05/10/2023
Bozovcasit, pritje madhështore për Lazim Destanin
I ftuar në ngjarjen me karakter hulumtues studimor, Java e Veçantë Studimore (JVS), Lazim Destani dje ishte prezent në aktivitetin që studentët e Fakultetit Pedagogjik të Universitetit të Tetovës e zhvilluan në fshatin Bozovcë.
Java e parë e këtij viti akademik, studentët e këtij fakulteti së bashku me profesorët e tyre, i ka gjetur në një varg katundesh të malësisë së Tetovës ku këta po realizojnë projektin e tyre JVS. Në këto katunde studentët e kanë gjetur atë pritjen e ngrohtë të malësorëve ku ekipet prezantuese të çdo fshati veçmas kanë shpalosur karakteristikat socio-kulturore të fshatrave të tyre në Malësinë e Sharrit.
Në mesin e katundeve të vizituara ishte dhe Bozovca ku Lazim Destani ishte i ftuar si një personalitet i njohur e i nderuar që lindi në këtë katund. Krahas studentëve dhe profesorëve të Pedagogjikut në këtë aktivitet ishin të pranishëm edhe ekipet prezantuese nga të gjitha fshatrat e kësaj ane që dhanë kontributin e tyre për realizimin e këtij aktiviteti studimor.
Prania e Lazim Destanit në këtë aktivitet në Bozovcë, Javën e Veçantë Studimore e bëri akoma më të veçantë. Si gjithmonë kur e viziton katundin e tij, ai u prit në mënyrë mjaft madhështore. Shumë bashkëfshatarë të tij kishin dalë për ta pritur që në hyrje të fshatit, duke e shoqëruar pastaj deri te oborri i shkollës ku e prisnin grupi i studentëve, profesorëve dhe ekipeve të punës nga fshatrat e përfshira në këtë studim.
Para se të shtrohej këtu dreka me ushqimet tradicionale të gatuara nga vetë bozovcasit, fjalë rasti mbajti dekani i Fakultetit Pedagogjik, Prof. Dr. Lulzim Memeti si dhe koordinatori i JVS, përfaqësuesi i Shoqatës “Arsimi” nga Zvicra Doc. Dr. Mahir Mustafa. Pas këtyre, fjala i kaloi ekipit prezantues të karakteristikave socio-kulturore të Bozovcës, të cilët shpalosën aspekte të ndryshme nga jeta shoqërore në fshat, diversiteti i bimësisë, si dhe nga llojshmëria e kulturave bujqësore që kultivohen këtu.
Fjala përshëndetëse e Lazim Destanit ishte ajo që me kureshtje e kënaqësi e ndoqën gjithë të pranishmit dhe sidomos studentët. Lazim Destani me këtë rast me fjalë motivuese në mënyrë të veçantë i inkurajoi studentët që ata të kenë vetëbesim, të kenë guxim e të jenë të përkushtuar në punën e detyrat e tyre.
Në kuadër të këtij aktiviteti në Bozovcë, gjithë pjesëmarrësit realizuan një shëtitje nëpër katund me ç’rast ata bënë dy ndalesa, e para - te shtëpia ku lindi e u rrit njeriu më meritor për themelimin e Universitetit të Tetovës, Fadil Sulejmani, dhe ndalesa e dytë - te shtëpia ku lindi e u rrit Lazim Destani, pra te shtëpitë e dy figurave madhore që nxori ky fshat, në këtë zonë të thellë të malësisë së Sharrit.
