28/07/2026
ДАЛИ ВАКА СЕ ГРИЖИТЕ ЗА ДЕЦАТА?
Повеќе не станува збор само за партиски вработувања и унапредувања, туку за директно загрозување на здравјето и безбедноста на децата!
Фотографиите од поплавената градинка се вознемирувачки. Доколку навистина ја прикажуваат фактичката состојба, тогаш децата престојуваат во установа во која атмосферска и канализациона вода навлегла во просториите, вклучително и во подрумите каде што се чува храна и се наоѓа котларницата.
Според информациите што ги добивме, причината за поплавата е сериозен пропуст при кој не бил затворен главниот вентил. Наместо одговорност, јавноста слуша молк.
Во исто време, се отвораат сериозни сомнежи за незаконски распоредувања на работни места, партиски привилегии и злоупотреби во работењето на установата. Доколку овие наводи се точни, тогаш не станува збор само за лошо менаџирање, туку за целосен распад на системот.
Бараме итна интервенција на Државниот санитарен и здравствен инспекторат, Државниот просветен инспекторат, Трудовиот инспекторат и Јавното обвинителство. Нека излезат на терен, нека ги утврдат фактите и нека кажат дали децата биле изложени на здравствен ризик.
Никој нема право да си игра со здравјето на децата. Ако фотографиите се вистинити, некој мора да понесе одговорност. Молкот не е решение – тој е соучесништво.
