30/08/2026
Пожарот кој вчера избувна во близина на атарот на село Подмочани и се прошири кон пониските делови на Националниот парк „Пелистер“, од страната на Преспа, е локализиран.
Од самиот почеток, Општина Ресен, преку своите противпожарни екипи и расположливите ресурси, активно е вклучена во справувањето со пожарот.
Заедно со екипите на НП „Пелистер“, ТППЕ Ресен и Битола,ЈКП - Пролетер,Ренџерската служба на Општина Ресен,ЈП Национални шуми, Дирекцијата за заштита и спасување, доброволните противпожарни друштва, јавните претпријатија и приватните субјекти, се вложуваат максимални напори за целосно ставање на пожарот под контрола.
Во текот на целата ноќ екипи од Ресен и Битола беа на терен, а во текот на денот имаше и дополнителна воздушна интервенција со хеликоптер на МВР и два „Ер трактори“.
Состојбата е стабилна, но поради големината на зафатената површина и временските услови, опасноста од повторно ширење на пожарот сè уште постои.
Изразувам благодарност до сите пожарникари, припадниците на НП „Пелистер“, доброволци, јавните претпријатија, приватни компании и сите граѓани кои со своето ангажирање придонесуваат во справувањето со огнената стихија.
Апелирам до сите граѓани на крајна внимателност и одговорно однесување во шумските предели, особено во овие денови со висока опасност од пожари.
