05/09/2026
ເປີດ “ເທດສະການຄຳລາວ 2026” ຊຸກຍູ້ຄຳລາວສູ່ມາດຕະຖານສາກົນ ແລະ ເຊື່ອມໂຍງອຸດສາຫະກຳຄຳລາວກັບພາກພື້ນ
ໃນວັນທີ 4 ກັນຍາ 2026 ທີ່ຫໍປະຊຸມແຫ່ງຊາດນະຄອນຫຼວງວຽງຈັນ ໄດ້ມີພິທີເປີດ “ງານເທດສະການຄຳລາວ 2026” (Lao Gold Festival 2026) ຂຶ້ນ ພາຍໃຕ້ຄຳຂວັນ:“ຄຳລາວ ສູ່ ຄຳໂລກ”“Lao Gold to the World”Connecting • Building Trust • Growing Together ໄດ້ຮັບກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍບັນດາການນຳພັກ–ລັດ, ຜູ້ຕາງໜ້າບັນດາກະຊວງ, ອົງການຂອງລັດ, ສະຖານທູດ, ອົງການສາກົນ, ສະພາການຄ້າ, ສະມາຄົມຄຳ, ສະຖາບັນການເງິນ, ຜູ້ປະກອບການຄຳ ແລະ ເຄື່ອງປະດັບ, ນັກລົງທຶນເຂົ້າຮ່ວມ.
ງານເທດສະການຄຳລາວ 2026 ຈັດຂຶ້ນໂດຍ ທະນາຄານຄຳລາວ ຈຳກັດ (Lao Bullion Bank – LBB) ຮ່ວມກັບພາກສ່ວນທີ່ກ່ຽວຂ້ອງ ເຊິ່ງເປັນເວທີສຳຄັນໃນການສົ່ງເສີມ ແລະ ຍົກລະດັບຂະແໜງ ການຄຳຂອງ ສປປ ລາວ ໃຫ້ມີມາດຕະຖານ, ຄວາມໂປ່ງໃສ, ຄວາມໜ້າເຊື່ອຖື ແລະ ສາມາດເຊື່ອມໂຍງກັບຕະຫຼາດພາກພື້ນ ແລະ ສາກົນໄດ້ຢ່າງຍືນຍົງ.
ຈຸດປະສົງສຳຄັນຂອງການຈັດງານ ແມ່ນເພື່ອສ້າງເວທີແລກປ່ຽນຄວາມຮູ້, ປະສົບການ ແລະ ນະວັດຕະກຳໃນຂະແໜງການຄຳ; ສົ່ງເສີມການລົງທຶນ ແລະ ການຮ່ວມມືທາງທຸລະກິດ; ພັດທະນາຄຸນນະພາບການຜະລິດ, ການອອກແບບ, ການສ້າງແບຣນ ແລະ ການຕະຫຼາດ; ພ້ອມທັງສືບສານພູມປັນຍາ, ສິລະປະຫັດຖະກຳ ແລະ ມໍລະດົກອັນມີຄຸນຄ່າຂອງຄຳລາວ.
ໃນພິທີເປີດ, ທ່ານ ປອ ຈັນທອນ ສິດທິໄຊ, ຜູ້ອໍານວນການໃຫຍ່ ທະນາຄານຄໍາ ລາວ ຈໍາກັດ ໄດ້ກ່າວ ວ່າ:“ງານເທດສະການຄຳລາວ 2026 ບໍ່ພຽງແຕ່ເປັນງານວາງສະແດງຄໍາ ຫຼື ເຄື່ອງປະດັບ ເທົ່ານັ້ນ ແຕ່ແມ່ນເວທີການເຊື່ອມໂຍງຕະຫລາດຄຳລາວ ກັບຕະຫຼາດຄຳຂອງໂລກ.ເປັນເວທີທີ່ພາກລັດ, ພາກເອກະຊົນ, ສະຖາບັນການເງິນ, ຜູ້ຜະລິດ, ຊ່າງສີມື, ນັກອອກແບບ, ນັກລົງທຶນ ແລະ ຄູ່ຮ່ວມມືຈາກສາກົນ ເພື່ອເປັນເວທີເຈລະຈາ, ຮ່ວມມື, ຮ່ວມຄ້າ ແລະ ສ້າງອະນາຄົດໃໝ່ໃຫ້ແກ່ອຸດສາຫະກຳຄຳລາວຮ່ວມກັນ ແລະ ນຳພາຄຳລາວກ້າວສູ່ມາດຕະຖານສາກົນ ບົນພື້ນຖານຂອງຄຸນນະພາບ, ຄວາມໂປ່ງໃສ ແລະ ການເຕີບໂຕຮ່ວມກັນຢ່າງຍືນຍົງ.”
ພາຍໃນງານມີການຈັດສະແດງຄຳແທ່ງ, ຄຳຮູບປະພັນ, ເຄື່ອງປະດັບຄຳ, ຜະລິດຕະພັນຫັດຖະກຳລາວ ແລະ ນະວັດຕະກຳດ້ານການເງິນ–ການລົງທຶນໃນຄຳ ຈາກບັນດາຜູ້ປະກອບການຊັ້ນນຳພາຍໃນ ແລະ ຕ່າງປະເທດ.
ນອກຈາກນັ້ນ, ຍັງມີກອງປະຊຸມສຳມະນາ, ບົດປາຖະກະຖາພິເສດ ແລະ ການສົນທະນາຈາກຜູ້ຊ່ຽວຊານ ໂດຍກວມເອົາຫຼາຍຫົວຂໍ້ສຳຄັນ ເຊັ່ນ: ການສ້າງປະເທດລາວໃຫ້ເປັນສູນກາງຄຳແຫ່ງໃໝ່ຂອງອາຊຽນ, ອະນາຄົດເສດຖະກິດລາວ ແລະ ອຸດສາຫະກຳຄຳແທ່ງ, ບົດບາດຂອງຄຳຕໍ່ຄວາມໝັ້ນຄົງຂອງຄອບຄົວ, ຄຳກັບວັດທະນະທຳ ແລະ ອັດຕະລັກອາຊຽນ, ການອອກແບບ ແລະ ພັດທະນາແບຣນຈາກມໍລະດົກຄຳລາວ, ລວມເຖິງການລົງທຶນຄຳໃນຍຸກດິຈິຕອນ.
ກິດຈະກຳພິເສດພາຍໃນງານຍັງປະກອບມີ ການສະແດງແຟຊັນຄຳ ແລະ ຜ້າໄໝລາວ, ການແນະນຳຜະລິດຕະພັນ ແລະ ບໍລິການໃໝ່, ການຈັບສະຫຼາກລາງວັນຄຳ ພ້ອມດ້ວຍກິດຈະກຳສ້າງສັນທີ່ເປີດໂອກາດໃຫ້ປະຊາຊົນໄດ້ຮຽນຮູ້, ສຳຜັດ ແລະ ເຂົ້າໃຈຄຸນຄ່າຂອງຄຳຫຼາຍຂຶ້ນ.
ການຈັດງານຄັ້ງນີ້ຍັງເປັນໂອກາດສຳຄັນໃນການຂະຫຍາຍເຄືອຂ່າຍຄູ່ຮ່ວມມື, ສ້າງໂອກາດທາງການຄ້າ ແລະ ການລົງທຶນ, ຕະຫຼອດຮອດການເຊື່ອມໂຍງຜູ້ຜະລິດ, ຜູ້ປະກອບການ, ສະຖາບັນການເງິນ ແລະ ນັກລົງທຶນຈາກຫຼາຍປະເທດ ເພື່ອຮ່ວມກັນສ້າງລະບົບນິເວດຂອງອຸດສາຫະກຳຄຳທີ່ເຂັ້ມແຂງ.
ຄະນະຈັດງານເຊື່ອໝັ້ນວ່າ ງານເທດສະການຄຳລາວ 2026 ຈະເປັນອີກໜຶ່ງບາດກ້າວສຳຄັນໃນການປະກາດສັກກະຍະພາບຂອງຂະແໜງການຄຳລາວ, ສົ່ງເສີມພາບລັກຂອງ ສປປ ລາວ ໃນເວທີສາກົນ ແລະ ວາງຮາກຖານໃຫ້ປະເທດລາວກ້າວຂຶ້ນເປັນສູນກາງການຄ້າ, ການບໍລິການ ແລະ ການລົງທຶນດ້ານຄຳທີ່ມີມາດຕະຖານໃນພາກພື້ນອາຊຽນ.
