17/01/2024
සඳුදා මව්බිම ......... 💙Her අතිරේකය❤
දියුණු වන මිනිසෙක්ට මී කුණත් නිධානයක් බව පෙන්වා දුන්නේ පන්සිය පනස් ජාතක පොතය. එය එදාට පමණක් නොව අදටද වලංගු කාරණයකි. දියුණුවේ හිණි පෙතේ සිටින ව්යාපාරිකයන්ගේ ජීවිත කතා සොයා බැලුවහොත් ඔවුන් ජීවිතය දිනා ගත්තේ ඉතා කුඩා දෙයකින් නමුත් ඉමහත් වෙහෙසකින්, කැප කිරීමකිනි. සේනානි ප්රඩට්ස් පෞද්ගලික සමාගමේ හිමිකාරිණිය වූ සේනානි වරුසවිතාන මහත්මියත් ජීවිතයේ බොහෝ හැල හැප්පීම් වලට මුහුණ දී ජීවිතය දිනා ගත් තැනැත්තියකි. ඇය ජීවිතය ජය ගත්තේ ගොරකා වලිනි. මේ ගොරකා වලින් ජීවිතය ජය ගත් සේනානිගේ කතාවය.
• ඔබේ ජීවිතය දිනා ගත්තෙ ගොරකා ගෙඩියෙන් කියලා මම කිව්වොත්?
හරියට හරි ආර්ථිකව වගේම මානසිකවත් මම බිංදුවටම වැටිලා හිටපු මොහොතක මම ජීවිතය දිනා ගන්න පාර හොයා ගත්තෙ ගොරකා ගෙඩියකින්.
• ඒ කතාවේ සාරංශයනේ. අපි කතාව මුල ඉදන්ම පටන් ගමු?
මමයි මගේ සැමියයි බොහොම සාර්ථක අතමිට සරු ජීවිතයක් ගෙව්වෙ. අපි රැකියාව කළේ ජපානයේ. ඒත් ලංකාවෙ අංග සම්පූර්ණ ගෙදරක් අරගෙන යාන වාහනත් අරගෙන තිබුණෙ. නොසිතුව මොහොතක මගේ සැමියා අසනීප වුණා. ජපානයේදී ඔහුට ප්රතිකාර කළත් කිසිම සුවයක් ලැබුණේ නැහැ. මුදල් ප්රමාණයත් අඩු වේගෙන එනවා. සැමියාට රැකියාවට යන්න බෑ. ඔහු ව දාලා මට රැකියාවට යන්නත් බෑ. ඒ නිසා අපි ලංකාවට එන්න තීරණය කළා.
• ලංකාවට ආවට පස්සෙ තමන්ගේ මිනිස්සු අතරෙ කරදර බාධක ආවත් සිතට සැනසීමක් දැණෙන්න ඇති?
ඔව්. අපිත් හිතුවෙ එහෙම තමයි. මුලදි අපිට හුඟක් අය උදව් කළා. මොකද ඒ විටත් අපි ආර්ථිකව වැටිලා හිටියෙ නැහැ. නමුත් අතේ තුබුණ සල්ලියි, ඉතුරුම්වල සල්ලියි, ගෙවල් දොරවල් යාන වාහන සියලු දේ ප්රතිකාර සඳහා වියදම් වුණාට පස්සේ හිතවත්, නෑදෑයො කියන අය අපට ඉතුරු වුණේ නැතිම තරම්. අන්තිමට අපි දෙන්නා ජීවත් වුණේ පුංචි ලෑලි මඩුවක. දෙන්නටම රස්සාවක් නෑ. ආදායමක් නෑ. අපි දෙන්නට අපි දෙන්නා විතරයි ඉතුරු වුණේ.
• ශාරීරිකව වැටෙනවාට වඩා අපහසුයි මානසිකව වැටෙන එක?
ඔව්. ඒත් වාසනාවට මම මානසිකව වැටුණෙ නැහැ. මම හිතුවෙම කොහොම හරි නැඟිටින්න. මගේ අත්තම්මා වෙද හාමිනේ කෙනෙක්. එයා ගෙදරට අවශ්ය කුළුබඩු හදන්නෙ ගෙදර මයි. ගොරකා පේස්ට් එක හදන්නෙත් ගලේ අඹරලා. මට හිතුණා අපි ඉන්න කාර්ය බහුල පරිසරයත් එක්ක රස්සාවට යන කාන්තාවන්ට ගොරකා ගලේ අඹරලා මාළු ඇඹුල් තියල්, මස් වර්ග හදන්න අපහසුයිනේ කියලා. ඒ අයට ගොරකා පේස්ට් එකක් තිබුණොත් ලොකු පහසුවක් වෙයි කියලා හිතුණා. යාළුවෙක්ගෙන් ගොරකා කිලෝ එකක් ඉල්ලගෙන අත්තම්මගේ වට්ටෝරුවට මම ගොරකා පේස්ට් හැඳුවා. යෝගට් වගේ පොඩි ප්ලාස්ටික් කප් ටිකක් අරගෙන හදපු පේස්ට් එක ඒවාට දැම්මා. ඊට පස්සෙ තමයි නමක් දාන්න ඕනෙනේ කියලා මතක් වුණේ. මට සුදුසු නමක් ඔළුවට ආවෙම නැහැ. අන්තිමට මගේ නම තමයි හොඳම නම කියලා හිතලා මම මේ නිෂ්පාදනයට සේනානි කියලා නම දැම්මා.
• හිතුවා වගේම නිෂ්පාදනයට හොඳ ප්රතිචාර ලැබෙන්න ඇති?
නැහැ. කවුරුවත් මගේ නිෂ්පාදන මිලදී ගත්තෙ නැහැ. ගොරකා පේස්ට් ටික මල්ලක දාගෙන මම පානදුර ටවුමෙම ඇවිද්දා. විකිණුනේ නැහැ. පළවෙනි දවසේ මම හිස් අතින්ම ගෙදර ආවා. දුක නොහිතුණා නෙමෙයි. ඒත් මම කඩාගෙන වැටුණෙ නැහැ. උත්සාහය අත ඇරියෙත් නැහැ. ඔය අතරෙ තමයි පානදුර සතොස මගේ නිෂ්පාදනය තමන්ගෙ රාක්කෙ තියන්න අවස්ථාව අරන් දුන්නේ. මම ඊට පස්සෙ දවස ගානේ ගිහින් විකිණෙනවද බලනවා. ඒත් නෑ..මම හිතුවා මිනිස්සු මේ ගැන දැණුවත් නෑ කියලා. ඊට පස්සෙ මම ගොරකා වල ආයුර්වේද ගුණයයි, ගොරකා පේස්ට් එකෙන් හදන කෑම වර්ගයි සඳහන් කරලා පොඩි පෝස්ටරයක් හදලා ගොරකා පේස්ට් එක තියන තැනින් තිබුණා. මගේ උත්සාහය දින කීපයකින් සාර්ථක වුණා. මගේ ගොරකා පේස්ට් එකට ඉල්ලුමක් ලැබුණා. ඒ තමයි මගේ ආරම්භය.
• අද වන විට ඔබ ගොරකා පේස්ට් විදෙස් රටවලටත් අපනයනය කරන, ගොරකා ඇතුළු බොහෝ කුළු බඩු නිෂ්පාදනය කරන, ව්යවසායකත්ව සම්මාන දිනා ගත් දක්ෂ ව්යවසායිකාවක්?
2023 ව්යවසායකත්ව සම්මාන උළෙලේ බස්නාහිර පලාතේ හොඳම කාන්තා ව්යවසායිකාව වෙන්න මට පුළුවන් වුණා. ඒ වගේම පහුගිය අවුරුදු වලත් මට සම්මාන පිට සම්මාන ලැබුණා. ඒ ගැන නම් මම ආඩම්බර වෙනවා. මොකද පුංචි කාලයක් ඇතුලත මට නැගිටින්න පුළුවන් වුණා. එහෙම වුණේ මගෙ උත්සාහය නිසා. මගේ සැමියා යෝධ හෙවනැල්ලක් වගේ හැම දේටම උදව් කළා. අපි දෙන්නා මගේ ගොරකා පේස්ට් එකට වෙළඳ පොළ හොයාගෙන ගියා. සමහර තැන් වලින් ප්රතික්ෂේප වුණා. තවත් තැන්වලින් පිළිගත්තා. කොහොම හරි අපි නමක් වගේම වෙළඳ පොලක් හොයා ගත්තා. හිත හොඳ මිනිස්සු වගේම හිත හොඳ මිනිසුන් සිටින රාජ්ය ආයතන මේ තත්ත්වයට එන්න මට උදව් කළා. විදාතා ආයතනයෙන් තමයි මට මුළින්ම පුහුණුව ලැබුණේ. ප්රාදේශීය ලේකම්කාර්යාලයේ සිට සෑම රාජ්ය ආයතනයක්ම මට උදව් කළා.
• රාජ්ය ආයතනවල සහයෙන් ඔබේ ව්යාපාරය දියුණු කර ගත්ත කියලද ඔබ කියන්නේ?
මගේ උත්සාහය තරමට ඒ ආයතන වල සහයත් මගේ දියුණුවට ඉනි මගක් වුණා. විශේෂයෙන් 2017 වසරේදී ප්රාථමික කර්මාන්ත අමාත්යාංශයේ කෘෂිකර්ම අංශය නවීකරණ ව්යාපෘතියෙන් ව්යවසායකයන්ට මූල්ය ගැලපුම් ප්රදාන ලබාදෙන බව ආරංචි වුනා. එතකොට මම කුඩා ව්යාපාරිකයෙක්. නමුත් මම අයදුම් කළා. මාව ඒ ව්යාපෘතිය ලබා දෙන්න තෝරා ගත්තා. දැන් ඒ ව්යාපෘතිය තියෙන්නේ වැවිලි කර්මාන්ත අමාත්යාංශය යටතේ. කොහොම වුණත් රජයේ ආයනයකින් ලැබුණු රු.මි. 24.5ක මුදල නිසා මට නොසිතුව ලෙස මගේ ව්යාපාරය වැඩි දියුණු කර ගෙන ඉදිරියට යන්න පුළුවන් වුණා. නව කර්මාන්ත ශාලාවක් හදලා අපනයනය සඳහා සුදුසු නිශ්පාදන බිහිකරන්න අවශ්ය යන්ත්ර උපකරණ මිලදී ගත්තා. කෙටියෙන්ම කිව්වොත් ගලේ ගොරකා අඹරපු මට නවීන කර්මාන්ත ශාලාවක නවීන යන්ත්රසූත්ර භාවිතා කරන්න ලැබුණේ මේ ව්යාපෘතියෙන් ලැබුණු මුදල නිසා.
• නමුත් නැවත වතාවක් දෛවය ඔබගේ ආත්ම ශක්තිය පරීක්ෂා කරන්න උත්සාහ කළා නේද?
ඔව්. නොසිතුව මොහොතක , සියල්ල හොඳින් සිදුවෙමින් පවතින මොහොතක මට දැන ගන්න ලැබුණා මම පිලිකා රෝගියෙක් කියලා. වෙන කෙනෙක් නම් ගතින් හිතින් කඩා වැටෙයි. ඒත් මම කඩා වැටුණෙ නැහැ. මිනිස්සුන්ටනේ ලෙඩ හැඳෙන්නේ. ලෙඩක් හැඳුන පමණින් මැරෙන්නෙ නැහැනේ. මම හිතුවා ඒ අභියෝගයත් ජය ගන්නවා කියලා. ගතින් වැටුණු මම හිත ශක්තිමත් කරගෙන ප්රතිකාර ආරම්භ කළා. මම රෝගියෙක් කියලා දැනගන්න විට ASMP එකෙන් මූල්යාධාර ලැබිලා කර්මාන්ත ශාලාව හදන්න ආරම්භ කළා විතරයි. මම ව්යාපාරය මගේ කළමනාකරුට බාර දුන්නා. මහත්තයායි මමයි මගේ රෝගය සුවපත් කරන්න වෙහෙසුණා. මට ඕන වුණේ සුවපත් වෙන්න. දැන්ම මැරෙන්න උවමනාවක් මට තිබුණෙ නැහැ. ව්යාපාරය තමයි ලොකුම හීනය. මම ඒ හීනය වෙනුවෙන් ජීවත් වුණා. මම ප්රතිකාර ගන්න කාලේ මගේ කළමනාකාරතුමා මම හිතුවා වගේම මගේ කර්මාන්තශාලාවෙ නවීන යන්ත්ර සූත්ර සමඟ ඉදිකිරීම් කටයුතු කළා. මම සුව වෙලා අංගසම්පූර්ණ කර්මාන්තශාලාවකට තමයි ආවේ. ඒ සම්පූර්ණ ගෞරවය හිමි වෙන්න ඕන මගේ කළමනාකරතුමා ඇතුළු සේවක මණ්ඩලයට.
• මෙච්චර ආත්ම ශක්තියක් ඔබට ලැබුණෙ කොහොමද?
මම කොහොමත් අභියෝග වලට බය කෙනෙක් නෙමෙයි. හිතුවොත් දෙයක් කරන කෙනෙක්. ඒ නිසා මම හරි ශක්තිමත් කාන්තාවක්.ලෙඩකට මාව ගතින් වට්ටන්න පුළුවන් වුණාට හිතින් වට්ටන්න බෑ. හැම කාන්තාවකටම මම කියන්නේ ඔබ ඇතුලේ ඉන්න ශක්තිමත් ගැහැණියට එළියට එන්න ඉඩ දෙන්න. එදාට ඔබේ ධෛර්යයට , සාර්ථකත්වයට අභියෝග කරන්න කාටවත් බෑ.
හිමේෂා රාජපක්ෂ
