07/10/2026
ဆေးတက္ကသိုလ်များနှင့်ဆေးပညာနှီးနွှယ်တက္ကသိုလ်များတွင် Digital နှင့် e-Government လုပ်ငန်းစဉ်များ အကောင်အထည်ဖော်နိုင်ရေး ညှိနှိုင်းအစည်းအဝေးကျင်းပ
နေပြည်တော်၊ အောက်တိုဘာ ၆
တက္ကသိုလ်များအနေဖြင့် အတိုင်းအတာတစ်ခုအထိ Digital Information System ကို ဆောင်ရွက်ထားပြီးဖြစ်၍ သိပ္ပံနှင့်နည်းပညာဝန်ကြီးဌာနနှင့်ပူးပေါင်း၍ နည်းပညာအကူအညီများရယူပြီး ဆက်လက်အကောင်အထည်ဖော်ဆောင်ရွက်သွားရမည်ဖြစ်ကြောင်း၊ ကျန်းမာရေးဝန်ကြီးဌာန၊ ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းသည် (၆-၁၀-၂၀၂၆)ရက်နေ့တွင် ကျန်းမာရေးဝန်ကြီးဌာန၊ အစည်းအဝေးခန်းမ၌ ကျင်းပသည့် ဆေးတက္ကသိုလ်များနှင့်ဆေးပညာနှီးနွှယ်တက္ကသိုလ်များတွင် Digital နှင့် e-Government လုပ်ငန်းစဉ်များ အကောင်အထည်ဖော်နိုင်ရေးညှိနှိုင်းအစည်းအဝေး၌ ပြောကြားခဲ့သည်။
ထို့ပြင် Digital Student Information Management System ကို တက္ကသိုလ်အားလုံး အသုံးပြုနိုင်သည့် Common Digital Platform ဖြစ်စေရေး ဆောင်ရွက်ရန်လိုပါကြောင်း၊ Data Security နှင့်ပတ်သက်၍ အဆင့်မြှင့်တင်ဆောင်ရွက်မည်ဖြစ်ကြောင်း၊ ပြည်သူ့ဆေးရုံများတွင် ဒီဂျစ်တယ် ဖွံ့ဖြိုးတိုးတက်ရေးဦးစီးဌာနနှင့်ပူးပေါင်း၍ Hospital Information System ကို ဆောင်ရွက်နေပြီဖြစ်ကြောင်း၊ ဆေးရုံကြီးများတွင် Telemedicine System ကိုလည်းကောင်း၊ FDA အနေဖြင့် e-submission, Digital Payment System များကိုလည်းကောင်း ဆောင်ရွက်လျက်ရှိကြောင်း၊ တက္ကသိုလ်စာကြည့်တိုက် များအားလုံးကို e-Library အဆင့်မြှင့်တင်နိုင်ရေး ဆက်လက်ဆောင်ရွက်ကြရမည်ဖြစ်ကြောင်း၊ မိမိတို့ တက္ကသိုလ်အလိုက် လက်ရှိဆောင်ရွက်နေမှုများ၊ ကြုံတွေ့ခဲ့ရသည့်အခက်အခဲများကို အချင်းချင်းအတွေ့အကြုံများဖလှယ်ပြီး ဝန်ကြီးဌာနအနေဖြင့် ဖြည့်ဆည်းပေးရမည့် အချက်များကိုပါ တင်ပြဆွေးနွေးစေလိုကြောင်းနှင့် လိုအပ်သည်များ ပံ့ပိုးသွားမည်ဖြစ်ကြောင်းလည်း ပြည်ထောင်စုဝန်ကြီးက ထည့်သွင်းပြောကြားခဲ့သည်။
အစည်းအဝေးတွင် ကျန်းမာရေးဝန်ကြီးဌာန ၊ ဒုတိယဝန်ကြီးသည် Digital Information System အကောင်အထည်ဖော်ရန် ချိတ်ဆက်ဆောင်ရွက်သင့်သည့်အစီအစဉ်များ၊ တက္ကသိုလ်တစ်ခုစီတွင် ကိုယ်စားလှယ်ထားရှိနိုင်ရေးနှင့် Data Security ပိုင်းအတွက် ဆိုက်ဘာလုံခြုံရေးဦးစီးဌာနမှ အသိအမှတ်ပြုထားသော ကုမ္ပဏီများဖြင့်သာ ချိတ်ဆက်ဆောင်ရွက်ရေးကိစ္စများကို ဆွေးနွေးတင်ပြပြီး တက်ရောက်လာကြသူများသည် မိမိတို့တက္ကသိုလ်အလိုက် အကောင်အထည်ဖော်ဆောင်ရွက်လျက်ရှိသည့် e-library System, Webpage, Learning Management System, Student Information System များနှင့်ပတ်သက်၍ တင်ပြဆွေးနွေးကြရာ ပြည်ထောင်စုဝန်ကြီးက လိုအပ်သည်များကို ပြင်ဆင်ဆောင်ရွက်နိုင်ရေးဆွေးနွေး ပြောကြားကာ အစည်းအဝေးကို ရုပ်သိမ်းလိုက်သည်။
မွန်းလွဲပိုင်းတွင် ကျန်းမာရေးလူ့စွမ်းအားအရင်းအမြစ်ဦးစီးဌာန၊ ဆေးတက္ကသိုလ်များနှင့် ဆေးပညာနှီးနွှယ် တက္ကသိုလ်များမှ တာဝန်ရှိသူများနှင့် ကိုယ်စားလှယ်များသည် Naypyitaw State Polytechnic University(NSPU) အကောင်အထည်ဖော်ဆောင်ရွက်လျက်ရှိသည့် Campus Monitoring System, Moodle Learning Management System တို့ကို သွားရောက်လေ့လာကြသည်။
အဆိုပါ အစည်းအဝေးတွင် ကျန်းမာရေးဝန်ကြီးဌာန၊ ပြည်ထောင်စုဝန်ကြီးနှင့်အတူ ဒုတိယဝန်ကြီး၊ အမြဲတမ်းအတွင်းဝန်၊ ကျန်းမာရေးလူ့စွမ်းအားအရင်းအမြစ်ဦးစီးဌာနမှ တာဝန်ရှိသူများ၊ ဆေးတက္ကသိုလ်များနှင့် ဆေးပညာနှီးနွှယ်တက္ကသိုလ်များမှ ပညာရပ်ဆိုင်ရာ တာဝန်ရှိသူများ တက်ရောက်ကြပါသည်။
