Divisional Secretariat Mahiyangana

03/09/2026

01/09/2026

දඹාන ජනතාවගේ පිරිසිදු පානීය ජල සිහිනය සැබෑ වෙයි.
පවුල් 200කට සහන සැලසීමේ සත්කාරයත් සමඟ RO Plant යන්ත්‍රය ජනතා අයිතියට!
▪️▪️▪️▪️▪️▪️▪️▪️▪️▪️▪️▪️▪️

මහියංගන ප්‍රාදේශීය ලේකම් කොට්ඨාසයේ දඹාන වසමේ ජනතාවගේ පානීය ජල අවශ්‍යතාව වෙනුවෙන් ඉදිකරන ලද ජල පිරිපහදු යන්ත්‍රය (RO Plant) ජනතා අයිතියට පත්කිරීම සහ ප්‍රදේශයේ ආර්ථික දුෂ්කරතා සහිත පවුල් 200ක් සඳහා ප්‍රතිලාභ ලබාදීමේ විශේෂ වැඩසටහන අද දින (01) දඹාන වසමේදී උත්කර්ෂවත් ලෙස පැවැත්විණි.

පූජ්‍ය මහාචාර්ය මැදවච්චියේ ධම්මජෝති නායක හිමිපාණන් වහන්සේගේ අනුශාසනා පරිදි, හොංකොං නියෝජිත කණ්ඩායමේ සහ ජිඑස් ජැරිටි පදනමේ අනුග්‍රහයෙන් ක්‍රියාත්මක වූ මෙම වැඩසටහන සඳහා වැවිලි සහ ප්‍රජා යටිතල පහසුකම් ගරු අමාත්‍ය සමන්ත විද්‍යාරත්න මැතිතුමා, බදුල්ල දිස්ත්‍රික් ගරු පාර්ලිමේන්තු මන්ත්‍රී සුදත් බලගල්ල මැතිතුමා, ඌව පළාත් ප්‍රධාන ලේකම්තුමිය, බදුල්ල දිස්ත්‍රික් ලේකම්තුමා, මහියංගන ප්‍රාදේශීය ලේකම්තුමා, මහියංගන ප්‍රාදේශීය සභා සභාපතිනිය ඇතුළු සම්භාවනීය අමුත්තන් රැසක් සහභාගී වූහ.

ඉන් අනතුරුව පැවැත්වුණු උත්සව සභාවේදී පවුල් 200ක් වෙනුවෙන් මූල්‍ය ප්‍රතිලාභ සහ සහන ලබාදීමට කටයුතු කළ අතර, මෙම සත්කාරය සඳහා දායක වූ විශේෂ නියෝජිතයින් ඇගයීමටද කටයුතු කෙරිණි.

31/08/2026

🇱🇰 ජාතික සුපිළිපන් සම්මාන - 2026 | නිල ලාංඡනය නිර්මාණය කිරීමේ තරගාවලිය

අල්ලසින් හා දූෂණයෙන් තොර සුපිළිපන් රාජ්‍ය සේවයක් උදෙසා ක්‍රියාත්මක වන "ජාතික සුපිළිපන් සම්මාන - 2026" සඳහා නිල ලාංඡනය (Logo) නිර්මාණය කිරීමේ අවස්ථාව ශ්‍රී ලාංකික ඔබට හිමිවේ!

🏆 ජයග්‍රාහී නිර්මාණය සඳහා:
රු. 75,000.00 ක මුදල් ත්‍යාගයක් සහ සහතික පත්‍රයක්!

📲 තරග කොන්දේසි, මාර්ගෝපදේශ සහ අයදුම්පත් සඳහා පෝස්ටරයේ ඇති QR කේතය ස්කෑන් කරන්න.

25/08/2026

2026 යල කන්නයේ වී අස්වනු මිලදී ගැනීමේ කඩිනම් වැඩපිළිවෙළ: සුළු හා මධ්‍ය පරිමාණ වී මෝල් හිමියන්ට සුවිශේෂී අවස්ථාවක්! 🌾
▪️▪️▪️ ▪️ ▪️▪️▪️▪️▪️ ▪️ ▪️ ▪️

2026 යල කන්නයේ වී අස්වනු මිලදී ගැනීමේ කඩිනම් වැඩපිළිවෙළ පිළිබඳව සුළු හා මධ්‍ය පරිමාණ සහල් මෝල් හිමියන් දැනුවත් කිරීමේ විශේෂ සාකච්ඡාවක් 2026 අගෝස්තු 24 වන දින මහියංගන ප්‍රාදේශීය ලේකම් කාර්යාලයේදී සාර්ථකව පැවැත්විණි.

මෙමඟින් ප්‍රදේශයේ වී මෝල් හිමියන්ට සහ ගොවි මහතුන්ට හිමිවන සුවිශේෂී වාසි පහතින්:

✅ සුදුසුකම්: උපරිම වී මෙට්‍රික් ටොන් 25ක ධාරිතාවයක් සහිත සුළු හා මධ්‍ය පරිමාණ සහල් මෝල් හිමියන්ට මේ සඳහා සම්බන්ධ විය හැක.

✅ පහසු ලියාපදිංචිය: දිස්ත්‍රික් ලේකම් කාර්යාලයේ ලියාපදිංචි වීමේ කටයුතු දැන් ප්‍රාදේශීය ලේකම් කාර්යාල හරහාම පහසුවෙන් සිදු කරගැනීමට බලය විමධ්‍යගත කර ඇත.

✅ මූල්‍ය සහන: වී මෝල් හිමියන් සඳහා පොළි රහිත රුපියල් මිලියන 25ක උපරිම ණය මුදලක්! මෙම මුදල දින 60ක් ඇතුළත වාරික 4කින් ලබා දෙනු ඇත.

✅ පහසු ගෙවීමේ කාලය: ලබාදෙන ණය මුදල පියවීම සඳහා මාස 08ක සහන කාලයක් හිමි වේ.

මෙම සුවිශේෂී අවස්ථාව සඳහා බදුල්ල දිස්ත්‍රික් පාර්ලිමේන්තු මන්ත්‍රී ගරු සුදත් බලගල්ල මහතා, ප්‍රාදේශීය සභා සභාපතිනිය, බදුල්ල දිස්ත්‍රික් ලේකම් සුනිල් ගලගම මහතා, අතිරේක දිස්ත්‍රික් ලේකම්තුමිය ඇතුළු මහියංගන, රිදීමාලියද්ද, කන්දකැටිය සහ මීගහකිවුල යන ප්‍රාදේශීය ලේකම්වරුන් සහභාගී වූහ. ඊට අමතරව දිස්ත්‍රික් කෘෂිකර්ම අධ්‍යක්ෂතුමා, නේවාසික ව්‍යාපාර කළමනාකාරතුමා, ගොවිජන සංවර්ධන නිලධාරීන්, ගොවි සංවිධාන නියෝජිතයින් සහ වී මෝල් හිමියන් රැසක්ද මේ සඳහා එක්විය.

ගොවියාත් සුරකිමින්, දේශීය සහල් කර්මාන්තයත් නංවාලන මෙම මහඟු අවස්ථාවෙන් ප්‍රයෝජන ගන්නා ලෙස ප්‍රදේශයේ සියලුම සුළු හා මධ්‍ය පරිමාණ වී මෝල් හිමියන්ට අපි ආරාධනා කරමු! 🤝

#2026යලකන්නය #ශ්‍රීලංකාකෘෂිකර්මය #මහියංගනය #බදුල්ල #වීගොවිතැන

22/08/2026

"දිවියට සුවයක් - දහමට සවියක්"
වෛද්‍ය සායනය බදුල්ල මුතියංගනයේදී.
▪️▪️▪️▪️▪️▪️▪️▪️▪️▪️▪️▪️▪️

දිවියට සුවයක් - දහමට සවියක් වෛද්‍ය සායනය අද (22) මුතියංගන රජමහා විහාරස්ථානයේදී සාර්ථකව පැවැත්විණි.

වැවිලි ප්‍රජා හා වතු යටිතල පහසුකම් අමාත්‍ය සමන්ත විද්‍යාරත්න මහතාගේ සහ තරුණ කටයුතු නියෝජ්‍ය අමාත්‍ය දිනිඳු සමන් හෙන්නායක යන මහත්වරුන්ගේ ඉල්ලීමකට අනුව බුද්ධ ශාසන ආගමික හා සංස්කෘතික කටයුතු අමාත්‍යාංශය සෞඛ්‍ය අමාත්‍යාංශයේ මඟ පෙන්වීමෙන් සිදුකළ මෙම වැඩසටහන මගින් අධ්‍යාත්මික වශයෙන් පොහොසත් සමාජ සංස්ථාවක් ගොඩනැගීම උදෙසා සුවිශේෂී කාර්යභාරයක් සිදු කරන බදුල්ල දිස්ත්‍රික්කයේ මහා සංඝරත්නයේ හා අනෙකුත් ආගමික පූජකතුමන්ලාගේ කායික හා මානසික යහපැවැත්ම අපේක්ෂාවෙන් මෙම වැඩසටහන පැවැත්විණි.

මෙම කාර්යය ඉතාමත් කාලෝචිත සම්භාව්‍ය කටයුත්තක් ලෙස අගය කළ යුතු බව වැඩමවා වදාළ බදුල්ල මුතියංගන රජමහා විහාරාධිකාරී මුරුද්දෙණියේ ධම්මරතන නාහිමියන් වහන්සේ ප්‍රකාශ කළෝය.

වෛද්‍ය පරීක්ෂණ කටයුතු, රුධිර පරීක්ෂණ, ශරීර ස්කන්ධ දර්ශකය මැන බැලීම, අධි රුධිර පීඩනය මැනීම, අක්ෂි පරීක්ෂාව, කන් පරීක්ෂාව, දන්ත ගැටලු පරීක්ෂාව මෙන්ම ආයුර්වේද දෙපාර්තමේන්තුව මගින් විවිධ රෝගාබාධ සඳහා ආයුර්වේද ප්‍රතිකාර ලබා ගැනීමට ද මෙහිදී අවස්ථාව සලසා තිබුණි.

බදුල්ල දිස්ත්‍රික්කයේ වැඩ වාසය කරන මහා සංඝරත්නය, සිල් මෑණිවරුන්, අන්‍ය ආගමික පූජකතුමන්ලා ඇතුළු පූජ්‍ය පක්ෂයේ විශාල පිරිසක් වෛද්‍ය සායනය සඳහා සහභාගී වූ අතර බදුල්ල ප්‍රාදේශීය සෞඛ්‍ය වෛද්‍ය නිලධාරී කාර්යාලයේ අධීක්ෂණය මත සෞඛ්‍ය සායනය සඳහා බදුල්ල ශික්ෂණ රෝහල, ආයුර්වේද දෙපාර්තමේන්තුව, ලංකා රෝහල (පුද්ගලික) විෂන් කෙයාර් ආයතනය යන සෞඛ්‍ය ආයතන විසින් සම්පත් දායකත්වය ලබාදී තිබුණි.

මෙම වැඩසටහන සඳහා ඌව පළාත් ආණ්ඩුකාර නීතිඥ කපිල ජයසේකර, වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න, බුද්ධ ශාසන හා ආගමික කටයුතු නියෝජ්‍ය අමාත්‍යය ගමගෙදර දිසානායක, තරුණ කටයුතු පිළිබඳ නියෝජ්‍ය අමාත්‍ය දිනිඳු සමන් හෙන්නායක, සංචාරක නියෝජ්‍ය අමාත්‍යය රුවන් රණසිංහ, ඇතුළු දේශපාලන අධිකාරිය ඌව පළාත් ප්‍රධාන ලේකම් අනූෂා ගෝකුල ප්‍රනාන්දු, බදුල්ල දිස්ත්‍රික් ලේකම් සුනිල් ගමගේ බදුල්ල අතිරේක දිස්ත්‍රික් ලේකම්වරුන් දෙපළ ඇතුළු රාජ්‍ය නිලධාරීන් රැසක් සහභාගී වූහ.

21/08/2026

මහියංගන ශාසනාරක්ෂක බල මණ්ඩල රැස්වීම
▪️▪️▪️▪️▪️▪️▪️▪️▪️▪️▪️▪️▪️

මහියංගන ප්‍රාදේශීය ලේකම්තුමාගේ මඟපෙන්වීම යටතේ, මහියංගන ශාසනාරක්ෂක බල මණ්ඩලයේ විශේෂ රැස්වීම 2026 අගෝස්තු 20 වන දින මහියංගන ප්‍රාදේශීය ලේකම් කාර්යාල ශ්‍රවණාගාරයේ දී සාර්ථකව පවත්වන ලදී.

රෝහණ ශ්‍රී මහින්දාරාම විහාරස්ථානයේ විහාරාධිපති, පූජ්‍ය පල්ලෙවත්තේ චන්දවිමල ස්වාමීන් වහන්සේගේ මුලසුනෙයන් පැවැත්වුණු මෙම රැස්වීමේ කටයුතු මහියංගන රාජමහා විහාරස්ථානයේ භාරකාර, මහියංගන ශාසනාරක්ෂක බල මණ්ඩලයේ ගරු ලේඛකාධිකාරී, පූජ්‍ය මන්දාරම්නුවර යසස්සී ස්වාමීන් වහන්සේ විසින් මෙහෙයවන ලදී.

මහියංගන ශාසනාරක්ෂක බල මණ්ඩලයට අයත් විහාරස්ථානයන්හි විහාරාධිපති ස්වාමීන් වහන්සේලා, වැඩ සිටින අනෙකුත් පූජනීය සංඝරත්නය, මෙහෙණින් වහන්සේලා මෙන්ම ප්‍රදේශයේ දහම් පාසල් ගුරු භවතුන් රැසක් මේ සඳහා සහභාගී වූහ.

සාකච්ඡා වූ ප්‍රධාන කරුණු:

⭐ ප්‍රාදේශීය සිසු නිපුණතා තරගාවලිය සංවිධානය කිරීම.

🌟 2026 දහම් පාසල් ශ්‍රේණි විභාගයන් පැවැත්වීමට අදාළ කටයුතු.

⭐ ශාසනාරක්ෂක බල මණ්ඩලයේ ඉදිරි ශාසනික හා අධ්‍යාපනික වැඩසටහන්.