Asambleja e Femrës- Aleanca për Shqiptarët

21/08/2026

Derisa vendet e rajonit po afrohen me sistemin evropian të roamingut, qytetarët e Maqedonisë së Veriut vazhdojnë të paguajnë një faturë që mund dhe duhet të ishte shmangur.

Këtë faturë nuk e paguajnë vetëm qytetarët që udhëtojnë drejt vendeve të BE-së. E paguan edhe diaspora jonë sa herë vjen në vendlindje, komunikon me familjen, punën dhe institucionet, dhe përballet me shpenzime shtesë vetëm sepse shteti ynë po ecën më ngadalë se të tjerët.

Në kohën kur Shqipëria dhe Mali i Zi po avancojnë drejt përfitimeve konkrete për qytetarët e tyre, Maqedonia e Veriut vazhdon të prodhojë arsyetime.

Roamingu nuk është luks. Është shpenzim i përditshëm për studentët, familjet, bizneset, mërgimtarët dhe secilin qytetar që lëviz mes Maqedonisë së Veriut dhe Bashkimit Evropian.

Çdo euro e paguar pa nevojë për roaming është çmimi i vonesës së kësaj Qeverie.

VLEN-i mund të vazhdojë të flasë për “suksese”, por qytetarët e matin suksesin në xhepin e tyre. Dhe kur fqinjët ecin përpara, ndërsa ne mbetemi pas, propaganda nuk e ul faturën.

Aleanca për Shqiptarët kërkon që Qeveria të tregojë qartë pse Maqedonia e Veriut nuk po avancon me të njëjtin ritëm dhe çfarë po bën konkretisht që qytetarët tanë dhe diaspora të mos vazhdojnë të paguajnë për paaftësinë institucionale.

Evropa duhet të ndihet në jetën e qytetarëve, jo vetëm të përmendet në konferenca për shtyp.

20/08/2026

E vetmja zgjidhje janë zgjedhjet!

20/08/2026

Gratë e bëjnë ndryshimin!
Gati për zgjedhje!...

ASH: TË GATSHËM PËR ZGJEDHJE – DATËN MUND TA CAKTOJMË QË SOT

Aleanca për Shqiptarët është e gatshme për zgjedhje të parakohshme parlamentare.

Pas deklaratës së Kryeministrit se është i gatshëm të shkojë në zgjedhje nëse këtë e kërkon opozita, përgjigjja jonë është e qartë: po, jemi gati!

Jemi të gatshëm që që sot të ulemi dhe ta caktojmë datën e zgjedhjeve. Nuk ka nevojë për taktizime, prolongime apo kalkulime politike.

Qytetarët duhet të kenë mundësinë të japin vlerësimin e tyre për drejtimin në të cilin po ecën vendi dhe për mënyrën se si po qeveriset.

Sa më shpejt të mbahen zgjedhjet, aq më mirë për vendin, për qytetarët dhe për të ardhmen tonë.

Aleanca për Shqiptarët është gati. Le të vendosin qytetarët!

18/08/2026

QEVERIA I KA LËNË GRATË PA SKRINING FUNKSIONAL PËR KANCERIN E GJIRIT

Derisa në vendet e zhvilluara programet për zbulimin e hershëm të kancerit të gjirit zgjerohen, në Maqedoninë e Veriut gratë përballen me një sistem jofunksional, vonesa dhe pasiguri.

Kur bëhet fjalë për kancerin, çdo muaj i humbur mund të ketë pasoja të rënda. Zbulimi i hershëm rrit ndjeshëm mundësinë për trajtim të suksesshëm, ndërsa institucionet kanë për detyrë ta bëjnë skriningun të qasshëm dhe funksional për çdo grua.

Aleanca për Shqiptarët kërkon që Ministria e Shëndetësisë urgjentisht të sigurojë funksionimin e plotë të skriningut të kancerit të gjirit, termine të rregullta dhe rezultate pa vonesa.

Me shëndetin dhe jetën e grave nuk guxon të luhet. Qeveria duhet të veprojë, jo të heshtë.

10/08/2026

Qeveria fshin shqiptarët dhe gjuhën shqipe nga spoti i pavarësisë

Aleanca për Shqiptarët shpreh shqetësim të thellë lidhur me spotin qeveritar të publikuar me rastin e 35-vjetorit të pavarësisë së shtetit, në të cilin shqiptarët janë pothuajse tërësisht të përjashtuar, ndërsa gjuha shqipe mungon plotësisht.

Është e papranueshme që një material zyrtar, i financuar edhe nga taksat e qytetarëve shqiptarë, të ndërtohet mbi një narrativë një etnike, duke krijuar përshtypjen sikur ky shtet i përket vetëm një komuniteti.

Shqiptarët kanë qenë pjesë e pandashme e proceseve më të rëndësishme politike dhe shoqërore të vendit, nga periudha e pavarësimit, deri te ndërtimi i institucioneve demokratike, integrimi në NATO dhe rruga drejt Bashkimit Evropian. Kontributi i tyre në jetën politike, ekonomike, arsimore, kulturore dhe shoqërore është i pamohueshëm dhe nuk mund të anashkalohet apo të fshihet nga narrativa zyrtare e shtetit.

Aleanca për Shqiptarët kërkon nga Qeveria të tërheqë këtë spot dhe të publikojë një material të ri, dinjitoz, përfaqësues dhe gjithëpërfshirës, ku të respektohet gjuha shqipe dhe të pasqyrohet në mënyrë të denjë kontributi i shqiptarëve në historinë, ndërtimin dhe të tashmen e këtij shteti.

Njëkohësisht, shprehim keqardhje për heshtjen e përfaqësuesve shqiptarë në Qeveri, të cilët edhe kur preket drejtpërdrejt dinjiteti, identiteti dhe përfaqësimi i shqiptarëve, zgjedhin të heshtin.

Shteti është i të gjithë qytetarëve të tij dhe edhe simbolika shtetërore duhet ta dëshmojë këtë.

08/08/2026

Sonte në “KËNDIN E DEBATIT” me Ardi Visokën
Cila është alternativa e ASH-së për opozitëbërje dhe si po përfaqësohen shqiptarët në Qeverinë e Maqedonisë së Veriut?
Çfarë thotë kryetari i Aleancës për Shqiptarët, Arben Taravari, për takimin e Kurtit me Selën?
Pse nuk po kalon Ligji për Përfaqësim të Drejtë dhe Adekuat?
Ndiqeni, nga ora 21:40.

08/08/2026

Mbi fatkeqësinë e qytetarëve të Gostivarit nuk ndërtohet rejting politik

Situata në Gostivar po shkon drejt normalizimit të plotë, falë reagimit të institucioneve lokale dhe qendrore, si dhe punës së pandërprerë të shtabeve të krizës qendror dhe lokal, komunave të tjera, stafit shëndetësor, ekspertëve, kompanive dhe miqve.

Aleanca për Shqiptarët i jep mbështetje të plotë kryetarit të Komunës së Gostivarit, Valbon Limani, në menaxhimin e situatës me qetësi, transparencë dhe përkushtim ndaj shëndetit dhe sigurisë së qytetarëve.

Sidoqoftë, mbi fatkeqësinë e Gostivarit nuk ndërtohet rejting politik.

Situata e rëndë që kaloi Gostivari nuk duhet të shfrytëzohet për poena politikë. Mbi gjithë atë që ndodhi në qytet dhe shqetësimin e qytetarëve nuk ndërtohet as kauzë, as rejting dhe as fushatë partiake.

Është e lehtë të kritikosh nga larg, por qytetarët e mbajnë mend mirë se kush ishte pranë tyre në ditët më të vështira dhe kush nuk solli as edhe një shishe ujë, duke u mjaftuar vetëm me akuza dhe deklarata publike.

Çdo lëshim duhet të zbardhet dhe çdo përgjegjësi të përcaktohet nga institucionet kompetente. Por situata delikate në Gostivar nuk duhet të përdoret për tensione, viktimizim apo përfitime partiake.

Gostivari ka nevojë për solidaritet, përgjegjësi dhe ndihmë konkrete, jo për propagandë dhe skenarë politikë.

23/07/2026

Situata drejt stabilizimit, të vazhdojmë me qetësi dhe përgjegjësi

Aleanca për Shqiptarët vlerëson se rezultatet e fundit të analizave mikrobiologjike të ujit nga katër pika në Gostivar tregojnë se situata është në përmirësim dhe në proces të stabilizimit.

I ftojmë qytetarët që të vazhdojnë t’u përmbahen rekomandimeve të institucioneve kompetente dhe informacionet t’i marrin nga burimet zyrtare. Shqetësimi i tyre është plotësisht i kuptueshëm i drejtë, por në këtë moment nevojitet qetësi, maturi dhe bashkëpunim deri në përfundimin e të gjitha analizave dhe procedurave përkatëse.

Nuk duhet të shpejtojmë me gjykime, etiketime apo akuza pa përfunduar puna profesionale e institucioneve. Njëkohësisht, bëjmë thirrje që të ndalet fjalori ofendues dhe përçarës, sepse shëndeti publik duhet të na bashkojë dhe jo të përdoret për përplasje politike.

Shtabi i Krizës është duke kryer detyrat e tij, ndërsa kryetari i Komunës së Gostivarit ka vënë në dispozicion të gjitha kapacitetet komunale për menaxhimin e situatës dhe për t’u dalë në ndihmë qytetarëve. Po ashtu, përfshirja dhe mbështetja e Qeverisë dhe e institucioneve qendrore është e rëndësishme dhe e mirëseardhur.

Prioriteti i vetëm duhet të mbetet mbrojtja e shëndetit të qytetarëve, informimi i rregullt dhe transparent dhe kthimi sa më i shpejtë i situatës në normalitet.

17/07/2026

KUR PREMTIMET PËR NDRYSHIM PËRFUNDOJNË NË EMËRIME FAMILJARE

Mimoza Musa e fitoi mandatin e deputetes me votat, besimin dhe mbështetjen organizative të strukturave të Aleancës për Shqiptarët.

Kur vendosi ta braktisë Aleancën dhe të mbetet pjesë e VLEN-it, u arsyetua se dëshironte ta vazhdonte betejën kundër nepotizmit, krimit dhe korrupsionit.

Sot po e shohim se si e zhvillon këtë “betejë”.

Babai i saj, tanimë pensionist, është emëruar anëtar i Këshillit Mbikëqyrës të Bankës Zhvillimore, një institucion shtetëror që duhet të menaxhohet mbi bazën e meritës, profesionalizmit dhe përgjegjësisë publike.

Në publik flasin për meritokraci, ndërsa në pushtet sistemojnë familjarët.

Nëpër studio televizive luftojnë nepotizmin, ndërsa në institucionet shtetërore emërojnë baballarët e tyre.

Kjo nuk është luftë kundër nepotizmit. Ky është nepotizëm i pastër, i mbështjellë me fjalime për moral dhe ndryshim.

Mimoza Musa duhet të tregojë se kush e propozoi babain e saj, mbi çfarë kriteresh është bërë emërimi dhe si ndodhi që, mes mijëra ekonomistëve dhe profesionistëve të rinj, zgjedhja ra pikërisht mbi familjarin e një nënkryetareje të VLEN-it.

Ndërsa të rinjtë presin një mundësi ose largohen nga vendi, VLEN-i kujdeset që familjarëve të funksionarëve të mos u mungojë asnjë pozitë.

Mandati i fituar nga Aleanca u përdor për të mbetur në pushtet. Pushteti tani po përdoret për të rehatuar familjen.

Ja sa vlejnë premtimet e VLEN-it kundër nepotizmit.