Ministry of Ports and Civil Aviation.

07/08/2026

නාවිකයන් වෙනුවෙන් වෙනස් වන වෙළඳ නාවික ලේකම් කාර්යාලය...

නියෝජ්‍ය අමාත්‍ය ජනිත රුවන් කොඩිතුවක්කු මහතා අද (2026.08.07) වෙළඳ නාවික ලේකම් කාර්යාලයේ කාර්ය මණ්ඩලය හමුවී විශේෂ සාකච්ඡාවක් පැවැත්වීය.

හිටපු වෙළඳ නාවිකයෙකු ලෙස නාවික ප්‍රජාවේ ජීවිතය හා ඔවුන් මුහුණදෙන අභියෝග පිළිබඳ මනා අවබෝධයකින් පසුවන නියෝජ්‍ය අමාත්‍යවරයා අවධාරණය කළේ, තම දරු පවුල්වලින් ඈත්ව දුෂ්කර කැපකිරීම් මධ්‍යයේ සේවය කරමින් රටට අත්‍යවශ්‍ය විදේශ විනිමය ගෙනෙන නාවිකයන්ට වෙළඳ නාවික ලේකම් කාර්යාලය තුළින් ගෞරවනීය, කාර්යක්ෂම හා සුහදශීලී සේවාවක් ලබාදීම රාජ්‍යයේ වගකීමක් බවයි.

වෙළඳ නාවික ලේකම් කාර්යාලයේ සේවාව සම්බන්ධයෙන් නාවික ප්‍රජාවගෙන් දිගින් දිගටම ලැබී ඇති පැමිණිලි පිළිබඳව අවධානය යොමු කළ නියෝජ්‍ය අමාත්‍යවරයා, සේවාව ලබාගැනීමට පැමිණෙන සෑම පුද්ගලයෙකුටම සවන් දී, සංවේදීව හා වගකීමෙන් යුතුව කටයුතු කරන කාර්යක්ෂම සුහදශීලී සේවා සංස්කෘතියක් ගොඩනැගීමේ වැදගත්කම කාර්ය මණ්ඩලයට පෙන්වා දුන්නේය.

එහිදී අදහස් දැක්වූ නියෝජ්‍ය අමාත්‍යවරයා සඳහන් කළේ,
"නාවිකයන් තම දරු පවුල්වලින් ඈත්ව විශාල කැපකිරීම් සිදු කරමින් රටේ ආර්ථිකයට සුවිශේෂී දායකත්වයක් ලබාදෙනවා. එවැනි පිරිසක් සේවාවක් ලබාගැනීම සඳහා වෙළඳ නාවික ලේකම් කාර්යාලයට පැමිණෙන විට, ඔවුන් තවත් අපහසුතාවයට පත් නොකර, දිරිගන්වන, විශ්වාසය ගොඩනඟන සහ සුහදශීලී සේවාවක් ලබාදීම අප සැමගේ වගකීමක්."

වැඩිදුරටත් අදහස් දැක්වූ නියෝජ්‍ය අමාත්‍යවරයා, මෙම ආයතනයේ සේවාව පිළිබඳව තමන් පෞද්ගලිකවම අඛණ්ඩව සොයා බලන බවත්, නාවික ප්‍රජාවට වඩාත් කාර්යක්ෂම සුහදශීලී සේවාවක් ලබාදීම සඳහා අවශ්‍ය සියලු ක්‍රියාමාර්ග ගන්නා බවත් සඳහන් කළේය. එමෙන්ම, කාර්ය මණ්ඩලය මුහුණදෙන ප්‍රායෝගික ගැටලු හඳුනාගෙන ඒවාට අවශ්‍ය විසඳුම් ලබාදීම සඳහා අමාත්‍යාංශයේ පූර්ණ සහාය ලබාදෙන බවද අවධාරණය කළේය.
නව අධ්‍යක්ෂ ජනරාල්වරයාගේ නායකත්වය යටතේ මෙම වසර තුළ වෙළඳ නාවික ලේකම් කාර්යාලයේ සැලකිය යුතු ධනාත්මක වෙනසක් ඇති කිරීමට බලාපොරොත්තු වන බවද හෙතෙම ප්‍රකාශ කළේය.

මෙහිදී අදහස් දැක්වූ අධ්‍යක්ෂ ජනරාල්වරයා ද සේවාව සම්බන්ධයෙන් ලැබෙන පැමිණිලි පිළිබඳව අවධානය යොමු කරමින්, කාර්ය මණ්ඩලය මුහුණදෙන ගැටලු හඳුනාගෙන අමාත්‍යාංශය සමඟ එක්ව ඒවාට විසඳුම් ලබාදී, නාවික ප්‍රජාවට වඩාත් කාර්යක්ෂම, ගුණාත්මක හා සුහදශීලී සේවාවක් ලබාදීම සඳහා සියලු දෙනා එක්ව කැපවිය යුතු බව අවධාරණය කළේය.

• වෙළඳ නාවික ලේකම් කාර්යාලයේ සේවාවන් සම්බන්ධයෙන් ඔබට යම් ගැටලුවක් හෝ පැමිණිල්ලක් ඇත්නම්, නියෝජ්‍ය අමාත්‍ය ජනිත රුවන් කොඩිතුවක්කු මහතා වෙත WhatsApp පණිවිඩයක් මඟින් දැනුම් දෙන්න.

 මාලක උදයංග (පෞද්ගලික ලේකම්) – 076 648 8828
 සඳුනි මැදිවත්ත (මහජන සම්බන්ධතා නිලධාරිනී) – 077 598 6104

• කරුණාකර දැනුම්දීම් WhatsApp පණිවිඩ මඟින් පමණක් යොමු කරන්න.

07/08/2026

🛑ගුවන් තොටුපළ අවට ප්‍රදේශවල සරුංගල් යැවීම, ගුවන් යානා මෙහෙයුම්වලට බාධා පමුණුවමින් ගුවන් ආරක්ෂාවට බරපතළ අවදානමක් ඇති කළ හැකිය.

එබැවින්, සරුංගල් යැවීම සඳහා ගුවන් තොටුපළ ප්‍රදේශවලින් දුරස්ථ, ආරක්ෂිත හා විවෘත ස්ථාන පමණක් භාවිත කරන ලෙස සියලුම ජනතාවගෙන් කාරුණිකව ඉල්ලා සිටිමු.

ගුවන් මගීන්ගේ, ගුවන් සේවා කාර්ය මණ්ඩලයේ සහ මහජනතාවගේ ආරක්ෂාව තහවුරු කිරීම සඳහා ඔබගේ වගකීම් සහගත සහයෝගය අගය කරමු.

06/08/2026

බණ්ඩාරනායක ජාත්‍යන්තර ගුවන්තොටුපළේ පළමු මගී පර්යන්තය පුළුල් කිරීමේ ව්‍යාපෘතියේ ප්‍රගතිය නියෝජ්‍ය අමාත්‍ය ජනිත රුවන් කොඩිතුවක්කු මහතාගේ නිරීක්ෂණයට

වරාය හා සිවිල් ගුවන්සේවා නියෝජ්‍ය අමාත්‍ය ජනිත රුවන් කොඩිතුවක්කු මහතා 2026 අගෝස්තු 05 දින බණ්ඩාරනායක ජාත්‍යන්තර ගුවන්තොටුපළේ පළමු මගී පර්යන්තය නවීකරණය හා පුළුල් කිරීමේ ව්‍යාපෘතියේ ප්‍රගතිය සොයා බැලීම සඳහා විශේෂ නිරීක්ෂණ චාරිකාවකට එක්විය.

මෙම අවස්ථාවට වරාය හා සිවිල් ගුවන්සේවා අමාත්‍යාංශයේ ලේකම් ඩබ්. ඩබ්. එස්. මංගල මහතා ඇතුළු අමාත්‍යාංශයේ නිලධාරීන් පිරිසක් සහ ගුවන්තොටුපළ හා ගුවන්සේවා (ශ්‍රී ලංකා) සමාගමේ කළමනාකාරීත්වය ද එක්විය.

නිරීක්ෂණ චාරිකාවේදී පළමු මගී පර්යන්තය පුළුල් කිරීමේ ව්‍යාපෘතියේ ප්‍රගතිය, නව පරීක්ෂා කිරීමේ කවුන්ටර් ස්ථාපනය, ගුවන්තොටුපළ තුළ ව්‍යාපාරික කුටි විධිමත් හා විද්‍යාත්මක පදනමක් මත ප්‍රතිස්ථාපනය කිරීම, ව්‍යාපාරික කුටි බදු දීමේ ක්‍රියාවලිය විද්‍යාත්මක පදනමක් මත විනිවිදභාවයෙන් ක්‍රියාත්මක කිරීම සහ ගුවන්තොටුපළ ආශ්‍රිත සේවාවන් පුළුල් සහ ජනහිතකාමී සේවාවක් බවට පත් කිරීම පිළිබඳව සමාලෝචනය කෙරිණි.

මෙහිදී ව්‍යාපෘතියේ සියලු අදියරයන් ගුණාත්මකභාවය සහ කාර්යක්ෂමතාව ඉහළ මට්ටමකින් පවත්වාගෙන යමින් කඩිනමින් අවසන් කිරීමේ අවශ්‍යතාව නියෝජ්‍ය අමාත්‍යවරයා අවධාරණය කළේය.

ගුවන්තොටුපළ හා ගුවන්සේවා (ශ්‍රී ලංකා) සමාගමේ මූල්‍ය ප්‍රතිපාදන යටතේ සම්පූර්ණයෙන්ම ක්‍රියාත්මක වන මෙම ව්‍යාපෘතිය අවසන් වීමෙන් අනතුරුව බණ්ඩාරනායක ජාත්‍යන්තර ගුවන්තොටුපළේ මගී හැසිරවීමේ ධාරිතාව ඉහළ නංවා, මගී තදබදය අවම කරමින් දේශීය හා විදේශීය ගුවන් මගීන්ට වඩාත් සුවපහසු, නවීන සහ කාර්යක්ෂම සේවාවක් ලබාදීමට හැකි වනු ඇත. එමඟින් ශ්‍රී ලංකාවේ ගුවන් ප්‍රවාහන ක්ෂේත්‍රය සහ සංචාරක කර්මාන්තය තවදුරටත් ශක්තිමත් කිරීම සඳහා ද සැලකිය යුතු දායකත්වයක් හිමිවනු ඇත.

06/08/2026

නාවික පාඨමාලා අවසන් කරන තරුණ තරුණියන්ට නාවික පුහුණු අවස්ථා සහතික කිරීමට රජයේ විශේෂ අවධානය...

නාවික පාඨමාලා අවසන් කර CDC ලබාගත් පසුවද, නාවික පුහුණු (Sea Training) අවස්ථාවක් නොලැබීම හේතුවෙන් බොහෝ නවක නාවිකයන් මුහුණ දෙන ගැටලුවට ප්‍රායෝගික විසඳුම් සෙවීමේ අරමුණින්, වරාය සහ සිවිල් ගුවන්සේවා නියෝජ්‍ය අමාත්‍ය ජනිත රුවන් කොඩිතුවක්කු මහතාගේ ප්‍රධානත්වයෙන් විශේෂ සාකච්ඡාවක් වරාය සහ සිවිල් ගුවන්සේවා අමාත්‍යාංශයේදී පැවැත්විණි.

මෙම අවස්ථාවට වෙළඳ නාවික ලේකම් කාර්යාලයේ අධ්‍යක්ෂ ජනරාල්තුමා ඇතුළු නිලධාරීන්, නාවික අධ්‍යාපන ආයතන නියෝජනය කරමින් ක්ෂේත්‍රයේ ප්‍රවීණයන් පිරිසක් සහභාගී වූ අතර, නවක නාවිකයන් මුහුණ දෙන මෙම අභියෝගයට ක්‍රියාත්මක කළ හැකි විසඳුම් පිළිබඳව පුළුල් ලෙස අදහස් හුවමාරු විය.

සාකච්ඡාවේදී නියෝජ්‍ය අමාත්‍යතුමා අවධාරණය කළේ, CDC ලබාගෙනත් නාවික පුහුණු අවස්ථා නොලැබීම අද වන විට බරපතළ සමාජ ගැටලුවක් බවට පත්ව ඇති බැවින්, එහි මූලික හේතු කඩිනමින් හඳුනාගෙන ප්‍රායෝගික විසඳුම් ක්‍රියාත්මක කිරීම කාලීන අවශ්‍යතාවයක් බවයි.
එමෙන්ම, පවතින සැබෑ නාවික පුහුණු අවස්ථාවල ඉල්ලුමට සරිලන පරිදි නාවික පාඨමාලා සඳහා සිසුන් බඳවාගැනීමේ විධිමත් ක්‍රමවේදයක් හඳුන්වාදීමේ අවශ්‍යතාවය ද නියෝජ්‍ය අමාත්‍යතුමා අවධාරණය කළේය. එමඟින් අනාගතයේදී නාවික පාඨමාලා අවසන් කරන තරුණයන් විශාල පිරිසක් නාවික පුහුණු අවස්ථා නොමැතිව අසීරුතාවයට පත්වීම අවම කරගත හැකි බවද ඔහු පෙන්වා දුන්නේය.

තවද, ශ්‍රී ලාංකීය නාවිකයන් සඳහා නව ජාත්‍යන්තර නාවික පුහුණු සහ රැකියා අවස්ථා හඳුනාගෙන පුළුල් කිරීම වෙනුවෙන් අමාත්‍යාංශය මේ වන විටත් ක්‍රියාමාර්ග ගනිමින් සිටින බවත්, ඉදිරියටත් ඒ සඳහා අවශ්‍ය සහයෝගය නොඅඩුව ලබාදෙන බවත් නියෝජ්‍ය අමාත්‍යතුමා සඳහන් කළේය.

මෙම සාකච්ඡාවට එක්වූ ක්ෂේත්‍රයේ ප්‍රවීණයන් විසින් ඉදිරිපත් කළ අදහස් හා යෝජනා වෙළඳ නාවික ලේකම් කාර්යාලයේ අධ්‍යක්ෂ ජනරාල්තුමා වෙත යොමු කරමින්, අදාළ සියලු පාර්ශ්ව සමඟ තවදුරටත් සාකච්ඡා කර මෙම ගැටලුවට ප්‍රායෝගික විසඳුම් ඇතුළත් වැඩපිළිවෙළක් කඩිනමින් සකස් කරන ලෙස නියෝජ්‍ය අමාත්‍යතුමා උපදෙස් ලබා දුන්නේය.

නාවිකයන්ගේ බලාපොරොත්තු ආරක්ෂා කරමින්, රටට අවශ්‍ය නාවික මානව සම්පත නිසි සැලසුමක් යටතේ ගොඩනැඟීම වෙනුවෙන් අවශ්‍ය ප්‍රතිපත්තිමය හා ප්‍රායෝගික පියවර ගැනීමට රජය අඛණ්ඩව කැපවී සිටී.

05/08/2026

”අත්තම” ජාතික පිරිසිදු කිරීමේ දිනය

05/08/2026

03/08/2026

ඊජිප්තුව සහ ශ්‍රී ලංකාව අතර ගුවන් හා ප්‍රවාහන සහයෝගීතාව ශක්තිමත් කිරීමට සාකච්ඡා

ඊජිප්තු තානාපතිවරයා අමාත්‍යාංශ පරිශ්‍රයේදී වරාය, සිවිල් ගුවන්සේවා හා බලශක්ති අමාත්‍ය අනුර කරුණාතිලක මහතා හමුවී දෙරට අතර ගුවන් සේවා සහ ප්‍රවාහන ක්ෂේත්‍රයේ සහයෝගීතාව තවදුරටත් වර්ධනය කිරීම සම්බන්ධයෙන් සාකච්ඡා කළේය. නියෝජ්‍ය අමාත්‍ය ජනිත රුවන් කොඩිතුවක්කු, අමාත්‍යාංශ ලේකම් W.W.S. මංගල යන මහත්වරුන් සාකච්ඡාවට හවුල් වූහ.
සාකච්ඡාවේදී සූවස් ඇළ හරහා නාවික ගමනාගමනයේ ආරක්ෂාව පිළිබඳව ද අවධානය යොමු වූ අතර, මධ්‍යධරණී මුහුදේ මෑතකදී සිදුවූ සිද්ධියක් හේතුවෙන් සූවස් ඇළේ ආරක්ෂාවට කිසිදු බලපෑමක් නොමැති බවත්, එම මාර්ගය හරහා නාවික ගමනාගමනය සාමාන්‍ය පරිදි සිදුවන බවත් ඊජිප්තු තානාපතිවරයා සඳහන් කළේය.
එමෙන්ම, ඊජිප්තු ජාතික ගුවන් සේවයට අනුබද්ධ Air Cairo ගුවන් සේවාව ශ්‍රී ලංකාවට නිත්‍ය මගී හා භාණ්ඩ ප්‍රවාහන ගුවන් ගමන් ආරම්භ කිරීම සඳහා ඉදිරිපත් කර ඇති ඉල්ලීම සම්බන්ධයෙන් ද සාකච්ඡා කෙරිණි.
ඒ පිළිබඳව අමාත්‍ය අනුර කරුණාතිලක මහතා සඳහන් කළේ, සිවිල් ගුවන්සේවා අධිකාරිය විසින් නියමිත ඇගයීම් කටයුතු කඩිනමින් සම්පූර්ණ කර අවශ්‍ය ප්‍රතිචාර ලබාදීමට පියවර ගන්නා බවයි.
තවද, මාලදිවයින වෙත යැවීමට නියමිත ඊජිප්තු අධ්‍යාපන අමාත්‍යාංශයට අයත් පොත් තොගයක් වැරදීමකින් කටුනායක බණ්ඩාරනායක ජාත්‍යන්තර ගුවන් තොටුපොළ වෙත පැමිණීම හේතුවෙන් ඇතිවී තිබෙන ගබඩා ගාස්තු සම්බන්ධයෙන් ද සාකච්ඡා විය.
ඒ පිළිබඳව අමාත්‍යවරයා සඳහන් කළේ, අදාළ නිල ඉල්ලීම අමාත්‍යාංශය වෙත යොමු කිරීමෙන් අනතුරුව පවතින නීතිමය ප්‍රතිපාදන සහ අදාළ කමිටුවේ නිර්දේශ අනුව ගබඩා ගාස්තු සහන ලබාදීමේ හැකියාව සලකා බලන බවයි.

සාකච්ඡාව අවසානයේ ශ්‍රී ලංකාව හා ඊජිප්තුව අතර වරාය, ගුවන්සේවා සහ වෙළෙඳ සබඳතා තවදුරටත් ශක්තිමත් කිරීම සඳහා සමීප සහයෝගයෙන් කටයුතු කිරීමට දෙපාර්ශ්වය එකඟ වූහ.

03/08/2026

ශ්‍රී ලංකා වරාය අධිකාරියේ 47 වන සංවත්සරය සැමරීමේ වැඩසටහන වරාය පරිශ්‍රයේ දී පැවැත්විණි.