຄຸ້ມຄອງການປ່ຽນແປງດິນຟ້າອາກາດ ທີ່ມີວິໃສທັດຮອດປີ 2050 ແລະ ແຜນດໍາເນີນງານຮອດປີ 2030. ໂດຍການ ຜັນຂະຫຍາຍວຽກງານດັ່ງກ່າວອອກເປັນ ນະໂຍບາຍອຸດສາຫະກໍາສີຂຽວ, ຍຸດທະສາດສົ່ງເສີມພະລັງງານຊີວະມວນ ສໍາລັບພາກອຸດສາຫະກໍາ ຂອງ ສປປ ລາວ ຮອດປີ 2035. ນອກນັ້ນ ຍັງໄດ້ນຳສະເໜີກ່ຽວກັບ ຂໍ້ຕົກລົງວ່າດ້ວຍອຸດສາຫະກໍາ.
ໃນຕອນທ້າຍ ກອງປະຊຸມໄດ້ສະແດງຄວາມຊົມເຊີຍຕໍ່ ທ່ານຮອງຜູ້ອໍານວຍການ ພ້ອມດ້ວຍທິມງານຂອງບໍລິສັດ ຊັນເປເປີ ສະຫວັນນະເຂດ ຈໍາກັດ ທີ່ມີຄວາມຕັ້ງໃຈສະເໜີຂໍອອກໃບຢັ້ງຢືນອຸດສາຫະກຳສີຂຽວ ຂອງການຈັດຕັ້ງປະຕິບັດວຽກງານ ISO 14001:2015.
ປະຈຸບັນການຈັດຕັ້ງປະຕິບັດຂໍ້ຕົກລົງວ່າດ້ວຍອຸດສາຫະກໍາສີຂຽວ ສະບັບ ເລກທີ 0141/ອຄ.ກອຫ, ລົງວັນທີ 03/2/2022 ມີພຽງແຕ່ 08 ບໍລິສັດເທົ່ານັ້ນທີ່ໄດ້ຮັບໃບຢັ້ງຢືນອຸດສາ ຫະກໍາສີຂຽວໃນທົ່ວປະເທດ ແລະ ໃນນັ້ນມີພຽງ 01 ບໍລິສັດເທົ່ານັ້ນທີ່ຕັ້ງຢູ່ແຂວງສະຫວັນນະເຂດເຮົາ;

#ອຸດສາຫະກຳສີຂຽວ #ສະຫວັນນະເຂດ #ການພັດທະນາແບບຍືນຍົງ #ອຸດສາຫະກຳ4_0 #ອຸດສາຫະກຳປຸງແຕ່ງ

09/06/2026

ກົມອຸດສາຫະກຳປຸງແຕ່ງ ຈັດຕັ້ງການແລກປ່ຽນບົດຮຽນ ວຽກງານຄຸ້ມຄອງສານເຄມີ ແລະ ໂຮງງານອຸດສາຫະກຳ

ຫວ່າງບໍ່ດົນມານີ້, ຢູ່ທີ່ແຂວງຫົວພັນ . ກົມອຸດສາຫະກຳປຸງແຕ່ງໄດ້ມີການຈັດກອງປະຊຸມແລກປ່ຽນປະສົບການ ແລະ ຖອດຖອນບົດຮຽນສຳຄັນ ກ່ຽວກັບວຽກງານການຄຸ້ມຄອງສານເຄມີ ແລະ ໂຮງງານອຸດສາຫະກຳ ເພື່ອຍົກລະດັບມາດຕະຖານຄວາມປອດໄພ ແລະ ຮັບປະກັນການປົກປັກຮັກສາສິ່ງແວດລ້ອມພາຍໃນແຂວງ.

ຈຸດປະສົງຫຼັກຂອງການຈັດຕັ້ງການແລກປ່ຽນບົດຮຽນໃນຄັ້ງນີ້ ແມ່ນເພື່ອແນໃສ່ເຮັດໃຫ້ພະນັກງານ, ເຈົ້າໜ້າທີ່ທີ່ກ່ຽວຂ້ອງ ຕະຫຼອດຮອດຜູ້ປະກອບການໂຮງງານອຸດສາຫະກຳ ໄດ້ມີການແລກປ່ຽນຄວາມຄິດເຫັນ ແລະ ປະສົບການຕົວຈິງ ເຊິ່ງກັນ ແລະ ກັນ. ໂດຍສະເພາະແມ່ນການລົງເລິກກ່ຽວກັບ ມາດຕະການໃນການຄຸ້ມຄອງ, ການເກັບຮັກສາ ແລະ ການນຳໃຊ້ສານເຄມີໃນຂະແໜງອຸດສາຫະກຳ ໃຫ້ຖືກຕ້ອງຕາມຫຼັກການເຕັກນິກ ແລະ ລະບຽບກົດໝາຍທີ່ວາງອອກ.

ພ້ອມດຽວກັນນີ້, ພາກສ່ວນກ່ຽວຂ້ອງຍັງໄດ້ເນັ້ນໜັກເຖິງຄວາມສຳຄັນໃນການລົງຕິດຕາມ ແລະ ກວດກາບັນດາໂຮງງານອຸດສາຫະກຳຢ່າງເປັນປະຈຳ ເພື່ອແກ້ໄຂບັນຫາທີ່ອາດຈະເກີດຂຶ້ນຢ່າງທັນທ່ວງທີ, ຮັບປະກັນຄວາມປອດໄພໃນສະຖານທີ່ເຮັດວຽກ ແລະ ປ້ອງກັນບໍ່ໃຫ້ເກີດຜົນກະທົບທາງລົບຕໍ່ສັງຄົມ ກໍຄືສະພາບແວດລ້ອມອ້ອມຂ້າງ.

ຜ່ານການແລກປ່ຽນບົດຮຽນໃນຄັ້ງນີ້, ຄາດວ່າຈະຊ່ວຍເພີ່ມຂີດຄວາມສາມາດ ແລະ ຄວາມເຂົ້າໃຈອັນເລິກເຊິ່ງໃຫ້ແກ່ເຈົ້າໜ້າທີ່ ໃນການປະຕິບັດໜ້າທີ່ວຽກງານຕົວຈິງ. ພ້ອມທັງເປັນການຊຸກຍູ້ໃຫ້ບັນດາໂຮງງານອຸດສາຫະກຳໃນທົ່ວແຂວງຫົວພັນ ຫັນໜ້າໄປສູ່ການດຳເນີນທຸລະກິດທີ່ໄດ້ມາດຕະຖານປອດໄພ, ມີຄວາມຮັບຜິດຊອບຕໍ່ສັງຄົມ ແລະ ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງແຂວງຢ່າງຍືນຍົງ.

23/05/2026

20/05/2026

ພິທີມອບ-ຮັບເຄື່ອງຈັກການຜະລິດ ພາຍໃຕ້ໂຄງການສົ່ງເສີມການນຳໃຊ້ເຕັກໂນໂລຊີອຸດສາຫະກຳ ເຂົ້າໃນການປຸງແຕ່ງວັດຖຸດິບຈາກກະສິກຳ ຢູ່ແຂວງຈຳປາສັກ

ໃນວັນພຸດ ທີ 20 ພຶດສະພາ 2026, ພະແນກເຕັກໂນໂລຊີອຸດສາຫະກຳ, ກົມອຸດສາຫະກຳປຸງແຕ່ງ ພາຍໃຕ້ການຊີ້ນຳຂອງ ກະຊວງອຸດສາຫະກຳ ແລະ ການຄ້າ (ອຄ) ໄດ້ສົມທົບກັບ ພະແນກອຸດສາຫະກຳ ແລະ ການຄ້າ ແຂວງຈຳປາສັກ, ຫ້ອງການອຸດສາຫະກຳ ແລະ ການຄ້າ ນະຄອນປາກເຊ ແລະ ເມືອງປາກຊ່ອງ ຈັດພິທີມອບ-ຮັບເຄື່ອງຈັກການຜະລິດຂຶ້ນຢ່າງເປັນທາງການ.

ການມອບ-ຮັບເຄື່ອງຈັກໃນຄັ້ງນີ້ ແມ່ນນອນຢູ່ໃນ “ໂຄງການສົ່ງເສີມການນຳໃຊ້ເຕັກໂນໂລຊີອຸດສາຫະກຳ ເຂົ້າໃນການປຸງແຕ່ງວັດຖຸດິບຈາກກະສິກຳ”. ສຳລັບເຄື່ອງຈັກທີ່ນຳມາມອບໃຫ້ແກ່ຜູ້ປະກອບການ ມີຈຳນວນທັງໝົດ 04 ເຄື່ອງ, ລວມມູນຄ່າ 116.000.000 ກີບ (ໜຶ່ງຮ້ອຍສິບຫົກລ້ານກີບ).

ພິທີດັ່ງກ່າວ ໄດ້ດຳເນີນໄປດ້ວຍຜົນສຳເລັດອັນຈົບງາມ ໂດຍມີບັນດາຕົວແທນຈາກພາກລັດທີ່ກ່ຽວຂ້ອງ ແລະ ບັນດາຜູ້ປະກອບການພາຍໃນທ້ອງຖິ່ນ ເຂົ້າຮ່ວມເປັນສັກຂີພິຍານທັງໝົດ 26 ທ່ານ.

ຈຸດປະສົງຫຼັກຂອງໂຄງການນີ້ ແມ່ນເພື່ອເປັນການຊຸກຍູ້, ຍົກລະດັບເຕັກໂນໂລຊີໃນຂະບວນການຜະລິດ ແລະ ປຸງແຕ່ງວັດຖຸດິບທາງດ້ານກະສິກຳ ໃຫ້ມີຄວາມທັນສະໄໝ. ອີກທັງຍັງເປັນການຊ່ວຍຜູ້ປະກອບການຫຼຸດຜ່ອນຕົ້ນທຶນການຜະລິດ ແລະ ສ້າງມູນຄ່າເພີ່ມໃຫ້ແກ່ຜະລິດຕະພັນພາຍໃນໃຫ້ມີຄຸນນະພາບ, ໄດ້ມາດຕະຖານ ແລະ ສາມາດແຂ່ງຂັນໃນຕະຫຼາດໄດ້ດີຂຶ້ນ.

ພາບ/ຂ່າວ: ກົມອຸດສາຫະກຳປຸງແຕ່ງ
#ກະຊວງອຸດສາຫະກຳແລະການຄ້າ #ກົມອຸດສາຫະກຳປຸງແຕ່ງ #ພະແນກອຄແຂວງຈຳປາສັກ #ນະຄອນປາກເຊ #ເມືອງປາກຊ່ອງ #ໂຄງການສົ່ງເສີມກະສິກຳ #ອຸດສາຫະກຳປຸງແຕ່ງ

14/05/2026

15/04/2026

ສະບາຍດີປີໃໝ່ລາວ ພ.ສ 2569 💦🌸 ຂໍອວຍພອນໄຊອັນປະເສີດມາຍັງທຸກໆທ່ານ ຈົ່ງມີແຕ່ຄວາມສຸກ ຄວາມຈະເລີນ ສຸຂະພາບແຂງແຮງ. ຂໍໃຫ້ປີໃໝ່ນີ້ ນຳພາແຕ່ສິ່ງດີໆ, ຄວາມສຳເລັດ ແລະ ໂຊກລາບ ເຂົ້າມາສູ່ຊີວິດ ແລະ ຄອບຄົວຂອງທ່ານດ້ວຍເທີ້ນ. ສຸກສັນວັນປີໃໝ່ລາວ!

22/03/2026

10/03/2026

ໃນວັນທີ 06 ມີນາ 2026, ທ່ານ ກິນົນ ຂຸນວິສິດ ຮອງຫົວໜ້າກົມອຸດສາຫະກຳປຸງແຕ່ງ ໄດ້ນຳພາຄະນະຈາກພາກລັດ ແລະ ພາກເອກະຊົນ ຈຳນວນ 22 ທ່ານ ເຂົ້າຮ່ວມຖອດຖອນບົດຮຽນ ແລະ ທັດສະນະສຶກສາດ້ານເຕັກໂນໂລຊີການຖະໜອມອາຫານ ທີ່ຄະນະເຕັກໂນໂລຊີ ມະຫາວິທະຍາໄລຂອນແກ່ນ ປະເທດໄທ ພາຍໃຕ້ໂຄງການສົ່ງເສີມເຕັກໂນໂລຊີການຖະໜອມອາຫານ ເພື່ອສະໜັບສະໜູນຄວາມໝັ້ນຄົງດ້ານສະບຽງອາຫານ ແລະ ສ້າງໂອກາດທາງການຄ້າ.

ໃນໂອກາດນີ້, ທ່ານ ດຣ. ອາລະຍາ ເຊົາເລືອງຣິດ ຄະນະບໍດີ ຄະນະເຕັກໂນໂລຊີ ພ້ອມດ້ວຍຄະນະອາຈານຈາກສາຂາວິຊາທີ່ກ່ຽວຂ້ອງ ໄດ້ໃຫ້ການຕ້ອນຮັບຄະນະຢ່າງອົບອຸ່ນ ພ້ອມທັງແລກປ່ຽນຂໍ້ມູນ ແລະ ປະສົບການທີ່ເປັນປະໂຫຍດ.

ໃນການເຂົ້າຮ່ວມຄັ້ງນີ້ ຄະນະໄດ້ຮຽນຮູ້ກ່ຽວກັບຫຼັກສູດ ແລະ ທຶນການສຶກສາ ທີ່ສາມາດສົ່ງເສີມການພັດທະນາທັກສະ ແລະ ຄວາມຮູ້ໃຫ້ແກ່ຜູ້ປະກອບການ. ພ້ອມກັນນັ້ນ, ທັງສອງຝ່າຍໄດ້ປຶກສາຫາລື ແລະ ແລກປ່ຽນປະສົບການ ກ່ຽວກັບໂອກາດໃນການຮ່ວມມືໃນອະນາຄົດ. ນອກນັ້ນ ຜູ້ປະກອບການກໍໄດ້ແລກປ່ຽນບັນຫາ ແລະ ອຸປະສັກດ້ານການຜະລິດ ເພື່ອຮ່ວມກັນຊອກຫາແນວທາງພັດທະນາເຕັກໂນໂລຊີ ແລະ ເລືອກນຳໃຊ້ເຄື່ອງມືທີ່ເໝາະສົມ ເພື່ອຍົກລະດັບການຜະລິດອາຫານໃນອະນາຄົດ.

ນອກຈາກນີ້, ຄະນະຍັງໄດ້ເຂົ້າຢ້ຽມຊົມ ໂຮງງານຕົ້ນແບບອາຫານ (Food Pilot Plant) ເພື່ອຮຽນຮູ້ການຈັດສັນພື້ນທີ່ ແລະ ການບໍລິຫານໂຮງງານຢ່າງເປັນລະບົບ ຕາມມາດຕະຖານອະນາໄມ. ພ້ອມທັງໄດ້ຮຽນຮູ້ການເຮັດວຽກຂອງເຄື່ອງຈັກທີ່ນຳໃຊ້ໃນການປຸງແຕ່ງອາຫານ ເຊັ່ນ: ເຄື່ອງປະສົມ, ເຄື່ອງປາສະເຕີໄຣ (Pasteurizer), ເຄື່ອງທອດສະເດັດນ້ຳມັນ, ເຄື່ອງຂ້າເຊື້ອດ້ວຍຄວາມດັນ (Retort) ແລະ ເຄື່ອງອົບແຫ້ງແບບພົ່ນຝອຍ (Spray Dryer).

ການຖອດຖອນບົດຮຽນ ແລະ ທັດສະນະສຶກສາໃນຄັ້ງນີ້ ນັບເປັນໂອກາດອັນດີໃນການເສີມສ້າງຄວາມຮູ້ ແລະ ແລກປ່ຽນປະສົບການ ລະຫວ່າງພາກວິຊາການ ແລະ ພາກການຜະລິດ ເພື່ອນຳໄປປະຍຸກໃຊ້ໃນການພັດທະນາອຸດສາຫະກຳປຸງແຕ່ງອາຫານໃນອະນາຄົດ.

24/02/2026

ໃນລະຫວ່າງວັນທີ 24-25 ຜ່ານມານີ້, ກົມອຸດສາຫະກຳປຸງແຕ່ງ, ກະຊວງອຸດສາຫະກຳ ແລະ ການຄ້າ (ອຄ) ໄດ້ສົມທົບກັບ ພະແນກ ອຄ ແຂວງຈຳປາສັກ, ຫ້ອງການ ອຄ ນະຄອນປາກເຊ ແລະ ຫ້ອງການ ອຄ ເມືອງປາກຊ່ອງ ຈັດຊຸດຝຶກອົບຮົມພາຍໃຕ້ຫົວຂໍ້: “ການປຸງແຕ່ງພືດ ແລະ ໝາກໄມ້ໃຫ້ກາຍເປັນຜະລິດຕະພັນພາຍໃນທ້ອງຖິ່ນ”.
​ກອງປະຊຸມຝຶກອົບຮົມໃນຄັ້ງນີ້ ໃຫ້ກຽດເປັນປະທານຮ່ວມໂດຍ ທ່ານ ກຽງຄຳ ຣາຊະຈັກ ຮອງຫົວໜ້າກົມອຸດສາຫະກຳປຸງແຕ່ງ ແລະ ທ່ານ ປອ ເພັດສາຄອນ ຄໍສີສະຫວັດ ຮອງຫົວໜ້າພະແນກ ອຄ ແຂວງຈຳປາສັກ. ຈຸດປະສົງຫຼັກຂອງການຈັດງານແມ່ນເພື່ອສົ່ງເສີມການນຳໃຊ້ວັດຖຸດິບຈາກກະສິກຳທີ່ມີທ່າແຮງໃນທ້ອງຖິ່ນ ມາສ້າງມູນຄ່າເພີ່ມ, ພ້ອມທັງຍົກລະດັບຄວາມຮູ້ ແລະ ມາດຕະຖານການຜະລິດໃຫ້ແກ່ຜູ້ປະກອບການ ເພື່ອໃຫ້ສາມາດຕອບສະໜອງໄດ້ຕາມຄວາມຕ້ອງການຂອງຕະຫຼາດ.
​ສຳລັບຜູ້ເຂົ້າຮ່ວມໃນຊຸດຝຶກອົບຮົມຄັ້ງນີ້ ມີຈຳນວນທັງໝົດ 39 ທ່ານ ເຊິ່ງມາຈາກຫຼາຍພາກສ່ວນທີ່ກ່ຽວຂ້ອງ ຄື: ຕາງໜ້າຈາກຂັ້ນກົມ (ກະຊວງ ອຄ) ຈຳນວນ 5 ທ່ານ, ຕາງໜ້າຈາກພະແນກ ອຄ ແຂວງ ຈຳນວນ 17 ທ່ານ, ຕາງໜ້າຈາກຫ້ອງການ ອຄ ນະຄອນປາກເຊ ຈຳນວນ 2 ທ່ານ, ຕາງໜ້າຈາກຫ້ອງການ ອຄ ເມືອງປາກຊ່ອງ ຈຳນວນ 2 ທ່ານ ແລະ ບັນດາຜູ້ປະກອບການ ລວມເຖິງຜູ້ຜະລິດທ້ອງຖິ່ນ ຈຳນວນ 13 ທ່ານ.