CIS Bettembourg - Centre d'Incendie et de Secours Bettembourg

23/06/2026

++ Virowend Nationalfeierdag 🇱🇺 ++

Wéi all Joers war den CIS Bettembourg och dëst Joer nees um Virowend Nationalfeierdag zu Beetebuerg dobäi, dëst esou wuel mat de Jugendpompjeeën ewéi och mat eisen aktive Memberen.

Mir wënschen iech all e schéine Nationalfeierdag.

🇱🇺 Vive de Grand-Duc 🇱🇺 Vive Lëtzebuerg 🇱🇺

23/06/2026

20/06/2026

++ Vigilance rouge ab e Méindeg 12:00 ++

Opgrond vun der unhaalender Hëtzt an am Bléck vun de sëllege Festivitéiten rondrëm Nationalfeierdag, gëlt ab e Méindeg 12:00 Auert’ Alerte rouge.

Et ass dofir de Rappel op sech an op anerer opzepassen:
- drénkt reegelméisseg Waasser (min. 1,5L pro Dag)
- haalt iech net an der Sonn op
- bedeckt äre Kapp an denkt u Sonnecrème
- kuckt no vulnérabelen an eelere Leit, grad ewéi och no Kanner
- loosst keng Kanner oder Déieren am Auto zeréck - och net fir puer Minutten.
- mat der Hëtzt klëmmt och de Risiko vu Vegetatiounsbränn - passt op!

Am Noutfall gëlt den 112 unzeruffen.

18/06/2026

++ Avis de chaleur - vigilance orange ++

Vun e Freideg un an iwwert déi nächst Deeg gëllt eng Alerte Orange wéinst grousser Hëtzt. D'Temperature klammen iwwer 30°C a riskéieren och nuets net ënner 20°C ze falen.

Och wann héich Temperaturen am Summer normal sinn, esou sinn dës awer eng Belaaschtung fir de Kierper. Grad en vue vun de villen Evenementer de Weekend a ronderëm Nationalfeierdag, ass et dofir de Rappel, opzepassen:

- Drénkt genuch Waasser (min. 1,5L)
- Haalt iech net ze vill an der Sonn op an evitéiert kierperlech ustrengend Aktivitéiten.
- Denkt un eng Kapp-Bedeckung, wann dir dobausse sidd.
- Kuckt no eeleren oder vulnerabele Leit. Bleift a Kontakt mat hinnen a suergt dofir, dass si reegelméisseg a genuch drénken.
- Evitéiert all Aktivitéiten, déi zu engem Brand féiere kënnen.

Loosst op kee Fall Kanner oder Déieren am Auto, dëst ka schonn no e puer Minutte liewensgeféierlech ginn. Kuckt, dass dir Waasser am Auto hutt, am Fall vun engem längere Stau.

Am Noutfall gëllt et den 112 unzeruffen.

Den CIS Bettembourg ass am Austausch mat der Gemeng Beetebuerg, fir d'Sécherheet och um Virowend Nationalfeierdag ze garantéieren.

16/06/2026

++ Remise des médailles 🎖️ ++

Gëschter Owend huet de CGDIS zu Käerjeng op d'Remise des médailles invitéiert. Hei kruten eng ganz Rei vun de Membere vum CIS Bettembourg an och vum CIS Dudelange hir Medaill vum Inneminister Léon Gloden fir geleeschten Déngschtjoren iwwerreecht. Och de Beetebuerger Buergermeeschter Jean Marie Jans huet un der Zeremonie deelgeholl.

Vu Beetebuerg si follgend Memberen ausgezeechent ginn (och wa si net all konnten dobäi sinn):

- Colotte Malou
- De Sousa Veloso Barbara
- Ferreira Gaspar Barbara
- Giberius Samuel
- Gomes Rodrigues Luis
- Massard Sam
- Muller Alex
- Putz Carlo
- Schammel Joe
- Steffen Linda
- Weber Dennis

Mir felicitéieren hinnen alle fir hir Medaile a soen MERCI fir dee geleeschten Déngscht.

Bei dëser Geleeënheet krut och de Pascal Thinnes d'Insigne de fonction als Chef CIS iwwerreecht.

11/06/2026

++ Summerfest vun de Beetebuerger Pompjeeën ++

🇱🇺 Dëse Samschdeg 13. Juni fënnt ab 10:00 Auer d'Summerfest vun de Beetebuerger Pompjeeën op der Kiercheplaz zu Beetebuerg statt.

Entdeckt d'Beetebuerger Rettungsdéngschter, d'Aarbecht vun de Jugendpompjeeën (Virféierung um 11:00 Auer) an huelt un der Aweiung vun engem restauréierte Pompjeeswon aus dem Joer 1950 (15:00 Auer) deel.

Fir Iessen a Gedrénks, eng Tombola , grad esou wéi fir Animatioun fir d'Kanner ass gesuergt.

🇫🇷 Ce samedi 13 juin, le "Summerfest" des pompiers de Beetebuerg aura lieu sur la place de l'église à Beetebuerg à partir de 10:00 heures.

Venez découvrir les services de secours de Beetebuerg, le travail des jeunes pompiers (démonstration à 11 h) et participez à l’inauguration d’un camion de pompiers restauré datant de 1950 (15 h).

Buvette, grillades et gaufres ainsi que des animations pour les enfants et une tombola seront proposés.

04/06/2026

The place to be - Samschdes 13. Juni op der Kiercheplaz zu Beetebuerg

++ Aweiung vum restauréierte Pompjeeswon ++

Samschdes den 13. gëtt um 15:00 Auer op eisem Summerfest, a Präsenz vum Buergermeeschter a vum Paschtouer, e restauréierte Beetebuerger Won aus dem Joer 1950 dem Publik virgestallt an offiziell ageweit.

Uschléissend invitéiert d'Gemeng op e Patt.

Mir invitéieren iech all, den 13. Juni bei eisem Summerfest op der Kiercheplaz dobäi ze sinn. Fir Iessen, Gedrénks an Animatioun ass gesuergt.

CIS Bettembourg - Centre d'Incendie et de Secours Bettembourg Bettembourg

03/06/2026

90% vun de Pompjeeën zu Lëtzebuerg si Fräiwëlleg. Merci fir hiren Engagement!

20/05/2026

++ Maintien des Acquis iwwer d'Thema Vegetatiounsbrand ++

Gëschter Owend huet den CIS Bettembourg, zesumme mat de Kolleege vum CIS Centre d’incendie et de secours Dudelange a vum CIS Frisange eng Übung ronderëm d'Thema Vegetatiounsbrand organiséiert. Vegetatiounsbränn erfuerdere vun de Rettungsdéngschter en ugepasste Virgoen. Dofir ass et wichteg, dëst Thema reegelméisseg ze trainéieren an déi neisten Technike virzestellen.

D'Übung huet mat engem kuerze Rappel iwwert d'Virgoe bei Vegetatiounsbränn ugefaangen. Och d'Sécherheetshiweiser bei esou Asätz sinn nach eng Kéier erkläert ginn. Uschléissend ass d'Schaffe mat enger Kaart an d'Orientatioun theoretesch a praktesch thematiséiert ginn, bevir d'Memberen an zwee Ateliere weider Infoe kruten.

An engem Atelier kruten d'Membere d'Funktionalitéit vum ULF (Universallöschfahrzeug) vum CIS Bettembourg a vum TLFW (Tanklöschfahrzeug-Waldbrand) vum CIS Frisange erkläert.

An engem weideren Atelier sinn déi gängeg Utensilie fir d'Bekämpfe vu Vegetatiounsbränn erkläert ginn. D'Participant'en konnten dës uschléissend an engem kontrolléierten a gesécherten Ëmfeld och praktesch trainéieren.

Merci alle Participante fir dësen intressanten Austausch.

An deenen nächsten Deeg wäert et nees e gutt Stéck méi waarm an domat och méi dresche ginn. Et ass de Rappel, vigilent ze sinn, fir eventuell Vegetatiounsbränn ze vermeiden.

Note: och wa bei Vegetatiounsbränn op eng reduzéiert Uniform zeréckgegraff ka ginn, hunn d'Participanten bei der Übung deels awer an der Nomex-Jackett geschafft, dëst opgrond vum Wieder.

12/05/2026

++ Visite vum Parc Merveilleux ++

Gëschter Owend kruten d’Membere vum CIS Bettembourg an och hier Kolleege vun Diddeleng e Bléck hannert d’Kulisse vun der gréisster Fräizäit-Attraktioun zu Lëtzebuerg. Nieft der Virstellung vum Site a vu Beräicher déi soss net fir de Public accessibel sinn, huet och de Veterinaire vum Parc puer Hiweiser am Ëmgang mat den deels exoteschen Déiere ginn.

Esou Visitten si wichteg, fir dass esou wuel d’Rettungsdéngschter ewéi och d’Mataarbechter vum Parc Hand an Hand zesumme schaffe kënnen.

Merci dem Parc Merveilleux fir den intressanten Owend.

Centre d’incendie et de secours Dudelange