02/09/2026
ДЗС: Национална работилница посветена на профилот на ризици во рамки на ИПА проект
Оваа недела, во просториите на Воената академија „Генерал Михаило Апостолски“, се одржува национална работилница посветена на профилот на ризици, изготвен во рамките на проектот „ИПА студија за повеќе земји - Сеопфатна анализа на пределот на ризик од катастрофи и капацитетот за реагирање („IPA Multi-country Study – Comprehensive Analysis of Disaster Risk Landscape and Capacity to Respond“ ). Национален координатор на проектот е Дирекцијата за заштита и спасување (ДЗС).
Целта на работилницата беше презентација, разгледување и валидација на наодите, препораките и предложените приоритетни активности содржани во нацрт-профилот на ризици на државата. Токму во тој контекст, заменик директор на ДЗС, Кашмир Салиу, имаше негово воведно обраќање, при што ја истакна важноста на проектот за државата и за регионот.
Профилот на ризиците ги обединува наодите за целокупниот циклус на управување со ризици од катастрофи – од процена и превенција, преку подготвеност и одговор, до опоравување. Притоа, идентификувани се клучните предизвици и недостатоци, постојните капацитети и предности, како и препораки за нивно натамошно унапредување и усогласување со европските и меѓународните рамки и стандарди.
Работните сесии беа организирани тематски, по одделни ризици, со фокус на поплави, шумски пожари, епидемии, земјотреси и големи кризи. Во рамките на сесиите, учесниците имаа можност да ги разгледаат наодите и препораките, да дадат стручни мислења и предлози и да придонесат кон нивно подобрување и финализирање.
Преку ваквиот инклузивен процес се настојува да се зајакне сопственоста и ангажманот на националните институции во однос на резултатите од проектот и да се обезбеди финализирање на квалитетен, применлив и одржлив профил на ризици на Македонија.
Националниот профил на ризици претставува значајна основа за понатамошно унапредување на националните капацитети за намалување на ризикот од катастрофи, зајакнување на подготвеноста и координацијата меѓу институциите, како и за поефикасно управување со ризиците во сите фази на циклусот на управување со катастрофи.
Инаку, на оваа Работилница учествуваа претставници на повеќе национални институции и организации, како на пример, Министерството за животна средина и просторно планирање, Министерството за внатрешни работи, Министерството за одбрана, Армијата на Република Северна Македонија, Министерството за здравство, Агенцијата за катастар на недвижности, Воената академија, Институтот за земјотресно инженерство и инженерска сеизмологија (ИЗИИС), Институтот за јавно здравје, ЈП „Национални шуми“, АД „Водостопанство“, а и Факултетот за безбедност при УКЛО.
