https://www.facebook.com/103336905256867/

GTI Insein Interim Administrative Council, Insein (2026)

21/12/2021

၁၀၉ နှစ်ပြည့်သမိုင်းအား မရိုင်းစေခဲ့သော သူရဲကောင်းတို့အား မှတ်တမ်းတင်ဂုဏ်ပြုခြင်း
အင်းစိန် GTI ကျောင်းတော်ကြီးသည် Government Technical Institute (Insein) ဟုပြောင်းလဲခေါ်ဝေါ်သတ်မှတ်ခဲ့သော ၁၉၁၂ ခုနှစ်မှ ယခု ၂၀၂၁ ခုနှစ်အထိ ရေတွက်သော် ၁၀၉ နှစ် ပြည့်မြောက်ခဲ့ပြီဖြစ်ပါသည်။ ခေတ်အဆက်ဆက်တွင် အင်းစိန် GTI ရှိကျောင်းသား/သူများ ဆရာ/မ တို့သည် မတရားမှုတို့အားလက်ပိုက်ကြည့်မနေကြဘဲ အမှန်တရားဘက်မှသာ ရပ်တည်ခဲ့ကြပါသည်။ ထိုသို့ ၁၀၉ နှစ်ပြည့်မြောက်သော အင်းစိန် GTI ၏သမိုင်းအား အရိုင်းမခံဘဲ၊ ၂၀၂၁ ခုနှစ် ဖေဖော်ဝါရီလ(၁) ရက်နေ့တွင် မတရားနည်းဖြင့် အာဏာသိမ်းယူသွားသော အကြမ်းဖက်စစ်တပ်၏ လုပ်ရပ်အား မထောက်ခံကြောင်း Civil Disobedience Movement (CDM) လှုပ်ရှားမှုတွင် ပါဝင်ခဲ့ကြပြီး ယနေ့အချိန်အထိ အာဏာသိမ်းစစ်တပ်၏ ယန္တရားတွင် တာဝန်ထမ်းဆောင်ခြင်းမရှိကြသော ဆရာ၊ဆရာမ များနှင့် ရောက်ရာအရပ် ကျရာအခန်းကဏ္ဍတို့မှ အသီးသီးတော်လှန်နေကြသော CDM ကျောင်းသား၊ကျောင်းသူ များအား “ဂျီ.တီ.အိုင်(အင်းစိန်)ကြားကာလအုပ်ချုပ်ရေးကောင်စီ” မှ လေးစားမှုဖြင့် အထူးတလည် မှတ်တမ်းတင် ဂုဏ်ပြုအပ်ပါသည်။
အင်းစိန် GTI ကျောင်းတော်ကြီးသည် ၁၉၁၂ ခုနှစ်မှစ၍ မွေးထုတ်ခဲ့သော ကျောင်းသားဟောင်းများ အနက်မှ“ဂျီ.တီ.အိုင်(အင်းစိန်)ကြားကာလအုပ်ချုပ်ရေးကောင်စီ”နှင့် ပူးပေါင်းကာ CDM ဆရာ/မ များနှင့် အစစအရာရာ လိုအပ်သော ဒေသတို့အား ကူညီထောက်ပံ့ပေးကြသည့် ကျောင်းသားဟောင်းအချို့တို့အား အထူးပင်ကျေးဇူးတင် ဂုဏ်ပြုအပ်ပါသည်။
၁၀၉ နှစ်ပြည့်မြောက်သည့် ခုနှစ်မှ စတင်၍ အမှန်တရားအား မြတ်နိုးကြသော ဆရာ ဆရာမများ ၊ ကျောင်းသူ ကျောင်းသားများနှင့် ကျောင်းသားဟောင်းများသည် အင်းစိန် GTI ၏ ရတုအဆက်ဆက် သမိုင်းတွင် အထင်အရှား ဂုဏ်ယူဝင့်ကြွားစွာ တည်ရှိနေမည်ဖြစ်ပါသည်။

20/12/2021

📌 G.T.I Insein 109 နှစ်ပြည့် သမိုင်းမှတ်တမ်းအကျဉ်း

၁၈၉၅ ခုနှစ်၊ ဧပြီလ(၁) ရက်နေ့တွင် စတင်တည်ထောင်ခဲ့သော G.T.I ပညာရေးသည် ၁၉၀၈ ခုနှစ်တွင် ယခု G.T.I-Insein တည်ရှိရာ အင်းစိန်ရွာမသို့ Government School of Engineering & Technical High School အမည်ဖြင့် ကျောင်းအုပ်ကြီး Mr. F.H.O Connor Mitchell မှဦးဆောင်၍ ရွှေ့ပြောင်းခဲ့ပါသည်။ ၁၉၀၈ခုနှစ် မတိုင်မှီကပင် ပင်မဆောင်(Main Building) သည်တည်ရှိခဲ့ပြီး ၁၉၀၈ ခုနှစ်တွင် ဗဟိုဆောင်(Main Hostel) အား စတင်ဆောက်လုပ်ခဲ့ပါသည်။ ကျန်အဆောက်အဦးများအား (၁၉၂၂) ခုနှစ်တွင်ဆောက်လုပ်ခဲ့ခြင်း ဖြစ်ပါသည်။ ပင်မဆောင်(Main Building)တွင် စာသင်ခန်း (၆) ခန်း၊ ဧည့်ခန်း၊ ပုံဆွဲခန်း၊ ရုံးခန်း၊ ဓါတ်ခွဲခန်း၊ စာကြည့်ခန်း၊ ကျောင်းအုပ်ကြီးရုံးခန်းတို့ ပါဝင်ခဲ့ပါသည်။ အင်းစိန်GTI ၏မူလအဆောက်အဦး များသည် ဝိတိုရိယခေတ် ဗိသုကာလက်ရာတို့ဖြင့် တည်ဆောက်ထားခြင်းဖြစ်ပြီး ပင်မဆောင်(Main Building) ၏ကျောင်းဆောင်အလယ်တွင် စတုရန်းပုံ မြေကွက်ငယ်အား ချန်လှပ်ထားရှိခဲ့ပါသည်။
၁၉၁၂ ခုနှစ်တွင် ကျောင်းအုပ်ကြီး Mr. A.P Morris ပြောင်းရွှေ့တာဝန်ယူခဲ့ပြီး Government Technical Institute (GTI) ဟုအမည်ပြောင်းလဲသတ်မှတ်ခဲ့သည်။ Mr. A.P Morris သည် အင်းစိန် GTI ကျောင်းကြီးတိုးတက် ဖွံ့ဖြိုးရေးအတွက် အားကြိုးမာန်တက် ကြိုးပမ်းဆောင်ရွက်ခဲ့သူဖြစ်ပြီး တာဝန်ယူအုပ်ချုပ်နေစဉ်အတွင်း ၁၉၂၂ ခုနှစ်တွင် ပင်မစာသင်ဆောင်အား သုံးဆ ပိုမိုချဲ့ထွင်ဆောက်လုပ်ပေးခဲ့သည်။ ပညာသင်ကြားသူ ကျောင်းသားအရေအတွက် လည်း တိုးတက်လာခဲ့ပါသည်။ ကျောင်းအုပ်ကြီး Mr. A.P Morris အား အများဆုံးအကူအညီပေးခဲ့သူမှာ ရန်ကုန် တက္ကသိုလ်မှ ပြောင်းရွှေ့လာသော သချာ်ကထိက Mr. P.P Annantanaraya Aiyar ဖြစ်ပြီး၊ ဆရာအိုင်ယာသည် Member of the Society of West Virginia Collegiate ဖြစ်ပါသည်။ (၁၉၂၆) ခုနှစ်တွင် Winners of the Morris Medal ဆုအား စတင်ချီးမြင့်ခဲ့ပြီး၊ (၁၉၃၈) ခုနှစ်အထိ ပညာထူးချွန်သူ၊ ကျောင်းသားများ ကို ပေးအပ်ခဲ့ပါသည်။

၁၉၃၆ ခုနှစ်တွင် ပထမဆုံး မြန်မာလူမျိုးကျောင်းအုပ်ကြီးအဖြစ် Mr.T Ba Hli (ဆရာကြီးဦးဘလှီ) M.Sc (London), DIC (Diploma of the Imerial Collage), B.E (Civil, Culcutta University) မှ တာဝန်ယူအုပ်ချုပ်ခဲ့ပါသည်။ ဆရာကြီးဦးဘလှီ လက်ထက်တွင် မြန်မာလူမျိုးကျောင်းသားများ စားသောက်မှု အဆင်ပြေစေရန် Main Burmese Mess ကို ဖွဲ့စည်းပေးခဲ့ပါသည်။(၁၉၄၁) BBA 4 th Division အမှတ်ပေး ဘောလုံးပြိုင်ပွဲတွင် နာမည်ကြီးဘောလုံးအသင်းများဖြစ်သော Customs အသင်း၊ ပုလိပ်ကြီးအသင်း၊ မြူနီစပယ်အသင်း၊
ရန်ကုန်ကောလိပ်၊ ဖရန့်ယူနီယံအသင်း၊ မြို့မ၊ သံလျှင်ကလပ်၊ ဂျင်မခါနာကလပ် စသော၊ အသင်းများနှင့်အတူ၊ ဝင်ရောက်ယှဉ်ပြိုင်ခဲ့ရာ၊ အင်းစိန် GTI အသင်းမှ ပထမဆု ရခဲ့ပါသည်။
ဒုတိယ ကမ္ဘာစစ်အတွင်း၊ (၁၉၄၁)ခုနှစ်၊ ဒီဇင်ဘာလတွင် ဂျပန်စစ်တပ်မှ မြန်မာပြည်အား သိမ်းပိုက်လိုက်သောအခါ၊ အင်းစိန် GTI ၏ ပညာသင်ကြားမှုများလည်းရပ်ဆိုင်းသွားခဲ့ပါသည်။

၁၉၄၄ ခုနှစ်၊စက်တင်ဘာလ (၁၈) ရက်နေ့တွင်၊ ဂျပန် စစ်အုပ်ချုပ်ရေး လက်အောက်ခံ အစိုးရမှ၊ State Technical Institute အမည်ဖြင့် ရန်ကုန်ပြည်သူ့ဆေးရုံကြီး အတွင်း၌၊ ပြန်လည်ဖွင့်လှစ်ခဲ့ပြီး၊ (၁၉၄၅) ဧပြီလ မတိုင်မှီ၊ ရပ်ဆိုင်းခဲ့ပါသည်။ ဂျပန်စစ်တပ်မှ မြန်မာပြည်အား၊ အုပ်ချုပ်နေသောကာလများတွင် မူလအင်းစိန် G.T.I ၏ ပင်မဆောင်(Main Building) နှင့် ဗဟိုဆောင်(Main Hostel) တို့အား၊ ဆေးရုံအဖြစ် အသုံးပြုခဲ့ပြီး ရင်ခွဲရုံ(Mortuary) အနေဖြင့် Main Hostel ဗဟိုဆောင်၏ အဆောက်အဦ အစိတ်အပိုင်း၊ တချို့အားအသုံးပြုခဲ့ပါသည်။

၁၉၄၅ ခုနှစ်၊ သြဂုတ်(၁၅) မှစ၍ အမှတ်(၆)၊ ချာချီလမ်း (ယခုကိုယ့်မင်းကိုယ်ချင်းလမ်း) တွင် “ဗမာနိုင်ငံတော်အစိုးရစက်မှု၊လက်မှုပညာသင်ကျောင်း” အမည်ဖြင့်လည်ကောင်း၊ ဒဂုံမြု့နယ်၊ မော်ကွန်းတိုက်လမ်းနှင့် ပန်တျာလမ်းကြား ဦးဝိစာရလမ်းမပေါ်ရှိ ဂူဂျရတ္တီကျောင်းနေရာသို့လည်ကောင်းပြောင်းရွှေ့ခဲ့ရပြီး ကျောင်းအုပ်ကြီးအဖြစ် ဆရာကြီးဦးဘလှီ မှပင် ဆက်လက်တာဝန်ထမ်းဆောင်ခဲ့ပါသည်။ ထိုချိန်တွင်ဝင်ခွင့် စာမေးပွဲ စနစ်အား စတင်ကျင့်သုံးခဲ့ပါသည်။ မိခင်ကျောင်းတော်ကြီးသည် ၁၉၄၁ ခုနှစ်မှ ၁၉၄၈ ခုနှစ်အထိ နိုင်ငံရေးအခြေအနေများကြောင့် ကျောင်းသား/သူ တို့နှင့်ဝေးကွာခဲ့ပါသည်။

၁၉၄၈ ခုနှစ်၊ ဇန်နဝါရီ(၃၁) တွင် မူလအင်းစိန် G.T.I ကျောင်းနေရာ၌၊ ECEC (Emergency Civil Engineering Course) သင်တန်းအမည်ဖြင့် ပြောင်းရွှေ့ဖွင့်လှစ်ခဲ့ပါသည်။ ကျောင်းအုပ်ကြီးမှာ ဆရာကြီးဦးဘရှင်ဖြစ်ပြီး (၁၉၅၂) ခုနှစ်၊ သြဂုတ်လ(၈) ရက်နေ့အထိ တာဝန်ယူအုပ်ချုပ်ခဲ့ပါသည်။ ဆရာကြီးဦးဘရှင်မှာ(၁၂၈၂)ခုနှစ် တန်ဆောင်မုန်းလပြည့်ကျော် ၈ရက်နေ့ ပထမကျောင်းသားသပိတ် တွင် ပါဝင်ခဲ့သည့် ခေါင်းဆောင်၁၁ဦးမှ ကိုဘရှင်(သံတွဲ) ဖြစ်ပါသည်။

၁၉၅၂ ခုနှစ်၊ သြဂုတ်လ(၈)ရက်နေ့တွင် ကျောင်းအုပ်ကြီးအဖြစ်၊ အင်းစိန် G.T.I ဆင်း မြို့ပြအင်ဂျင်နီယာဌာနမှ ကထိက ဆရာကြီးဦးအန့်ခင်က ဇူလိုင်လ (၂၀) ရက် (၁၉၅၃) ခုနှစ်အထိ တာဝန်ယူခဲ့ပါသည်။ တာဝန်ယူချိန် အချိန်တစ်နှစ်ကျော် ကာလအတွင်း (၁၉၅၂ - ၅၃) ပညာသင်နှစ်တွင် Electronics & Communications (အီလက်ထရောနစ်နှင့် ဆက်သွယ်ရေးအင်ဂျင်နီယာသင်တန်း)ကို ဖွင့်လှစ်နိုင်ခဲ့ပါသည်။

၁၉၅၃ ခုနှစ်၊ ဇူလိုင်လ(၂၀)ရက်နေ့တွင် AMI, MECE, AMICE, AMIEE လက်မှတ်များရရှိထားသော ပန်ဂျပ်ပြည်နယ်ဇာတိဖြစ်သည့်၊ ဆရာကြီး ဦးမောင်ကြီးမှ သြဂုတ်လ (၂) ရက် (၁၉၅၄) ခုနှစ် အထိ၊ ကျောင်းအုပ်ဆရာကြီးအဖြစ်တာဝန်ယူခဲ့ပါသည်။ နောက်ပိုင်းတွင် ဆရာကြီးသည် အမေရီကန်နိုင်ငံရှိ NASA (National Aeronautics and Space Administration) တွင် တာဝန်ထမ်းဆောင်ရန်ပြောင်းရွှေ့သွားခဲ့ပါသည်။

၁၉၅၄ ခုနှစ်၊ သြဂုတ်လ(၂) ရက်နေ့တွင် ဆရာကြီးဦးခန့်အင်မှ ကျောင်းအုပ်ကြီးအဖြစ် ပြန်လည်တာဝန်ယူခဲ့ပါသည်။ ယခင်က GTI ကျောင်းဆင်းလက်မှတ်ကိုသာ ပေးအပ်ခဲ့ပြီး၊ ဆရာကြီးဦးအန့်ခင်လက်ထက် (၁၉၅၄) ခုနှစ်တွင် A.G.T.I (Associateship of the Government Technical Institute) အသိအမှတ်ပြုလက်မှတ်အား စတင်ပေးအပ်ခဲ့ပါသည်။ ၁၉၅၅ ခုနှစ်တွင် သုံးထပ်မှန်ဆောင်၊ ဒက္ခိဏနဲ့ ဥတ္တရဆောင် များကိုလည်း၊ ဆောက်လုပ်ခဲ့ပါသည်။ ဆရာကြီးဦးအန့်ခင်လက်ထက် အင်းစိန် G.T.I တွင် ယခင်က ဖွင့်လှစ်ခဲ့သော၊ ပုံဆွဲသင်တန်း (Draftsmanship သင်တန်း) မရှိတော့ပဲ၊ (၁၉၅၄) ခုနှစ်တွင် Mining Engineering
သတ္တုတူးဖော်ရေး အင်ဂျင်နီယာသင်တန်းနှင့် (၁၉၅၅) ခုနှစ်တွင် Mechanical (Machine Tools & Designs) စက်မှု(ပုံစံပြု) အင်ဂျင်နီယာသင်တန်းတို့အား စတင်ဖွင့်လှစ်ခဲ့ပါသည်။ ဆရာကြီးဦးခန့်အင်သည် (၁၉၅၆) ခုနှစ် အောက်တိုဘာလ (၁၉) ရက်နေ့တွင် အငြိမ်းစားယူခဲ့ပါသည်။

၁၉၅၆ ခုနှစ်၊ အောက်တိုဘာလ (၁၉) ရက်နေ့တွင် ဆရာကြီးဦးအန့်ခင် အငြိမ်းစားယူပြီးနောက်၊ ဆရာကြီးဦးမြသန်းမှ ကျောင်းအုပ်ဆရာကြီး အဖြစ်တာဝန် ယူခဲ့ပါသည်။
(၁၉၅၆) ခုနှစ် ပညာသင်နှစ်တွင် အမျိုးသမီးအင်ဂျင်နီယာသင်တန်းသူ (၃) ဦးအား၊ စတင်ကျောင်းဝင်ခွင့်ပြုခဲ့ပါသည်။ ဆရာကြီးဦးမြသန်းသည်(၁၉၅၉)ခုနှစ်တွင် အငြိမ်းစားယူခဲ့ပါသည်။

၁၉၅၉ ခုနှစ်၊ ဆရာကြီးဦးမြသန်း အငြိမ်းစားယူသည့်အခါ၊ B.O.C ကောလိပ်ဘွဲ့ရ ဆရာကြီးဦးစိုးမောင် (B.Sc. Engg, ၁၉၅၅ ခုနှစ်) သည် (၁၉၅၉) ခုနှစ်မှ (၁၉၇၂) ခုနှစ်အထိ၊
ကျောင်းအုပ်ဆရာကြီး အဖြစ် တာဝန်ယူခဲ့ပြီး၊ Aeronautical Engineering လေကြောင်းအင်ဂျင်နီယာသင်တန်း ကိုစတင်သင်ကြားရန် စီစဉ်ခဲ့ပါသည်။
သင်ကြားမှုအထောက်အကူအဖြစ် ဒုတိယကမ္ဘာစစ်သုံး Dakota လေယာဉ်ပျံတစ်စီးအား ကျောင်းဝင်းအတွင်းရှိ ဥတ္တရဆောင်နှင့် ဘောလုံးကွင်းအကြားတွင် ထားရှိခဲ့သည်ဟုသိရပါသည်။
ဆရာကြီးဦးစိုးမောင်ကျောင်းအုပ်ကြီးအဖြစ်တာဝန်ယူစဉ် (၁၉၅၉-၁၉၆၀) ပညာသင်နှစ်တွင်၊ ကင်မရွန်း နိုင်ငံသား (၁) ဦးနှင့် လာအိုနိုင်ငံသား (၂) ဦး ကျောင်းဝင်ခွင့်လျှောက်ထားခဲ့ကြပြီး လာအိုနိုင်ငံသား (၂) ဦးအားလက်ခံခဲ့ပါသည်။ ၁၉၆၂ မတ်လတွင် တော်လှန်ရေးအစိုးရတက်လာပြီး၊ အင်းစိန် G.T.I အား စက်မှုဝန်ကြီးဌာနကြီးကြပ်မှုမှ၊ ပညာရေး ဝန်ကြီးဌာနကြီးကြပ်မှုသို့ ပြောင်းလည်းဖွဲ့စည်းခဲ့ပါသည်။ (၁၉၆၅) ခုနှစ်၊ အောက်တိုဘာလ (၂၃) ရက်နေ့တွင် အင်းစိန် G.T.I ကျောင်းသားဟောင်း အလုပ်သမားဝန်ကြီးဌာန အတွင်းဝန် ဦးမျိုးမြင့် (နောင် တွင် သံအမတ်ကြီးဟောင်း)၊ စက်မှုလက်မှုပညာသင်ကြားရေးဝန် ဆရာကြီးဦးခင်မောင်၊ ကျောင်းအုပ် ချုပ်ရေးအဖွဲ့ ဥက္ကဌ ဒုတိယဗိုလ်မှူးကြီးထွန်းရီတို့၊ ကမကထလုပ်ကာ ပထမဆုံးအကြိမ် A.G.T.I အောင် လက်မှတ်ပေးပွဲအား ကျင်းပခဲ့ပါသည်။ပထမဆုံး အကြိမ် A.G.T.I အောင်လက်မှတ်ပေးပွဲအခမ်းအနားသည် (၁၉၅၄) ခုနှစ်မှ၊ (၁၉၆၅) ခုနှစ် အတွင်း သင်တန်းဆင်းခဲ့သူ (၁၀၇၂) ဦးတို့အတွက်၊ ကျင်းပပြုလုပ်ခဲ့ခြင်းဖြစ်ပြီး (၃၄၀) ဦး အခမ်း အနား တက်ရောက်ကာ၊ အောင်လက်မှတ်ရယူခဲ့ပါသည်။ အခမ်းအနားအတွက် ကုန်ကျစားရိတ် အားလုံး ကို ကျောင်းသားထောက်ပံ့ငွေ Caution Money ထဲမှသာ သုံးစွဲခဲ့ပါသည်။ ဆရာကြီး ဦးစိုးမောင်သည် (၁၉၇၂)ခုနှစ်၊ ဇူလိုင်လတွင် မန္တလေး GTI သို့ပြောင်းရွှေ့ခဲ့ပါသည်။

၁၉၇၂ခုနှစ်၊ဇူလိုင်လတွင်ကျောင်းအုပ်ကြီးအဖြစ် ကလော GTI မှ ဆရာကြီးဦးအုန်းမောင် ပြောင်းရွှေ့လာခဲ့ပါသည်။ ဆရာကြီးဦးအုန်းမောင် လက်ထက်တွင် ကျောင်းသူများအတွက် သပြေဆောင်အား စတင်ဆောက် လုပ်ခဲ့ပါသည်။ ဆရာကြီးသည် (၁၉၇၇)ခုနှစ်အထိ တာဝန်ထမ်းဆောင်ခဲ့ပါသည်။

၁၉၇၇ ခုနှစ် တွင် ဆရာကြီး ဦးခင်မောင်သွင်မှကျောင်းအုပ်ကြီး အဖြစ် ဆက်လက် တာဝန်ယူခဲ့ပါသည်။ ကျောင်းအုပ်ကြီးအဖြစ် လအနည်းငယ်သာ အမှုထမ်းဖြစ်ခဲ့သူ ဆရာကြီး ဦးခင်မောင်သွင်နေရာတွင် ဆရာကြီးဦးမြင့်ဆွေသည် ကထိကဌာနမှုးအဖြစ်မှ ကျောင်းအုပ်ကြီး အဖြစ်သို့ ပြောင်းရွှေ့တာဝန်ယူခဲ့ပါသည်။ ဆရာကြီးဦးမြင့်ဆွေသည် (၁၉၆၀) ခုနှစ်၊ B.O.C ကောလိပ်မှ B.Sc. Engg; ဘွဲ့ရဖြစ်ပြီး၊ အင်းစိန် ဒိစတြိတ်ကောင်စီရုံးမှာ အင်ဂျင်နီယာအနေဖြင့် (၆) နှစ်ခန့် ဝင်ရောက်လုပ်ကိုင်ပြီး သင်ကြားရေးအားဝါသနာပါသူဖြစ်၍ မန္တလေး GTI တွင် လက်ထောက်ကထိက အဖြစ်ပြောင်းရွှေ့တာဝန်ထမ်းဆောင်ခဲ့သူ ဖြစ်ပါသည်။
ဆရာကြီးဦးမြင့်ဆွေလက်ထက် (၁၉၇၇) နှင့် (၁၉၇၈) တို့တွင် ကိုလံဘိုစီမံကိန်းအရ၊ နိုင်ငံခြားမှ ဆရာများ၊ အင်းစိန် G.T.I သို့ သင်တန်းများလာရောက်ပို့ချပေးခဲ့ပါသည်။ ဆရာကြီး ဦးမြင့်ဆွေသည် စက်မှုဆရာဖြစ်သင်ကျောင်း G.T.I - Technical Teacher’s Trainging Institute ကိုလည်း၊
ဆရာကြီး ဦးလှမြင့် ကျောင်းအုပ်ကြီး အဖြစ်ပြောင်းရွှေ့ တာဝန်မယူမှီအထိ တွဲဖက်တာဝန်ယူခဲ့ပါသည်။ တော်လှန်ရေးအစိုးရလက်ထက်နှင့် မြန်မာ့ဆိုရှယ်လစ်လမ်းစဉ်ပါတီအစိုးရလက်ထက် (၁၉၇၂) ခုနှစ်အထိ၊
Boys Army ခေါ် တပ်မတော်မှ သင့်လျှော်သူများကို အင်းစိန်G.T.I တွင် သင်တန်းတက်စေခဲ့ပါတယ်။
ဆရာကြီး ဦးမြင့်ဆွေသည်၊ (၁၉၉၀) ခုနှစ်တွင် Department of Technical, Agriculture & Vocational Education စက်မှု၊ စိုက်ပျိုးနှင့် သက်မွေးပညာဦးစီးဌာန (ရုံးချုပ်) သို့၊ လက်ထောက်ညွှန်ကြားရေးမှုးအဖြစ် ပြောင်းရွှေ့ သွားခဲ့ပြီး၊ (၁၉၉၁) တွင် အငြိမ်းစားယူခဲ့ပါသည်။
၁၉၉၀ ခုနှစ် တွင် ဆရာကြီး ဦးခင်မောင်ညွန့် မှ ကျောင်းအုပ်ကြီးအဖြစ် တာဝန်ထမ်းဆောင်ခဲ့ပါသည်။

၁၉၉၁ ခုနှစ် တွင် ဆရာကြီးဦးသိန်းဇံ မှ တာဝန်ယူ အုပ်ချုပ်ခဲ့ပါသည်။ ဆရာကြီးဦးသိန်းဇံ လက်ထက် (၁၉၉၃) ခုနှစ်တွင် Food & Chemical Technology (အစားအသောက်နှင့် ဓါတုနည်းပညာ အင်ဂျင်နီယာသင်တန်း) နှင့် Plastic & Rubber Technology (ပလတ်စတစ်နှင့် ရာဘာနည်းပညာ အင်ဂျင်နီယာသင်တန်း) တို့ကို၊ စတင်ဖွင့်လှစ်ခဲ့ပါသည်။ ပထမဆုံးဌာနမှူးများကတော့ ဆရာမကြီးဒေါခင်ဝင်းကြည် နှင့် ဆရာမကြီးဒေါတိုးတိုးသန်း တို့ဖြစ်ကြပါသည်။ ၁၉၉၃ ခုနှစ်တွင် ဆရာကြီးဦးသိန်းဇံသည် စက်မှု၊ စိုက်ပျိုးနှင့် သက်မွေးပညာဦးစီးဌာန (ရုံးချုပ်) သို့ပြောင်းရွှေ့သွားခဲ့ပါသည်။

၁၉၉၃ ခုနှစ် တွင် ဆရာကြီးဦးအောင်ဝင်း မှလွှဲပြောင်းတာဝန်ယူခဲ့ပြီ ၁၉၉၅ ခုနှစ် အထိတာဝန်ယူအုပ်ချုပ်ခဲ့ပါသည်။

၁၉၉၅ ခုနှစ် တွင် ဆရာကြီး ဦးမြင့်အောင်မှ ကျောင်းအုပ်ကြီးအဖြစ်၊ ဆက်လက် တာဝန်ယူခဲ့ပါသည်။ ၁၉၉၈ ခုနှစ် အထိတာဝန်ယူဆောင်ရွက်ခဲ့ပါသည်။ ၁၉၉၄ ခုနှစ်တွင် ဝင်ခွင့်စာမေးပွဲဖြေဆိုအောင်မြင်ခဲ့သူများသည် (၁၉၉၅ - ၉၆) ပညာ သင်နှစ်တွင် ဒုတိယနှစ် သင်တန်းများအား သံလျှင် GTI သို့ ပြောင်းရွှေ့သင်ယူခဲ့ပြီး၊ (၁၉၉၈) ခုနှစ်တွင် သင်တန်းပြီးဆုံးအောင်မြင်ခဲ့ပြီး အင်းစိန် GTI ၏နောက်ဆုံးအသုတ်အဖြစ်သတ်မှတ်ခဲ့ပါသည်။

၂၀၀၇ ခုနှစ်၊ ဇူလိုင်လ (၁၆) ရက်နေ့တွင် (၄၁ ဒသမ ၉၉၇ ဧက) အကျယ်အဝန်းရှိသော၊ အင်းစိန် GTI ကျောင်းကြီးအား၊ ရန်ကုန်မြို့တော် စည်ပင်သာယာရေးကော်မတီသို့ လွဲပြောင်းပေးအပ်ခဲ့ပါတယ်။ ၂၀၀၇ ခုနှစ်တွင် အင်းစိန် GTI ကျောင်းကြီးသည် နိုင်ငံရေး အခြေအနေများကြားတွင် စစ်ကြောရေးအဖြစ် အသုံးတော်ခံခဲ့ရပါသည်။

၂၀၁၆ ခုနှစ်၊ စက်တင်ဘာလ (၉) ရက်နေ့တွင် အင်းစိန် GTI ကျောင်းကြီးအား ရန်ကုန်မြို့တော် စည်ပင်သာယာရေးကော်မတီ မှ ပညာရေးဝန်ကြီးဌာနလက်အောက်သို့ ပြန်လည် လွှဲပြောင်းပေးအပ်ခဲ့ပါသည်။
ထို့နောက် ၂၀၁၇ ခုနှစ်၊ ဒီဇင်ဘာလ (၁) ရက်နေ့တွင် ပြန်လည်ဖွင့်လှစ်နိုင်ခဲ့ပြီး ကျောင်းအုပ်ကြီးအဖြစ် ဦးမြတ်ကိုမှ တာဝန်ထမ်းဆောင်ခဲ့ပါသည်။ ၂၀၁၈ ခုနှစ်တွင် Information Technology (သုတနည်းပညာသင်တန်း) နှင့် ညသင်တန်းများ အားထပ်တိုးဖွင့်လှစ်ခဲ့ပါသည်။ ၂၀၂၀ ခုနှစ် မတ်လ(၃) ရက်နေ့တွင် ကိုဗစ်-၁၉ ကပ်ရောဂါ အခြေအနေတို့ကြောင့် အင်းစိန် GTI အား ရက်အကန့်အသတ်မရှိ ယာယီ ပိတ်ထားခဲ့ရပါသည်။ ၂၀၂၁ ခုနှစ် ဖေဖော်ဝါရီလ(၁) ရက်နေ့တွင် စစ်တပ်၏ အာဏာသိမ်းမှုဖြစ်ပေါ်ချိန်တွင် အင်းစိန် GTI ကျောင်းသား/သူ များ၊ ဆရာ/မ အချို့ နှင့် ကျောင်းသားဟောင်းအချို့ တို့သည် စစ်ကောင်စီ၏ အာဏာသိမ်းမှုအပေါ် ကန့်ကွက်၊ ဆန့်ကျင် ခဲ့ကြပြီး ယခုလက်ရှိအချိန်အထိ ဖက်ဆစ်စစ်အာဏာရှင်စနစ်အား တော်လှန်‌တိုက်ပွဲဝင်လျက်ရှိကြပါသည်။ သို့သော် ဦးမြတ်ကိုမှာမူ ယခုအချိန်အထိ ဖက်ဆစ်စစ်ကောင်စီ၏လက်အောက်တွင် ကျောင်းအုပ်ကြီးအဖြစ် ဆက်လက်တာဝန်ထမ်းဆောင်နေပြီး ကျွန်ပညာရေးယန္တရားအားအထောက်ကူပြုနေဆဲဖြစ်သောကြောင့် အမျိုးသားညီညွတ်ရေးအစိုးရ(National Unity Government - NUG)မှ အမည်ပျက်စာရင်းသွင်းခဲ့ပြီး ရာထူးမှတရားဝင်ဖယ်ရှားခဲ့သည်။ ခေတ်အဆက်ဆက် မတရားမှုများအား တော်လှန်ဆန့်ကျင်ခဲ့သော G.T.I Insein၏သမိုင်းတွင် ဖောက်ပြန်သူ အကျင့်ပျက်ဝန်ထမ်းများအတွက် နေရာရှိမည်မဟုတ်ကြောင်း ကျောင်းသားပြည်သူများအားလုံးမှ သက်သေထူလျက်ရှိသည်။

၁၉၀၈ ခုနှစ်တွင် အင်းစိန်(ရွာမ) သို့ ပြောင်းရွှေ့တည်ထောင်ခဲ့ပြီး ၁၉၁၂ ခုနှစ်တွင် Government Technical Institute (G.T.I) ဟု စတင်ပေါ်ပေါက်လာခဲ့သော G.T.I Insein ကျောင်းတော်ကြီးသည် ယခု ၂၀၂၁ ခုနှစ်တွင် ၁၀၉နှစ် ပြည့်မြောက်ခဲ့ပြီဖြစ်ပါသည်။

အထက်တွင်ဖော်ပြထားသော သမိုင်းအချက်အလက်တို့သည် (၁၂)ကြိမ်မြောက် ဂျီတီအိုင် ကျောင်းသား၊ ကျောင်း သူဟောင်းများ အာစရိယပူဇော်ပွဲအမှတ်တရ "ဂျီတီအိုင် ပုံရိပ်သမိုင်းမှတ်တမ်းများ" စာအုပ်နှင့် GTI ပညာရေး ၁၂၅ နှစ်ပြည့် အထိမ်းအမှတ်အဖြစ် G.T.I-Insein Students' Union မှ ရေးသားထားသော post အား ပြန်လည်စီစဉ်ဖော်ပြထားခြင်းဖြစ်ပါသည်။

G.T.I သမိုင်းကြောင်းများအား ပိုမိုလေ့လာနိုင်ရန် G.T.I-Insein Student’s Union page မှ ရေးသားထားသော post အား ပြန်လည်ဖော်ပြအပ်ပါသည်။
https://www.facebook.com/104173391155226/posts/175942383978326/
https://www.facebook.com/media/set/?set=a.221047696134461&type=3

15/11/2021

❙ တက္ကသိုလ်၀င်တန်းစာမေးပွဲ ဖြေဆိုရန် ကိစ္စနှင့်စပ်လျဉ်း၍ မိဘပြည်သူ၊ ကျောင်းသူ၊ကျောင်းသားများသို့ အသိပေး သတင်းထုတ်ပြန်ခြင်း

◾️အမျိုးသားညီညွတ်ရေးအစိုးရ၊ ပညာရေး၀န်ကြီးဌာနသည် တိုင်းရင်းသားပြည်သူတစ်ရပ်လုံး လိုလားတောင့်တနေသည့် ဖက်ဒရယ်ဒီမိုကရေစီ ပညာရေးစနစ် တည်ဆောက်ရန် ခိုင်မာစွာ သန္နိဋ္ဌာန် ချမှတ်ထားပြီး ဖြစ်သည့်အလျောက် ကြားကာလအတွင်း ပညာရည်ဆန်းစစ်မှု စာမေးပွဲစနစ်များကိုလည်း ဖက်ဒရယ်ပညာရေး သဘောတရားများ၊ နိုင်ငံတကာစံနှုန်းများနှင့်အညီ အများပြည်သူ နစ်နာမှုမရှိစေရေးကို အထူးဦးစားပေး၍ အကောင်အထည်ဖော် ဆောင်ရွက်သွားမည် ဖြစ်ပါသည်။

◾️သင်ရိုးညွှန်းတမ်းစနစ် ပြောင်းလဲရေးတွင် ဆောင်ရွက်ရန် ကျန်ရှိနေသည့် တက္ကသိုလ်၀င်တန်း၌ တက်ရောက်နေဆဲ ကျောင်းသူ၊ကျောင်းသားများ အတွက် ပညာရေး အရည်အသွေးရှိကာ အများပြည်သူ လက်ခံနိုင်သော ဆန်းစစ်ဖြေဆိုမှုစာမေးပွဲတစ်ခု ကျင်းပပြုလုပ်ပေးနိုင်ရန် သက်ဆိုင်ရာ ပညာရှင်များ၊ နည်းပညာရှင်များနှင့် တိုင်ပင် ဆွေးနွေးလျက်ရှိပါသည်။

◾️ထို စာမေးပွဲကို တက္ကသိုလ်၀င်တန်းကျောင်းသူ၊ကျောင်းသားအားလုံး လက်လှမ်းမီ ပါ၀င်ဖြေဆို နိုင်မည့် အစီအစဉ် ဖြစ်စေရန် သက်ဆိုင်ရာ ကျောင်းသားအဖွဲ့အစည်းများ/သမဂ္ဂများ၊ ပညာရေးအဖွဲ့ အစည်းများ၊ ကိုယ်ပိုင်ကျောင်းများ၊ မြို့နယ်ပညာရေးဘုတ်အဖွဲ့များ၊ တက္ကသိုလ်ကောင်စီများ၊ ဆရာ သမဂ္ဂများ၊ ပြည်တွင်းပြည်ပ ပညာရှင်များ၊ နည်းပညာရှင်များ၊ အဖွဲ့အစည်းများနှင့် တိုင်ပင်ဆွေးနွေးကာ အကောင်အထည်ဖော် ဆောင်ရွက်သွားမည် ဖြစ်ပါသည်။

◾️လက်ရှိအချိန်တွင် ကျောင်းသူ၊ကျောင်းသားများ၊ မိဘပြည်သူများ အနေဖြင့် မိမိဆန္ဒမပါ၀င်ပဲ တက္ကသိုလ်၀င်တန်း စာမေးပွဲဖြေဆိုရန် စစ်ကောင်စီ၏ ဖိအားပေး ခြိမ်းခြောက်ခံရ ခြင်းများ၊ ယခုနှစ် စာမေးပွဲဖြေဆိုရန် အမည်စာရင်း မတင်သွင်းလျှင် နောက်နှစ်များတွင် ဖြေဆိုခွင့်မပြုဟူသော အာဏာရှင် ဆန်သည့် ဖိအားပေးမှုများသည် အနာဂတ်လူငယ်များအား ပညာရည်နိမ့်ပါးအောင် လုပ်ဆောင်နေခြင်း ဖြစ်ပြီး အမျိုးသားညီညွတ်ရေးအစိုးရ၊ ပညာရေးဝန်ကြီးဌာနသည် အားလုံးပါဝင်နိုင်မည့် တက္ကသိုလ်ဝင်တန်း စာမေးပွဲစနစ်ကို အများဆန္ဒနှင့်အညီ ညှိနှိုင်းဆောင်ရွက်မည်ဖြစ်ပါသဖြင့် အဆိုပါ မတရား ဖိအားပေး ခြိမ်းခြောက်မှုများကို စိုးရိမ်ပူပန်ရန် မလိုအပ်ပါ။

◾️ပြည်တွင်းပြည်ပ နိုင်ငံတကာမှလုံးဝအသိအမှတ်မပြုသော တရားမ၀င် စစ်ကောင်စီ၏ ပညာရေးလုပ်ဆောင်မှုများအားလုံးသည် အလိုအလျောက် တရားမ၀င်ကြောင်း ကြေညာထားပြီးဖြစ်သဖြင့် စစ်ကောင်စီမှ ခိုင်းစေကျင်းပသည့် တက္ကသိုလ်၀င်တန်း စာမေးပွဲရလဒ်များကိုလည်း ဖက်ဒရယ်စနစ်ဖြင့် အကောင်အထည်ဖော်သွားမည့် အဆင့်မြင့်ပညာ တက္ကသိုလ်/ကောလိပ်/ သိပ္ပံများက အသိအမှတ်ပြု လက်ခံမည် မဟုတ်ပါကြောင်း အသိပေး သတင်းထုတ်ပြန်အပ်ပါသည်။

ပညာရေး၀န်ကြီးဌာန
အမျိုးသားညီညွတ်ရေးအစိုးရ

13/08/2021

ပညာရေးဝန်ကြီးဌာန၊ အမျိုးသားညီညွတ်ရေးအစိုးရ၏ ကျောင်းသား၊ကျောင်းသူ လူငယ်များ စဉ်ဆက်မပြတ်သင်ယူနိုင်ရေးအတွက် ကြားကာလ ပညာရေးအစီအစဉ်အရ

အကောင်အထည်ဖော်ဆောင်သော ကာလတိုသင်ကြားရေး( Short Course) အစီအစဉ်

ကြားကာလပညာရေးအစီအစဥ် (Short Course for Students) ကိုဗစ်ကူးစက်မှုနှင့် အကြမ်းဖက်မှုတို့ကြောင့် ရပ်ဆိုင်းနှောင့်နှေးခဲ့ရသော ကျောင်းသူ ကျောင်းသားများကို ပညာဆက်လက်သင်ယူခွင့်ရရန် သက်ဆိုင်ရာပြည်တွင်း ပြည်ပပညာရှင်များဖြင့် အမျိုးသားညီညွတ်ရေး အစိုးရ (NUG)၊ ပညာရေးဝန်ကြီးဌာနမှ စီစဥ်လျှက်ရှိသည်။

Korea နိုင်ငံ၏ Asean Cyber University Project နှင့် Cyber University of Korea (CUK) တို့ ပူးပေါင်းဖွင့်လှစ်သင်ကြားမည့် online interactive Korean Language class အစီအစဥ်ဖြစ်ပါသည်။

Basic Korean Language တက်ရောက်ရန် စိတ်ပါဝင်စားသူ တက္ကသိုလ်များမှ မည်သူမဆို အောက်ဖော်ပြပါ Link သို့ ၀င်ရောက်ပြီး စာရင်းပေးသွင်းနိုင်ပါသည်။
https://bit.ly/acu-cuk

သင်တန်းကာလ ၄ လ ကြာမြင့်မည်ဖြစ်ပြီး 16 August 2021 နောက်ဆုံးထားစာရင်းသွင်းရန်ဖြစ်ပါသည်။

Name of Course: Quick Korean
Period: September to December 2021
Course level: Basic
Channel: http://www.aseanoer.net နှင့် interactive online class အတွက် “ZOOM”
Platform အသုံးပြုမည်ဖြစ်ပါသည်။

Course syllabusအား အောက်ဖော်ပြပါ Linkတွင် downloadရယူနိုင်ပါသည်။

https://drive.google.com/file/d/15Lbog4vI3gLYiGhXUHx0Rg-Pv7T0mvpY/view?usp=sharing

30/07/2021

အင်းစိန် ဂျီတီအိုင်မှ ကျောင်းသားကျောင်းသူ / CDM ဆရာဆရာ မများ သိရှိစေရန် _

(၁)Software Development: An Introduction to Agile Framework and Methodologies -ကွန်ပျူတာ ဆော့(ဖ်)ဝဲ(ရ်) များ ဖန်တီးရေးသားခြင်း - အဂျိုင်း(လ်) နည်းလမ်း နှင့် လုပ်ဆောင်နည်း များ မိတ်ဆက် သင်တန်းအား ကွန်ပျူတာ ပရိုဂရမ် ဖန်တီးရေးဆွဲခြင်းကို သင်ယူနေသော ကွန်ပျူတာ တက္ကသိုလ်နှင့် ကောလိပ်များမှ ကျောင်းသားများ၊ ကွန်ပျူတာ ပရိုဂရမ် ရေးဆွဲဘူးသည့် အတွေ့အကြုံရှိသူများ၊ ကွန်ပျူတာ ပရိုဂရမ် ရေးဆွဲရန် ကြိုးစားနေသော သို့မဟုတ် သင်တန်းတက် နေသူများ အတွက် စီစဉ်နေပါသည်။

(၂)Design & Implementation of Gravity Flow Water Supply System for Small Communities- ချောင်းရေနှင့် စိမ့်စမ်းရေ ပေါများသော တောင်ပေါ်ဒေသ ကျေးရွာများတွင် ရေသွယ်ယူရန် လေ့လာ၊ တွက်ချက်၊ အကောင်အထည်ဖေါ်၊ ထိန်းသိမ်းခြင်း သင်တန်းကို ကိုယ့်ဒေသမှာ ကိုယ်တိုင် ဦးစီးပြီး၊ ဒါမှမဟုတ် ကျေးရွာလူထုတွေအတွက် ရေပေးဝေရေး ကိစ္စတွေ ဆောင်ရွက်နေတဲ့ အဖွဲ့အစည်းတွေကတဆင့် ရေသွယ်ရေးလုပ်ငန်းတွေ ဆောင်ရွက်လိုသူများ၊ ဖော်ပြပါ လုပ်ငန်းခွင်များတွင် ဝင်ရောက်ရန် ပြင်ဆင်နေသော တက္ကသိုလ် (အထူးသဖြင့်နောက်ဆုံးနှစ်) တက္ကသိုလ်ကျောင်းသား၊ ကျောင်းသူများ အတွက် စီစဉ်နေပါသည်။

(၃)Personal Development Training- ကိုယ်ရည်ကိုယ်သွေး မြှင့်တင်ခြင်း
သင်တန်းကို လုပ်ငန်းခွင်ဝင်ရန် ပြင်ဆင်နေသော တက္ကသိုလ်ကျောင်းသား၊ကျောင်းသူများအတွက် ရည်ရွယ်ခြင်းဖြစ်၍ တတိယနှစ်၊ နောက်ဆုံးနှစ်ကျောင်းသားများအတွက် စီစဉ်နေပါသည်။

(၄)Basic Graphic Design -အခြေခံဂရပ်ဖစ်ဒီဇိုင်းများရေးဆွဲခြင်း သင်တန်း ကို ကွန်ပြူတာ အခြေခံတတ်မြောက်ပြီး Graphic Design ကို စိတ်ဝင်စားသည့် CDM လှုပ်ရှားမှုတွင် ပူးပေါင်းပါဝင်နေသည့် ပြည်သူ့ဝန်ထမ်းသူရဲကောင်းများ အတွက် ရည်ရွယ်၍ စီစဉ်နေပါသည်။

Unity School by Unity Corner Team နှင့်ပူးပေါင်းကာ ဦးစွာ ဖွင့်လှစ်သင်ကြား ပို့ချသွားမည်ဖြစ်ပါသည်။

စာရင်းပေးသွင်းရမည့်လင့်များ

တက္ကသိုလ်ကျောင်းသား၊ ကျောင်းသူများ အတွက်

https://docs.google.com/forms/d/e/1FAIpQLSecbno4qeREWX28naHMW5pUOE9M0QzIVjTy28Nt9Nszdh4Q5g/viewform

CDM လှုပ်ရှားမှုတွင် ပူးပေါင်းပါဝင်နေသည့် ပြည်သူ့ဝန်ထမ်းသူရဲကောင်းများ အတွက်
https://docs.google.com/forms/d/e/1FAIpQLSe8kRLXj9RWqPN3QaR72fBD_F3COeAOKBIIm0vujQt8FzKkLw/viewform

17/06/2021

📌အမျိုးသားညီညွတ်ရေးအစိုးရ ပညာရေးဝန်ကြီးဌာန၏ ကြားကာလပညာရေးအစီစဉ်အား ကြေညာခြင်း

၂၀၂၁ခုနှစ်၊ ဇွန်လ(၁၆)ရက်

11/05/2021

ဂျီတီအိုင် (အင်းစိန်)ကြားကာလ ယာယီ အုပ်ချုပ်ရေးကောင်စီ ကို ပညာရေးဝန်ကြီးဌာန( အမျိုးသားညီညွှတ်ရေးအစိုးရ )မှ အသိမှတ်ပြုကြောင်း ကြေညာချက်အား ပေးပို့

နေ့စွဲ၊၂၀၂၁ခုနှစ်၊မေလ၊၁၁ရက်နေ့
___________________________________

ပညာရေးဝန်ကြီးဌာန (အမျိုးသားညီညွှတ်ရေးအစိုးရမှ အောက်ဖော်ပြ ပါအတိုင်း ပေးပို့ခဲ့ပါသည်။

သို့
ကြားကာလ ယာယီ တက္ကသိုလ်ကောင်စီ/ ကြားကာလ ယာယီ စီမံအုပ်ချုပ်ရေးကောင်စီ

ပြည်ထောင်စုသမ္မတမြန်မာနိုင်ငံတော်၊အမျိုးသားညီညွတ်ရေးအစိုးရ၊ပညာရေးဝန်ကြီးဌာန၏ ကြေညာချက်အမှတ်(၇/၂၀၂၁) ကောင်စီများအား အသိအမှတ်ပြုကြောင်း ကြေညာချက်အား ပူးတွဲပါ Attachment ဖြင့်ပေးပို့အပ်ပါသည်။

ရုံးအဖွဲ့
ပညာရေးဝန်ကြီးဌာန
အမျိုးသားညီညွတ်ရေးအစိုးရ

06/05/2021

📌CDMဆရာ/ဆရာမများအား ကူညီထောက်ပံ့ခြင်း

ဂျီ.တီ.အိုင်(အင်းစိန်) ကြားကာလအုပ်ချုပ်ရေးကောင်စီမှ
CDMပြုလုပ်နေသော ဆရာ/ဆရာမ ၁၉ဦးအား
ငွေကျပ် ၇၀၀၀၀ကျပ်စီ ယနေ့ပေးအပ်ထောက်ပံ့ခဲ့ပြီးဖြစ်ပါသည်။

05/05/2021

📌ဂျီ.တီ.အိုင်(အင်းစိန်) ကြားကာလအုပ်ချုပ်ရေးကောင်စီ၏ ဖွဲ့စည်းပုံ၊ မူဝါဒနှင့် ရည်ရွယ်ချက်များ

ဂျီ.တီ.အိုင်(အင်းစိန်) ကြားကာလအုပ်ချုပ်ရေးကောင်စီကို ၂၀၂၁ခုနှစ်၊ ဧပြီလ ၂၄ရက်နေ့တွင် ဖွဲ့စည်းခဲ့ပြီး ပူးတွဲပေါ်ပြပါ မူဝါဒနှင့် ရည်ရွယ်ချက်များအတိုင်း CDMဆရာ/ဆရာမ ဝန်ထမ်းများ၏ လိုအပ်ချက်များကူညီဖြည့်ဆည်း‌ေထာက်ပံ့ပေးနိုင်ရေးအား အမြန်ဆုံးအကောင်ထည်ဖော်‌ေဆာင်ရွက်နိုင်ရန် ကြိုးပမ်းလျက်ရှိပါသည်။

GTI Insein Interim Administrative Council

21/12/2021

20/12/2021

15/11/2021

13/08/2021

30/07/2021

17/06/2021

11/05/2021

06/05/2021

05/05/2021

Address

Website

Alerts

Contact The Organization

Shortcuts

Share

Category