25/01/2024
#လမ်းခွဲဖို့ကိုကိုယ်ပဲရွေးပါတယ်
ငါတို့ လမ်းခွဲရအောင်ဆိုတဲ့ စကားကို သူကိုယ်တိုင်ပဲပြောပြီး သူကိုယ်တိုင်ပဲ ငိုနေတဲ့ ကောင်မလေးတစ်ယောက်ပေါ့ … တစ်ဖက်က ဆွဲထားလေဦးမလားဆိုပြီး ရူးမိုက်ပြီး တွေးနေမိသေးသလို ဒီတိုင်းဆက်သွားရင် ပိုချစ်သွားမယ့်သူက သူကိုယ်တိုင်ဖြစ်ပြီး ဒီထက်ပိုနာကျင်ခံစားရမှာကို ကြိုသိနေတဲ့အဖြစ်တွေကနေ ရုန်းထွက်ချင်နေမိတဲ့အတွေးတွေက တစ်ဖက်ပေါ့ … လမ်းခွဲဖို့ လွယ်သလားမေးရင် မချစ်တဲ့လူတစ်ယောက်အတွက်ကတော့ လွယ်မှာပါ … တကယ်ချစ်တဲ့သူအတွက်ကျတော့ လမ်းခွဲဖို့ ဘာကြောင့်ရွေးသလဲ မေးရင် မုန်းမိသွားမှာစိုးလို့ လို့ပဲ ပြန်ဖြေကြမယ်ထင်ပါတယ် ။
ကျွန်တော်လေ သူ့ကို သိပ်ချစ်တာ … ဒါပေမယ့် လူတစ်ယောက်ကို ဘယ်လောက်ပဲချစ်ချစ် ကိုယ့်ရဲ့ ချစ်ခြင်းမေတ္တာက အဲ့ဒီလူအတွက် မလိုအပ်ဘူးဆိုရင် ချစ်ပါတယ် ဒါပေမယ့် ဆိုတဲ့စကားကို သုံးရတာပါပဲ ။ ရပ်နေရင်းက ကိုယ်က ပိုနေမှန်းပိုသိသာလာတဲ့ရက်ပေါင်းများစွာမှာ တစ်ယောက်တည်း ဘယ်သူက ငိုနေနိုင်ပါ့မလဲ ။တန်ပြန်မေတ္တာကို မျှော်ပေမယ့် ပေါ်မလာတဲ့ လူတစ်ယောက်ကို နာနာကျင်ကျင်နဲ့ နှစ်ပေါင်း ဘယ်လောက်ကြာတဲ့အထိ စောင့်နေနိုင်မလဲ ။ လူတစ်ယောက်ကို လွယ်လွယ်လေး ချစ်တတ်ဖို့ မလွယ်ကူခဲ့သလို နောက်ဆုံး … လမ်းခွဲရအောင်ဆိုတဲ့ စကားတွေ ပြောဖို့ကလည်း တကယ်မလွယ်ပါဘူး ။
သူနဲ့ လမ်းခွဲဖို့ ငါရွေးလိုက်တော့မယ်ဆိုတဲ့ စကားကို ကျွန်တော့် သူငယ်ချင်းတွေကို ပြောပြတဲ့အချိန်မှာလေ … တားမယ်လို့ ထင်နေခဲ့တာ တကယ်တမ်းကျတော့ နောက်တောင်ကျနေသေးတယ်ဆိုပြီး ပြောကြတယ် ။ ဘာလို့လဲသိလား ကျွန်တော့်မျက်ရည်တွေကို မြင်နိုင်တာဆိုလို့ သူတို့ပဲ ရှိခဲ့တယ် ။ ကျွန်တော် အဆင်မပြေတိုင်း ရင်ဖွင့်မိလို့ မကြာခဏ ဒေါသထွက်ကြတာလဲ သူတို့ပဲ ။ မျက်ရည်တွေနဲ့ စကားတွေ သွားပြောလိုက် … သူတို့ ဆုံးမတဲ့အခါ ကိုယ့်မှာ မင်းကို မမေ့နိုင်လို့ မကြားချင်ယောင်ဆောင်လိုက်နဲ့ ဒီနှစ်ထဲ သံသရာတွေလည်နေခဲ့တာ ။
ကျွန်တော်လေ ... လမ်းခွဲဖို့ ဘယ်တုန်းကမှ မတွေးခဲ့မိဘူး.… ဒါပေမယ့် ဒီတစ်ခါတော့ လမ်းခွဲဖို့ကို ကျွန်တော်ပဲ ရွေးပါတယ် ။ ဘာကြောင့်လဲလို့ မေးရင် … ကျွန်တော် သိပ်ချစ်တဲ့ ခင်ဗျားကို ခါးခါးသီးသီး မမုန်းချင်တဲ့အတွက်ကြောင့်လို့ပဲ ဖြေရမယ် ။ ကျွန်တော်က လူသားတစ်ယောက်လေ … အသွေးအသားနဲ့ တည်ဆောက်ထားတဲ့ လူသားတစ်ယောက်ဖြစ်သလို နာကျင်ခံစားတတ်တဲ့ နှလုံးသားနဲ့ သက်ရှိတစ်ယောက်လေ ။ ခင်ဗျ ငယ်ငယ်တုန်းက လိုချင်ခဲ့ဖူးတဲ့ အရုပ်လေးတစ်ရုပ်လို မဟုတ်ဘူးလေ … ကစားလို့ ၀သွားတဲ့အခါ ကြုံတဲ့ နေရာ ကြုံသလိုပစ်ထားလို့ရတဲ့ အရုပ်လေးတစ်ရုပ်မဟုတ်ဘူးလေ .. အရုပ်လေးတစ်ရုပ်တောင် ဂျောင်ထိုးထားတာ ကြာသွားရင် ဖုန် သဲ တွေနဲ့ ဆွေးမြေ့ပျက်စီးသွားရတတ်သေးတာပဲ ။ ခင်ဗျားဥပေက္ခာ အကြာကြီးပစ်ထားတဲ့ ကျွန်တော် လဲ ဒီအချိန် တော်တော်လေး ထိခိုက်ကြေကွဲပြီးနေပါပြီ ။
ကျွန်တော်တို့ တွဲခဲ့ကြတဲ့ နှစ်တွေကို ပြန်ရေတွက်ကြည့်ပါဦး ခင်ဗျား ကျွန်တော့် မွေးနေ့ကို ဒီနေ့အထိ မှတ်မိဖို့ ခဲယှဉ်းနေတုန်းပဲ ။ ကျွန်တော် တို့ရဲ့ Anni date ကို ခဏခဏ ပြန်မေးနေရတုန်းပဲ ။ အသေးအမွှားလေးတွေပါတဲ့ … ကျွန်တော်က ခင်ဗျား ရဲ့ မှတ်ပုံတင်နံပါတ်ကအစ မှတ်ထားတတ်တဲ့အချိန်မှာ အဲ့ဒီအသေးအမွှားလေးတွေက ကျွန်တော့် ကို ထိခိုက်နာကျင်စေခဲ့တယ် ။ တစ်ခါတစ်လေမှာ နာမ်စားတွေ မှားတဲ့အထိ ခင်ဗျားကအတွေးတွေများပါတယ် အကြိမ်ကြိမ်အခါခါ မစွန့်လွှတ်နိုင်လို့ ခွင့်လွှတ်ခဲ့ခြင်းတွေက ကိုယ့်ရဲ့ ရူးမိုက်ချင်တွေပဲ ။ အမှားတစ်ခုကို ခွင့်လွှတ်လိုက်တဲ့အကြိမ်တိုင်းမှာ ကျွန်တော် ဘယ်လောက်နာကျင်ရသလဲဆိုတာကို ဒီနေ့ထိ ခင်ဗျား မစာနာတတ်သေးဘူး ။ မင်း ကြည်ဖြူလို့ ခွင့်လွှတ်ခဲ့တာပဲ မဟုတ်လားဆိုတဲ့ စကားနဲ့ ကျွန်တော့် ရဲ့နာကျင်မှုကို ပျက်ရယ်ပြုဖို့ပဲ ကြိုးစားတယ် ။
အစော်ကားခံလိုက်ရခြင်းတွေကို ခွင့်လွှတ်လိုက်တဲ့ လူတစ်ယောက်ရဲ့ ရင်ထဲမှာလေ … အဲ့ဒီနေ့ရက်တွေကို ပြန်တွေးတိုင်း အဲ့ဒီနေ့တွေတုန်းကအတိုင်း အမြဲတမ်းနာကျင်ခံစားနေရတုန်းပဲ ဆိုတာ ခင်ဗျား မသိတတ်ခဲ့ဘူး ။ အမှားတွေကို ခွင့်လွှတ်ဖို့ လွယ်ကောင်း လွယ်နိုင်ပေမယ့် အဲ့ဒီအမှားတွေကို အလုံးစုံမေ့သွားနိုင်ဖို့ကျ သိပ့်ခတ်ခဲပါတယ် ခင်ဗျားခွင့်မလွတ်ဖူးသေးလို့ပါ ။ ပြီးတော့ မနာကျင်ဖူးသေးလို့ပါ ။ ကိုယ် သိပ်ချစ်တဲ့သူ တစ်ယောက်ကို ဆွဲထားရင်းက ပင်ပန်းလာတဲ့နေ့ရက်တွေမှာလေ ဘယ်သူ့ကို ရင်ဖွင့်လို့ ရင်ဖွင့်ရမယ်မသိအောင် လမ်းတွေ ပျောက်ခဲ့ရတဲ့ နေ့ရက်တွေမှာ ခင်ဗျား ပျော်နေတာလေးကို ငေးပြီး ကျွန်တော့် မှာ မျက်ရည်ပိုကျရတယ် ။ နေနိုင်လိုက်တာကွာ … နေတတ်လိုက်တာဆိုတဲ့ စကားကို ရေရွှတ်ပြီး အသည်းတွေ တစ်ဆစ်ဆစ်နာခဲ့ရတာ ။
လမ်းခွဲရအောင်ဆိုတဲ့ စကားဟာ … မချစ်တတ်တဲ့သူတစ်ယောက်အတွက်တော့ လွယ်ပါတယ် … ဒါပေမယ့် သိပ်ချစ်တတ်တဲ့ လူတစ်ယောက်အတွက်ကျတော့လေ … လမ်းခွဲရအောင်ဆိုတဲ့ စကားကိုသုံးဖို့ နှစ်တွေ လတွေ အတော်ကြာ အချိန်ပေးရတယ် … ကိုယ်ရခဲ့တဲ့ ဒဏ်ရာတွေကို ပြန်ငေးရတယ် … စိတ်နာစရာတွေ တွေ့လာတိုင်း မင်းကို မုန်းရမယ့် အချိန်တွေ မရောက်ချင်ဘူးဆိုတဲ့ သတိပေးစကားတွေဆိုရတယ် .. ကျေးဇူးပြုပြီး နေနိုင်သွားတဲ့အထိ ပစ်မထားပါနဲ့လားဆိုပြီး မျက်ရည်တွေနဲ့ တောင်းပန်ခဲ့ရသေးတာ ။ ဒါတွေကို ခင်ဗျားမှ ဂရုမစိုက်ခဲ့ပဲလေ
ဘယ်တော့မှ မင်းကို ပစ်သွားမှာ မဟုတ်ဘူးဆိုတဲ့ ယုံကြည်ချက် အပြည့်အ၀နဲ့ မင်းက ရပ်နေတဲ့ ကိုယ့်ကို နည်းနည်းလေးတောင် ဂရုစိုက်ပေးဖို့ သတိမရခဲ့ဘူး … ဒီရက်တွေ မရောက်ချင်ခဲ့ဘူးသိလား … ကျွန်တော် တစ်နေ့ကျရင်ဆိုတဲ့ မျှော်လင့်ချက်လေးကို ဆုတ်ကိုင်ထားပြီး ထပ်ပြီးရပ်နေဖို့ သတ္တိတွေ မွေးခဲ့ပါသေးတယ် ဒါပေမယ့် ဒီထက်ပိုနာကျင်ရရင် ကျွန်တော့် စိတ်တွေဟာ ဒီထက် နာသွားဖို့ပဲရှိတော့တာ ။ ကျွန်တော် သိပ်ချစ်တဲ့ ခင်ဗျား ကို မုန်းမိသွားမှာပဲ ကြောက်တာပါ ။ ဒီအတိုင်း ချစ်မြဲအတိုင်း ဆက်ချစ်နေချင်ပါတယ် ။ နာကျင်စရာကောင်းတဲ့ အတိတ်ကို ဖယ်ပြီး ကိုယ်တို့ချစ်ခဲ့ဖူးပါလားဆိုတဲ့ အမှတ်တရလေးကိုပဲ မှတ်မိနေချင်ပါတယ် ။
ကျွန်တော် ဆက်ချစ်နေသရွေ့ လမ်းခွဲရအောင်ဆိုတဲ့စကားကို ဘယ်တော့မှ သုံးမှာမဟုတ်တဲ့ ခင်ဗျား ကို ကျွန်တော် ကပဲ လမ်းခွဲဖို့ကို ရွေးပါမယ် ။
နှစ်တွေကြာလာရင် … သူငါ့ကို တကယ်ချစ်လာမှာပါဆိုတဲ့ မျှော်လင့်ချက်လေးက ဝေဝါးပျောက်ကွယ်သွားပြီမို့ ။
တစ်နေ့ကျရင် ငါတို့နီးရမှာဆိုတဲ့ အိပ်မက်လေးက တစ်နေ့ထက်တစ်နေ့ ပိုအေးစက်လာတဲ့ ဆက်ဆံရေးမှ ကျကွဲသွားပြီမို့ ။
သူ ချစ်တတ်လာတဲ့တစ်နေ့ထိ ကိုယ် ရပ်နေချင်တယ်ဆိုတဲ့ စိတ်ကူးလေးက အင်အားမဲ့သွားပြီမို့
ကိုယ်ပဲ လမ်းခွဲဖို့ကို ရွေးပါတယ် ။
