08/07/2026
Главниот државен ревизор м-р Максим Ацевски денеска оствари работна средба со претставниците на експертската мисија на Европската комисија, која престојува во нашата држава во рамки на TAIEX Peer Review мисијата на тема „Заштита на независноста на централната банка во Република Северна Македонија“.
На средбата присуствуваа Cees Ullersma, раководител на Одделот за меѓународна соработка во De Nederlandsche Bank, Hans Weenink, виш советник за централно банкарство и надворешен консултант, Aaron Zitnic, претставник на Генералниот директорат за проширување и Источно соседство (DG ENEST) при Европската комисија, Luke Klein од TAIEX тимот во Брисел, како и Ruzica Andronikova, претставник на Делегацијата на Европската Унија во Скопје.
Во текот на состанокот, Главниот државен ревизор ги запозна членовите на експертската мисија со надлежностите, организациската поставеност и начинот на работа на Државниот завод за ревизија, со постигнатите резултати во работењето, како и со улогата на институцијата во обезбедувањето независна, професионална и објективна ревизија на јавниот сектор.
Посебен акцент во разговорите беше ставен на ревизијата на Народната банка на РСМ, при што беа разменети мислења и искуства во однос на ревизорскиот пристап, законската рамка и принципите што ја обезбедуваат институционалната, финансиската и функционалната независност на централната банка, како и значењето на транспарентноста и отчетноста во нејзиното работење.
Соговорниците ја истакнаа важноста на независните институции во системот на јавна одговорност и владеење на правото, при што беше нагласено дека ваквите средби претставуваат можност за размена на добри европски практики и унапредување на институционалната соработка во процесот на усогласување со стандардите на Европската Унија.
