Од десната страна на реката Радика, во срцето на прекрасната планина Дешат, на околу 1100 метри надморска височина е сместено едно од најубавите села во западниот дел од Република Македонија, Требиште. Тоа може да го потврдат сите оние кои имале прилика да го посетат овој крај и ова село. Близината на бујната шумска вегетација и изобилството од чиста планинска вода придонесле ова село да биде едно
од најголемите и едно од најубавите села во Долнореканскиот крај. Требиште има 1.480 жители распоредени во повеќе мали населби кои го сочинуваат селото.
За жал, денес поради проблемот со невработеноста, печалбарството за многу луѓе претставува единствено решение, како за жителите на Требиште, така и за жителите од околните села. Ѕидарите од овој крај по својата умешност се надалеку познати. Денес тие својата егзистенција главно ја обезбедуваат во Холандија, Германија, Швајцарија и Италија. Во минатото, мајсторите оделе на печалба сами, но денес се почесто тие со себе ги земаат и своите семејства. Најголемиот дел од нив своите летни одмори ги поминуваат во родниот крај, и тоа го прави летото занимливо. Во останатиот дел од годината селото е полупразно. Прашање е дали утре следната генерација ќе сака летниот одмор да го мине во родниот крај, или полека ќе почнат да се забораваат своите корени.
