19/11/2025
Среќен Роденден, чичко Дончо.
Денес 90 години наполни Андон Дончевски или за сите нас познат како чичко Дончо. Човекот кој со својата играчка и тренерска кариера остави неизбришлива трага во фудбалскиот живот во Република Македонија, Кипар, Тунис, Канада и Австралија. Човек, кој со право можеме да го наречеме "Татко на модерниот македонски фудбал". Со своите 335 настапи за ФК Вардар остави сите ние да се сеќаваме на неговите 217 официјални постигнати голови во YU првенствата и на неговиот лукав, упорен и итар карактер на играч за кој голманите и противничките тимови стравуваа.
Тој ист свој карактер го пренесе на зеленото поле кога после извесен временски период влезе во тренерскиот живот. Успесите не изостанаа, а вреди да се потсетиме на шампионската титула на ФК Вардар од 1987 г. и нашите први репрезентативни натпревари од осамостувањето против Словенија, Белгија, Данска и Шпанија. Голема плејада на познати фудбалски мајстори и виртуозни играчи беа изградени под негово влијание и тренерско едуцирање како во Македонија така и надвор од неа.
Чичко Дончо е многу комуникативен човек, а за тоа многу му помага неговото познавање на Англискиот, Францускиот, Рускиот, Грчкиот и до некаде Арапскиот јазик. Неговите познанства се многубројни, а во широкиот дијапазон пријателства се многубројни доктори, академци, спортисти, научни работници и многу други интелектуалци ширум светот. Еден од среќниците да биде негов долгогодишен пријател сум и јас. Иако генерациски сме различни, сепак фудбалот и спортот не знае за граници.
Голема беше честа за него кога во 2015 година со Одлука на Владата беше прогласен за Амбасадор на спортот, а уште поголема чест и привилегија за мене претставуваше можноста да му ја доделам наградата за животно дело во областа на спортот во 2016 година. Иако долги години живее во Австралија, неговото срце чука само за Македонија! Не познавам поголем патриот и родољуб од чичко Дончо!
ФК Вардар и Македонската фудбалска федерација треба да ја запазат ова наша фудбалска икона бидејќи чичко Дончо е нашиот последен мохиканец. Од се' срце му изразувам срдечни честитки по повод неговиот роденден и Господ да го поживее и да му даде здравје.
Среќен 90-ти роденден, чичко Дончо.
🔴⚫🔴⚫🔴⚫🇲🇰🇲🇰🇲🇰
