21/08/2026
المحطة الطرقية واجهة تادلة
السوق المغطاة (المارشي) وجهة كل عائلة
زوج بريكولات خفاف ظراف لمن أن اراد نصفق له ، أو أن نطبل له كاع ، واحد يعتبر واجهة المدينة ونقطة استقبال البراني ، و الثاني مصدر رزق بعض الأسر ، و مكان يشتري منه التادلوي ما يأكله هو و وليداتو .
بزوجهم في حالة كارثية لا تسر عدوا و لا حبيبا .
و بزوجهم دازو فالدورة و خرجات لهما ميزانية مهورة .
هدا بريكول للمسؤولين على المدينة الى كيهمهم حالنا و باغين رضانا .
و هادي دعوة للصفحات التي تتغنى بأشخاص معينين أو تنساق وراء أحداث ثانوية كالخصومات و النزاعات الخاوية ، هادي فرصة تفاعلو فيها مع هدا الطلب ربما تكسبو شوية المصداقية ، و ترفعو عليكم تهمة التطبيل و التدليس و التظليل و التهليل .
هادي مناسبة باش تبينو لنا حسن النية ، و هادي مناسبة باش تكفروا على ذنوبكم شوية ، و هادي مناسبة باش تبينو حنت يديكم و غيرتكم على المدينة المنسية .
سوق مابحال الأسواق ريحتو تردك اللور ، و حيوطو يفكروك فشي ضريح مهجور ، تندم كي تشوفو و عمرك ترجع ليه او تفكر تمشي فيه دور .
و محطة تحشم تسنى شي واحد فيها ، و إلى شدك الليل تخاف تبقى تما ، حيث كلها ظلمة ، ما ترتاح ، ما تهنى ، ما تلقى فيها حتى بيت الما .
صور مؤلمة وخا ماخديناهاش براحتنا احتراما للناس اللي مازالين تما ، و عندهم أمل شي واحد يتفكرهم قبل مايمشي لتيزي نسلي او بو تفردة يدير الحملة و يبيع الناس العجلة .
✍️ حيلي عبدالرحيم
