ЛК СДММ-Свети Николе

13/08/2026

💧 ШТО ТОЧНО ИМА ВО ВОДАТА ШТО ЈА ПИЕМЕ?

Во нашата претходна објава поставивме конкретни прашања за микробиолошката неисправност на водата за пиење во Свети Николе.

Но, наместо јасни одговори, граѓаните добија уште повеќе дилеми.

❓ Која бактерија е утврдена во водата?

Граѓаните имаат право да знаат што точно покажала лабораториската анализа. Не е доволно да се каже дека постојат „микробиолошки отстапувања“. Потребно е јавно да се објави добиениот наод кој укажува на тоа која бактерија е утврдена, во која концентрација, од кој примерок и кога е земен примерокот.

❓ Како е можно проблемот да биде решен без прекин на водоснабдувањето?

Ако за отстранување на неисправноста било доволно да се извршат одредени интервенции во системот, граѓаните заслужуваат да знаат кои точно мерки биле преземени.

❓Дали е извршено дополнително хлорирање или таканаречено хиперхлорирање?

❓Дали цистерните со вода низ населбите се пуштени самоиницијативно или по наредба или препорака на надлежна институција?

❓ Дали е точно дека во мрежата бил измерен резидуален хлор од околу 0,8 mg/l и што значи тоа во однос на редовниот режим на хлорирање?

❓ Од која вода добиваат компаниите од прехранбената индустрија за производствените процеси?

Ако водата од градскиот водовод не била препорачана за пиење, какви инструкции добиле компаниите кои ја користат истата вода во производни процеси.

❓ Зошто за ваквата состојба не беше обезбедено навремено и целосно информирање на граѓаните?

Кога станува збор за водата што ја пијат граѓаните, информацијата мора да стигне до секое семејство, а не само до оние што ќе ја видат објавата на социјалните мрежи.

❓Во соопштението од ЈКП Комуналец, се наведува дека причината за загадувањето е дефект на мрежата. Дали тоа намерно се прави дефокус за да се отстрани сомнежот дека загадувањето доаѓа заради хигиената на таложниците и целата водоводна мрежа?

🔴 Затоа го повикуваме Основното јавно обвинителство да постапи по допрен глас и да ги провери сите околности поврзани со бактериолошката неисправност на водата во Свети Николе.

❗️Здравјето на луѓето нема цена. Неколку граѓани реагираат на појава на кожни реакции.
Не обвинуваме никого однапред, но бараме институциите да ги утврдат фактите. Доколку има пропусти – мора да има и одговорност!

11/08/2026

💧 КАКВА ВОДА ПИЈАТ ЖИТЕЛИТЕ НА СВЕТИ НИКОЛЕ❓

Во услови кога во повеќе градови низ Македонија надлежните институции утврдија неисправност на водата за пиење, сметавме дека граѓаните на Свети Николе имаат право да знаат каков е квалитетот на водата што секојдневно ја користат.

Затоа, на 27 јули, советничката група на СДСМ во Советот на Општина Свети Николе официјално поднесе Барање за дополнување на дневниот ред на наредната седница со точката:

„Информација за квалитетот на водата за пиење на територијата на Општина Свети Николе.“

На нашето барање, добивме експресен одговор од градоначалникот на 28 јули:

„Водата во Свети Николе е безбедна за пиење.“

Беше најавено и дека, по барање на советничката група на СДСМ, на наредната седница на Советот ќе бидат презентирани сите релевантни документи и добиените резултати од лабораториските анализи кои укажуваат на квалитетот на водата што секојдневно ја користат граѓаните и во градот и во околните села.

❗️ Но, само 13 дена по уверувањето дека водата е безбедна, јавноста доби сосема поинакво официјално соопштение од ЈКП „Комуналец“.

На 10 август, граѓаните беа официјално известени за микробиолошки отстапувања, со препорака водата да не се користи за пиење. За таа цел, обезбедена е вода за пиење од цистерна, која ќе биде дистрибуирана на локациите наведени во соопштението за 10 и 11 август.

И токму затоа, бараме јасни одговори:

❓ Дали дефектот на главната цевководна мрежа е причината за појавата на неисправноста на водата и, доколку е така, како е можно дефект на водоводната мрежа да доведе до состојба во која водата не е безбедна за пиење? Имајќи предвид дека дефекти на водоводната мрежа се случувале и порано, а никогаш не се случило бактериолошко заболување.

❓ За која бактерија станува збор?

❓ Зошто во процесот на обезбедување безбедна вода за пиење не е активиран озонаторот на филтерната станица, за кој во официјалните документи на ЈКП „Комуналец“ е наведено дека служи за озонирање и подобрување на квалитетот на водата?

❓ Кога последен пат е извршено темелно чистење и дезинфекција на водоводната мрежа и на базените за водоснабдување? Најверојатно во овој одговор лежи и одговорот за бактериолошкото загадување, а не дефектот на цевката.

Поточно, загадувањето не е од дефектот, туку од нередовно чистење на таложниците и на самата мрежа.

❓ Со оглед дека е најавено обезбедување вода за пиење од цистерна за потребите на граѓаните на 10 и 11 август, како може за два дена да се тврди дека ќе има пивка вода во мрежата, кога е задолжително да има три последователни негативни мостри кои се во ред?

Не шириме паника. Не тврдиме нешто што треба да го утврдат надлежните институции, но не прифаќаме ниту граѓаните да бидат оставени без јасни одговори.

Дополнително, во момент кога граѓаните имаат оправдан интерес да поставуваат прашања и да добијат појаснувања, на објавата од градоначалникот со која се информира јавноста за состојбата со водата е оневозможено коментирањето. Во време кога се потребни повеќе информации и отворена комуникација со граѓаните, ваквиот потег остава впечаток на ограничување на јавната дискусија токму во момент кога граѓаните имаат најмногу прашања.

Бидејќи сите жители на Општина Свети Николе, без разлика дали живеат во градот или во селата, имаат право да знаат каква вода пијат, нашата цел беше и останува јасна – преку навремено, транспарентно и одговорно информирање да нема дилеми, туку да има поголема сигурност, доверба и спокој кај граѓаните.

07/08/2026

21/07/2026

😊 Градоначалникот на Скопје порача: „Кој работи и греши...“

Доколку таа изјава ја преведеме на светиниколски, би звучела вака:

❤️ „Кој работи и греши, а кој ништо не работи нема како да згреши.“

Откако видовме дека со еден билборд може да се претстави ликот на еден град, решивме и ние, низ малку сатира, да го претставиме Свети Николе.

Затоа го подготвивме нашиот „туристички водич“:

🗼 Кривата чешма – нашата верзија на Кривата кула во Пиза. За среќа, оваа атракција веќе не постои, бидејќи беше исправена по нашата реакција. Воедно, тоа е и една од ретките активности со кои локалната власт може да се пофали во изминатите пет години.

🦁 Сафари парк „Горобински пат“ – единственото сафари каде тревата е повисока од посетителите.

🦟 Национален резерват за комарци – едни од ретките што немаат никакви забелешки од работата на општината.

🐕 Алеја на бездомните кучиња – атракција што, за жал, секојдневно ја среќаваат граѓаните.

🏖️ Градска плажа „Филип Втори“ – активна веднаш по првиот посилен дожд.

Секако, ова е сатиричен приказ на дел од „атракциите“ по кои денес е препознатливо Свети Николе.

Но, за разлика од сликата, проблемите не се измислени. Тие се реалност со која граѓаните секојдневно се соочуваат.

03/07/2026

🦁 Сафари парк „Горобински пат“ во Свети Николе е подготвен за своите посетители!

Влезот е бесплатен, а движењето е на сопствена одговорност, бидејќи во џунгла никогаш не знаеш што те чека.

Со месеци јавните површини на територија на Општина Свети Николе се оставени сами на себе и обраснати со висока трева. Наместо уредени населби, граѓаните добиваат „сафари паркови“ - токму во периодот на летните горештини, кога ваквата запуштеност претставува и сериозна опасност од пожари.

⚠️ Уредувањето и редовното одржување на јавните површини не е прашање на естетика, туку обврска кон граѓаните.

Граѓаните не бараат сафари паркови и непристапен јавен простор. Бараат уредени населби во кои ќе можат безбедно да живеат, а не секојдневно да стравуваат од несакани ситуации.

26/06/2026

🏖️ Свечено отворена Градската плажа „Филип Втори“ во Свети Николе!

После само 6 месеци работа, резултатот навистина е видлив. 👏

Баш во пресрет на летните горештини, Свети Николе доби нова атракција. А бидејќи викендов се одржува 11-тиот МОТО ФЕСТ, ги покануваме сите посетители да понесат костими за капење, гуми за пливање и добро расположение. 🏊

Жал ни е само што плажата сè уште нема спасителска служба.

Доколку некој се прашува зошто новореконструираната улица „Филип Втори“ (поранешна „Вељко Влаховиќ“) по првиот дожд се претвора во базен, да потсетиме:

⚠️ Навремено укажувавме дека реконструкцијата на улицата без замена на подземната инфраструктура ќе биде само козметичка.

⚠️ Денес подземната инфраструктура сè уште не е заменета, а тротоарите сè уште не се завршени.

Но важно е што асфалтот е нов.
А резултатот... резултатот е навистина видлив.

24/06/2026

Институциите воглавно треба да се темелат на стручност, искуство и професионалност.
Така би требало да биде, особено кај најсензитивните јавни установи од кои зависат граѓаните како што е здравството воопшто.
Загрижувачки е кога особено во тие такви здравствените установи се врши преместување, деградирање или малтретирање на вработени само затоа што не се политички истомисленици на дпмне.
Ваквите постапки се удар врз квалитетот на здравствените услуги што ги добиваат граѓаните.
Кога искусни и стручни кадри се тргаат од своите работни места поради партиски причини, губат пациентите, губи установата и губи целото општество.
Во овој контекст, со еден збор може да се каже дека распашана банда владее во Здравствениот дом во Свети Николе.
Директорот не смее да противречи на ниските одмазнички страсти на партиските инсталации во домот бидејќи си има вработено цела фамилија преку дпмне во државни и јавни установи.
Остана уште скутерот невработен.

Искусните сестри се деградираат и се испраќаат на места со помали коефициенти за сметка на кадри на дпмне.
Кога раководеше СДСМ, кадрите ротираа без разлика од која партија се. За сите подеднакви обврски и привилегии.
Сега кога се деградирани здравствените работнички кои се неистомисленици со дпмне, нивните колешки наместо да застанат во одбрана тие си ги зафаќаат местата и молчат иако во времето на СДСМ ротираа и имаа привилегии и обврски исто како и сите други.
Сега, за нив привилегиите за останатите обврските.
Типично вмровско однесување.
Едноставно глупаво е здравствени работници да бидат изложени на притисоци, закани и преместувања поради нивните лични убедувања, а сите бараме помош од нив без разлика на партија и етникум.
Здравството не смее да биде партиски плен. На пациентите им требаат стручни и мотивирани здравствени работници, а не партиски пресметки.

19/06/2026

Градоначалникот денес, брзајќи навреме да стаса на журката во Струмица, изгледа си го заборавил паркираниот виљушкар на сред тротоар во центарот на градот. Неозначен, необезбеден – таман како симбол за неговото „одговорно“ управување.

За жал, ова не е само повод за потсмев. Поради ваквата негрижа, наш сограѓанин вечерва се здоби со повреда на главата.

Очигледно, кога е во прашање забава, се брза. Кога е во прашање безбедноста на граѓаните – може и да почека.