What are the opening hours?

Monday 08:00 - 16:00 Tuesday 08:00 - 16:00 Wednesday 08:00 - 16:00 Thursday 08:00 - 16:00 Friday 08:00 - 16:00

ສານປະຊາຊົນສູງສຸດແຫ່ງ ສປປລາວ The People's Supreme Court of The Lao PDR, Khouvieng Road, Ban Beungkanyong, Sisattanak District, Vientiane (2026)

15/08/2026

ໃນລະຫວ່າງ ວັນທີ 13-15 ສິງຫາ 2026 ຄະນະຜູ້ແທນສານປະຊາຊົນ ແຫ່ງ ສປປລາວ ຈຳນວນ 17 ທ່ານ ນຳໂດຍ ທ່ານ ໄພວີ ສີບົວລິພາ ປະທານສານປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີ່ນທາງເຂົ້າຮ່ວມກອງປະຊຸມ ແຂວງຊາຍແດນຕິດຈອດກັນ ລາວ-ຫວຽດນາມ-ກຳປູເຈຍ ຄັ້ງທີ VIII ທີ່ ນະຄອນຫຼວງພະນົມເປັນ, ຣາຊະອານາຈັກ ກຳປູເຈຍ ກອງປະຊຸມດັ່ງກ່າວ ແມ່ນ 3 ປະເທດ ໄດ້ພັດປ່ຽນການເປັນເຈົ້າພາບ ແລະ ຈັດຂື້ນ 2 ປີ ຕໍ່ຄັ້ງ ເພື່ອຮ່ວມມືກັນລະຫວ່າງ ລາວ-ຫວຽດນາມ-ກຳປູເຈຍ ທີ່ເປັນປະເທດມີຊາຍແດນຮ່ວມກັນເພື່ອແລກປ່ຽນບົດຮຽນ ແລະ ປະສົບການໃນການພັດທະນາລະບົບສານ ແລະ ແກ້ໄຂຂໍ້ຂັດແຍ່ງທີ່ເກີດຂຶ້ນຢູ່ໃນສັງຄົມໃຫ້ຖືກຕ້ອງ ແລະ ເປັນທຳ ຈຶ່ງສາມາດຮັບປະກັນການປົກປ້ອງສິດ, ເສລີພາບ ແລະ ຜົນປະໂຫຍດຂອງພົນລະເມືອງຢູ່ໃນສັງຄົມ.
ໃນກອງປະຊາຊຸມຄັ້ງນີ້ ຄະນະຜູ້ແທນ ທັງ 3 ປະເທດ ໄດ້ພ້ອມກັນແລກປ່ຽນບົດຮຽນ ດ້ວຍ 4 ຫົວຂໍ້: (1) ຜົນຂອງ ການຈັດຕັ້ງປະຕິບັດຖະແຫຼງການຮ່ວມຂອງກອງປະຊຸມ ຄັ້ງທີ 7 ປີ 2024; (2) ການແລກປ່ຽນປະສົບການໃນ ການປາບປາມ ແລະ ປ້ອງກັນການຫຼອກລວງທາງລະບົບເຕັກໂນໂລຊີ, ພ້ອມທັງການພິຈາລະນາຕັດສິນຄະດີ; (3) ການແລກປ່ຽນປະສົບການໃນການຍົກສູງປະສິດທິພາບຂອງການແກ້ໄຂຂ້ໍຂັດແຍ່ງທາງແພ່ງ ແລະ ການຄ້າຂ້າມແດນ; ແລະ (4) ການແລກປ່ຽນປະສົບການໃນການພິຈາລະນາຕັດສິນຄະດີຢາເສບຕິດ ແລະ ວາງທິດທາງແຜນການໃນກອງປະຊຸມຄັ້ງຕໍ່ໄປ . ການຮວ່ມມືຂອງສານ 3 ປະເທດ ໃນລະດັບການນຳຂັ້ນສູງ, ຂັ້ນວິຊາການ ແລະ ບັນດາສານແຂວງ ເວົ້າສະເພາະບັນດາແຂວງທີ່ມີຊາຍແດນຕິດຮວ່ມກັນ ກໍໄດ້ມີການພົວພັນຮວ່ມມືພົບປະແລກປ່ຽນບົດຮຽນຊ່ວຍເຫຼືອເຊິ່ງກັນ ແລະ ກັນໃນຫຼາຍດ້ານເພື່ອຕ້ານ ແລະ ສະກັດກັ້ນອາຊະຍະກຳ ແລະ ແລກປ່ຽນບົດຮຽນກ່ຽວກັບການດຳເນີນຄະດີຂອງສານນັບມື້ເຂົ້າສູ່ລວງເລິກ ແລະ ເກີດໝາກຜົນຕົວຈິງຫຼາຍຂຶ້ນກວ່າປີທີ່ຜ່ານມາ. ປະກອບສວ່ນສຳຄັນເຂົ້າໃນການເສີມສ້າງສາຍພົວພັນແຫ່ງນ້ຳໃຈມິດຕະພາບ, ຄວາມສາມັກຄີ, ການຮວ່ມມືທີ່ເປັນມູນເຊື້ອອັນດີງາມຂອງ 3 ປະເທດ ລາວ-ຫວຽດນາມ-ກຳປູເຈຍ. ກອງປະຊຸມໄດ້ຮ່ວມກັນເຊັນຖະແຫຼງການຄັ້ງທີ VIII ໄດ້ກໍານົດ 9 ຂໍ້ເພື່ອຈັດຕັ້ງຜັນຂະຫຍາຍໝາກຜົນຂອງກອງປະຊຸມໃຫ້ມີປະສິດທິພາບ ໄປພ້ອມໆກັບການເສີມສ້າງສາຍພົວພັນມິດຕະພາບ, ຄວາມສາມັກຄີຖານເພືີ່ອນມິດ ສາມຊາດອິນດູຈີນ, ໃຫ້ນັບມື້ນັບໜຽວແໜ້ນ, ເຂັ້ມແຂງ ແລະ ເກີດດອກອອກຜົນຂື້ນເລື້ອຍໆ; ເຮັດໃຫ້ຂົງເຂດນີ້ກາຍເປັນເຂດປອດອາຊະຍາກໍາຂ້າມຊາດ ເຮັດໃຫ້ປະຊາຊົນມີຄວາມຜາສຸກຢ່າງແທ້ຈິງ.,
ນອກນັ້ນ ປະທານສານປະຊາຊົນສູງສຸດ ແຫ່ງ ສປປ ລາວ ຍັງໄດ້ເຂົ້າຢ້ຽມຂໍ່ານັບພະບາດສົມເດັດພະບໍລົມມະນຽດ ນໍຣົດດົມ ສີຫະມຸນີ ພະມະຫາກະສັດ ແຫ່ງ ຣາຊະອານາຈັກກຳປູເຈຍ, ພະບາດສົມເດັດ ຍັງໄດ້ຊົມເຊີຍ ແລະ ຍ້ອງຍໍສັນລະເສີນການຈັດກອງປະຊຸມຂອງສານສູງສຸດທັງສາມປະເທດ, ເຊິ່ງໄດ້ສ້າງເວທີໃຫ້ບັນດາສານ, ໂດຍສະເພາະແມ່ນສານແຂວງຊາຍແດນ ໄດ້ເພີ່ມທະວີການພົບປະແລກປ່ຽນບົດຮຽນ ແລະ ການປະສານງານໃນການເຮັດວຽກ, ປະກອບສ່ວນສ້າງສາຊາຍແດນໃຫ້ເປັນເຂດຊາຍແດນແຫ່ງສັນຕິພາບ ແລະ ມິດຕະພາບ.
ສານປະຊາຊົນ ແຫ່ງ ສປປລາວ ຍັງໄດ້ພົບປະສອງຝ່າຍ ກັບ ສານປະຊາຊົນ ແຫ່ງ ສສ ຫວຽດນາມ ແລະ ຣາຊະອານາຈັກກຳປູເຈຍ ເພື່ອປືກສາຫາຫລຶຄືນກ່ຽວກັບ MOU ທີ່ທັງສອງຝ່າຍໄດ້ເຊັນກັນ ເພື່ອສືບຕໍ່ຈັດຕັ້ງແຜນກິດຈະກຳໃຫ້ສຳເລັດຕາມແຜນທີ່ວາງໄວ້.

10/08/2026

ວັນທີ 7 ສິງຫາ 2026 ທີ່ຜ່ານມາ, ສະຖາບັນຄົ້ນຄວ້າ ແລະ ຝຶກອົບຮົມ, ສານປະຊາຊົນສູງສຸດ ໄດ້ຈັດພິທີປິດຊຸດຝຶກອົບຮົມວຽກງານຈ່າສານ ຊຸດທີ VIII ຢ່າງເປັນທາງການ ຫຼັງຈາກໄດ້ດໍາເນີນການຝຶກອົບຮົມມາເປັນເວລາຫຼາຍອາທິດ, ແຕ່ວັນທີ 13 ກໍລະກົດ ຫາ ວັນທີ 7 ສິງຫາ 2024.
ພິທີດັ່ງກ່າວໄດ້ດຳເນີນໄປດ້ວຍບັນຍາກາດອັນມີຄວາມໝາຍສຳຄັນ, ໂດຍມີການຜ່ານບົດສະຫຼຸບການເຄື່ອນໄຫວຝຶກອົບຮົມ ໂດຍຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ ເຊິ່ງໄດ້ຍົກໃຫ້ເຫັນເຖິງຜົນສຳເລັດ ແລະ ຄວາມຕັ້ງໃຈຂອງນັກຝຶກອົບຮົມທຸກທ່ານ. ໃນໂອກາດດຽວກັນ, ທ່ານ ໄພວີ ສີບົວລິພາ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ ໄດ້ໃຫ້ກຽດມອບໃບຢັ້ງຢືນໃຫ້ແກ່ນັກຝຶກອົບຮົມທີ່ສຳເລັດການຝຶກອົບຮົມໃນຄັ້ງນີ້.
ນອກຈາກນັ້ນ, ທ່ານປະທານສານປະຊາຊົນສູງສຸດ ຍັງໄດ້ມີຄຳເຫັນໂອ້ລົມ ແລະ ໃຫ້ຄຳໂອວາດອັນລ້ຳຄ່າ ເພື່ອເປັນແນວທາງໃນການນຳໄປປະຕິບັດໜ້າທີ່ວຽກງານຕົວຈິງ. ພິທີດັ່ງກ່າວໄດ້ປິດລົງດ້ວຍຄວາມພາກພູມໃຈ ພ້ອມດ້ວຍການຖ່າຍຮູບລວມທີ່ເປັນທີ່ລະນຶກຂອງບັນດາແຂກຜູ້ມີກຽດ, ຄະນະນຳ ແລະ ນັກຝຶກອົບຮົມທຸກທ່ານ.

10/08/2026

ໃນວັນທີ 10 ສິງຫາ 2026 ທີ່ ຫໍປະຊຸມແຫ່ງຊາດ ຄະນະບໍລິຫານງານພັກ, ສານປະຊາຊົນສູງສຸດ ນໍາໂດຍສະຫາຍ ໄພວີ ສີບົວລິພາ ກໍາມະການສູນກາງພັກ, ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ ພ້ອມດ້ວຍຄະນະ ໄດ້ເຂົ້າວາງພວງມະລາ ແລະ ໄວ້ອາໄລຕໍ່ການຈາກໄປຂອງສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປລາວ

07/08/2026

ໃນລະຫວ່າງ ວັນທີ 27-30 ກໍລະກົດ 2026 ທີ່ຜ່ານມາ, ທ່ານບຸນຂວາງ ທະວີສັກ ຮອງເລຂາຄະນະບໍລິຫານງານພັກ ຮອງປະທານສານປະຊາຊົນສູງສຸດ ພ້ອມດ້ວຍຄະນະສານອາຍາ ຂອງສານປະຊາຊົນສູງສຸດ ໄດ້ລົງເຄື່ອນໄຫວຊຸກຍູ້ ຕິດຕາມ ກວດກາ ການດໍາເນີນຄະດີອາຍາຕາມສາຍຕັ້ງ ຂອງສານປະຊາຊົນທ້ອງຖິ່ນ ຢູ່ແຂວງອຸດົມໄຊ, ແຂວງຫຼວງນໍ້າທາ ແລະ ແຂວງບໍ່ແກ້ວ.
ຈຸດປະສົງຂອງການເຄື່ອນໄຫວໃນຄັ້ງນີ້ ແມ່ນເພື່ອເຜີຍແຜ່ຄຳແນະນຳຂອງທ່ານປະທານສານປະຊາຊົນສູງສຸດ ກ່ຽວກັບການແກ້ໄຂບັນຫາຢາເສບຕິດ, ແນະນໍາວິທີການການໂຕ້ຖຽງໃນທີ່ປະຊຸມສານ, ການສະເໜີອອກຄຳຊີ້ຂາດຢັ້ງຢືນໂທດປະຫານຊີວິດ, ຫຼັກການວາງໂທດ, ການເພີ່ມໂທດ, ການຜ່ອນໂທດ, ການວາງໂທດຕ່ຳກວ່າກົດໝາຍກຳນົດ ແລະ ການວິນິດໄສກ່ຽວກັບການວາງໂທດ, ພ້ອມທັງເປັນການຊຸກຍູ້, ຕິດຕາມ, ເກັບກຳສະຖິຕິຄະດີອາຍາຕົວຈິງ ໃຫ້ມີຄວາມຊັດເຈນ ແລະ ແລກປ່ຽນຄໍາຄິດຄໍາເຫັນ ກ່ຽວກັບການດໍາເນີນຄະດີອາຍາ ຢູ່ສານທ້ອງຖິ່ນ ເພື່ອຊອກຫາສາເຫດຂອງຄະດີທີ່ຊັກຊ້າ, ຄ້າງຄາແກ່ຍາວມາດົນ ແລະ ຊອກຫາວິທີການແກ້ໄຂໃຫ້ໄວ ທັງໄດ້ຄຸນນະພາບ.
ໃນໂອກາດດັ່ງກ່າວ ທ່ານຍັງໄດ້ເນັ້ນຢໍ້າໃຫ້ພະນັກງານ-ລັດຖະກອນຂອງສານປະຊາຊົນທ້ອງຖິ່ນ ຈົ່ງເພີ່ມທະວີໃສ່ການປະຕິບັດໜ້າທີ່ ດ້ວຍຄວາມຮັບຜິດຊອບສູງ, ມີສະຕິຕໍ່ການຈັດຕັ້ງ, ປະຕິບັດຕາມຫຼັກຈັນຍາບັນ-ຈັນຍາທໍາ ຢ່າງເຂັ້ມງວດ; ສ້າງຄວາມສາມັກຄີເປັນປຶກແຜ່ນ ທັງພາຍໃນ-ພາຍນອກ ແລະ ເອົາໃຈໃສ່ຂອດປະສານສົມທົບ ກັບສາຍຕັ້ງ-ສາຍຂວາງ ໃຫ້ເປັນປົກກະຕິ; ສືບຕໍ່ແກ້ໄຂຄະດີທີ່ຍັງຄ້າງຄາ, ທັງເອົາໃຈໃສ່ປະຕິບັດໜ້າທີ່ວິຊາສະເພາະ ຕາມກົດໝາຍຢ່າງຄົບຖ້ວນ ແລະ ຖືກຕ້ອງ.

07/08/2026

ສານປະຊາຊົນສູງສຸດ(ສປສສ) ເຜີຍແຜ່ເຊື່ອມຊຶມມະຕິວ່າດ້ວຍການເພີ່ມທະວີການນຳພາຂອງພັກ ຕໍ່ວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານສາມສ້າງໃນໄລຍະໃໝ່ ແລະ ມອບ-ຮັບ ໃບຢັ້ງຢືນ ໜ່ວຍພັກປອດໃສ ເຂັ້ມແຂງ ໜັກແໜ້ນ ໄດ້ຈັດຂຶ້ນໃນວັນທີ 6 ສິງຫາ 2026 ທີ່ ສປສສ,ໃຫ້ກ່ຽດເຜີຍເອກະສານໂດຍສະຫາຍ ໄພວີ ສີບົວລິພາ ກຳມະການສູນກາງພັກ ເລຂາບໍລິຫານງານພັກ ປະທານສານປະຊາຊົນສູງສຸດ ,ຊຶ່ງມີສະຫາຍຮອງປະທານ ຫົວໜ້າກົມ ຮອງກົມ ພ້ອມດ້ວຍ ພະນັກງານອອ້ມຂ້ອງ ສປສສ ເຂົ້າຮ່ວມຮັບຟັງຢ່າງພ້ອມພຽງ.
ສະຫາຍ ໄພວີ ສີບົວລິພາ ໄດ້ຍົກໃຫ້ເຫັນ ຄວາມໝາຍ ແລະ ຄວາມສຳຄັນ ຂອງເອກສານດັ່ງກ່າວ ເປັນຕົ້ນ ຄະນະບໍລິຫານງານສູນກາງພັກອອກມະຕິ: 1.ທັດສະນະຂອງພັກ , 2.ທິດທາງ ແລະ ໜ້າທີ່ລວມ , 3. ຄາດໝາຍສູ້ຊົນໃນຊຸມປີຕໍ່ໜ້າ, 4.ວຽກງານຈຸດສຸມຕົ້ນຕໍໃນຕໍ່ໜ້າ, 5. ມາດຕະການ ແລະ ວິທີການຈັດຕັ້ງປະຕິບັດ .
ພ້ອມນີ້, ສະຫາຍ ໄພວີ ສີບົວລິພາ ໄດ້ເປັນກ່ຽດມອບ ມອບ ໃບຢັ້ງຢືນ ໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ 11 ໜ່ວຍພັກ ທີ່ຂຶ້ນກັບອົງຄະນະພັກ ສານປະຊາຊົນສູງສຸດ ເຊິ່ງປະກອບມີ: ໜ່ວຍພັກຫ້ອງການ,ໜ່ວຍພັກກົມຈັດຕັ້ງ-ພະນັກງານ,ໜ່ວຍພັກກົມກວດກາ,ໜ່ວຍພັກກົມແຜນການ-ການເງິນ,ໜ່ວຍພັກກົມຮ່ວມມືສາກົນ,ໜ່ວຍພັກສະຖາບັນຄົ້ນຄວ້າ ແລະ ຝຶກອົບຮົມ,ໜ່ວຍພັກຄະນະສານແພ່ງ,ໜ່ວຍພັກຄະນະສານອາຍາ,ໜ່ວຍພັກຄະນະສານ ແຮງງານ,ໜ່ວຍພັກຄະນະສານການຄ້າ ແລະ ໜ່ວຍພັກຄະນະສານຄອບຄົວ.
ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ໃນທົ່ວອົງຄະນະພັກ ສານປະຊາຊົນສູງສຸດ ຜ່ານມາ ສາມາດສະຫຼຸບຕີລາຄາຄືນໄດ້ ດັ່ງນີ້: ອົງຄະນະພັກສານປະຊາຊົນສູງສຸດ ປະກອບມີ 14 ໜ່ວຍພັກ; ທຽບໃສ່ປີຜ່ານມາແມ່ນບໍ່ມີການເພີ່ມຂຶ້ນ ຫຼື ຫຼຸດລົງ. ໃນປີ 2025 ໜ່ວຍພັກທີ່ໄດ້ຮັັບການຕີລາຄາແບ່ງປະເພດທັງໝົດ 14
ໜ່ວຍພັກ; ໃນນັ້ນ, ໜ່ວຍພັກແຂງ 14 ໜ່ວຍພັກ; ບໍ່ມີປະເພດກາງ ແລະ ປະເພດອ່ອນ; ໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນມີ 11 ໜ່ວຍພັກ .
ມີສະມາຊິກພັກທັງໝົດ 221 ສະຫາຍ, ຍິງ 86 ສະຫາຍ; ສະມາຊິກພັກສຳຮອງ 4 ສະຫາຍ, ຍິງ 2 ສະຫາຍ; ສະມາຊິກພັກອາວຸໂສບຳນານ 17 ສະຫາຍ, ຍິງ 2 ສະຫາຍ; ທຽບໃສ່ປີຜ່ານມາເພີ່ມຂຶ້ນ 17 ສະຫາຍ; ໃນນີ້, ສະມາຊິກພັກແຂງ 198 ສະຫາຍ, ຍິງ 80 ສະຫາຍ; ກາງ 2 ສະຫາຍ, ຍິງ 00 ສະຫາຍ; ບໍ່ມີສະມາຊິກພັກອ່ອນ ແລະ ເສຍທາດ; ສະມາຊິກພັກທີ່ບໍ່ໄດ້ຕີລາຄາຈັດປະເພດມີ 21 ສະຫາຍ, ຍິງ 4 ສະຫາຍ (ໃນ 21 ສະຫາຍ ນີ້ແມ່ນສະມາຊິກພັກສຳຮອງ ແລະ ສະມາຊິກພັກອາວຸໂສບຳນານ).

30/07/2026

ສານປະຊາຊົນສູງສຸດ ປາຖະກະຖາມູນເຊື້ອວັນເກີດປະທານສຸພານຸວົງ ຄົບຮອບ 117 ປີ
ສານປະຊາຊົນສູງສຸດ (ສປສສ) ໄດ້ຈັດກອງປະຊຸມ ປາຖະກະຖາມູນເຊື້ອວັນເກີດປະທານສຸພານຸວົງ ຄົບຮອບ 117 ປີ ແລະ ວັນເຊັນສົນທິສັນຍາ ມິດຕະພາບ-ການຮ່ວມມື ລາວ-ຫວຽດນາມ ຄົບຮອບ 49 ປີ ແລະ ການສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 64 ປີ ຂຶ້ນໃນວັນທີ 30 ກໍລະກົດ 2026 ທີ ສປສສ,ໃຫ້ກ່ຽດປາຖະກະຖາໂດຍທ່ານ ອານົງ ຍອຍສາຍຄຳ ຄະນະປະຈຳພັກ ຮອງປະທານສານປະຊາຊົນສູງສຸດ ຊຶ່ງມີພະນັກພະນັກງານອອ້ມຂ້າງ ສປສສ ເຂົ້າຮ່ວມຮັບຟັງ
ທ່ານ ອານົງ ຍອຍສາຍຄຳ ໄດ້ຍົກໃຫ້ເຫັນມູນເຊື້ອ ຜົນງານການເຄື່ອນໄຫວປະຕິວັດຂອງ ທ່ານ ປະທານ ສຸພານຸວົງ, ປະທານສຸພານຸວົງ ເປັນແບບຢ່າງທີ່ດີໃນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ຕໍ່ສູ້ຕ້ານສັດຕູຜູ້ຮຸກຮານ ແລະ ຄຸນງາມຄວາມດີຂອງ ປະທານ ສຸພານຸວົງ.
ພ້ອມນັ້ນ,ທ່ານຍັງໄດ້ຍົກໃຫ້ເຫັນ ຄວາມໝາຍສໍາຄັນຂອງສາຍພົວພັນ ມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ - ຫວຽດນາມ , ຂະບວນການຕໍ່ສູ້ຂອງປະຊາຊົນສອງປະເທດ ຕ້ານພວກລ່າເມືອງຂຶ້ນແບບເກົ່າ (1930 - 1954), ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ (1975 ເຖິງປັດຈຸບັນ) ແລະ 47 ປີ ແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມືຮອບ ດ້ານລາວ-ຫວຽດນາມແລະ ສືບຕໍ່ເສີມຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ.
ທັງໝົດນັ້ນ ກໍເພື່ອໃຫ້ພະນັກງານ ຮັບຮູ້ ແລະ ກຳແໜ້ນໄດ້ ຄວາມໝາຍຄວາມສຳຄັນມູນເຊື້ອ ເພື່ອຮໍ່າຮຽນເອົາຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດຂອງ ປະທານ ສຸພານຸວົງ ແລະ ກຳແໜ້ນໄດ້ຄວາມໝາຍ ຄວາມສຳຄັນ ມູນເຊື້ອຂອງສອງປະເທດ ລາວ-ຫວຽດນາມ.

29/07/2026

ສານປະຊາຊົນສູງສຸດ ລາວ-ຫວຽດນາມ ເສີມຂະຫາຍການຮ່ວມມື
----------
ໂດຍຕອບສະໜອງຕາມການເຊື້ອເຊີນຂອງ ສະຫາຍ ຫວຽນ ວັນ ກວ້າງ ເລຂາທິການສູນກາງພັກ ປະທານສານປະຊາຊົນສູງສຸດ ແຫ່ງ ສສ ຫວຽດນາມ, ຄະນະຜູ້ແທນຂັ້ນສູງຂອງສານປະຊາຊົນສູງສຸດ ແຫ່ງ ສປປ ລາວ ນຳໂດຍ ສະຫາຍ ໄພວີ ສີບົວລິພາ ກຳມະການສູນກາງພັກ ປະທານສານປະຊາຊົນສູງສຸດ ແຫ່ງ ສປປ ລາວ ໄດ້ເດີນທາງໄປຢ້ຽມຢາມພົບປະ ແລະ ເຮັດວຽກ ຢູ່ ສສ ຫວຽດນາມ ຕາມການເຊື້ອເຊີນ ຢ່າງເປັນທາງການໃນລະຫວ່າງວັນທີ 27-30 ກໍລະກົດ 2026 ນີ້ ເພື່ອເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ຮອບດ້ານ.
ການໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ຂອງຄະນະຜູ້ແທນຂັ້ນສູງ ຂອງສານປະຊາຊົນ ແຫ່ງ ສປປ ລາວ ໃນຄັ້ງນີ້ ແມ່ນເປັນການສະແດງໃຫ້ເຫັນເຖິງການເຄື່ອນໄຫວພົວພັນຮ່ວມມືຢ່າງຕໍ່ເນື່ອງ, ຮອບດ້ານ ແລະ ເລິກເຊິ່ງ ໃນກອບບົດບັນທຶກການຮ່ວມມື 2 ຝ່າຍ ທີ່ໄດ້ລົງນາມກັນໃນປີ 2008, ເປັນການຮ່ວມມືຂອງ 2 ອົງການຕຸລາການ ຂອງ 2 ປະເທດ ເພື່ອແນໃສ່ເສີມສ້າງ, ຊຸກຍູ້ ແລະ ແລກປ່ຽນບົດຮຽນກ່ຽວກັບການປັບປຸງດ້ານການຈັດຕັ້ງໃນລະບົບສານ, ວຽກງານການບໍລິຫານສານ - ບໍລິຫານຄະດີ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ.
ໃນວັນທີ 28 ກໍລະກົດ ຜ່ານມາ, ຄະນະຜູ້ແທນຂັ້ນສູງຂອງສານປະຊາຊົນ 2 ປະເທດ ໄດ້ພົບປະກັນຢ່າງເປັນທາງການຢູ່ ສໍານັກງານຂອງສານປະຊາຊົນສູງສຸດ ແຫ່ງ ສສ ຫວຽດນາມ ຊຶ່ງທັງ 2 ຝ່າຍໄດ້ຕີລາຄາສູງຕໍ່ຜົນສໍາເລັດການຮ່ວມມືໃນໄລຍະຜ່ານມາ ຊຶ່ງເນື້ອໃນຫົວຂໍ້ການພົບປະຄັ້ງນີ້ມີດັ່ງລຸ່ມນີ້:
- ສອງຝ່າຍໄດ້ເຊັນບົດບັນທຶກ ຊ່ວຍຈຳ MOU ສະບັບປີ 2026 ເພື່ອໃຫ້ສອດຄ່ອງ ແລະ ຖືກຕ້ອງກັບສະພາບຕົວຈິງຂອງປັດຈຸບັນ ເຮັດໃຫ້ສານປະຊາຊົນຂອງສອງປະເທດ ຫຍັບເຂົ້າໃກ້ກັນ, ຊ່ວຍເຫຼືອຊຶ່ງກັນ ແລະ ກັນ.
- ແລກປ່ຽນບົດຮຽນຊຶ່ງກັນ ເເລະ ກັນ ໃນວຽກງານບໍລິຫານຄະດີ-ບໍລິຫານສານ ຂອງສານສອງປະເທດ ເປັນການເສີມສ້າງສາຍພົວພົນມິດຕະພາບອັນຍິ່ງໃຫຍ່ ລະຫວ່າງ ສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ແມ່ນລະບົບສານປະຊາຊົນຂອງສອງປະເທດ ໃຫ້ນັບມື້ກ້າວສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.
ເນື່ອງໃນໂອກາດດັ່ງກ່າວ, ໃນວັນທີ 28 ກລະກົດ 2026 ຄະນະຜູ້ແທນຂັ້ນສູງ ຂອງສານປະຊາຊົນສູງສຸດ ແຫ່ງ ສປປ ລາວ ຍັງໄດ້ຮັບກຽດເຂົ້າຢ້ຽມຂໍ່ານັບ ສະຫາຍ ໂຕ ເລີມ ເລຂາທິການໃຫຍ່,ປະທານປະເທດ ແຫ່ງ ສສ ຫວຽດນາມ ທ່ານເລຂາທິການໃຫຍ່, ປະທານປະເທດ ໄດ້ເນັ້ນໜັກເຖິງຄວາມສຳຄັນຂອງການຮ່ວມມືດ້ານຕຸລາການ ໃນສະພາບການທີ່ລາວພວມສຸມໃສ່ການປັບໂຄງສ້າງລັດຖະບານ, ຈັດຕັ້ງລະບົບການປົກຄອງທ້ອງຖິ່ນໃຫ້ເຂັ້ມແຂງ, ແລະ ສ້າງລັດທີ່ປົກຄອງດ້ວຍກົດໝາຍ ສັງຄົມນິຍົມ. ທ່ານຢືນຢັນວ່າ ຫວຽດນາມ ຖືສຳຄັນ ແລະ ໃຫ້ບູລິມະສິດສູງສຸດ ໃນການປົກປັກຮັກສາ ແລະ ເພີ່ມພູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ການພົວພັນຍຸດທະສາດ ຫວຽດນາມ-ລາວ. ທ່ານຍັງໄດ້ສະເໜີໃຫ້ສອງອົງການຕຸລາການ ເພີ່ມທະວີການຮ່ວມມື ໃນຂົງເຂດຫັນເປັນດີຈີຕອນ, ສ້າງສານເອເລັກໂຕຣນິກ, ຝຶກອົບຮົມພະນັກງານ-ຜູ້ພິພາກສາ, ແລະ ສົມທົບກັນໃນການຕ້ານອາດຊະຍາກຳຂ້າມຊາດ, ອາດຊະຍາກຳເຕັກໂນໂລຊີສູງ, ການຄ້າມະນຸດ ແລະ ຢາເສບຕິດ ຢູ່ບໍລິເວນຊາຍແດນ.ຊຶ່ງນອກຈາກໄດ້ເຄື່ອນໄຫວຢູ່ສານປະຊາຊົນສູງສຸດ ແລ້ວ, ຄະນະຜູ້ແທນ ຍັງໄດ້ເຂົ້າພົບ ທ່ານ ຮວາງ ແທັງຕຸງ ລັດຖະມົນຕີກະຊວງຍຸຕິທຳ ແຫ່ງ ສ ສ ເພື່ອຮ່ວມມືດ້ານວິຊາການໃຫ້ເຂົ້າສູ່ລ່ວງເລີກ.
(ຂ່າວ: ສານປະຊາຊົນສູງສຸດ)

27/07/2026

ໃນວັນທີ 24 ກໍລະກົດ 2026 ຜ່ານມານີ້ ຢູ່ທີ່ສານປະຊາຊົນສູງສຸດ, ທ່ານ ໄພວີ ສີບົວລິພາ ປະທານສານປະຊາຊົນສູງສຸດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ແລະ ພົບປະຫາລື ຂອງຄະນະຊ່ຽວຊານສາກົນທີ່ປຶກສາແຫ່ງລັດຝຣັ່ງ, ໃນໂອກາດທີ່ຄະນະດັ່ງກ່າວທີ່ໄດ້ຖືກເຊື້ອເຊີນມາບັນລະຍາຍໃນການຝຶກອົບຮົມພາກປະຕິບັດກ່ຽວກັບການດໍາເນີນຄະດີປົກຄອງ ໃຫ້ແກ່ພະນັກງານຂອງ ສານປະຊາຊົນ ແຫ່ງ ສປປ ລາວ.
ການພົບປະໃນຄັ້ງນີ້ ມີຈຸດປະສົງຫຼັກ ເພື່ອພົບປະແລກປ່ຽນ ແລະ ປຶກສາຫາລືກ່ຽວກັບແຜນຮ່ວມມືໃນອານາຄົດ ລະຫວ່າງ ສານປະຊາຊົນສູງສຸດ ແລະ ທີ່ປຶກສາແຫ່ງລັດຝຣັ່ງ ເພື່ອສຶກສາຄວາມເປັນໄປໄດ້ໃນການສ້າງບົດບັັນທຶກຊ່ວຍຈໍາລະຫວ່າງສອງພາກສ່ວນ ໃນການຮ່ວມມືຊ່ວຍເຫຼືອທາງດ້ານວິຊາການ ແລະ ເພື່ອເປັນການຮັດແໜ້ນສາຍພົວພັນຮ່ວມມືລະຫວ່າງສອງພາກສ່ວນເວົ້າລວມ, ເວົ້າສະເພາະ ແມ່ນການໃຫ້ການຊ່ວຍເຫຼືອທາງດ້ານການຍົກລະດັບຂີດຄວາມສາມາດດ້ານຕຸລາການ, ກົດໝາຍປົກຄອງໃຫ້ກວ້າງຂວາງ ແລະ ກ້າວເຂົ້າສູ່ລວງເລີກ.
ໂອກາດດຽວກັນ, ຄະນະສະມາຊິກສະພາແຫ່ງລັດຝຣັ່ງ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ທ່ານປະທານສານປະຊາຊົນສູງສຸດ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ ພ້ອມທັງແລກປ່ຽນຂໍ້ມູນ ທີ່ມີປະໂຫຍດສູງຕໍ່ພົບປະແລກປ່ຽນ ແລະ ປຶກສາຫາລືໃນຄັ້ງນີ້.

27/07/2026

ຜູ້ແທນສານປະຊາຊົນສູງສຸດ ໄດ້ສໍາເລັດການເຂົ້າຮ່ວມ
ກອງປະຊຸມໃຫຍ່ກອງປະຊຸມໃຫຍ່ຂອງສະມາຄົມນັກກົດໝາຍອາຊຽນ GA-ALA ຄັ້ງທີ 15
(THE 15th ASEAN LAW ASSOCIATION GENERAL ASSEMBLY)
ແລະ ກອງປະຊຸມສະພາສະມາຄົມນັກກົດໝາຍອາຊຽນຄັ້ງທີ 47
(THE 47th ASEAN LAW ASSOCIATION GOVERNING COUNCIL MEETING)

ໃນລະຫວ່າງວັນທີ 21-23 ກໍລະກົດ 2026 ທີ່ຜ່ານມາ ຜູ້ແທນສານປະຊາຊົນສູງສຸດແຫ່ງ ສປປ ລາວ ໂດຍ ທ່ານ ຄີ ສີເມືອງ, ຮອງຫົວໜ້າກົມຮ່ວມມືສາກົນ, ສານປະຊາຊົນສູງສຸດແຫ່ງ ສປປ ລາວ ໄດ້ເຂົ້າຮ່ວມກອງປະຊຸມ ກອງປະຊຸມໃຫຍ່ຂອງສະມາຄົມນັກກົດໝາຍອາຊຽນ GA-ALA ຄັ້ງທີ 15 (THE 15th ASEAN LAW ASSOCIATION GENERAL ASSEMBLY) ແລະ ກອງປະຊຸມສະພາສະມາຄົມນັກກົດໝາຍອາຊຽນຄັ້ງທີ 47 (THE 47th ASEAN LAW ASSOCIATION GOVERNING COUNCIL MEETING) ທີ່ນະຄອນຫຼວງບາງກອກ, ຣາຊະອານາຈັກໄທ.
ເຂົ້າຮ່ວມກອງປະຊຸມໃນຄັ້ງນີ້ ປະກອບມີປະທານສະມາຄົມນັກກົດໝາຍຂອງບັນດາປະເທດອາຊຽນເຂົ້າຮ່ວມແບບເຊິ່ງໜ້າທັງໝົດ 10 ປະເທດຄື: ໄທ (ປະເທດເຈົ້າພາບ), ບຣູໄນ, ອິນໂດເນເຊຍ, ສປປ ລາວ, ມາເລເຊຍ, ມຽນມາ, ຟີລິປິນ, ຫວຽດນາມ ແລະ ຕີມໍເລດສ໌ເຕ ໃນນາມປະເທດສັງເກດການ, ສ່ວນປະເທດກໍາປູເຈຍໄດ້ເຂົ້າຮ່ວມທາງອອນລາຍ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການລາຍງານຜົນການຈັດຕັ້ງປະຕິບັດວຽກງານຕາມຜົນຂອງກອງປະຊຸມຄັ້ງທີ 46th ທີ່ສິງກະໂປ ໃນປີ 2025 ຜ່ານມາ ພ້ອມດຽວກັນນີ້ ຍັງໄດ້ຮັບຟັງຜົນການເຮັດວຽກຂອງບັນດາກຸ່ມວຽກຕ່າງໆຂອງສະມາຄົມນັກກົດໝາຍອາຊຽນ, ປຶກສາຫາລື ແຜນການເຄື່ອນໄຫວໃນຕໍ່ໜ້າ ແລະ ບັນຫາອື່ນໆທີ່ຜູ້ແທນໃຫ້ຄວາມສົນໃຈຮ່ວມກັນ.
ໃນໄລຍະຜ່ານ ສານປະຊາຊົນສູງສຸດແຫ່ງ ສປປ ລາວ ຂອງພວກເຮົາ ໄດ້ເຂົ້າຮ່ວມກອງປະຊຸມສະພາສະມາຄົມນັກກົດໝາຍອາຊຽນຄັ້ງທີ່ຜ່ານມາ ເຖິງແມ່ນວ່າພວກເຮົາຍັງບໍ່ທັນໄດ້ເປັນສະມາຊິກຂອງສະມາຄົມນັກກົດໝາຍອາຊຽນເທື່ອກໍຕາມ ພວກເຮົາໄດ້ຖືເອົາບາດກ້າວອັນສໍາຄັນນີ້ ໃນການຄົ້ນຄວ້າ ປຶກສາຫາລື ແລະ ພິຈາລະນາກັບພາກສ່ວນຕ່າງໆທີ່ກ່ຽວຂ້ອງ ເພື່ອສ້າງຕັ້ງສະມາຄົມນັກກົດໝາຍແຫ່ງ ສປປ ລາວ, ພ້ອມດຽວກັນນີ້ ພວກເຮົາກໍໄດ້ຈັດກອງປະຊຸມຫຼາຍຄັ້ງຮ່ວມກັບພາກສ່ວນຕ່າງໆເຊັ່ນ: ກະຊວງຍຸຕິທໍາ, ອົງການໄອຍະການປະຊາຊົນ, ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດລາວ ແລະ ສະພາທະນາຍຄວາມແຫ່ງ ສປປ ລາວ ເພື່ອປຶກສາຫາລື ສຶກສາຄວາມເປັນໄປໄດ້ໃນການສ້າງຕັ້ງສະມາຄົມນັກກົດໝາຍແຫ່ງ ສປປ ລາວ ມາຮອດປີ 2026 ນີ້ ພວກເຮົາສາມາດສໍາເລັດຮ່າງເບື້ອງຕົ້ນລະບຽບການຈັດຕັ້ງ ແລະ ການເຄື່ອນໄຫວຂອງສະມາຄົມນັກກົດໝາຍແຫ່ງ ສປປ ລາວ ເພື່ອສະເໜີຕໍ່ພາກສ່ວນທີ່ກ່ຽວຂ້ອງພິຈາລະນາຕາມຂັ້ນຕອນ.

27/07/2026

ຄະນະຜູ້ແທນຂັ້ນສູງຂອງສານປະຊາຊົນສູງສຸດແຫ່ງ ສປປ ລາວ ສໍາເລັດການເຂົ້າຮ່ວມກອງປະຊຸມສະພາປະທານສານສູງສຸດອາຊຽນຄັ້ງທີ XIII (13th MEETING of the COUNCIL OF ASEAN CHIEF JUSTICES)
ທີ່ນະຄອນຫຼວງບາງກອກ, ຣາຊະອານາຈັກໄທ

ໃນລະຫວ່າງວັນທີ 21 ຫາ 23 ກໍລະກົດ 2026 ຄະນະຜູ້ແທນຂັ້ນສູງຂອງສານປະຊາຊົນສູງສຸດແຫ່ງ ສປປ ລາວ ນໍາໂດຍ ທ່ານ ບຸນຂວາງ ທະວີສັກ, ຮອງປະທານສານປະຊາຊົນສູງສຸດ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມສະພາປະທານສານສູງສຸດອາຊຽນ ຄັ້ງທີ XIII ທີ່ນະຄອນຫຼວງບາງກອກ, ຣາຊະອານາຈັກໄທ. ເຂົ້າຮ່ວມກອງປະຊຸຸມໃນຄັ້ງນີ້ມີບັນດາທ່ານປະທານສານສູງສຸດ ແລະ ຄະນະຜູ້ແທນ ຈາກ ສປປ ລາວ, ບຣູໄນ, ຣາຊາອານາຈັກກໍາປູເຈຍ (ອອນລາຍ), ອິນໂດເນເຊຍ, ມາເລເຊຍ, ມຽນມາ, ຟີລິປິນ, ສິງກະໂປ, ຣາຊາອານາຈັກໄທ (ເຈົ້າພາບ), ສສ ຫວຽດນາມ ແລະ ຕີມໍເລດສ໌ເຕ (ສະມາຊິກໃໝ່) ພ້ອມດ້ວຍທ່ານຮອງເລຂາທິການໃຫຍ່ອາຊຽນ (ASEAN Secretariat),ເລຂາທິການໃຫຍ່ລັດຖະສະພາອາຊຽນ (AIPA) ແລະ ກອງເລຂາສະພາປະທານສານສູງສຸດອາຊຽນ (CACJ Secretariat) ເຂົ້າຮ່ວມ.
ກອງປະຊຸມສະພາປະທານສານສູງສຸດອາຊຽນຄັ້ງທີ XIII (13th MEETING of the COUNCIL OF ASEAN CHIEF JUSTICES) ຊຶ່ງເປັນກອງປະຊຸມຜູ້ນໍາຂັ້ນສູງສຸດຂອງລະບົບຕຸລາການອາຊຽນປະຈໍາປີ ທີ່ແຕ່ລະປະທານສານສູງສຸດຂອງບັນດາປະເທດອາຊຽນຈະໄດ້ເຂົ້າຮ່ວມ ເພື່ອປຶກສາຫາລື - ກໍານົດແນວທາງການຮ່ວມມືໃນຕໍ່ໜ້າຮ່ວມ ພ້ອມດຽວກັນນີ້ ກໍຍັງຈະໄດ້ທົບທວນຄືນການຈັດຕັ້ງປະຕິບັດຖະແຫຼງການປະທານສານສູງສຸດອາຊຽນຄັ້ງທີ XII (ຖະແຫຼງການ Singapore) ທີ່ປະເທດສິງກະໂປ ຜ່ານມາ.
ກອງປະຊຸມສະພາປະທານສານສູງສຸດອາຊຽນໃນຄັ້ງນີ້ ມີຈຸດປະສົງເພື່ອ: (1) ຊຸກຍູ້-ສົ່ງເສີມ ການພົວພັນຮ່ວມມືທີ່ໃກ້ສິດ ແລະ ເສີມສ້າງຄວາມເຂົ້າໃຈເຊິ່ງກັນ ແລະ ກັນດ້ານວຽກງານຕຸລາການຂອງປະເທດອາຊຽນ, (2) ເປັນເວທີ່ເພື່ອປຶກສາຫາລື ແລະ ແລກປ່ຽນບົດຮຽນດ້ານຕ່າງໆຂອງບັນດາປະທານສານສງູສຸດອາຊຽນ, (3) ອໍານວຍຄວາມສະດວກການຮ່ວມມືດ້ານຕຸລາການໃນຂົງເຂດປະເທດອາຊຽນ ເພື່ອເສີມສ້າງການພັດທະນາດ້ານເສດຖະກິດ-ສັງຄົມ ພ້ອມດຽວກັນນີ້ ກອງປະຊຸມຍັງໄດ້ຮັບຟັງລາຍງານການຈັດຕັ້ງປະຕິບັດວຽກງານ ແລະ ທິດທາງແຜນການເຄື່ອນໄຫວຂອງບັນດາຄະນະປະຕິບັດງານ ຫຼື ກຸ່ມວຽກດ້ານຕ່າງໆ ເພື່ອກໍານົດເປັນເນື້ອໃນຖະແຫຼງການຮ່ວມຂອງສະພາປະທານສານສງູສຸດອາຊຽນຄັ້ງທີ XIII ຫຼື ຖະແຫຼງການບາງກອກ.
ໃນໂອກາດທີ່ເຂົ້າຮ່ວມກອງປະຊຸມໃນຄັ້ງນີ້ ທ່ານຮອງປະທານປະຊາຊົນສູງສຸດແຫ່ງ ສປປ ລາວ ໃນນາມຫົວໜ້າຄະນະຜູ້ແທນແຫ່ງ ສປປ ລາວ ກໍໄດ້ມີຄໍາເຫັນຕໍ່ກອງປະຊຸມ ຊຶ່ງເນື້ອໃນບາງຕອນທ່ານໄດ້ກ່າວວ່າ: ສານປະຊາຊົນສູງສຸດແຫ່ງ ສປປ ລາວ ໃນນາມສະມາຊິກຂອງສະພາປະທານສານສູງສຸດອາຊຽນ (CACJ) ກໍໄດ້ມີຄວາມພະຍາຍາມສູງສຸດໃນການຈັດຕັ້ງປະຕິບັດວຽກງານໃນໄລຍະຜ່ານມາ ດ້ວຍການຜັນຂະຫຍາຍເນື້ອໃນຂອງຖະແຫຼງການຄັ້ງທີ XII (ຖະແຫຼງການສິງກະໂປ) ເຂົ້າໃນການຈັດຕັ້ງປະຕິບັດວຽກງານວິຊາສະເພາະພາຍໃນຂອງຕົນ, ສ້າງນິຕິກໍາລຸ່ມກົດໝາຍ ເພື່ອເປັນເຄື່ອງມືໃນການຜັນຂະຫຍາຍວຽກງານດັ່ງກ່າວ ເປັນຕົ້ນແມ່ນ: ການເຜີຍແຜ່ວຽກງານຂອງສານ ແລະ ການສ້າງຖານຂໍ້ມູນດ້ານກົດໝາຍຜ່ານເວັບໄຊຂອງສານປະຊາຊົນ, ເພດເຟດສ໌ບຸກ, ສໍາເລັດການສ້າງຄໍາແນະນໍາຂອງສານປະຊາຊົນສູງສຸດວ່າດ້ວຍການຮັບຮູ້ຜົນການແກ້ໄຂຂໍ້ຂັດແຍ່ງທາງດ້ານເສດຖະກິດພາຍໃນ ແລະ ຕ່າງປະເທດ, ກໍານົດການສ້າງສານໃຫ້ເປັນສານທັນສະໄໝເຂົ້າໃນແຜນພັດທະນາສານປະຊາຊົນ 5 ປີ ຄັ້ງທີ V (2026-2030), ຊຸກຍູ້ສົ່ງເສີມພະນັກງານຂອງສານເຂົ້າຮ່ວມຝຶກອົບຮົມດ້ານວິຊາສະເພາະຕ່າງໆຢ່າງເປັນປົກກະຕິ, ເອົາໃຈໃສ່ໃນການພົວພັນຮ່ວມມື ແລະ ແກ້ໄຂບັນຫາເດັກນ້ອຍຕາມຊາຍແດນໃນຂອບເຂດ 2 ຝ່າຍ ແລະ ຫຼາຍຝ່າຍ, ການດໍາເນີນຄະດີຕ້ານການຄ້າມະນຸດ, ຄະດີສິ່ງແວດລ້ອມ ແລະ ໄດ້ຖືສໍາຄັນວຽກງານການໂຕ້ແຍ່ງ-ໂຕ້ຖຽງຄະດີໃນທີ່ປະຊຸມສານເປັນບັນຫາພື້ນຖານໃນການຊັ່ງຊາຕີລາຄາຂໍ້ມູນຫຼັກຖານ ແລະ ຕັດສິນ-ພິພາກສາຄະດີ. ພິເສດໃນປີ 2025 ຜ່ານມາ ສານປະຊາຊົນສູງສຸດແຫ່ງ ສປປ ລາວ ໄດ້ເປັນເຈົ້າພາບຈັດກອງປະຊຸມສໍາມະນາສໍາລັບຜູ້ພິພາກສາອາຊຽນ ດ້ານການດໍາເນີນຄະດີຄ້າມະນຸດທີ່ນະຄອນຫຼວງວຽງຈັນ.
ສານປະຊາຊົນສູງສຸດແຫ່ງ ສປປ ລາວ ຂອງພວກເຮົາ ຮັບຮູ້ ແລະ ເຂົ້າໃຈດີວ່າ ການພົວພັນຮ່ວມມື ແລະ ແລກປ່ຽນຂໍ້ມູນຂ່າວສານເຊິ່ງກັນທາງດ້ານວຽກງານຕຸລາການພາຍໃນຂົງເຂດອາຊຽນຂອງພວກເຮົາແມ່ນສິ່ງທີ່ສໍາຄັນ ແລະ ຈໍາເປັນທີ່ສຸດ ສໍາລັບການເຂົ້າເຖິງຂະບວນການຍຸຕິທໍາ ແລະ ການໄດ້ຮັບຄວາມຍຸຕິທໍາຈາກການດໍາເນີນຄະດີ ໂດຍສະເພາະແມ່ນໃນໄລຍະແຫ່ງການເຊື່ອມໂຍງຂອງບັນດາປະເທດພາກພື້ນ ແລະ ສາກົນ, ໃນນີ້ການສ້າງສານໃຫ້ເປັນສານທີ່ທັນສະໄໝ ນໍາໃຊ້ເທັກໂນໂລຊີເຂົ້າມາຊ່ວຍໃນການບໍລິຫານສານ ແລະ ບໍລິການຄະດີ ກໍເປັນສິ່ງຈໍາເປັນທີ່ສຸດສໍາລັບຍຸກປັດຈຸບັນ ຊຶ່ງສານປະຊາຊົນສູງສຸດແຫ່ງ ສປປ ລາວ ຂອງພວກເຮົາ ສະໜັບສະໜູນ ແລະ ເຂົ້າຮ່ວມໃນວຽກງານຕ່າງໆດ້ານຕຸລາການຂອງອາຊຽນດ້ວຍຄວາມຮັບຜິດຊອບສູງສຸດ ແລະ ເປັນເຈົ້າການຮ່ວມກັນ ເພື່ອພ້ອມກັນປັບປຸງ-ແກ້ໄຂ ແລະ ເຊື່ອມໂຍງເຂົ້າກັນ ຕາມວິໄສທັດຂອງການສ້າງປະຊາຄົມອາຊຽນ.

ສານປະຊາຊົນສູງສຸດແຫ່ງ ສປປລາວ The People's Supreme Court of The Lao PDR

15/08/2026

10/08/2026

10/08/2026

07/08/2026

07/08/2026

30/07/2026

29/07/2026

27/07/2026

27/07/2026

27/07/2026

Address

Opening Hours

Telephone

Website

Alerts

Shortcuts

Share

Category

Listing takedown request

Monday	08:00 - 16:00
Tuesday	08:00 - 16:00
Wednesday	08:00 - 16:00
Thursday	08:00 - 16:00
Friday	08:00 - 16:00