ກົມຊັບສິນທາງປັນຍາ

ກົມຊັບສິນທາງປັນຍາ ກົມຊັບສິນທາງປັນຍາ (ກຊປ), ກະຊວງ ອຸດສາຫະກຳ ແລະ ການຄ້າ

ກົມຊັບສິນທາງປັນຍາ ຈັດງານສັບປະດາຊັບສິນທາງປັນຍາ 2026 (IP Week 2026) ຢູ່ໃນ ງານວາງສະແດງ “ຄຸນຄ່າພູມປັນຍາລາວ ຄັ້ງທີ 1” ພາຍໃຕ້ຫ...
10/09/2026

ກົມຊັບສິນທາງປັນຍາ ຈັດງານສັບປະດາຊັບສິນທາງປັນຍາ 2026 (IP Week 2026) ຢູ່ໃນ ງານວາງສະແດງ “ຄຸນຄ່າພູມປັນຍາລາວ ຄັ້ງທີ 1” ພາຍໃຕ້ຫົວຂໍ້“ຈາກພູມປັນຍາລາວ ສູ່ຄວາມຮັ່ງມີດ້ວຍຊັບສິນທາງປັນຍາ”
----------------------------------------------
ເນື່ອງໃນໂອກາດການສົ່ງເສີມການສ້າງສັນ, ນະວັດຕະກຳ ແລະ ການນຳໃຊ້ລະບົບຊັບສິນທາງປັນຍາໃນການພັດທະນາເສດຖະກິດຂອງ ສປປ ລາວ, ກົມຊັບສິນທາງປັນຍາ ໄດ້ຈັດງານ ສັບປະດາຊັບສິນທາງປັນຍາ 2026 (Lao IP Week 2026) ໂດຍລວບລວມກິດຈະກຳດ້ານຊັບສິນທາງປັນຍາຕະຫຼອດປີໄວ້ໃນຫຼາກຫຼາຍເວທີແຕກຕ່າງກັນ.
ວັນທີ 9 ກັນຍາ 2026, ທີ່ສູນການຄ້າລາວ-ໄອເຕັກ (ຕຶກເກົ່າ), ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ຈັດງານສັບປະດາຊັບສິນທາງປັນຍາ 2026 (IP Week 2026) ຢູ່ໃນ ງານວາງສະແດງ “ຄຸນຄ່າພູມປັນຍາລາວ ຄັ້ງທີ 1” ພາຍໃຕ້ຫົວຂໍ້ “ຈາກພູມປັນຍາລາວ ສູ່ຄວາມຮັ່ງມີດ້ວຍຊັບສິນທາງປັນຍາ” (Turning Lao Wisdom to Wealth by Intellectual Property) ໂດຍມີບັນດາ ຜູ້ຕາງໜ້າຈາກ ຫ້ອງການ, ກົມ, ສະຖາບັນ, ກະຊວງອຸດສາຫະກໍາ ແລະ ການຄ້າ, ຕາງໜ້າພາກລັດ, ພາກທຸລະກິດ, ນັກສຶກສາ ແລະ ສື່ມວນຊົນເຂົ້າຮ່ວມ.
ງານໃນຄັ້ງນີ້ ໄດ້ກໍານົດຫົວຂໍ້ “ຈາກພູມປັນຍາລາວ ສູ່ຄວາມຮັ່ງມີດ້ວຍຊັບສິນທາງປັນຍາ” (Turning Lao Wisdom to Wealth by Intellectual Property) ຊຶ່ງເນັ້ນໃຫ້ເຫັນເຖິງບົດບາດຂອງຊັບສິນທາງປັນຍາໃນການເຊື່ອມໂຍງພູມປັນຍາລາວ ກັບໂອກາດທາງເສດຖະກິດ. ການນໍາໃຊ້ເຄື່ອງມື ແລະ ກົນໄກດ້ານຊັບສິນທາງປັນຍາຢ່າງເໝາະສົມ ຈະຊ່ວຍຊຸມຊົນ ແລະ ຜູ້ປະກອບການສາມາດປົກປ້ອງ, ສ້າງຄວາມແຕກຕ່າງ, ດໍາເນີນການຄ້າ ແລະ ເພີ່ມມູນຄ່າໃຫ້ແກ່ຜະລິດຕະພັນລາວ ຕະຫຼອດຮອດການສ້າງຜົນງານສ້າງສັນໃຫ້ອອກສູ່ສັງຄົມ. ແນວຄິດດັ່ງກ່າວ ຍັງຫັນການພັດທະນາລະບົບນິເວດ ຊັບສິນທາງປັນຍາ ທີ່ສາມາດນໍາໃຊ້ໄດ້ຈິງ, ປ່ຽນຄວາມຮູ້ພື້ນບ້ານ ແລະ ຮາກຖານວັດທະນະທໍາລາວ ໃຫ້ເປັນສິນຄ້າ ແລະ ຜະລິດຕະພັນທີ່ມີມູນຄ່າສູງຂຶ້ນ, ສ້າງແບຣນທ້ອງຖິ່ນໃຫ້ເຂັ້ມແຂງ ແລະ ສ້າງທຸລະກິດທີ່ຍືນຍົງ.
ພາຍໃນງານ ມີການຈັດເວທີເສວະນາ ຊຶ່ງໃຫ້ກຽດເຂົ້າຮ່ວມເສວະນາ ໃນຄັ້ງນີ້ ມີທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ, ມີທ່ານ ລິດທິໄກ ພູມມະສັກ, ປະທານສາມາຄົມ SME ລາວ ແລະ ທ່ານ ແພງທອງ ແຈ່ມມາໄລ, ຫົວໜ້າພະແນກນະໂຍບາຍ ແລະ ສົ່ງເສີມ ນະວັດຕະກໍາຊັບສິນທາງປັນຍາ, ໃນການເສວະນາຄັ້ງນີ້ ມີ 2 ຫົວຂໍ້ຫຼັກ ຄື: “ຈາກພູມປັນຍາລາວ ສູ່ຄວາມຮັ່ງມີດ້ວຍຍຸດທະສາດຊັບສິນທາງປັນຍາ (IP) 2026–2030 ແລະ ການນໍາໃຊ້ເຄື່ອງມືຊັບສິນທາງປັນຍາ” ແລະ “ກົນໄກແກ້ໄຂຂໍ້ຂັດແຍ່ງທາງດ້ານວຽກງານຊັບສິນທາງປັນຍາ” ຊຶ່ງມາໃນຮູບແບບການສົນທະນາແລກປ່ຽນຄວາມຮູ້ດ້ານຊັບສິນທາງປັນຍາ ໃນຫຼາຍຫົວຂໍ້ ເຊັນ: ຄວາມຮູ້ກ່ຽວກັບເຄື່ອງໝາຍການຄ້າ, ສິດທິບັດ, ອານຸສິດທະບັດ, ແບບອຸດສາຫະກຳ, ຖິ່ນກຳເນີດ, ພັນພືດໃໝ່ ແລະ ລິຂະສິດ ແລະ ສິດກ່ຽວຂ້ອງກັບລິຂະສິດ.
ພາຍໃນງານຍັງມີບູດຂອງ ກົມຊັບສິນທາງປັນຍາ (IP Clinic) ເພື່ອເຜີຍແຜ່ວຽກງານຊັບສິນທາງປັນຍາ, ໃຫ້ຄຳປຶກສາ ແກ່ ພາກທຸລະກິດ, ຜູ້ປະກອບການ, SMEs ແລະ ມວນຊົນ ໃຫ້ເຂົ້າໃຈລະບົບນິເວດຂອງຊັບສິນທາງປັນຍາ ພ້ອມທັງທິດທາງການດໍາເນີນງານຕາມແຜນພັດທະນາຂອງ ກະຊວງອຸດສາຫະກໍາ ແລະ ການຄ້າ, ພ້ອມທັງສາມາດເຂົ້າໄປສອບຖາມຂໍ້ມູນໂດຍກົງ ກັບຜູ້ຊ່ຽວຊານດ້ານຊັບສິນທາງປັນຍາໄດ້ເຖີງທີ່. ພ້ອມນີ້ ຍັງມີການມອບໃບຢັ້ງຢືນການແຈ້ງຂໍ້ມູນລິຂະສິດ ແຄນສາມເຕົ້າ ໃຫ້ແກ່ຜູ້ປະກອບການລາວ.
ການຈັດງານໃນຄັ້ງນີ້ ຈະມີຂື້ນ ແຕ່ ວັນທີ 9 ຫາ 13 ກັນຍາ 2026 ຂໍເຊີນຊວນທຸກທ່ານເຂົ້າທ່ຽວຊົມ ແລະ ສົ່ງເສີມສີນຄ້າພູມປັນຍາລາວ ພ້ອມທັງຮັບຟັງ ແລະ ແລກປ່ຽນຄວາມຮູ້ ຜ່ານເວທີສໍາມະນາຕ່າງໆ ໃນຫຼາຍຫົວຂໍ້. ງານນີ້ຈຶ່ງເປັນໂອກາດ ແລະ ການຍົກລະດັບ ຄວາມສໍາຄັນໃນການເຜີຍແຜ່, ສ້າງຄວາມຮູ້ ກ່ຽວກັບວຽກງານຊັບສິນທາງປັນຍາ ໃຫ້ແກ່ພາກລັດ, ພາກທຸລະກິດ, ນັກສ້າງສັນ, ນັກປະດິດຄິດຄົ້ນ, ຊາວໜຸ່ມ ແລະ ມວນຊົນ ເພື່ອນໍາເອົາພູມປັນຍາ ແລະ ຜົນງານສ້າງສັນຂອງລາວ ມາສ້າງມູນຄ່າ, ສ້າງແບຣນ ແລະ ສ້າງໂອກາດທາງເສດຖະກິດ ໃຫ້ເກີດປະໂຫຍດຢ່າງຍືນຍົງ.

ຂ່າວ ແລະ ຮູບພາບ: ກົມຊັບສິນທາງປັນຍາ

🔊 ມາແລ້ວ 💡 ຢາກປ່ຽນ "ຄວາມຄິດ ແລະ ພູມປັນຍາ" ໃຫ້ກາຍເປັນ "ມູນຄ່າ ແລະ ຄວາມຮັ່ງມີ" ບໍ່? 💡ໂອກາດດີໆ ທີ່ທ່ານບໍ່ຄວນພາດ! ຂໍເຊີນຊວນທ...
08/09/2026

🔊 ມາແລ້ວ
💡 ຢາກປ່ຽນ "ຄວາມຄິດ ແລະ ພູມປັນຍາ" ໃຫ້ກາຍເປັນ "ມູນຄ່າ ແລະ ຄວາມຮັ່ງມີ" ບໍ່? 💡
ໂອກາດດີໆ ທີ່ທ່ານບໍ່ຄວນພາດ! ຂໍເຊີນຊວນທຸກທ່ານມາຮ່ວມ "ງານວາງສະແດງ ຄຸນຄ່າພູມປັນຍາລາວ ຄັ້ງທີ່ 1" (The Value of Laos Wisdom 1st Edition) 🌟 ພ້ອມທັງເຂົ້າຮ່ວມຮັບຟັງການສຳມະນາສຸດພິເສດ ໃຫ້ຄວາມຮູ້ຟຣີ!
ຈາກນັກສຳມະນາກອນ ຜູ້ມີປະສົບການຕົວຈິງໃນຫຼາກຫຼາຍດ້ານ ທີ່ຈະມາເຈາະລຶກ 2 ຫົວຂໍ້ເດັດ:
📅 ຕາຕະລາງງານສຳມະນາ (ຫ້າມພາດ!):
1️⃣ ຫົວຂໍ້ທີ 1: ຈາກພູມປັນຍາລາວ ສູ່ຄວາມຮັ່ງມີ ດ້ວຍຍຸດທະສາດ ຊັບສິນທາງປັນຍາ (IP) 2026-2030 ແລະ ເຄື່ອງມືຊັບສິນທາງປັນຍາ
👉 ວັນທີ 9 ກັນຍາ 2026 | ເວລາ 13:00 - 17:00 ນ.
2️⃣ ຫົວຂໍ້ທີ 2: ກົນໄກແກ້ໄຂຂໍ້ຂັດແຍ່ງ ທາງດ້ານວຽກງານ ຊັບສິນທາງປັນຍາ
👉 ວັນທີ 12 ກັນຍາ 2026 | ເວລາ 15:00 - 17:00 น.
📍 ສະຖານທີ່: ສູນການຄ້າລາວ-ໄອເຕັກ (Lao ITECC ຕຶກເກົ່າ)
------------------------------
✨ ພາຍໃນງານ ຍັງມີບູທ ໃຫ້ຄຳປຶກສາຟຣີ!

* ບູທ ກົມຊັບສິນທາງປັນຍາ: ແນະນຳການຂໍຈົດທະບຽນແບບອຸດສາຫະກຳ, ການແຈ້ງຂໍ້ມູນລິຂະສິດ, ພັນພຶດໃໝ່, ຖິ່ນກຳເນີດ ແລະ ການແກ້ໄຂຂໍ້ຂັດແຍ່ງ.
* IP Clinic Booth: ໃຫ້ຄຳປຶກສາແບບເຈາະລຶກ ຈາກບໍລິສັດຕົວແທນຈົດທະບຽນຊັບສິນທາງປັນຍາໂດຍກົງ.

------------------------------
🎁 ກິດຈະກຳພິເສດ! ແຈກຂອງລາງວັນສຸດ exclusive ງາມໆ (ບິກ, ຈອກຮັກສາຄວາມຮ້ອນ/ເຢັນ, ເສື້ອຢືດ) ຈາກກົມຊັບສິນທາງປັນຍາ!

ກະຕິກາງ່າຍໆ ພຽງແຕ່ 3 ຂັ້ນຕອນ:

1. ກົດ Like ເພຈ, ກົດ Follow Facebook ກົມຊັບສິນທາງປັນຍາ 🔔 👍
2. ກົດ Share ໂພສນີ້ ↩️
3. ເຄັບໜ້າຈໍ ແລ້ວ Comment ລົງ post ນີ້, ກິດຈະກຳນີ້ສະເພາະ ຜູ້ທີ່ມາຮ່ວມງາານເທົ່ານັ້ນ.
👉 ຮັບຂອງລາງວັນທັນທີຢູ່ທີ່ບູທພາຍໃນງານ! (ຂອງລາງວັນມີຈຳນວນຈຳກັດ)

ມາຮ່ວມຂັບເຄື່ອນນະວັດຕະກຳ, ຄວາມຄິດສ້າງສັນ ແລະ ການເຕີບໂຕຢ່າງຍືນຍົງໄປນຳກັນ! 🚀
#ຄຸນຄ່າພູມປັນຍາລາວ #ຊັບສິນທາງປັນຍາ

ກົມຊັບສິນທາງປັນຍາ ຈັດຝຶກອົບຮົມການກວດສອບສິດທິບັດເສີມສ້າງທັກສະ ແລະ ຍົກລະດັບວຽກງານກວດສອບ-----------------------------------...
08/09/2026

ກົມຊັບສິນທາງປັນຍາ ຈັດຝຶກອົບຮົມການກວດສອບສິດທິບັດ
ເສີມສ້າງທັກສະ ແລະ ຍົກລະດັບວຽກງານກວດສອບ
--------------------------------------------
ໃນລະຫວ່າງວັນທີ 7–9 ກັນຍາ 2026, ທີ່ຫ້ອງປະຊຸມຕຶກ SME ຊັ້ນ 5, ກົມຊັບສິນທາງປັນຍາ ໄດ້ຈັດຝຶກອົບຮົມກ່ຽວກັບ “ການກວດສອບສິດທິບັດ” ໂດຍການເປັນປະທານຂອງ ທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ ແລະ ທ່ານ Yasuaki Naito, ຫົວໜ້າພະແນກຊັບສິນທາງປັນຍາ, JETRO Bangkok,
ໃນການຝຶກອົບຮົມຄັ້ງນີ້, ມີ ທ່ານ ສໍລະສິນ ແສງສີລາວົງ, ຫົວຫນ້າພະແນກສິດທິບັດ, ກົມຊັບສິທາງປັນຍາ, ມີທ່ານ Takuya UESHIMA, ຮອງຫົວໜ້າພະແນກ ພ້ອມຄະນະ ຈາກສຳນັກງານສິດທິບັດຍີ່ປຸ່ນ, ພ້ອມດ້ວຍພະນັກງານພາຍໃນກົມຊັບສິນທາງປັນຍາ ເຂົ້າຮ່ວມ.
ທ່ານ ໄຊສົມເພັດ ນໍລະສິງ, ໄດ້ກ່າວວ່າ: ການຝຶກອົບຮົມຄັ້ງນີ້ ນັບເປັນຄັ້ງທີ 2 ພາຍຫຼັງຈາກກົມຊັບສິນທາງປັນຍາ ແລະ ສຳນັກງານສິດທິບັດຍີ່ປຸ່ນ ໄດ້ລົງນາມໃນແຜນວຽກຮ່ວມກັນໃນກາງປີ 2025 ແລະ ໄດ້ຈັດການຝຶກອົບຮົມຄັ້ງທຳອິດຂຶ້ນໃນເດືອນຕຸລາ 2025. ພາຍໃຕ້ແຜນວຽກດັ່ງກ່າວ, ສຳນັກງານສິດທິບັດຍີ່ປຸ່ນ ໄດ້ສົ່ງຊ່ຽວຊານດ້ານການກວດສອບສິດທິບັດມາໃຫ້ຄວາມຮູ້ ແລະ ຝຶກອົບຮົມແກ່ນັກກວດສອບ ແລະ ພະນັກງານພາຍໃນກົມຊັບສິນທາງປັນຍາ ຂອງ ສປປ ລາວ.
ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ໃນດ້ານວຽກງານຊັບສິນທາງປັນຍາ ຖືເປັນການຮ່ວມມືທີ່ສະໜິດແໜ້ນ ແລະ ມີການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ, ໂດຍສະເພາະ ດ້ານວິຊາສະເພາະ ແລະ ການພັດທະນາຊັບພະຍາກອນມະນຸດ. ການຮ່ວມມືດັ່ງກ່າວ ມີຄວາມສຳຄັນຕໍ່ການຍົກສູງຄວາມຮູ້ ແລະ ຄວາມສາມາດຂອງບຸກຄະລາກອນ ຊຶ່ງເປັນພື້ນຖານສຳຄັນໃນການພັດທະນາວຽກງານຊັບສິນທາງປັນຍາ ແລະ ການພັດທະນາເສດຖະກິດ-ສັງຄົມ.
ການຝຶກອົບຮົມໃນຄັ້ງນີ້, ບັນດາຜູ້ເຂົ້າຮ່ວມສຳມະນາຈະໄດ້ຮັບຟັງການບັນຍາຍ ຈາກຜູ້ຊ່ຽວຊານກ່ຽວກັບຫຼັກການ ແລະ ເນື້ອໃນສຳຄັນຂອງວຽກງານກວດສອບສິດທິບັດ, ພ້ອມທັງກໍລະນີສຶກສາຕົວຈິງ ເພື່ອໃຫ້ສາມາດເຂົ້າໃຈຂັ້ນຕອນ ແລະ ວິທີການກວດສອບໄດ້ຢ່າງເລິກເຊິ່ງຍິ່ງຂຶ້ນ. ພ້ອມທັງເສີມສ້າງທັກສະ ແລະ ຍົກລະດັບສັກກະພາບຂອງບຸກຄະລາກອນດ້ານການກວດສອບສິດທິບັດ ໃຫ້ສາມາດນຳໃຊ້ຄວາມຮູ້ ແລະ ບົດຮຽນຈາກຊ່ຽວຊານມາປັບປຸງວຽກງານກວດສອບໃຫ້ມີຄຸນນະພາບ, ມີປະສິດທິພາບ ແລະ ໃກ້ຄຽງກັບຫຼັກປະຕິບັດສາກົນຍິ່ງຂຶ້ນ.

ຂ່າວ ແລະ ຮູບພາບ: ກົມຊັບສິນທາງປັນຍາ

ລາວ–ສະຫະລັດອາເມລິກາ ເສີມສ້າງການຮ່ວມມືດ້ານສິດທິບັດ ຜ່ານການລົງນາມຖະແຫຼງການເຈດຈຳນົງ----------------------------------------...
04/09/2026

ລາວ–ສະຫະລັດອາເມລິກາ ເສີມສ້າງການຮ່ວມມືດ້ານສິດທິບັດ
ຜ່ານການລົງນາມຖະແຫຼງການເຈດຈຳນົງ
----------------------------------------------
ກົມຊັບສິນທາງປັນຍາ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ສຳນັກງານສິດທິບັດ ແລະ ເຄື່ອງໝາຍການຄ້າແຫ່ງສະຫະລັດອາເມລິກາ (USPTO) ໄດ້ຮ່ວມລົງນາມຖະແຫຼງການເຈດຈຳນົງ (Joint Statement of Intent – SOI) ວ່າດ້ວຍການຮ່ວມມື ເພື່ອເລັ່ງລັດການພິຈາລະນາ ແລະ ການອອກສິດທິບັດສຳລັບຄຳຮ້ອງສະໝັກສິດທິບັດທີ່ກ່ຽວຂ້ອງກັບ ສປປ ລາວ, ໃນວັນທີ 04 ກັນຍາ 2026, ທີ່ສະຖານທູດສະຫະລັດອາເມລິກາ ປະຈຳ ສປປ ລາວ.
ພິທີລົງນາມຄັ້ງນີ້ ໄດ້ຮັບກຽດເປັນປະທານໂດຍ ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ນາງ Michelle Y. Outlaw, ອຸປະທູດ ສະຖານທູດສະຫະລັດອາເມລິກາ ປະຈຳ ສປປ ລາວ, ພ້ອມດ້ວຍບັນດາຄະນະກົມຊັບສິນທາງປັນຍາ, ແຂກຮັບເຊີນ ແລະ ພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ໃນໂອກາດນີ້ ທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ, ກະຊວງອຸດສະຫະກໍາ ແລະ ການຄ້າ ກໍ່ໄດ້ກ່າວຄໍາເຫັນວ່າ: ການລົງນາມ SOI ໃນຄັ້ງນີ້ ຖືເປັນບາດກ້າວສຳຄັນໃນການເສີມສ້າງການຮ່ວມມືດ້ານຊັບສິນທາງປັນຍາລະຫວ່າງ ສປປ ລາວ ແລະ ສະຫະລັດອາເມລິກາ ແລະ ເປັນບາດກ້າວສຳຄັນ ໃນການຍົກສູງຄວາມວ່ອງໄວ, ຄວາມແນ່ນອນ ແລະ ປະສິດທິຜົນຂອງລະບົບສິດທິບັດ ຂອງ ສປປ ລາວ. ພາຍໃຕ້ກອບການຮ່ວມມືນີ້ ສອງຝ່າຍຈະມຸ່ງໝັ້ນສ້າງຂະບວນການທີ່ກະທັດຮັດ ແລະ ເລັ່ງລັດຫຼາຍຂຶ້ນ ສຳລັບການກວດສອບ ແລະ ອອກສິດທິບັດທີ່ກ່ຽວຂ້ອງກັບ ສປປ ລາວ ໂດຍອາໄສຄວາມຊ່ຽວຊານ ແລະ ປະສົບການດ້ານການກວດສອບສິດທິບັດ ຂອງ USPTO. ຄາດວ່າການຮ່ວມມືນີ້ ຈະຊ່ວຍຫຼຸດໄລຍະເວລາໃນການດຳເນີນງານ, ເພີ່ມປະສິດທິຜົນດ້ານບໍລິຫານ ແລະ ສ້າງຄວາມແນ່ນອນໃຫ້ແກ່ຜູ້ຍື່ນຄຳຮ້ອງ.
ສຳລັບຜົນປະໂຫຍດຫຼັກຂອງການຮ່ວມມື ແມ່ນຈະຊ່ວຍອຳນວຍຄວາມສະດວກແກ່ນັກປະດິດຄິດຄົ້ນ, ຜູ້ປະກອບການ, ນັກສ້າງສັນ ແລະ ທຸລະກິດຂອງລາວ ໃຫ້ສາມາດເຂົ້າເຖິງຂະບວນການຂໍຮັບຄວາມຄຸ້ມຄອງສິດທິບັດທີ່ມີປະສິດທິຜົນ ແລະ ຄາດຄະເນໄດ້ຫຼາຍຂຶ້ນ, ຊ່ວຍຫຼຸດບັນຫາດ້ານຂັ້ນຕອນ ແລະ ເຮັດໃຫ້ສາມາດໄດ້ຮັບສິດທິບັດຕາມເວລາທີ່ເໝາະສົມ. ພ້ອມກັນນີ້ ການຮ່ວມມືໃນຄັ້ງນີ້ ຍັງເປີດໂອກາດໃຫ້ສອງໜ່ວຍງານໄດ້ແລກປ່ຽນຄວາມຮູ້, ການຮ່ວມມືດ້ານເຕັກນິກ ແລະ ພັດທະນາຂີດຄວາມສາມາດ ເຊິ່ງຈະປະກອບສ່ວນຕໍ່ການຫັນເປັນທັນສະໄໝ ແລະ ການພັດທະນາລະບົບຊັບສິນທາງປັນຍາຂອງ ສປປ ລາວ ອີກດ້ວຍ.
ການຮ່ວມມືໃນຄັ້ງນີ້ ຈະນຳມາເຊິ່ງຜົນປະໂຫຍດຢ່າງເປັນຮູບປະທຳ ໃຫ້ແກ່ນັກປະດິດຄິດຄົ້ນ, ນັກທຸລະກິດ, ນັກລົງທຶນ ແລະ ເສດຖະກິດໂດຍລວມຂອງ ສປປ ລາວ ພ້ອມທັງສືບຕໍ່ເສີມສ້າງມິດຕະພາບ ແລະ ການຮ່ວມມືອັນຍາວນານ ລະຫວ່າງສອງປະເທດອີກດ້ວຍ.

ຂ່າວ ແລະ ຮູບພາບ: ກົມຊັບສິນທາງປັນຍາ

ຄະນະຜູ້ແທນ ສປປ ລາວ ເຂົ້າຮ່ວມງານ ສັບປະດາ ຊັບສີນທາງປັນຍາ ສິງກະໂປ (Singapore IP Week 2026) ແລະ ກອງປະຊຸມ ຊັບສີນທາງປັນຍາ ສາກ...
01/09/2026

ຄະນະຜູ້ແທນ ສປປ ລາວ ເຂົ້າຮ່ວມງານ ສັບປະດາ ຊັບສີນທາງປັນຍາ ສິງກະໂປ (Singapore IP Week 2026) ແລະ ກອງປະຊຸມ ຊັບສີນທາງປັນຍາ ສາກົນ (Global Forum on Intellectual Property) ທີ່ ປະເທດ ສິງກະໂປ
--------------------------------------------
ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມງານ ສັບປະດາ ຊັບສີນທາງປັນຍາ ສິງກະໂປ Singapore IP Week 2026 (IP Week @ SG 2026) ແລະ Global Forum on Intellectual Property (GFIP) ທີ່ ສາທາລະນະລັດ ສິງກະໂປ, ໃນລະຫວ່າງວັນທີ 26–27 ສິງຫາ 2026.
ການເຂົ້າຮ່ວມງານຄັ້ງນີ້ ຖືເປັນໂອກາດສຳຄັນໃຫ້ກັບຄະນະຜູ້ແທນ ໂດຍສະເພາະ ຂະແໜງຊັບສີນທາງປັນຍາຂອງ ສປປ ລາວ ໃນການຮັບຟັງ ການແລກປ່ຽນວິໄສທັດ, ປະສົບການ ແລະ ແນວຄິດດ້ານຊັບສິນທາງປັນຍາ ຮ່ວມກັບບັນດາຜູ້ນຳ, ຜູ້ກຳນົດນະໂຍບາຍ, ຫົວໜ້າອົງການຊັບສີນທາງປັນຍາໂລກ, ແລະ ຜູ້ຊ່ຽວຊານຈາກຫຼາຍປະເທດ ແລະ ອົງການສາກົນ ພາຍໃຕ້ຫົວຂໍ້ “The Rise of AI: Is It IP as Usual?” ຜູ້ເຂົ້າຮ່ວມ ໄດ້ຮັບຟັງການເຕີບ ໂຕຢ່າງໄວວາຂອງປັນຍາ ປະດິດ (AI) ໃນວຽກງານຍຸກ ດີຈິໂຕ ແລະ ເປັນ ຂໍ້ຄິດສຳຄັນວ່າ ລະບົບຊັບສິນທາງປັນຍາຄວນປັບຕົວແນວໃດ ເພື່ອຮອງຮັບ ການເຂົ້າມາຂອງ AI ແລະ ເຕັກໂນໂລຊີໃໝ່.
ເພື່ອເຫັນໄດ້ຄວາມສຳຄັນຂອງວຽກງານ ຊັບສີນທາງປັນຍາໃນລະດັບ ພາກພື້ນ ກໍຄືສາກົນ, ງານດັ່ງກ່າວ ໄດ້ໃຫ້ກຽດເຂົ້າຮ່ວມ ໂດຍຜູ້ນໍາລະດັບສູງເຊື່ງປະກອບມີ ທ່ານ Hem Vandy, ລັດຖະມົນຕີອຸດສາຫະກຳ, ວິທະຍາສາດ, ເຕັກໂນໂລຊີ ແລະ ນະວັດຕະກຳ ແຫ່ງລາຊະອານາຈັກກຳປູເຈຍ, ທ່ານ Supratman Andi Agtas, ລັດຖະມົນຕີກົດໝາຍ ແຫ່ງ ສາທາລະນະລັດອິນໂດເນເຊຍ; ທ່ານ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ທ່ານ Jung Yeonwoo, ຮອງລັດຖະມົນຕີ ກະຊວງຊັບສິນທາງປັນຍາ ແຫ່ງ ສາທາລະນະລັດເກົາຫຼີ. ນອກຈາກນັ້ນ ຍັງມີຫົວໜ້າອົງການຊັບສິນທາງປັນຍາໂລກ ທ່ານ ດາເລນຕັງ ແລະ ບັນດາ ຫົວຫນ້າອົງການ ຊັບສີນທາງປັນຍາ ຈາກປະເທດ ສະມາຊິກອາຊຽນ.
ໃນໂອກາດເຂົ້າຮ່ວມງານດັ່ງກ່າວ, ທ່ານ ປອ ມະໂນທອງ ວົງໄຊ ກໍໄດ້ເຂົ້າຮ່ວມພິທີສະເຫຼີມສະຫຼອງຄົບຮອບ 25 ປີ ຂອງ ການສ້າງຕັ້ງ ຫ້ອງການ ຊັບສີນທາງປັນຍາ ປະເທດສິງກະໂປ Intellectual Property Office of Singapore (IPOS) ແລະ ຮັບຟັງການນຳສະເໜີ ແລະ ການສົນທະນາໃນເວທີ GFIP “Unicorns in Disguise: Banking on Yesterday’s Economy?“, Data as a Commercial IP Asset: Opportunities or Risks, ແລະ ຫົວຂໍ້ສົນທະນາ ການນຳໃຊ້ກົດຫມາຍປົກປ້ອງຜູ້ປະດິດຄິດສ້າງ. ນອກຈາກນີ້ ທ່ານ ປອ ມະໂນທອງ ວົງໄຊ ຍັງໄດ້ນຳພາ ຄະນະຜູ້ແທນ ສປປ ລາວ ພົບປະສອງຝ່າຍກັບ ທ່ານ KASAI Yasuyuki, ຫົວໜ້າສໍານັກງານ ສິດທິບັດ ຍີ່ປຸ່ນ ແລະ ທ່ານ Tan Kong Hwee, ຫົວໜ້າສໍານັກງານຊັບສິນທາງປັນຍາແຫ່ງ ສິງກະໂປ. ຊຶ່ງການພົບປະກັບສອງສໍານັກງານ ໃນຄັ້ງນີ້ ແມ່ນໄດ້ເນັ້ນໃນການທົບທວນ ການເຊັນບົດບັນທຶກການຮ່ວມມືໄລຍະຜ່ານມາ ແລະ ແຜນການຈັດຕັ້ງປະຕິບັດໃນປີ 2026-2027 ຮ່ວມກັນ ເປັນຕົ້ນ ການສືບຕໍ່ສ້າງຄວາມອາດສາມາດໃຫ້ກັບ ນັກກວດສອບ ສປປ ລາວ ໃນວຽກງານ ເຄື່ອງຫມາຍການຄ້າ, ສິດທິບັດ, ແບບອຸດສາຫະກຳ ແລະ ການຮ່ວມກັນຈັດ ງານປະກວດການອອກແບບ ເພື່ອຊີງລາງວັນ ແລະ ເຂົ້າຮ່ວມງານລະດັບສາກົນ. ພິເສດ, ໃນຄັ້ງນີ້ ບໍລິສັດ ໂລກາ ລາວ ກໍໄດ້ຮັບລາງວັນ ຊັບສີນທາງປັນຍາ ຢູ່ທີ່ປະເທດສິງກະໂປ.
ໃນການເຂົ້າຮ່ວມງານ ສັບປະດາ ຊັບສີນທາງປັນຍາ ສິງກະໂປ Singapore IP Week 2026, ຂອງຄະນະຜູ້ແທນ ສປປ ລາວ ເຫັນໄດ້ຄວາມສຳຄັນຂອງວິວັດທະນາການຂອງວຽກງານ ຊັບສີນທາງປັນຍາ ຫັນເປັນທັນສະໄຫມ ແລະ ປະກອບສ່ວນເຂົ້າໃນການພັດທະນາເສດຖະກິດຂອງປະເທດ. ມັນໄດ້ຍັ້ງຢືນໃຫ້ເຫັນວ່າ ວຽກງານ ຊັບສີນທາງປັນຍາແມ່ນມີ ຄວາມສໍາຄັນ ຕໍ່ກັບ ສປປ ລາວ ໂດຍສະເພາະ ແມ່ນການການພັດທະນາລະບົບຊັບສິນທາງປັນຍາ ໃຫ້ທັນສະໄໝ ແລະ ສາມາດຮອງຮັບການປ່ຽນ ແປງ ຈາກ AI ແລະ ເຕັກໂນໂລຊີໃໝ່, ພ້ອມທັງເປັນໂອກາດໃນການຫັດແຫນ້ນສາຍພົວພັນກັບບັນດາປະເທດອາຊຽນ ແລະ ຄູ່ຮ່ວມມືສາກົນ ແລະ ເພື່ອນຳເອົາບົດຮຽນ, ແນວທາງ ແລະ ແນວປະຕິບັດ ຈາກປະເທດສາກົນທີ່ເໝາະສົມມາປະກອບ ແລະ ປັບປຸງໃສ່ການພັດທະນາ ວຽກງານຊັບສິນທາງປັນຍາ ຂອງ ສປປ ລາວ ໃຫ້ສາມາດ ຂັບເຂື່ອເປັນກົນໄກສຳຄັນ ຕໍ່ການສົ່ງເສີມ ເສດຖະກິດການສ້າງສັນ, ນະວັດຕະກຳ, ການສ້າງມູນຄ່າ ແລະ ການເພີ່ມຂີດຄວາມສາມາດແຂ່ງຂັນຂອງປະເທດ ໃຫ້ກ້າວທັນກັບສາກົນ.

ຂ່າວ: ກົມຊັບສິນທາງປັນຍາ

ສປປ ລາວ ໄດ້ຍື່ນສານ ແລະ ຄໍາຖະແຫຼງ ໃນການເຂົ້າຮ່ວມເປັນພາຄີຂອງ ອະນຸສັນຍາ ເຈນິວາ ພາຍໃຕ້ສັນຍາເຮັກ ວ່າດ້ວຍການຈົດທະບຽນສາກົນ ກ່ຽວ...
16/07/2026

ສປປ ລາວ ໄດ້ຍື່ນສານ ແລະ ຄໍາຖະແຫຼງ ໃນການເຂົ້າຮ່ວມເປັນພາຄີຂອງ ອະນຸສັນຍາ ເຈນິວາ ພາຍໃຕ້ສັນຍາເຮັກ ວ່າດ້ວຍການຈົດທະບຽນສາກົນ ກ່ຽວກັບແບບອຸດສະຫະກໍາ
---------------------------------------------------
ໃນຕອນບ່າຍວັນທີ 14 ກໍລະກົດ 2026, ຜ່ານມາ ທີ່ ສໍານັກງານໃຫຍ່ ອົງການຊັບສິນທາງປັນຍາໂລກ, ເຊີແນວ, ປະເທດສະວິດ, ທ່ານ ປອ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ, ຕາງໜ້າ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ໄດ້ສໍາເລັດການຍື່ນສານ ແລະ ຄໍາຖະແຫຼງ ໃນການເຂົ້າຮ່ວມເປັນພາຄີຂອງ ອະນຸສັນຍາ ເຈນິວາ ພາຍໃຕ້ສັນຍາເຮັກ ວ່າດ້ວຍການຈົດທະບຽນສາກົນ ກ່ຽວກັບແບບອຸດສະຫະກໍາ (The Geneva Act 1999 of the Hauge Agreement Concerning the International Registration of Industrial Design) ຢ່າງເປັນທາງການ ແລະ ເປັນປະເທດທີ 102, ໃຫ້ກຽດຮັບການຍື່ນສານ ໂດຍ ທ່ານ ດາ ເລັນຕັງ, ຜູ້ອໍານວຍການໃຫຍ່ ອົງການຊັບສີນທາງປັນຍາໂລກ WIPO.
ໃນພິທີການຍື່ນສານຄັ້ງນີ້ ໄດ້ຮັບກຽດເຂົ້າຮ່ວມ ໂດຍ ທ່ານ ດາວວີ ວົງໄຊ, ເອກອັກຄະລັດຖະທູດຜູ້ມີອໍານາດເຕັມ, ຫົວຫນ້າສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈໍາຫ້ອງການ ສປຊ, ມີທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ຜູ້ຕາງໜ້າຈາກອົງການຈັດຕັ້ງສາກົນອື່ນໆ ທີ່ເຊີແນວ, ບັນດາທ່ານຮອງຫົວໜ້າກົມ ແລະ ບັນດາທ່ານຫົວໜ້າພະແນກ ຈາກກົມຊັບສິນທາງປັນຍາ ທີ່ກ່ຽວຂອງເຂົ້້າຮ່ວມ.
ການຢື່ນສານເຂົ້າຮ່ວມສັນຍາໃນຄັ້ງນີ້ ຖືວ່າເປັນມື້ປະຫວັດສາດອີກມື້ໜຶ່ງ ແລະ ເປັນຄວາມພາກພູມໃຈຂອງ ສປປ ລາວ ໃນການເຂົ້າເປັນພາຄີ ຂອງ ອະນຸສັນຍາ ເຈນິວາ ພາຍໃຕ້ສັນຍາເຮັກ ວ່າດ້ວຍການຈົດທະບຽນສາກົນ ກ່ຽວກັບແບບອຸດສະຫະກໍາ, ການເຂົ້າຮ່ວມຄັ້ງນີ້ ສະແດງໃຫ້ເຫັນເຖິງຄວາມຕັ້ງໃຈຂອງ ລັດຖະບານ ສປປ ລາວ ໃນການເສີມສ້າງລະບົບຊັບສິນທາງປັນຍາ ຂອງປະເທດ ແລະ ການຂະຫຍາຍຄວາມຮ່ວມມື ກັບປະຊາຄົມຊັບສິນທາງປັນຍາສາກົນ, ລະບົບເຮັກ ຈະເປັນກົນໄກທີ່ອຳນວຍຄວາມສະດວກ ແລະ ປະຢັດຄ່າໃຊ້ຈ່າຍ ໃຫ້ແກ່ນັກອອກແບບ, ນັກສ້າງສັນ, ຜູ້ປະກອບການ ແລະ ວິສາຫະກິດຂອງລາວ ໃນການຂໍຮັບການຄຸ້ມຄອງແບບຜະລິດຕະພັນອຸດສາຫະກຳ ໃນຫຼາຍປະເທດ ຜ່ານການຍື່ນຄຳຮ້ອງສາກົນພຽງຄັ້ງດຽວ.
ໃນໂອກາດພິເສດນີ້, ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ສະແດງຄວາມຂອບໃຈຢ່າງຈິງໃຈ ຕໍ່ ທ່ານ ຜູ້ອຳນວຍການໃຫຍ່ (Director General), ທ່ານ ຮອງຜູ້ອຳນວຍການໃຫຍ່ (Deputy Directors General) ຂອງ WIPO, ສຳນັກເລຂານຸການ WIPO ແລະ ບັນດາຄູ່ຮ່ວມມືທຸກຝ່າຍ ທີ່ໄດ້ໃຫ້ການຊ່ວຍ ເຫຼືອອັນລ້ຳຄ່າ ທັງດ້ານວິຊາການ, ການໃຫ້ຄຳແນະນຳ ແລະ ການສ້າງຂີດຄວາມສາມາດ ຕະຫຼອດຂະບວນການເຂົ້າເປັນພາຄີ ຂອງ ສປປ ລາວ, ຊຶ່ງເພີ່ນໄດ້ເນັ້ນຕື່ມອີກວ່າ: ການສືບຕໍ່ການຮ່ວມມືອັນດີຂອງທຸກຝ່າຍ ເປັນປັດໄຈສຳຄັນທີ່ຊ່ວຍໃຫ້ ສປປ ລາວ ບັນລຸເປົ້າຫມາຍສຳຄັນນີ້.
ທ່ານຍັງໄດ້ກ່າວອີກວ່າ ສປປ ລາວ ຮູ້ສຶກເປັນກຽດຢ່າງຍິ່ງ ທີ່ໄດ້ເຂົ້າເປັນສ່ວນໜຶ່ງຂອງ ພາຄີຂອງສັນຍາເຮັກ ທີ່ກຳລັງຂະຫຍາຍຕົວ ແລະ ທ່ານຫວັງຢ່າງຍິ່ງວ່າ ຈະໄດ້ຮ່ວມມືຢ່າງໃກ້ຊິດ ກັບບັນດາສະມາຊິກທຸກປະເທດ ເພື່ອໃຫ້ການນຳໃຊ້ລະບົບເຮັກ ມີປະສິດທິຜົນ ແລະ ເສີມສ້າງການຮ່ວມມືສາກົນ ໃນການຄຸ້ມຄອງແບບຜະລິດຕະພັນອຸດສາຫະກຳ ໃຫ້ເຂັ້ມແຂງຍິ່ງຂຶ້ນ.

ຂ່າວ: ກົມຊັບສິນທາງປັນຍາ
ຮູບພາບ: ອົງການຊັບສິນທາງປັນຍາໂລກ

29/06/2026

ບາດກ້າວສຳຄັນຂອງວົງການນັກປະພັນເພງລາວໃນເວທີສາກົນ
ປັດຈຸບັນ ອົງການລິຂະສິດຂອງນັກປະພັນເພງລາວ (LASCAP) ໄດ້ຮັບການຮັບຮອງການເຂົ້າເປັນສະມາຊິກຂອງ ອົງການລິຂະສິດໂລກ (CISAC) ຢ່າງສົມບູນ, ການເຂົ້າຮ່ວມຄັ້ງນີ້ ເປັນການຍົກລະດັບມາດຕະຖານການຄຸ້ມຄອງ ແລະ ການປົກປ້ອງຊັບສິນທາງປັນຍາດ້ານດົນຕີຂອງລາວ ໃຫ້ທຽບເທົ່າມາດຕະຖານສາກົນ ເພື່ອຮັບປະກັນຜົນປະໂຫຍດສູງສຸດຂອງນັກປະພັນ ແລະ ຜູ້ສ້າງສັນຜົນງານທຸກຄົນ.

☎️ຊ່ອງທາງການຕິດຕໍ່ພົວພັນ:
* ຫາກທ່ານມີຂໍ້ສົງໄສ ຫຼື ຕ້ອງການສອບຖາມຂໍ້ມູນເພີ່ມເຕີມ ສາມາດຕິດຕໍ່ໄດ້ຜ່ານທາງກ່ອງຂໍ້ຄວາມ (Inbox) ຂອງທາງເພຈ.

#ລິຂະສິດເພງລາວ #ດົນຕີລາວ

ກອງປະຊຸມປຶກສາຫາລືຮ່ວມມືສອງຝ່າຍ ລະຫວ່າງ ກົມຊັບສິນທາງປັນຍາ ແລະ ອົງການສິດທິບັດຍີ່ປຸ່ນ--------------------------------------...
19/06/2026

ກອງປະຊຸມປຶກສາຫາລືຮ່ວມມືສອງຝ່າຍ ລະຫວ່າງ ກົມຊັບສິນທາງປັນຍາ ແລະ ອົງການສິດທິບັດຍີ່ປຸ່ນ
-------------------------------------------------------------
ໃນວັນທີ 27 ພຶດສະພາ 2026 ຜ່ານມາ, ທີ່ຫ້ອງປະຊຸມສອງແສງ ຊັ້ນ 3, ກະຊວງອຸດສາຫະກຳ ແລະ ການຄ້າ, ມີກອງປະຊຸມປຶກສາຫາລືຮ່ວມມືສອງຝ່າຍ ລະຫວ່າງ ກົມຊັບສິນທາງປັນຍາ ແລະ ອົງການສິດທິບັດຍີ່ປຸ່ນ (JPO) ຜ່ານອົງການສົ່ງເສີມການຄ້າຕ່າງປະເທດຂອງຍີ່ປຸ່ນ (JETRO) ເພື່ອທົບທວນຜົນການຮ່ວມມືໃນປີ 2025 ແລະ ກຳນົດທິດທາງການຮ່ວມມືໃນປີ 2026.
ກອງປະຊຸມຄັ້ງນີ້ ຝ່າຍ ສປປ ລາວ ນຳໂດຍທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ ພ້ອມດ້ວຍຄະນະ ແລະ ທ່ານ Dr. Yasuaki Naito ຜູ້ອຳນວຍການ JETRO ປະຈຳບາງກອກ ປະເທດໄທ ພ້ອມຄະນະ, ໂດຍມີພະນັກງານທີ່ກ່ຽວຂ້ອງຂອງສອງຝ່າຍ ເຂົ້າຮ່ວມທັງໝົດ 33 ທ່ານ.
ໃນກອງປະຊຸມ ທັງສອງຝ່າຍໄດ້ສະຫຼຸບ ແລະ ຕີລາຄາຜົນການດຳເນີນແຜນກິດຈະກຳ ປະຈຳປີ 2025 ຊຶ່ງໄລຍະຜ່ານມາການຮ່ວມມືໄດ້ຊ່ວຍຍົກລະດັບຄວາມຮູ້ ແລະ ຂີດຄວາມສາມາດຂອງພະນັກງານທາງດ້ານສິດທິບັດ, ເຄື່ອງໝາຍການຄ້າ ແລະ ລິຂະສິດ ແລະ ຫົວຂໍ້ອື່ນໆ ທີ່ຕິດພັນກັບວຽກງານຊັບສິນທາງປັນຍາ ໂດຍຜ່ານການຝຶກອົບຮົມ, ສຳມະນາ ແລະ ການແລກປ່ຽນວິຊາການ. ໃນທີ່ປະຊຸມ ຍັງໄດ້ພິຈາລະນາອະນຸມັດແຜນກິດຈະກຳ ປະຈຳປີ 2026, ໂດຍຈະສືບຕໍ່ເນັ້ນໃສ່ການພັດທະນາບຸກຄະລາກອນ, ການປັບປຸງລະບົບການກວດສອບສິດທິບັດ, ການນຳໃຊ້ເຕັກໂນໂລຊີດິຈີຕອນ ໃນວຽກງານບໍລິຫານ ແລະ ການຂະຫຍາຍການຮ່ວມມືທາງວິຊາການຂອງສອງຝ່າຍ.
ພ້ອມດຽວກັນນັ້ນ, ທັງສອງຝ່າຍໄດ້ປຶກສາຫາລື ກ່ຽວກັບການກະກຽມຈັດຝຶກອົບຮົມການກວດສອບເນື້ອໃນສິດທິບັດຂອງລາວໃນລະດັບສູງ (Advance) ທີ່ຈະຈັດຂຶ້ນໃນເດືອນ ກັນຍາ 2026 ທີ່ແຂວງຫຼວງພະບາງ. ການຝຶກອົບຮົມດັ່ງກ່າວ ຈະສຸມໃສ່ການຄົ້ນຫາຂໍ້ມູນສິດທິບັດ, ການວິເຄາະຄວາມໃໝ່ຂອງການປະດິດສ້າງ ແລະ ການນຳໃຊ້ມາດຕະຖານສາກົນ ໃນການກວດສອບຄຳຂໍສິດທິບັດ.
ຜົນຂອງກອງປະຊຸມ ທັງສອງຝ່າຍໄດ້ຕົກລົງເຫັນດີເປັນເອກະພາບກັນ ໃນການສືບຕໍ່ການແລກປ່ຽນຂໍ້ມູນ ແລະ ປະສົບການ ເພື່ອສະໜັບສະໜູນການພັດທະນາລະບົບຊັບສິນທາງປັນຍາຂອງລາວ ໃຫ້ທັນສະໄໝ ແລະ ສອດຄ່ອງກັບມາດຕະຖານສາກົນ. ພ້ອມນັ້ນ, ກົມຊັບສິນທາງປັນຍາ ໄດ້ສະເໜີໃຫ້ມີການຈັດກອງປະຊຸມປຶກສາຫາລືເປັນປົກກະຕິ ແລະ ຕໍ່ເນື່ອງ, ເພື່ອເພີ່ມຈຳນວນນັກສຳມະນາກອນໃນແຕ່ລະປີ ແລະ ພິຈາລະນາໃນການສະເໜີຢ້ຽມຢາມ ອົງການສິດທິບັດຍີ່ປຸ່ນໃນອະນາຄົດ. ກອງປະຊຸມຄັ້ງນີ້ ເປັນກ້າວສຳຄັນໃນການສືບຕໍ່ພັດທະນາວຽກງານຊັບສິນທາງປັນຍາ ຂອງ ສປປ ລາວ ໃຫ້ມີປະສິດທິພາບສູງຂຶ້ນ ແລະ ຮອງຮັບການພັດທະນານະວັດຕະກຳ ພ້ອມການເຊື່ອມໂຍງທາງເສດຖະກິດໃນລະດັບພາກພື້ນ ແລະ ສາກົນ.

ຂ່າວ ແລະ ຮູບພາບ: ກົມຊັບສິນທາງປັນຍາ

03/06/2026

ກະຊວງ ອຄ ແຈ້ງໃຫ້ບັນດາເຂື່ອນໄຟຟ້າ ໃນຂອບເຂດທົ່ວປະເທດ ເອົາໃຈໃສ່ຢ່າງເຂັ້ມງວດໃນການກຽມຄວາມພ້ອມວຽກງານຄວາມປອດໄພເຂື່ອນ ແລະ ແຜນຮັບມືສຸກເສີນ ສຳລັບລະດູຝົນທີ່ໃກ້ຈະມາເຖິງນີ້.

ເພື່ອຮັບປະກັນຄວາມປອດໄພ, ຊັບສິນຂອງປະຊາຊົນທີ່ອາໃສຢູ່ຕອນລຸ່ມ ແລະ ບໍລິເວນອ້ອມຂ້າງຂອງບັນດາເຂື່ອນ ລວມທັງແຜນຮັບມືຫາກເກີດເຫດການສຸກເສີນໃນຊ່ວງລະດູຝົນໃນປີ 2026 ນີ້, ກະຊວງອຸດສາຫະກຳ ແລະ ການຄ້າ (ອຄ) ໄດ້ອອກແຈ້ງການ ສະບັບເລກທີ 1016/ກພງ, ລົງວັນທີ 15 ພຶດສະພາ 2026 ຊີ້ນຳໃຫ້ບັນດາໂຄງການເຂື່ອນໄຟຟ້າໃນຂອບເຂດທົ່ວປະເທດ ເອົາໃຈໃສ່ຕໍ່ວຽກງານຄວາມປອດໄພຂອງເຂື່ອນ, ການບໍລິຫານຈັດການນໍ້າ ແລະ ການກະກຽມຄວາມພ້ອມໃນການຮັບມືສຸກເສີນຂອງໂຄງການຢ່າງເຂັ້ມງວດ.
ແຈ້ງການດັ່ງກ່າວ ໄດ້ກຳນົດມາດຕະການ ໃຫ້ບັນດາເຂື່ອນໄຟຟ້າ ເອົາໃຈໃສ່ດັ່ງນີ້: ①. ການກວດກາຮອບດ້ານ: ໂຄງສ້າງ, ປະຕູນໍ້າ, ລະບົບໄຟ ໃຫ້ຢູ່ໃນສະພາບພ້ອມໃຊ້ງານໃນທຸກສະພາບການ; ②. ການເຜີຍແຜ່ແຜນຮັບມື ແລະ ຝືກຊ້ອມແຜນຮັບມື ໃນກໍລະນີເກີດເຫດສຸກເສີນ; ③. ການປະສານງານ ແລະ ແຈ້ງເຕືອນ; ④. ການບໍລິຫານຈັດການນໍ້າໃນອ່າງ: ກ່ອນເຂົ້າຝົນນໍ້າໃນອ່າງຂອງເຂື່ອນໄຟຟ້າຕ້ອງຢູ່ໃນລະດັບຕໍ່າ ເພື່ອຮອງຮັບປະລິມານນໍ້າຝົນທີ່ຈະຕົກລົງມາໃນຊ່ວງລະດູຝົນ; ແລະ ⑤.ກໍລະນີເຂື່ອນໄຟຟ້າມີການປ່ອຍນໍ້າຜ່ານປະຕູລະບາຍນໍ້າ: ເຂື່ອນ ຕ້ອງໄດ້ມີແຜນລະອຽດໃນການປ່ອຍນ້ໍາ ແລ້ວແຈ້ງລ່ວງໜ້າຢ່າງນ້ອຍ 07ວັນ ພ້ອມທັງປະສານສົມທົບກັບພາກລັດທີ່ກ່ຽວຂ້ອງ ແລະ ປະຊາຊົນທີ່ຢູ່ໃນເຂດຄວາມສ່ຽງ ຮັບຊາບ ແລະ ເຂົ້າໃຈ.
ກະຊວງ ອຄ ຈະສືບຕໍ່ຕິດຕາມການຈັດຕັ້ງປະຕິບັດແຈ້ງການດັ່ງກ່າວກັບບັນດາເຂື່ອນ ແລະ ຈະແຈ້ງໃຫ້ທຸກພາກສ່ວນ ລວມທັງປະຊາຊົນຢູ່ອາໃສຢູ່ເຂດທີ່ມີຄວາມສ່ຽງ ໃນຕໍ່ໜ້າ.
ທ່ານ ສາມາດາວໂລດ https://ibox.mem.gov.la/s/9jM7OOhG1pX0A8x

Address

Vientiane

Opening Hours

Monday 08:00 - 16:00
Tuesday 08:00 - 16:00
Wednesday 08:00 - 16:00
Thursday 08:00 - 16:00
Friday 08:00 - 16:00

Telephone

+85621253111

Website

Alerts

Be the first to know and let us send you an email when ກົມຊັບສິນທາງປັນຍາ posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to ກົມຊັບສິນທາງປັນຍາ:

Shortcuts

Share

Category