25/11/2024
Mofonaina Alatsinainy 25 Novambra 2024
Galatiana 5. 16-18
Toe-panahy araka an'Andriamanitra sy ny fitarihan'ny Fanahy Masina
Fa hoy izaho: Mandehana araka ny Fanahy, dia tsy hahatanteraka ny filan'ny nofo ianareo. 17. Fa ny nofo manohitra ny Fanahy, ary ny Fanahy manohitra ny nofo; ary mifanohitra izy roroa, mba tsy hahazoanareo manao izay zavatra tianareo. 18. Fa raha tarihin'ny Fanahy ianareo, dia tsy mba ambanin'ny lalàna.
---------------
Zava-dehibe eo amin'ny fiainana maha-kristianina ny fitarihan'ny Fanahy Masina. Manampy amin'izay hijoroana ho vavolombelona Izy.
1. Manaiky tarihin'ny Fanahy Masina (and. 16)
"Fa hoy izaho: Mandehana araka ny Fanahy, dia tsy hahatanteraka ny filan'ny nofo ianareo."
Ny filan'ny nofo dia fanoherana ny sitrapon'Andriamanitra, ary mety hitondra amin'ny fahotana. Ny dingana voalohany hananana toe-panahy araka an'Andriamanitra dia ny fanekena ho tarihin'ny Fanahy Masina. Ny Fanahy Masina no manome ny fahazavana sy ny hery hanohitra ny filan'ny nofo, izay mety hanakana antsika tsy hanaraka ny sitrapon'Andriamanitra. Rehefa miaina araka ny Fanahy isika, dia lasa mora ny mamantatra sy manatanteraka ny sitrapon'Andriamanitra amin'ny fiainantsika.
Ny fanekena tarihin'ny Fanahy Masina dia manomboka amin'ny fifandraisana akaiky amin'Andriamanitra. Amin'ny alalan'ny vavaka sy ny fandalinana ny Soratra Masina dia manokatra ny fontsika isika mba ho tarihin'ny Fanahy, izay mitarika antsika hifidy ny tsara sy handà ny ratsy. Raha mahita fahasarotana eo amin'ny fiainana ianao, dia manatona an'Andriamanitra, mangataha ny tari-dalan'ny Fanahy Masina amin'ny fanapahan-kevitra rehetra.
2. Mahazo hery ho enti-manatanteraka ny lalàna (and. 18)
"Fa raha tarihin'ny Fanahy ianareo, dia tsy mba ambanin'ny lalàna."
Ny Fanahy Masina dia manampy antsika handresy ny fahalemena ara-nofo ary manome antsika ny hery hanatanterahana izay takian'ny lalàna amintsika. Raha ny herintsika samirery, dia sarotra na tsy ho tanteraka mihitsy ny hanaraka ny lalàn’Andriamanitra. Fa rehefa tarihin'ny Fanahy Masina, dia mahazo ny fahasoavana sy ny fahalalana hanatanteraka azy araka ny tokony ho izy.
Ny Fanahy Masina dia manampy antsika hanana toe-tsaina madio amin'ny asa atao. Na eo amin'ny fiainam-pianakaviana, ny asa, na ny fiaraha-monina, dia aseho amin'ny fitiavana, ny fahamarinan-toetra, ary ny fanajana ny hafa ny toe-panahy araka an’Andriamanitra. Miaina ny marina eo amin'ny asa sy manampy ny hafa amin'ny fitiavana no ahafantarana fa tarihin'ny Fanahy ianao.
Barinarivo Rajosoa Mpitandrina
