31/07/2026
„Истакнати културни дејци и достигнувања на Русија“ е насловот на поставката со фотографии – сведоштва за богатото руско културно наследство, која што денеска напладне беше отворена во нашата установа, како плод на долгогодишната соработка со амбасадата на Руската федерација во нашата земја и Македонско-руското друштво од Прилеп, во присуство на амбасадорот Н.Е. Дмитриј Зиков. Директорката на библиотеката, Андриана Ристеска во своето обраќање ја истакна важноста од заедничката соработка, која успешно продолжува низ годините. Н.Е, амбасадорот Дмитриј Зиков меѓу другото говореше за значењето на поставката и културата соработка со нашата библиотека. Поставка содржи фотографии од државниот академски „Бољшој театар“ – еден од најмаркантните симболи на руската култура и светски реномиран центар на оперската и балетската уметност, чија историја е нераскинливо поврзана со развојот на националната и интернационалната театарска сцена. Оваа институција годинава чествува 250 години опстој и успешно функционирање. Дел од поставката се и фотографиите со руските научници и просветители Михаил Ломоносов и Владимир Даљ, кои имаат огромен придонес во развојот на рускиот јазик, образованието и науката, надвор од националните рамки. Посетителите, најголем дел членови на Македонско-руското друштво од Прилеп, имаат можност да се запознаат со наследството на Александар Афанасјев, познат собирач на рускиот фолклор, благодарение на кого се зачувани единствени примери на руското народно творештво. Во чест на одбележувањето на значајни датуми во руската култура и соработката со амбасадата, во библиотеката се изложени дел од делата кои припаѓаат на збирката од истакнати руски автори, на руски и преведени на македонски јазик. Амбасадата на Руската федерација минатата година на библиотеката и донираше богата збирка дела од руските автори со светско реноме. Сите граѓани љубители на вонвременската руска култура и книжевност, може да ја погледнат поставката со фотографии и книги во установата, до 10 август.
